1. Abrahanba ejemplota catishpaca ñucanchicunapash ¿imatata rurai ushapanchi?

 ASHTACA gentecunami Diosta sirvij Abrahanmandaca uyashca. Shinapash paipa causaimandaca na ashta yachanllu. Shinapash ñucanchicunaca paimandaca ashtacatami yachapanchi. Por ejemplo, Bibliapica Taita Diospi tucui shunguhuan crishcamandami Abrahandaca ‘Taita Diospi crishcacunapaca taitashna can’ nin (Rom. 4:11). Shinaca ñucanchicunapash Abrahanba ejemplota catishpa ¿Taita Diospi tucui shunguhuan crita ushapanchichu? Ñucanchicunapash Abrahanba ejemplota catishpaca paishnallatami Taita Diospica tucui shunguhuan crita ushapanchi.

2. Abrahanba ejemplota yachajunaca ¿imamandata importante can? (Santiago 2:​22, 23).

² Abrahanba ejemplota catinami ñucanchicuna Taita Diospi tucui shunguhuan crichun ayudanga. Abrahán runaguca Taita Diostaca siempremi cazurca. Paita cazuimandami na rijsishca pushtucunaman causangapaj rirca. Shinallata carpacunata rurashpami ashtaca huatacunata causarca. Paipa churigutapashmi huañuchingapaj dispuesto carca. Caicunata rurashpami paica Taita Diospi tucui shunguhuan crishcata ricuchirca. Feta charishcata paipa ruraicunahuan ricuchishcamandami Taita Diospa ñaupapica ali ricurishpa paipa ali amigopash tucurca (Santiago 2:​22, 23​ta liipangui). Jehová Diosca tucuicunallata paipa ñaupapi ali ricurishpa paipa ali amigocuna cachunmi munan. Chaimandami apóstol Pablota y Santiagotapash Abrahanba ejemplomanda Bibliapi escribichun saquirca. Cati parrafocunapica Romanos capítulo 4​pi y Santiago capítulo 2​pi Taita Diosta sirvijcunamanda ima importante yuyaicunata escribishcatami yachajugripanchi.

3. Apóstol Pablo y Santiagoca ¿ima textomanda japishca shimicunatata parlarca?

 ³ Pablo y Santiagoca Génesis 15:6​manda shimicunata japishpami “Abranga Jehová Dios imata nishcata crirca. Chaimi Taita Diosca Abrandaca sin culpa justo runagu cajta ricurca” nircami. Jehová Dios shuj personata sin culpa justo nishpaca paihuan contento cashcata, imapash juchamanda limpio cashcata ricujtami shina nin. Shinaca gentecuna juchayucuna cajpipashmi Jehová Diosca sin culpa, justocuna cashcata ricujun. Seguromi quiquinbash Jehová Diospa ñaupapica justo, sin culpa ricuringapaj munapangui. Y chaipaca ¿imatata rurai ushapangui? Chaipaca Abrahán runaguta Jehová Dios imamanda justotashna ricushcata Taita Diospa ñaupapi justo ricuringapaca imata ñucanchicuna rurana cashcatami ricugripanchi.

4. ¿Imamandata gentecunaca sin culpa, justo ricuritaca na ushapanchi?

⁴ Apóstol Pablo Romanos cartata escribishpaca tucui gentecunallatami juchayucuna o pecadorcuna canchi nircami (Rom. 3:23). Shinaca ¿imashinata Jehová Diosca ñucanchitaca sin culpa, justota ricushpa contento caita ushan? Caita intindichunga apóstol Pabloca Abrahanba ejemplomandami parlarca. Paipa ejemplomi tucui cristianocunatallata cai yuyaita ali intindichun ayudaita ushan.

5. Jehová Diosca ¿imamandata Abrahandaca sin culpa, justo runagumi can nirca? (Romanos 4:​2-4).

⁵ Jehová Diosca Abrahandaca Canaán llactapi causajujpimi paica sin culpa, justo runagumi can nirca. Shinapash chaitaca ¿imamandata shina nirca? Moisesman Cushca Leyta tucui tucuita ¿ali pactachishcamandachu shina nirca? Na, na chaimanda carcachu (Rom. 4:13). Y chaitaca ¿imamandata yachapanchi? Porque Jehová Diosca Abrahán causashcamanda 400 huatacuna jipami israelitacunamanga leycunata curca. Shinaca, Jehová Diosca ¿imamandata Abrahandaca sin culpa, justo runagumi can? nirca. Abrahanga Jehová Diospi tucui shunguhuan crishcamandami Diospa ñaupapica justo runagu ricurirca (Romanos 4:​2-4​ta liipangui).

6. Shuj persona juchayu cashpapash ¿imamandata Jehovapa ñaupapica sin culpa, justo ricurita ushan?

⁶ Apóstol Pabloca pipash Taita Diospi tucui shunguhuan crishpaca, paipa ñaupapi sin culpa, justo tucui ushashcatami villarca (Rom. 4:5). Shinallata apóstol Pabloca David nishca shimicunatapashmi nirca: Davidca “nalicunata rurashca cashpapash perdonai tucushcacunaca cushilla cachun. Shinallata, paicunapa pecadocunamanda perdonai tucushcacunapash cushilla cachun. Jehová Diospa ñaupapi jucha illanshna ricurij gentecunapash cushilla cachun” nircami (Rom. 4:​6-8; Sal. 32:​1, 2). Jehová Diosca maijan personapash paipi tucui shunguhuan crijpica imapash pandarishcacunata o juchacunataca cungaitapachami cungan. Shinaca shuj persona Jehová Diospi cri callarishcamandami sin culpa, justo ricurita ushan.

7. Punda Diosta sirvijcunaca juchayucuna cashpapash ¿imamandata sin culpa, justocuna ricurirca?

⁷ Abrahán, David y shuj Diosta ali sirvijcunapash Taita Diospa ñaupapi sin culpa justocuna ricurishpapash Adán y Evapa culpamandaca juchayucunarami cashpa catirca. Shinapash paicuna tucui shungu Jehová Diospi crishcamandami shuj gentecunahuan ricujpica paicunaca Diospa ñaupapi sin culpa, justo runagucuna ricurirca (Efes. 2:12). Romanos cartata escribishpaca apóstol Pabloca Jehová Dioshuan ali amigo tucungapaca paipi tucui shunguhuan crina minishtirishcapacha cashcatami ricuchirca. Abrahán y Davidpash chaita rurashcamandami justocuna ricurirca. Shinaca ñucanchicunapash sin culpa, justo ricuringapaca feta charinaca minishtirishcapachami can.

8, 9. ¿Imamandata huaquingunaca feta charinamanda, feta charishcata ruraicunahuan ricuchinamandaca panda yuyaicunata charishca?

⁸ Ashtaca huatacunatami Iglesiata ñaupaman pushajcuna o lidercunaca feta charishcata ruraicunahuan ricuchinamandaca na de acuerdo cashca.  Huaquingunaca Jesuspi feta charinallami minishtirin nishcami. Chaimandami talvez quiquinga: “Jesús ñucanchi salvador cashcata crishpallami salvarita ushangui” nijta uyapashcangui. Y cai shimicunata ningapaca cai lidercunaca talvezpashmi Romanos 4:6​manda yuyaicunata japishcanga. Chai textopica apóstol Pabloca, ‘Taita Diosca na gentecunapa rurashcacunamandallachu paicunataca justo sin culpa cashcataca ricun’ nircami. Cutin shujcunaca salvaringapaca pipash na chayashca pushtucunata visitana. Iglesia imapash ali cosascunata rurachun mandashcacunata cumplinami ayudanga ninmi. Shinallata cai shimicunata ningapaca talvezpashmi Santiago 2:24​manda shimicunata utilizanga. Cai textopica: “Gentecunaca na solo Taita Diospi tucui shunguhuan confiaimandallaca sin culpa justo ricuritaca ushanllu. Sino paicunapa rurashcacunamandami sin culpa justo ricurita ushan” nijunmi.

⁹ Feta charishcata ruraicunahuan ricuchinamanda ashtacacuna shuj shuj yuyaicunata charishcamandami huaquin Bibliata estudiajcunaca apóstol Pablo y Santiagopash paicunapura na de acuerdo cashcata pensashca. Paicunaca apóstol Pabloca feta charina minishtirishcatami villashca. Cutin Santiagoca ali ruraicunata rurana minishtirishcatami villashca nishcami. Chaimandami shuj teólogo jarica: “Apóstol Pablo sin culpa, justo ricuringapaca feta charinami minishtirin nijpica imamanda shina nijujtaca Santiagoca na intindishca cashcachu” ninmi. Shinapash tanto apóstol Pablo y Santiagopash Jehová Diospa ayudahuanmi Bibliapi imapash tiashca shimicunataca escribirca (2 Tim. 3:16). Cashna shuj shuj yuyaicuna tiajpipash apóstol Pablo y Santiago escribishca shimicunata intindinaca na dificilchu can. Y caita intindingapaca paicuna escribishca shimicunamanda jahua lado, ura lado textocunata ricupashunchi.

10. Apóstol Pabloca ¿ima ruraicunamandata parlajurca? (Romanos 3:​21, 28). (Dibujocunata ricupangui).

¹⁰ Romanos 3 y 4​pi apóstol Pabloca ¿ima ruraicunamandata parlajurca? Chai textocunapica Jehová Dios Moisesman Cushca Leyta cazunamandami parlajurca (Romanos 3:​21, 28​ta liipangui). Huaquin judío cristianocunaca Moisesman Cushca  Leyta pactachishpa catina cashcatami crirca. Chaimandami apóstol Pabloca Diospa ñaupapi sin culpa, justo ricuringapaca Moisesman cushca Leycunataca na pactachina minishtirinllu nirca. Chaita intindichunmi Abrahanba ejemplomanda parlarca. Apóstol Pabloca Abrahanba tiempopica “Moisesman cushca Leycunaca” na tiashcata, Abrahanga Diospa ñaupapica feta charishcamandalla sin culpa, justo ricurishcatami intindichirca. Y apóstol Pablo nishca shimicunaca ñucanchitapashmi ninanda animan. Porque Jehovapi y Jesuspi feta charishpaca ñucanchicunapashmi paipa ñaupapica sin culpa, justo gentecunami ricurita ushapanchi.

11. Santiagoca ¿ima “leyta pactachinamandata” parlajurca?

¹¹ Cutin Santiagoca, Santiago capítulo 2​pica apóstol Pablo parlashca Moisesman Cushca Leymandaca na parlajurcachu. Santiagoca Jesusta catishpa cristiano tucushcacuna paicunapa causaipi imapash ali ruraicunata rurana cashcamandami parlajurca. Y cai ruraicunami ciertopacha Diospi feta charishcata o na charishcata ricuchin. Santiago parlashca ishcai ejemplocunamanda yachajupashunchi.

12. Santiagoca feta charishpapash ruraicunahuan ricuchina minishtirishca cashcataca ¿imashinata intindichirca? (Dibujocunata ricupangui).

¹² Callaripica Santiagoca, Jesusta catishca cristianocunaca tucui gentecunatami igual tratana can nircami. Santiagoca shuj rico genteta ali tratashpa cutin shuj pobre genteta nali tratashpaca Taita Diospi crini nishpapash paipa ruraicunahuanmi na crishcata ricuchijun nircami (Sant. 2:​1-5, 9). Cutin catipica Santiagoca pipash paipa huauquita o panita ropagu minishtirijujta ricushpa, micunaguta minishtijujta ricushpapash ayudangapaj imatapash na rurashpaca: “Taita Diospi feta charini nishpapash na imatapash rurashpaca chai feca nimapapash na sirvinmanllu”nircami (Sant. 2:​14-17).

13. Santiagoca feta charishpapash ruraicunahuan ricuchina minishtirishca cashcata intindichingapaca ¿ima ejemplocunamandata parlarca? (Santiago 2:​25, 26).

¹³ Feta charishcata ruraicunahuan ricuchina minishtirishca cashcata ricuchingapaca Rahab huarmigupa ejemplomandami Santiagoca parlarca  (Santiago 2:​25, 26​ta liipangui). Cai huarmiguca Jehová Diosmanda parlajtami uyashca carca. Shinallata Jehová Dios israelitacunata ninanda ayudajujtami uyashca carca (Jos. 2:​9-11). Y cai huarmiguca Jehová Diospi feta charimandami ishcai israelita jaricuna paipa llactapi cajpi ama huañuchichun pacarca. Y chashna rurashcamandami Abrahán runagushnallata cai huarmiguca na israelita cashpapash sin culpa, justo ricurirca. Cai huarmigupa ejemploca ñucanchicuna feta charishcata o crishcataca ruraicunahuan ricuchina minishtirishcapacha cashcatami yachachishca.

14. Apóstol Pablo y Santiagopash feta charinamanda, feta charishcata ruraicunahuan ricuchinamanda parlashpapash ¿imapita diferente carca?

¹⁴ Shinaca apóstol Pablo y Santiago feta charinamanda, feta charishcata ruraicunahuan ricuchinamanda ishcandillata parlanajushpapash cada unomi shuj shuj yuyaita ali intindichingapaj parlarca. Apóstol Pabloca Jesusta catishpa cristiano tucushcacunaca Diospa ñaupapi sin culpa, justo ricuringapaca Moisesman cushca Leycunata pactachina, cazunaca ñana minishtirinllu nijurcami. Cutin Santiagoca tucui Jesusta catishpa cristiano tucushcacunaca feta charina minishtirishca cajpipash feta charishcataca ruraicunahuan ricuchina minishtirishca cashcatami intindichirca.

15. Jehovapi tucui shunguhuan crishcataca ¿imacunata rurashpata ricuchita ushapanchi? (Fotocunata ricupangui).

¹⁵ Jehová Diosca paipa ñaupapi sin culpa, justo ricuringapaca Abrahanba ejemplotami catina canguichi ninmi. Shinapash chaita nishpaca Abrahanba tucui ima rurashcata catina cashcataca na nijunllu. Ashtahuangarin ñucanchicunaca feta charishcataca shuj shuj cosascunata rurashpami ricuchita ushapanchi. Ñucanchicunaca congregacionman mushuj shamushca huauquipanicunatami cushijushpa chasquita ushapanchi. Shinallata shuj huauqui o shuj pani o ñucanchipa familiarcuna imagupipash minishtijujpimi ayudaita ushapanchi. Chaita rurajpica Jehová Diosca ninandami cushijun (Rom. 15:7; 1 Tim. 5:​4, 8; 1 Juan 3:18). Ashtahuanbachaca tucui shunguhuan predicashpami Taita Diospi feta  charishcataca ricuchipanchi (1 Tim. 4:16). Shinaca tucuicunallatami ñucanchipa ruraicunahuan Jehová Diospa promesacunapi feta charishcata, Jehová Dios tucuita ali ruraj Dios cashcata tucui shunguhuan crishcataca ricuchita ushapanchi. Shina rurashpaca Jehová Diospa ñaupapica sin culpa, justocuna tucushpami paipa ali amigocunapash tucupashun.

16. Abrahán runaguca ¿imatata shuyarca? Shinallata ¿imapita feta charirca?

¹⁶ Romanos capítulo 4​pimi, Abrahán runagumandaca shuj alipacha yuyaitapash yachajuita ushapanchi. Chaipica, Jehová Dios carasha nishca promesacunapi pensarina, minishtirishcapacha cashcatami ricuchin. Jehová Diosca Abrahanmanga: “Canga ciertopachami ashtaca llactacunapa taita tucungui” nishpami prometirca. Y caica Abrahanbaca shuj alipacha bendicionmi carca (Gén. 12:3; 15:5; 17:4; Rom. 4:17). Jehová Dios cai promesata Abrahanman rurashca cajpipash Abrahanga ñami 100 huatacunata y paipa huarmi Sarapash ñami 90 huatacunata charirca. Y chai huatacunata charishpapash shuj huahuagutaca nara charircachu. Cashna situacionbi cashpaca talvezpashmi Jehová Diospa promesacunaca na pactaringachu yashpa pensaita ushanman carca. Shinapash Abrahanga Jehová Diospa nishcacunapi confiaimandami “Ashtaca llactacunapa taita canataca seguro carca” (Rom. 4:​18, 19). Tiempohuanga, Jehová Diospa nishcacunaca pactarircami. Abrahanga Isaacpa taitami tucurca (Rom. 4:​20-22).

17. ¿Imashinata Jehovapa ñaupapi sin culpa, justocuna tucushpa paipa amigocuna caita ushapanchi?

¹⁷ Ñucanchicunapash Abrahanshnallatami Jehová Diospa ñaupami sin culpa, justocuna tucushpa paipa ali amigocuna caita ushapanchi. Apóstol Pabloca Abrahanmanda parlashpami: “Sin culpa justotami paitaca ricurca” nircami. Shinapash cai shimicunaca na Abrahanballaca carcachu. ‘Sino ñucanchicunamandapashmi parlajun’. “Porque ñucanchipa Señor Jesusta huañushcacunapuramanda causachishca Taita Diospimi crinchi” nircami (Rom. 4:​23, 24). Shinaca Abrahanshnallatami ñucanchicunapash Diospa ñaupapi sin culpa, justocuna ricuringapaca feta charina, ali ruraicunata pactachina, Diospa promesacunata shuyanatami minishtipanchi. Cati temapica Diospa promesacunata shuyanamanda apóstol Pablo ima nishcatami Romanos capítulo 5​manda ashtahuan yachajupashun.