Shuj viajeca Nueva Zelanda llactamanda shuj paniguca Caishumanda chaishumanda preocuparishpa ayudaripashunchi, nishca videotami ricurca. Chai videopica cai paniguca Jehová Dios gentecunata llaquitallaca na llaquin cashcata, ashtahuangarin llaquishcataca ruraicunahuan ricuchin cashcatami yachajurca (Is. 63:​7-9). Chaimandami cai paniguca paipash, shujcunata ayudangapaj uchalla imagutapash rurana cashcata yachajurca. Chai punllaca paniguca comprasta rurangapaj llujshishpami callepi causaj shuj huarmiguta ricurca. Chaimandami chai huarmiguman micunaguta caranata decidirca. Micunaguta carajushpaca ¿Llaquicunaca imahorapash tucuringacha? nishca tratadohuanmi paimanga predicarca.

Panigu predicajpica huacashpami cai huarmiguca, “Jehová Diostaca huahuamandapachami rijsishpa viñashcani. Pero ashtaca huatacunatami congregacionmanda caruyashcani” nircami. Cai huarmiguca Jehovapa organizacionman tigrangapaj ayudahuai nishpami mañajushca carca. Paniguca shuj Bibliaguta carashpami cai huarmiguhuan Bibliata yachajungapaj quidarca. a

Ñucanchicunapashmi shuj gentecunaman, familiacunaman y congregacionmanda huauquipanicunaman juyashcata, llaquishcata ricuchi ushapanchi. Predicashpapashmi shujcunata llaquishcata, juyashcata ricuchina oportunidadta charipanchi.