1. Joven huauquicunaca ¿imatata rurana can?

 REY Davidca paipa churi Salomondaca: “Shinlli tucushpa, shinlli shayaringui” nircami (1 Rey. 2:​1-3). Jehovata sirvij tucui huauquicunami cai consejotaca catina can. Caita pactachi ushangapaca Jehová Diospa mandashcacunata cazunatami yachajuna can. Shinallata Bibliapa consejocunata pactachingapami esforzarina can (Luc. 2:52). Shinaca joven huauquicunaca ¿imamandata espiritualmente shinlli y responsable huauquicuna cana can?

2, 3. Joven huauquicunaca ¿imamandata Jehovata tucui shunguhuan sirvij y responsable cana can?

² Tucui huauquicunallatami familiapi y congregacionbipash ashtaca responsabilidadcunata charin. Joven huauquigu cashpaca seguromi jipa punllacunapi ima responsabilidadcunatalla charina cashcata pensaripashcangui. Por ejemplo, precursor regular, siervo ministerial o anciano shina sirvina metatapashmi talvez charipangui. O na cashpaca cazarangapaj o huahuacunata charingapapashchari munapangui (Efes. 6:4; 1 Tim. 3:1). Cai metacunata pactachi ushangapaca espiritualmente shinlli y responsablemi cana capangui. b

³ Espiritualmente shinlli cangapaj, causaipi ayudaj cosascunata yachajungapaca ¿imatata rurana capangui? Jipa punllacunapi imapash responsabilidadcuna ricurijpi aliguta pactachi ushangapaca ¿imashinata cunanmandallata prepararita ushapangui?

4. Ali ejemplocunataca ¿maipita tarita ushapanchi? (Fotocunata ricupangui).

⁴ Bibliapa ali ejemplocunata catipai. Bibliapica Jehová Diosta tucui shunguhuan juyaj runagucunamandami parlan. Paicunaca Jehovata  tucui sirvijcunataca shuj shuj cosascunata rurashpami cuidarca. Seguromi quiquinba familiapi y congregacionbipash espiritualmente shinlli y responsable huauquicuna tiapanga. Paicunapa ejemplotami catita ushapangui (Heb. 13:7). Ashtahuanbash Jesuspa ejemplotapashmi catita ushapangui (1 Ped. 2:21). Shinaca cai tucui ejemplocunamanda yachajushpami paicunapa ali cualidadcunata imashina cati ushashcata pensarina capangui (Heb. 12:​1, 2). Chai jipaca cai alipacha ejemplocunata imashina catinata decidipai.

5. Ali pensarinata yachajungapaca ¿imatata ruraita ushapanchi? Chaita ruranaca ¿imamandata importante can? (Salmo 119:9).

⁵ “Ali yuyaita” charingapaj esforzaripai. (Prov. 3:21). Ali yuyaita charij huauquicunaca imatapash nara decidishpallatami aliguta pensaringapaj tiempota llujchin. Shinaca ali yuyaita charingapami esforzarina capangui. Ashtaca jovengunaca paicuna imashina pensashcatalla o imashina sintirishcatalla catimandami imapash decisiongunataca japin (Prov. 7:7; 29:11). Ashtahuanbash peliculacuna, internet y redes sociales nishcacunapashmi quiquinba comportamientota y quiquinba pensamientocunatapash afectaita ushan. Shinaca aliguta pensarinata yachajungapaca ¿imatata ruraita ushapangui? Primero, Bibliapa consejocunatami yachajuna capangui. Shinallata Jehová Diospa nishcacuna quiquinballata ali cashcatami pensarina capangui. Chai jipaca imata yachajushcata yaipi charishpami Jehová Diospa ñaupapi ali ricurij decisiongunata agllaita ushapangui (Salmo 119:9​ta liipangui). Ali yachaita charinaca espiritualmente shinlli cachun, shinallata imapi cashpapash responsable cachun ayudanga (Prov. 2:​11, 12; Heb. 5:14). Cunanga ali yuyaita charina cai cosascunapi imashina ayudajtami ricupashun: 1) Panigucunata imashina tratanata yachangapaj. 2) Ima ropata churajunata decidingapaj.

6. Ali yuyaita charij shuj jovenga panigucunata respetashcataca ¿imashinata ricuchin?

⁶ Ali yuyaita charina o ali pensarinaca huarmigucunata respetohuan tratachunmi ayudanga. Por ejemplo, shuj joven huauquiguca shuj paniguta alicachishpa ricuimandami paihuan rijsiringapaj munanga. Chaita ruranaca imapash maloca na canllu. Shinapash shuj ali yuyaita charij jovenga paniguhuan cazarangapaj pensajushpallami chai panigutaca parlachinga o escribi callaringa. Na cazarangapaj munashpaca chaitaca na rurangachu (1 Tim. 5:​1, 2). Shinallata shuj paniguhuan ña rijsirijushpaca chai panigumanda pipash ama  nalicachishpa rimachunmi maipipash paicunalla ama cangapaj esforzaringa (1 Cor. 6:18).

7. ¿Ima decisiongunata japishpata shuj jovenga ali yuyaita chari callarishcata ricuchin?

⁷ Shuj jovenga Jehová Dios yachachishcashna pensai callarishcataca paipa churajushca ropapi o imashina ñajcharishcapimi ricuchita ushan. Por ejemplo, ropacunata rurashpa, a la moda llujchishpa jatuj gentecunaca normalmenteca Jehovapa mandashcacunata na cazuj gentecuna, paicuna munashcashna causaj gentecunami can. Chaimandami huaquin ropacunaca yapa apretado, jaricuna churajuna ropacunapash huarmipashna ricunajun. Chaimandami shuj joven huauquiguca espiritualmente shinlli tucungapaj o experienciata charij huauquigu tucungapaca ropacunata churajuna horasca Jehovapa mandashcacunata yaipi charishpa congregacionmanda huauquipanicunapa ali ejemplotapash catina can. Cashnami pensarita ushan: “Ñucapa decisiongunaca ¿ali yachaita charishcata, shujcunapa pensashcacunata respetashcatachu ricuchijun? Ñucapa churajushcacunaca ¿Taita Diosta sirvij cashcatachu ricuchijun?” nishpa (1 Cor. 10:​31-33; Tito 2:6). Ali yuyaita charij jovengunataca huauquipanicunapash, Jehová Diospash respetashpami ricunga.

8. Shuj jovenga shujcuna paipi confiachunga ¿imatata ruraita ushan?

⁸ Shujcuna canbi confiachun esforzaripai. Shujcuna canbi confiachunga ima responsabilidadta chasquishpapash chai responsabilidadcunata pactachingapami esforzarina capangui (Luc. 16:10). Jesusta yaripangui. Jesusca paipa responsabilidadcunataca tucuitami ali pactachirca. Huaquinbica na jahualla cajpipashmi Jehovapa mandashcata pactachingapaca tucuipi esforzarirca. Paipa discipulocunata, gentecunata juyaimandami paipa causaita cungapapash dispuesto carca (Juan 13:1). Shinaca Jesushna ima responsabilidadta chasquishpapash chai responsabilidadta pactachingapaj esforzaripangui. Responsabilidadcunata imashina pactachinata na yachashpaca humildadta ricuchishpami shuj experienciata charij huauquiguta ayudata mañaita ushapangui. Imagutapash mandashcatalla ruranapa randica siempre ashtahuan imagutapash rurangapaj esforzaripangui (Rom. 12:11). ‘Imata rurajushpapash gentecunapa rurajunshnaca na ruranachu capangui. Sino Jehová Diospa rurajunshnami’ pactachina capangui (Col. 3:23). Ciertomi can, tucuicunallatami juchayu capanchi. Chaimandami humildadta ricuchishpa imagupipash pandarishpaca reconocina capangui (Prov. 11:2).

9. Shuj jovenbaca ¿imamandata causaipi ayudaj cosascunata yachajunaca minishtirishcapacha can?

⁹ Espiritualmente shinlli, experienciata charij tucungapaca causaipi ayudaj cosascunatami yachajuna capangui. Caicunata yachajunaca congregacionbi responsabilidadcunata ali pactachichun, shuj trabajota tarishpa quiquinllata o quiquinba familiata mantinichunbashmi ayudaita ushanga. Shinallata shujcunahuanbash ali llevarichunmi ayudanga. Imacunatalla yachajuna minishtirishcata ricupashunchi.

10, 11. Ali liinata, ali escribinata yachajunaca ¿imashinata shuj jovendaca ayudanga? (Salmo 1:​1-3; fotota ricupangui).

¹⁰ Liinata, escribinata ali yachajupai. Bibliapica  Diospa Shimita cada punlla liij, liishcapi pensarij jarica cushilla y paipa causaipipash alimi causan ninmi (Salmo 1:​1-3​ta liipangui). Shinaca Jehová Dios imatapacha pensajta yachajunami quiquin imagutapash ali yuyashpa, ali pensarishpa rurachun ayudanga (Prov. 1:​3, 4). Congregacionbi ali yuyaita charij jovenguna imamanda minishtirishca cashcata ricupashunchi.

¹¹ Huauquipanicunaca espiritualmente shinlli, experienciata charij huauquicuna Bibliamanda yachachishpa, ali consejocunata cushpa ayudachunmi minishtin (Tito 1:9). Ali liinata, escribinata yachashpaca discursocunata, comentariocunatapash ali prepararishpami cuita ushapangui. Shinami huauquipanicunapash Jehová Diospi tucui shunguhuan crishpa catichun ayudapangui. Shinallata Bibliata estudiashpa, reuniongunapi y asambleacunapi discursocunata uyashpaca imata yachajushcata ali anotashpami quiquinllatapash tucui shungu Jehová Diospi crishpa catipangui. Shuj huauquipanicunatapashmi animaita ushapangui.

12. Shujcunahuan ali parlanata yachajuchunga ¿imata ayudanga?

¹² Shujcunahuan aliguman parlanata yachajupai. Caita yachajunaca joven cristianocunapaca ninan minishtirishcapachami can. Shujcunahuan ali parlanata yachajungapaca uyana, imata pensajta intindina, shujcuna imashina sintirishcata intindinami minishtirin (Prov. 20:5). Chaipaca paicuna imashina parlanajujta uyashpa, paicunapa ñavicuna cushilla o llaquilla cajtapashmi ricuita ushapangui. Y gentecunahuan yalishpami caicunataca ashtahuan yachajurin. Shujcunahuan telefonopilla o mensajecunata cachashpalla parlashpaca shuj personahuan ñavi ñavi parlangapaca dificilmi tucunga. Shinaca shujcunahuan ñavi ñavi parlangapaj esforzaripangui (2 Juan 12).

13. Shuj joven huauquiguca ¿imacunatallata ashtahuan yachajuna can? (1 Timoteo 5:8; fotota ricupangui).

¹³ Quiquinllata trabajashpa mantinirinata yachajupai. Espiritualmente shinlli o experienciata charij cristianocunaca paicunallata y paicunapa familiatapash mantinita yachaj cristianocunami cana can (1 Timoteo 5:8​ta liipangui). Huaquin llactacunapica jovengunaca paipa taita o shuj familia yachachijpimi imagupipash trabajanataca yachajuita ushan. Cutin shuj ladocunapica imapash cursocunata catishpami trabajanataca yachajuita ushan. Imashina cashpapash mantiniringapaj trabajanata yachajunaca minishtirishcami can (Hech. 18:​2, 3; 20:34; Efes. 4:28). Ima trabajotapash siempremi ali trabajashpa tucuchishpa saquina capangui. Shinami shujcunapa ñaupapi ali ricurishpa, shinallata shuj trabajota tarishpapash chai trabajopi trabajashpa catita ushapangui. Caipi yachajushca cualidadcuna, causaipi ayudaj cosascunaca jipacunaman shuj responsabilidadcunata pactachichunbashmi ayudanga. Jipacunaman imacunapilla ayudanata ricupashunchi. 

14. Jovengunataca Jehová Diosta tiempo completopi sirvichunga ¿imata ayudaita ushan?

¹⁴ Tiempo completopi Jehová Diosta sirvina. Cunan punllacunapi espiritualmente shinlli, experienciata charij huauquicunaca jovenguna cashpallatami precursor shina sirvi callarirca. Precursor tucushpaca shuj personacunahuan ayudarishpa trabajanata yachajushpami culquigutapash ali gashtanata yachajupangui (Filip. 4:​11-13). Callaripica precursorado auxiliartami japita ushapangui. Ashtaca huauquicunataca caita ruranami jipacunaman precursor regular shina sirvichun ayudashca. Y precursor regular tucunaca siervo de construcción o betelita shina sirvichunmi ayudaita ushan.

15, 16. Shuj joven siervo ministerial o anciano shina sirvingapaj munashpaca ¿imatata rurana can?

¹⁵ Siervo ministerial o anciano shina sirvina. Tucui huauquicunallatami congregacionbi anciano shina sirvingapaj esforzarina can. Bibliapica huauquipanicunata ashtahuan ayudangapaj munajcunaca “alitami rurajun” ninmi (1 Tim. 3:1). Congregacionbi anciano shina sirvingapaca callaripica siervo ministerialrami tucuna can. Siervo ministerialcunaca anciano huauquicunataca shuj shuj cosascunapimi ayudan. Siervo ministerial o anciano cashpapash humilde caimadami huauquipanicunata ayudashpa, predicaitapash cushijushpa predican. Shuj jovenga 17 huatacunata charishpallatami siervo ministerial tucungapaca listo caita ushan. Shinallata shuj jovendaca ña 20 huatacunata charijpimi anciano cachun nombraita ushan.

¹⁶ Siervo ministerial o anciano tucungapaj imata rurana cashcataca Bibliapimi ricuchijun. Bibliapica Jehová Diosta juyana, familiata, congregacionmanda huauquipanicunata juyana cashcatami ricuchin (1 Tim. 3:​1-13; Tito 1:​6-9; 1 Ped. 5:​2, 3). Bibliapi mandashcacunata pactachi ushangapaca Jehová Diosta mañanami ayudanga. c

17. Ali cusa tucuchun, familiata ñaupaman ali pushachunga shuj jovendaca ¿imata ayudanga? (Fotota ricupangui).

¹⁷ Cazarashpa shuj familiata ñaupaman pushana. Jesús nishcashnaca espiritualmente shinlli, experienciata charij huaquin huauquicunaca soltero cashpa catinatami decidin (Mat. 19:12). Shinapash quiquin cazaranata decidishpaca familiapica umashna ñaupaman pushana responsabilidadtami charipangui (1 Cor. 11:3). Jehová Diosca cusacuna paipa huarmiguta juyachun, tucui minishtirishca cosasgucunata cuchun, paicuna imashina sintirishcata intindingapaj esforzarichun y Jehová Diosta sirvishpa catinapi ayudachunmi munan (Efes. 5:​28, 29). Cai temapica ali yachaita charinamanda, huarmigucunata respetanamanda y shujcuna ñucanchipi confiachun esforzarinamandami  ricupashcanchi. Cai cualidadcunata charinaca shuj ali cusa tucuchun, familiatapash ali ñaupaman pushachunmi ayudaita ushan.

18. Shuj joven huauquiguca ¿imashinata shuj ali taita cangapaj ñamanda prepararita ushan?

¹⁸ Huahuacunata charina. Huahuacuna ricurijpica Jehová Diospa ejemplomi imashina shuj ali taita canamanda yachachita ushan (Efes. 6:4). Jehová Diosca Jesustaca na pinganayachishpami juyashcata, paipa ñaupapi alitami rurashcangui nirca (Mat. 3:17). Taita tucushpaca huahuacunata juyanimi nina, imapash alita rurashcamanda felicitana costumbreta charinaca alimi can. Jehová Diospa ejemplota catij cristianocunaca paipa huahuacunapash espiritualmente shinlli, experienciata charij huauquicuna tucuchunmi ayudaita ushan. Taita tucushpa quiquinba responsabilidadta ali pactachingapaca cunanmandami prepararita ushapangui. Chaipaca cunanmandami quiquinba familiata, congregacionmanda huauquipanicunata cuidana capangui. Shinallata paicunata juyashcata, valorashcatami ricuchina capangui (Juan 15:9). Chaita ruranami huahuacunata charishpa ali taita tucuchun ayudapanga. Ashtahuanbachaca chaita ruranaca cunanmandallatami Jehová Diospa ñaupapi, quiquinba familiapi, congregacionmanda huauquipanicunapa ñaupapi ali ricurichun ayudapanga. 

19, 20. Joven huauquicuna espiritualmente shinlli, experienciata charij tucungapaca ¿imatata rurana can? (Callari paginapa fotota ricupangui).

¹⁹ Shinaca joven cashpaca caita yaripangui: Espiritualmente shinlli, experienciata charij huauqui tucungapaca huaquin cosascunatami cunanmanda rurana capangui. Por ejemplo, ali ejemplocunata catina, ali yuyaita charingapaj esforzarina, shujcuna canbi confiachun esforzarina, quiquinllata o quiquinba familiata mantiningapaj imapash trabajota ruranata yachajuna, jipacunaman shuj responsabilidadcuna shamujpi chaicunata ali pactachingapaj cunanmanda prepararina capangui.

²⁰ Imacunatalla pactachina cashcapi pensarishpaca talvezpashmi, “ashtaca ashtaca cosascunatami rurana cani” yajupangui. Shinapash na desanimarinachu capangui. Quiquinga cai tucui cosascunataca pactachi ushapanguimi. Caitapashmi yarina capangui: Jehová Diosmi quiquindaca ayudangapaj munan (Is. 41:​10, 13). Congregacionmanda huauquipanicunapashmi quiquinda ayudapanga. Jehová Dios munashcashna tucushpaca cushillami causaita ushapangui. Jovenguna, quiquingunataca ninandami juyapanchi. Quiquinguna espiritualmente shinlli, experienciata charij huauquicuna tucungapaj esforzarijushcamanda Jehová Dios bendiciapachun (Prov. 22:4).