1. Abrahán runaguca ¿imamandata shuj churiguta charinataca seguro caita usharca?

 JEHOVÁ DIOSCA Abrahandaca paipa miraimandami ashtaca gentecuna bendiciai tucunga nishpami prometishca carca (Gén. 15:5; 22:18). Abrahanga Jehová Diospi tucui shunguhuan crimandami paipa promesacuna pactarinataca seguro carca. Shinapash Abrahanga ñami 100 huatacunata y paipa huarmiguca 90 huatacunata charirca. Shuj huahuagutallapash na charircachu (Gén. 21:​1-7). Shinapash Bibliapica: ‘Abrahanga ashtaca llactacunapa taita canataca seguro carca. “Ashtaca huahuacunatami charigringui” nishcataca tucui shunguhuanmi paica crirca’ ninmi (Rom. 4:18). Imashinami ña yachapanchi Abrahanman Jehová prometishca esperanzaca pactarircami. Abrahán runaguca Isaactami charirca. Cai huahuagutami Jehová Diosca carasha nishpa prometishcarca. Chaitami Abrahanga shuyajushcarca. Jehová Diospa promesa pactarinataca ¿imamandata Abrahanga tucui shunguhuan confiarca?

2. Abrahanga Jehovapa promesacuna pactarinataca ¿imamandata seguropacha carca?

² Abrahán runaguca Jehová Diosta ali rijsimandami paipa promesacuna pactarinataca ‘seguropacha carca’ (Rom. 4:21). Shinaca Abrahanga Diospi tucui shunguhuan crishcamandami paipa ñaupapica sin culpa, justo ricurirca (Sant. 2:23). Shinaca imashinami Romanos 4:18 ricuchin Abrahanga Jehovapa promesacuna pactarinata tucui shunguhuan confiaimandami shuyajurca. Cunanga Jehovapa promesacunamanda apóstol Pablo Romanos capítulo 5​pi ima nishcata ricupashunchi.

3. Apóstol Pabloca Jehovapa promesamandaca ¿imatata yachachirca?

³ Apóstol Pabloca: “Chaicunata shuyanajuimandami seguro caita ushapanchi” nircami (Rom. 5:5). Shinallata apóstol Pabloca Jehovapa promesacunapi tucui shunguhuan crichun ñucanchita ima ayudajtami intindichirca. Romanos 5:​1-5​ta yachajushpaca  quiquin imashina Jehová Diospa promesacunapi tucui shunguhuan crishpa catishcata pensaripangui. Cai textopi yachajushcacunami Jehovapa promesacunapi ashtahuan confiashpa catichun ayudanga. Apóstol Pabloca Jehová Diospa shuj promesa ciertopacha pactarina cashcamandami parlarca.

4. Romanos 5:​1, 2​pica ¿ima promesamandata parlan?

⁴ (Romanos 5:​1, 2​ta liipangui). Apóstol Pabloca cai shimicunataca Roma llactamanda congregacionbi huauquicunamanmi escribirca. Paicunaca Jehová Diosmanda, Jesusmanda yachajushpa tucui shunguhuan crishpami cristianocuna tucushca carca. Shinaca paicuna crishcamandami Taita Diospa ñaupapica ‘sin culpa, justocuna ricurirca’. Y Jehová Diosca paipa espíritu santohuanmi paipalla cachun agllarca. Chai punllamandapachami Jehovapa promesata chasquinata shuyanajurca.

5. Ungidocunaca ¿ima esperanzatata charin?

⁵ Jipamanga apóstol Pabloca espíritu santohuan agllai tucushca huauquipanicunamanga Taita Dios ‘paipa separashcacunaman ima bendiciongunata herenciatashna caranata yachachunmi’ intindichirca (Efes. 1:18). Colosenses huauquipanicunamanga apóstol Pabloca Jehová Dios ima bendiciongunata carana cashcatami villarca. Paicunamanga cangunapa bendicionga ‘jahua cielopimi’ can nircami (Col. 1:​4, 5). Shinaca espíritu santohuan separashca ungido huauquipanicunaca huañushpapash, causarishpa jahua cielopi para siempre causana esperanzatami charin. Chaipica Jesushuanmi para siempre cai alpata mandanga (1 Tes. 4:​13-17; Apoc. 20:6).

6. Jahua cielopi causana esperanzata charishcamandaca shuj ungido huauquiguca ¿imatata nirca?

⁶ Ungido huauquipanicunaca jahua cielopi chasquina esperanzataca tucui shunguhuanmi valichin. Por ejemplo, huata 1991​pica huauqui Frederick Franzca cai esperanzamanda parlashpaca: “Ñucanchi shuyanajushca promesa pactarinataca seguromi capanchi. 144 mil ungido huauquipanicunamandaca tucuicunallatami Jehová Dios carasha nishca bendiciongunataca  chasquinga. Y chai bendiciongunaca tucuita yali ashtahuan alimi can” nircami. Ashtaca huatacunata Jehová Diosta na saquishpa sirvishcamanda imashina sintirishcatapashmi intindichirca. “Jahua cielopi causagringapaj chasquigrina bendiciondaca siempremi ashtahuan ashtahuan valichishpa ricupashcanchi. Ashtaca huatacunata shuyana cashpapash [...] chai bendición shuj cosascunahuan ricujpi ashtahuan valishca cashcamandami shuyashpa catipashcanchi. Cunanbica jahua cielopi causana bendiciondaca ashtahuanmi valichipashcani” nircami.

7, 8. Diosta ashtaca sirvijcunaca ¿ima esperanzatata charin? (Romanos 8:​20, 21).

⁷ Cunan punllapi Jehová Diosta sirvij ashtaca ashtaca huauquipanicunaca Abrahanshnallatami cai alpapi Jesús mandajujpi para siempre causana esperanzata charin (Heb. 11:​8-10, 13). Apóstol Pabloca cai alpapi causana esperanzamandapashmi parlarca (Romanos 8:​20, 21​ta liipangui). Quiquinga Taita Dios jipa punllacunapi imata ruranamanda yachajui callarishpaca ¿imatata ashtahuan gushtaparcangui? Pecadomanda salvarishpa perfecto tucuna cashcataca ¿gushtaparcanguichu? Shinallata quiquinba huañushca familiacuna causarishpa paraíso alpagupi causanata uyashpaca ¿cushijuparcanguichu? Jehová Dios paraíso alpagupi causana oportunidadta cushcamandami shamuj punllacunapica shuj alipacha causaiguta charipangui.

⁸ Cai alpapi o jahua cielopi para siempre causana esperanzata charishpapash tucuicunallatami chai esperanzapi tucui shunguhuan crishpa catingapaj esforzarita ushapanchi. Chaipaca ¿imatata rurai ushapanchi? Pablo imata escribishcata ashtahuan yachajupashunchi. Paipa nishcacunami Jehová Dios imata prometishcacuna ciertopacha pactarina cashcata seguro cachun ayudanga.

9, 10. Apóstol Pabloshnallata ¿imatata yachapanchi? (Romanos 5:3; fotocunata ricupangui).

⁹ (Romanos 5:3​ta liipangui). Apóstol Pabloca imapash llaquicunata charishpami Jehovapa promesapi tucui shunguhuan confiashcata ricuchi ushapanchi nircami. Tucui cristianocunallatami imapash llaquicunata o problemacunata charinataca yachapanchi. Apóstol Pablo tesalonicenses  huauquipanicunaman ima nishcata ricupashun. Paica: “Quiquingunahuan cashpaca, llaquicunata charinatami parlan caparcanchi. Ña imashinami quiquingunallata yachapanguichi, ñucanchica sufripashcanchimi” nircami (1 Tes. 3:4). Shinallata Corinto llactamanda huauquipanicunamanga: “Ñucanchicuna ima llaquicunatalla charishcata villangapami munapanchi [...]. Cazi ñana fuerzata chariparcanchichu. Cunangarinbash huañugrinchimi yanajurcanchimi” nishpami escribirca (2 Cor. 1:8; 11:​23-27).

¹⁰ Cai llaquicunatashnallata cunan punllapi cristianocunapash charinataca alimi yachapanchi (2 Tim. 3:12). Jesuspa yachachishcacunata crishpa paita cati callarishca horasmandaca ¿ima llaquicunatallata charipashcangui? Talvez quiquinba amigocuna o familiacunami quiquinmanda burlarishpa nali tratapashcanga. Tucuipi honrado cashcamandaca ¿trabajopi imapash problemacunata charipashcanguichu? (Heb. 13:18). Jehovapa promesamanda shujcunaman parlashcamanda ¿gobiernocunahuan imapash problemacunata charipashcanguichu? Apóstol Pabloca, “ima llaquicunata charishpapash cushillami cana canguichi” nircami. Pero ¿imamandata shina nirca?

11. ¿Imamandata aguantashpa catingapaca decidido cana capanchi?

¹¹ Llaquicunata charishpaca shuj importante cualidadtami chari ushapanchi. Chaimandami cushilla sintiripanchi. Romanos 5:3​pica: “Llaquicunata charishpami aguantanata yachajupanchi” ninmi. Llaquicunata charishpapash tucui cristianocunallatami aguantashpa ñaupaman catingapaj decidido cana capanchi. Aguantashpallami Jehová carasha nishpa prometishcataca chasquita ushapashun. Jesusca huaquin gentecunataca rumi rumi alpapi muyu urmashcahuanmi compararca. Paicunashna cangapaca na munapanchichu. Paicunaca Taita Diospa Shimita uyashpaca cushijushpami chasquin. Pero llaquicuna ricurijpi o pipash catiriashpa llaquichijpica ñapashmi desanimarin (Mat. 13:​5, 6, 20, 21). Cabalta parlashpaca ni pipash llaquicunata o catiriashpa llaquichi tucungapaca na munapanchichu. Pero cai llaquicunata aguantashpaca ninandami ñucanchillata beneficiaripashun.

12. Aguantashpa catingapaj esforzarishpaca ¿ima beneficiocunatata charipanchi?

¹² Discípulo Santiagoca aguantana imacunapilla ayudajtami nirca. Paica: “Aguantashpa catishpami quiquingunaca ima pandapash illa canata y tucuita ali ruranatapash aliguta yachajupanguichi” nishpami escribirca (Sant. 1:​2-4). Shinaca aguantangapaj esforzarinami ñucanchillata pacienciata charichun, Jehovapa promesacunapi tucui shungu crichun y Jehová Diospipash tucui shungu confiachun ayudanga. Shinaca aguantashpa catingapaj esforzarijpica Jehová Diosca ¿imashinata ricunga?

13, 14. Llaquicunahuan cashpapash aguantajpica ¿imata pasan? Shinallata aguantashpaca Jehová carasha nishca promesataca ¿imashinata ricupashun? (Romanos 5:4).

¹³ (Romanos 5:4​ta liipangui). Apóstol Pabloca: “Aguantajpimi Taita Diosca alicachishpa o cushijushpa chasquin” nircami (Rom. 5:4). Cai shimicunata nishpaca llaquicunahuan cajpi Jehová Dios cushijun cashcataca na ningapaj munanllu. Ashtahuangarin llaquicunata charishpapash aguantashpa catijpi cushijujtami ningapaj munan. Llaquicunata aguantashpa, Jehovata na saquishpa sirvishpaca paitaca ninandami cushichipangui. ¿Nachu chaita yachanaca ashtahuan animarishpa, cushilla ñaupaman catichun ayudan? (Sal. 5:12).

¹⁴ Cunanga Abrahán runagupi pensaripashun. Paica ashtaca llaquicunata charishpapash aguantashpami Jehová Diospa ñaupapi ali ricurita usharca. Chaimandami Jehová Diosca Abrahán runagutaca ñucapa ali amigo y justo runagumi can nirca (Gén. 15:6; Rom. 4:​13, 22). Jehová Diosca paita sirvingapaj imacunatalla rurashcata o ima privilegiocunatalla  charishcataca na ricunllu. Ashtahuanbachaca llaquicunata charishpapash aguantashpa, paita na saquishpa sirvijta ricushpami cushijun. Jehová Diostaca ima edadta charishpa, ima situaciongunapi cashpa o imata ruranata yachashpapashmi cushichita ushapanchi. Quiquinga cunan horas ¿imapash llaquicunata charipanguichu? Shina cashpaca Jehová Diosta na saquishpa sirvingapaj esforzaripangui. Shina rurajpica Jehová Diosca quiquindaca alicachishpa o cushijushpami ricupanga. Jehová Dios ñucanchicunahuan cushilla cashcata yachashpaca pai carasha nishca promesapica ashtahuan tucui shungumi confiapashun.

15. Apóstol Pabloca ¿ima nishpata yachachishpa catirca? Shinallata ¿imatata talvez pensaripanchiman?

¹⁵ Imashinami ña ricupashcanchi apóstol Pabloca llaquicunata charishpapash aguantashpa catishpami Jehová Diospa ñaupapica ali ricurita ushashun nircami. Ashtahuanbash Taita Dios alicachishpa ricuimandami “ñucanchiman ashtaca bendiciongunata cunata shuyanajunchi. Chaicunata shuyanajuimandami seguro caita ushapanchi” nishpapashmi yachachirca (Rom. 5:​4, 5). Pundallatami Romanos 5:2​pi apóstol Pabloca Roma llactamanda cristianocunaca ‘Taita Dios alipi churachun cushijushpa shuyanajun’ nircami. Chaimandami talvez cashna pensaringa: “Roma llactamanda cristianocuna Jehová carasha nishpa prometishca cajpica ¿imamandata apóstol Pabloca cutin tigrashpa cai promesamandaca parlan?” nishpa.

16. Huaquinguna Jehovapa promesacuna ciertopacha pactarinata imashina ashtahuan crishcata parlapai. (Fotocunata ricupangui).

¹⁶ Jehová carasha nishca esperanza ñucanchicuna aguantachun, shinlli tucushpa ñaupaman catichun ayudajta yaipi charishpaca Pablo imata ningapaj munashcataca alimi intindi ushapashun. Por ejemplo, primera vez pipash “cai alpa shuj paraíso tucujpica para siempremi causaringa” nishpa parlashcata ¿yaripanguichu? Shina nishpa parlajpica talvez na ashta criparianguichu. Shinapash Jehová Diosta rijsishpa, Bibliata ashtahuan yachajushpa catimandami cai promesata Jehová Dios ciertopacha pactachinata ashtahuan crishpa catipariangui.

17. Bautizarishca jipapash ¿imashinata Jehovapa promesacunapi ashtahuan crishpa catipashcangui?

 ¹⁷ Bautizarishca jipapash Bibliamanda ashtahuan yachajushpa catishpa espiritualmente ñaupaman catijuimandami Jehová carasha nishca promesapica ashtahuan confiashpa catipashcangui (Heb. 5:13–6:1). Romanos 5:​2-4​pi shimicuna quiquinba causaipi imashina pactarishcatami talvez ricupashcangui. Chaimandami llaquicunata charishpapash aguantashcamanda Jehová Dios quiquinda alicachishpa y quiquinhuan cushilla cajtapash cuenta japipariangui. Shinaca Jehová Dios quiquinmanda cushijushca cajta yachaimandami Jehová Dios paipa promesata pactachinapacha cashcataca ashtahuan tucui shungumi cripangui. Y Jehovapa promesacuna pactarinata tucui shunguhuan crishcamandami quiquinba familiata ali tratapangui, ali decisiongunata agllapangui y tiempotapash ali utilizapangui.

18. Jehová Dios paipa promesata ciertopacha pactachina cashcata ricuchingapaca ¿imatata nirca?

¹⁸ Apóstol Pabloca Jehová Diospa ñaupapi ali ricurishca jipami pai carasha nishca promesataca chasquita usharinga nircami. Shinallata Jehová Diosca pai carasha nishca promesataca ciertopachami pactachinga nircapashmi. Chai promesata Jehová Dios ciertopacha pactachinata ricuchingapami Pabloca cristianocunamanga: “Chaicunata shuyanajuimandami seguro caita ushapanchi. Porque Taita Diosca paipa espíritu santota cushpami, ñucanchita juyashcata ricuchin” nirca (Rom. 5:5). Shinaca Jehová Dios carasha nishca promesata chasquinataca seguromi caita ushapangui.

19. ¿Imatata seguro capanchi?

¹⁹ Abrahán runagumanda yachajunaca alipachami can. Jehová Diosca Abrahán runagumanga shuj promesatami rurarca. Y caitaca Jehová Diosca pactachircami. Shinallata shuj alipacha amigotashnami Abrahán runagutaca ricurca. Bibliapica ninmi: “Abrahanga pacienciata ricuchishca jipami, Taita Dios imata prometishcataca chasquirca” (Heb. 6:15; 11:​9, 18; Rom. 4:​20-22). Abrahán runagushnallata Jehová Diosta na saquishpa sirvishpaca pai carasha nishca promesataca seguromi chasquipashun. Ñucanchi shuyanajushca promesaca ciertopachami pactaringa. Chaimandami ninanda cushijupanchi (Rom. 12:12). Apóstol Pabloca: “Quiquingunaca Taita Diospimi confiashcanguichi. Chaimi shuyachun ayudaj Taita Dios quiquingunamanga tucui shunguhuan cushilla canata y tranquilo canatapash cuchun mañapani. Shinami Taita Diospa espíritu santopa poderhuanga, tucui shunguhuan shuyashpa catita ushapanguichi” nishpami escribirca (Rom. 15:13).