1. Jehová Diosmandaca ¿imatata yuyapangui?

 JEHOVÁ DIOSCA imashinashi can nishpa ¿ima horapash pensaripashcanguichu? Shinapash Jehová Diosta na ricuita ushashpapash Bibliapi pai imashna cashcatami villan. Por ejemplo Bibliapica Jehová Diostaca ‘indishna, jarcarina escudoshnami’ can ninmi. Shinallata “tucuita tucuchij ninashnami can” ninbashmi (Sal. 84:11; Heb. 12:29). Shuj viaje Ezequiel runagu muscuipishna Jehová Diosta ricushpaca ‘zafiro nishca rumishna’, ‘punchapamba bronceshna’ y ‘cuichij punchapambagushnami’ can nircami (Ezeq. 1:​26-28). Caita yachashpaca Jehová Dios ashtaca poderta charishcata cuenta japishpami ashata manllaihuan sintirita ushapanchiman.

2. Huaquingunapaca ¿imamandata Jehová Diosman quimirinaca difícil caita ushan?

² Jehová Diosta na ricuita ushaimandami ñucanchita pai juyashcata crinaca na fácil caita ushan. Huaquinguna ninanda sufrishca caimandami Jehová Diosca ñucataca nunca na juyahuangachu nishpa pensan. Talvez paicunaca shuj juyaj taitataca na charishcangachu. Chaimandami Jehová Diosca imashina sintirishcata y imamanda paiman quimirina ñucanchipa difícil cashcataca alimi yachan. Shinallata ñucanchita ayudangapaca pai ciertopacha juyaj Dios cashcata ricuchishpami Bibliapi escribichirca.

3. ¿Imashinata Jehová Dios juyaj Dios cashcataca cuenta japita ushapanchi?

³ Bibliapica Jehová Dios ninan juyaj Dios cashcatami ricuchin (1 Juan 4:8). Jehová Diosca imata rurashpapash juyaimandami ruran. Jehová Diosca juyaj, na mitsaj caimandami paita na juyaj gentecunatapash juyan (Mat. 5:​44, 45). Cai temapica Jehová Diosmanda y paipa juyaimandami ashtahuan yachajupashun. Jehová Diosmanda ashtahuan yachajushpaca paitaca ashtahuanmi juyapashun.

JEHOVÁ DIOSCA ÑUCANCHITACA NINANDAMI JUYAN

4. Jehová Dios ninan juyaj Dios cashcata yachashpaca ¿imashinata sintiripangui? (Fotota ricupangui).

⁴ ‘Jehová Diosca ninanda juyaj’ Diosmi can (Sant. 5:11). Jehová  Diosmanda Bibliapi parlashpaca ninan juyaj mamahuanmi comparan (Is. 66:​12, 13). Por ejemplo, caipi pensaripashunchi: Shuj mamaca paipa uchilla huahuagutaca ¿imashinashi cuidanman? ¿Nachu huahuagutaca marcashpa, juyaihuan aliguman parlanman? Paipa huahuagu huacajpi o imatapash nanachijujpica ñapashmi ima minishtirishcaguta rurashpa cuidan. Shina cuendallatami imamandapash llaquilla o preocupado cashpaca Jehová Dios ñucanchita juyaihuan ayudanataca seguro caita ushapanchi. Chaimandami Salmos librota escribij runaguca: “Ñuca shungu ucupi ashtaca yuyaicunahuan musparijujpica, can cushichishcacunami, ñuca almatapash cushichihuarca” nircami (Sal. 94:19).

5. Jehová Dios na saquij Dios cashcata yachashpaca ¿imatata yuyapangui?

⁵ Jehová Diosca na saquij Diosmi can (Sal. 103:8). Ñucanchicuna pandarijpipash ñucanchita juyanataca Jehová Diosca na saquingachu. Israelitacunaca Jehová Diostaca cutin cutinmi llaquichirca. Shinapash israelitacuna arripintirishpa nali ruraicunata saquijpica Jehová Diosca: “Cangunaca, ñuca ricuipica ninan valishcami carcanguichi. Ñucapi alicachi tucushcacuna cajpimi, cangunata juyani” nishpami paicunata ciertopacha juyashcata ricuchirca (Is. 43:​4, 5). Ñucanchitapash Jehová Diosca shinallatami juyan. Chaimandami paipi tucui shunguhuan confiaita ushapanchi. Ñucanchicuna imapash jatun juchacunata rurajpipash Jehová Diosca jichushpaca na saquinllu. Nali ruraicunamanda arripintirishpa Jehová Diospa ayudata mascajpica pai ñucanchita juyashpa catijushcatami cuenta japipanchi. Jehová Diosca ñucanchi ‘ashtaca nali rurashcatapash anchuchisha’ nishpami prometishca (Is. 55:7). Bibliapica Jehová Dios ñucanchita perdonashca jipaca, “tranquilo cana tiempoguta caramunga” ninmi (Hech. 3:19).

6. Zacarías 2:8​pica Jehová Diosmandaca ¿imatata yachachin?

⁶ (Zacarías 2:8​ta liipangui). Jehová Diosca ñucanchicunataca paipa ñavi lulunhuanmi comparan. Ñavi lulunga tucui cuerpomanda yali valishcami can. Shinaca “Ñucata sirvijcuna, cangunata pipash llaquichishpaca ñucapa ninan valishca cajcunata llaquichijushnami can” nircami. Jehová Dios ñucanchita ninanda juyaimandami ñucanchicuna imashina sintirinajushcataca ñapash intindin. Chaimandami ñucanchita cuidangapaca listo can. Ñucanchicuna llaquilla o preocupado cajpica Jehová Diospashmi llaquirin. Shinaca “cambaj ricujuj ñavigutashna cuidahuayari” nishpa Jehovata mañajpica, pai ñucanchita contestanataca seguromi caita ushapanchi (Sal. 17:8).

7. Jehová Dios ñucanchita ciertopacha juyashcata seguro cachunga ¿imata ruranata ayudanga?

 ⁷ Jehová Dios ñucanchita ninanda juyajta seguro cachunmi munan. Shinapash pundacunapi ninanda sufrishca caimandami ¿Jehová Diosca ciertopachacha juyahuan? nishpa pensarita ushapanchiman. O na cashpaca cunanbi imapash llaquicunata charimandami ¿Jehová Diosca ciertopachacha juyahuan? nishpa pensaita ushapanchiman. Shinaca Jehová Dios ñucanchita ciertopacha juyajta seguro cachunga ¿imata ayudanga? Jesusta, ungidocunata y tucui sirvijcunata Jehová Dios imashina juyaihuan tratashcata yachajunami ayudanga.

JEHOVÁ DIOSCA ÑUCANCHITA JUYASHCATACA ¿IMASHINATA RICUCHIN?

8. Jesusca paipa Taita ninanda juyashcataca ¿imamandata seguro carca?

⁸ Jehová Diosca paipa Churi Jesushuanga ashtaca tiempotami igual causarca. Paica, Jesushuan jahua cielopi ashtaca ashtaca huatacunata igual causaimandami juyaipash ashtahuan mirashpa ali amigocuna tucurca. Jehová Dios Jesusta ninanda juyashcataca Mateo 17:5​pimi ricuchin. Jehová Diosca Jesusmanda parlashpaca: “Paimandami ninanda cushijuni” ninmanllami carca. Shinapash Jesusta ninanda juyashcata ricuchingapami: “Caimi ñuca juyashca Churigu” nirca. Jehová Diosca Jesusmandaca ninanda cushijushcami carca. Porque paica gentecunata salvangapami paipa causaita cugrijurca (Efes. 1:7). Shinallata Jesuspash Jehová Dios paita ninanda juyashcataca seguromi carca. Chaita ricuchingapaca tauca viajetami Jesusca ñuca Taitaca ninandami juyahuan nishpa parlarca (Juan 3:35; 10:17; 17:24).

9. Romanos 5:5​pica ungido huauquipanicunata Jehová Dios juyashcataca ¿imashinata ricuchin?

⁹ Jehová Diosca ungido huauquipanicunata ninanda juyashcatapashmi ricuchishca (Romanos 5:5​ta liipangui). Dios escribichishca shimicunapi Romanos 5:5​pica ungido huauquipanicunata Jehová Diosca ninanda juyashcatami intindichin. Chai ninan juyaitaca riomanda yacuhuanmi comparan. Caica Jehová Dios ungido huauquipanicunata ciertopacha ninanda juyashcatami ricuchin. Ungido huauquipanicunaca paicunata ‘Taita Dios juyashcataca’ alimi yachan (Judas 1). Apóstol Juanga pai imashina sintirishcataca 1 Juan 3:1​pimi ricuchin. Chaipica: “Taita Diosca ñucanchitaca ninandami juyan. Chaimi ñucanchitaca ñuca huahuacuna” nishpa escribirca. Shinapash Jehová Diosca ¿ungido huauquipanicunatallachu juyan? Na. Jehová Diosca tucui paita sirvijcunata ninandami juyan.

10. Jehová Dios quiquinda juyashcataca ¿imata rurashpata ricuchirca?

¹⁰ Jehová Diosca paipa Churi Jesuspa causaita cushpami gentecunata ninanda juyashcata ricuchirca. Shina rurashpami tucuicunamanda yali Jehová Dios ninanda juyan cashcata ricuchirca (Juan 3:16; Rom. 5:8). Jehová Diosca paipa juyashca Churipa causaita cushpami gentecunapa juchacunamanda perdonarca. Shinami paipa ali amigo cana oportunidadtapash curca (1 Juan 4:10). Jehová y Jesús ñucanchita juyaimanda imata rurashcata pensarishpaca paicuna ñucanchita ninanda juyashcatami cuenta japipanchi (Gál. 2:20). Ñucanchita salvangapaj paipa Churi Jesusta cachamushpaca justo Dios cashcata ricuchingapallaca na carcachu. Ashtahuanbachaca ñucanchita ninanda juyaimandami shina rurarca. Jehová Diosca paipa shujlla juyashca Churiguta ñucanchimanda sufrishpa huañuchun cachamushpami ñucanchita ninanda juyashcata ricuchirca.

11. Jeremías 31:3​mandaca ¿imatata yachajupanchi?

¹¹ Imashinami ricuparcanchi, Jehová Diosca ñucanchita juyashcataca ruraicunahuanmi ricuchishca (Jeremías 31:3​ta liipangui). Jehová Diosca ñucanchitaca juyaimandami paipa organizacionman pushamushca (Deuteronomio 7:​7, 8​huan chimbapurashpa ricupangui). Jehová Diospa juyaimandaca nipipash na separaita ushangachu (Rom. 8:​38, 39). Jehová juyaj Dios cashcata yachashpaca ¿imashinata sintiripangui? Salmo capítulo 23​ta liijushpaca Jehová Diospa juyaita yachaimanda, David imashina sintirishcata y ñucanchicunapash imashina sintiri ushashcatami cuenta japita ushapanchi.

 JEHOVÁ NINAN JUYAJ DIOS CASHCATA YACHASHPACA ¿IMASHINATA SINTIRIPANGUI?

12. Salmo 23​mandaca ¿imatata yachajupanchi?

¹² (Salmo 23:​1-6​ta liipangui). Salmo capítulo 23​pica Davidca Jehová Dios paita juyaihuan cuidanata seguro cashcata ricuchishpa candashcatami ricuchin. Davidca Jehová Dioshuan alipacha amigo cashcata ricuchingapami Taita Diosca ñucapa Michijmi can nirca. Davidca Jehová Dios paita ayudachun saquishpami paipi tucui shunguhuan confiashcata ricuchirca. Davidca Jehová Dios paita siempre juyashpa catinataca alimi yacharca. Shinaca ¿imamandata chaitaca seguro carca?

13. Davidca ¿imatata seguro carca?

¹³ ‘Nima na faltahuangachu’. Davidca Jehová Dios minishtirishca cosasgucunata paiman cushcamandami Jehová Dios paita siempre cuidajushcataca seguro carca. Shinallata Jehová Diospaca ali amigomi carca. Ashtahuanbash Jehová Diospa ñaupapipashmi ali ricurirca. Jipa punllacunapi ima pasanataca Davidca na preocuparircachu. Paica Jehová Dios minishtirishca cosasgucunata carashpa ayudanataca alimi yacharca. Davidca Jehová Dios paita juyaihuan cuidanataca seguromi carca. Chaimandami imamandapash na preocuparishpa tranquilo cushilla carca (Sal. 16:11).

14. Jehová Diosca ¿imashinata juyashcataca ricuchin?

¹⁴ Ñucanchicuna imapash llaquicunata charijpica Jehová Diosca juyaihuanmi cuidan. Claire a shuti paniguca 20 huatacunata yalimi Betelpi sirvirca. Paica, paipa familia ashtaca llaquicunata chari callarijpica imashina ayudanataca na atinarcachu. Panigupa taitataca derrame cerebraltami curca. Cutin panigupa caishuj ñañaca expulsai tucurca. Shinallata paipa familia culquigu illa quidaimandami huasipash illa quidarca. Shina pasajpipash Jehová Diosca paicunataca ¿imashinata cuidarca? Claire shuti paniguca: “Jehová Diosca ñuca familia minishtirishca cosasgucunata cada  punlla charichunmi ayudarca. Huaquinbica Jehová Diosca yalillagutapashmi carashpa ayudarca. Siempremi Jehová Dios ñucanchita juyaihuan imashina cuidashcata yarini. Chaitaca nunca na cungashachu. Jehová Dios imashina cuidashcata yarinami ima llaquicuna ricurijpipash Jehová Diosta tucui shungu cushilla sirvishpa catichun ayudahuan” ninmi.

15. Davidca ¿imamandata shinlli tucushpa ñaupaman catita usharca? (Dibujota ricupangui).

¹⁵ ‘Ñucataca paimi shinllichihuan’. Huaquinbica Davidca llaquicunamanda, shuj shuj problemacunamandami preocupado llaquilla sintirirca (Sal. 18:​4-6). Shina cajpipash Jehová Dios paita juyaihuan cuidashcamandami shinlli tucushpa ñaupaman catirca. Jehová Diosca Davidtaca ‘llullulla jihua pushtucunaman’ y ‘samana yacu manñacunamanmi’ pusharca. Shina rurashcamandami Davidca shinlli tucushpa Jehová Diosta tucui shunguhuan cushilla sirvishpa catita usharca (Sal. 18:​28-32).

16. Jehová Dios juyaihuan shinllichishcataca ¿imashinata cuenta japipashcangui?

¹⁶ Shinaca imapash llaquicunahuan o problemacunahuan cashpaca ñucanchipashmi “Mandaj Dios llaquijpillami, na tucuchi tucushcanchi” nita ushapanchi (Lam. 3:22; Col. 1:11). Rachel paniguhuan ima pasashcata ricupashun. COVID-19 pandemiapica Rachel shuti panigupa cusaca Jehová Diosta sirvinata saquishpami paitapash jichushpa rirca. Jehová Diosca cai panigutaca ¿imashinata ayudarca? Paniguca: “Jehová Dios ñucata ninanda juyashcatami sintircani. Jehová Diosca ali amigocunahuanmi ayudahuarca. Y cai amigocunaca ñucata cumbangapami tiempota llujchin carca. Shinallata micunaguta apamushpapashmi ayudahuan carca. Shinallata cai amigocunaca ñucata animachij textocunahuanmi ayudahuarca. Cai amigocunaca ñucataca juyaihuanmi Jehová Diosca candaca cuidajunmi nishpa yarichihuan carca. Cai juyaj familiata Jehová Dios ñucaman carashcamandaca ninandami agradicipani” ninmi.

17. Davidca ¿imamandata ‘ima nalitapash na manllashachu’ nirca?

¹⁷ “Can ñucahuan cajpimi, ima nalitapash na manllasha”. Davidca ashtaca contracunatami charirca. Chaimandami paipa causaica casi siempre peligropi carca. Chai problemacunata charishpapash Jehová Dios paita juyaihuan cuidan cashcamandami seguro sintirirca. Davidca llaquicuna o problemacuna ricurijpipash Jehová Dios siempre ayudanata yachaimandami tranquilo sintirirca. Davidca Jehová Diosmi ‘ñuca tucui imatalla manllajushcamandapash cacharichihuarca’ nishpami candarca (Sal. 34:4). Shinapash huaquinbi David imamandapash ninanda manllajushpaca Jehová Dios paita juyan cashcata yachaimandami ima manllaicunatapash mishai usharca.

18. Jatun llaquicunata chimbapurajushpaca ¿imashinata Jehová Dios ñucanchita juyashcata yachanaca ayudan?

 ¹⁸ Jatun llaquicunata o problemacunata charishpa Jehová Dios ñucanchita ninanda juyashcata yachanaca ¿imashinata ayudan? Susi shuti precursora paniguca paipa churi suicidarijpi paipa cusaguhuan imashina sintirishcatami parlan: “Jatun llaquicunata charishca cashpaca imapash ashtahuan nali cosascunami pasanga nishpami manllaita ushapanchiman. Jehová Dios ñucanchita ninanda juyaimandami pai siempre ñucanchita cuidashpa ayudanata seguro caita ushapanchi” ninmi. Párrafo 16​pi parlashca Rachel paniguca: “Shuj tutaca preocupada y llaquillapacha sintirimandami Jehová Diostaca huacashpa mañarcani. Mañashca jipaca imashinami shuj mama paipa huahuaguta juyaihuan puñuchinshnallatami ñucapash tranquila ali sintirishpa puñushpa quidashcani” ninmi. Tasos shuti shuj anciano huauquiguca guerraman na ringapaj munashcamandami carcelpi churai tucurca. Huauquigutaca Jehová Diosca ¿imashinata juyaihuan cuidarca? Huauquiguca: “Jehová Diosca ñucataca tucuipimi cuidahuarca. Chaimandami pai ñucata siempre ayudashpa catinapipash ashtahuan confiapani. Cárcel manllanai pushtu cajpipash, Jehová Diosca paipa espíritu santohuanmi ñuca cushilla ñaupaman catichun ayudahuarca. Cashna ayudashcamandami Jehová Diospi ashtahuan confiashpaca, pai ñucata ninanda juyashcata ashtahuan cuenta japita ushapani. Cashna situaciongunapi Jehová Dios ñucanchita ayudanapi confiashpaca Jehová Dios ninanda juyaj cashcatami cuenta japita ushapanchi. Chaimandami carcelpi cashpapash precursor regular shina sirvi callarircani” ninmi.

JEHOVÁ DIOSMAN ASHTAHUAN QUIMIRIPASHUNCHI

19. a) Jehová ñucanchita juyashcata yachashpaca ¿imashinata mañaita ushapanchi? b) Jehová Diospa juyaimanda parlashpaca quiquinga ¿maijan textotata ashtahuan gushtapangui? (“ Cai textocunami Jehová Dios ñucanchita ninanda juyashcata cuenta japichun ayudan” nishca recuadrota ricupangui).

¹⁹ Cai experienciacunaca Jehová Dios ninan juyaj cashcatami ricuchin (2 Cor. 13:11). Jehová Diosca cada unomandami ninanda preocuparin. Jehová Dios paipa sirvijcunata ninanda juyajtaca seguromi capanchi (Sal. 32:10). Jehová Dios ñucanchita imashina juyaihuan tratashcata pensarinaca, ñucanchimanda ninanda preocuparishcata cuenta japishpami paiman ashtahuan quimiripashun. Shinaca Jehová Diosta mañajushpaca, “canba juyaitaca ninandami minishtipani” nishpami mañaita ushapanchi. Shinallata Jehová Dios ñucanchita intindishpa ayudangapaj listo cashcamandami ñucanchi imamanda preocuparijushcata tucuita villashpa mañaita ushapanchi (Sal. 145:​18, 19).

20. Jehová Diospa juyaica ¿imashinata paiman ashtahuan quimirichun ayudan?

²⁰ Shuj rupajuj ninaca chiri chiri tutapica cunujlla ali sintirichunmi ayudan. Shina cuendallatami Jehová Diospa juyaipash tranquilo cushilla sintirichun ayudan. Chaimi paimanga ashtahuan quimirina munaita charipanchi. Jehová Diospa juyaica ashtaca ushaitami charin. Chaimandami Jehová Dios quiquinda juyajta yachashpaca cushilla cana capangui. Shinaca tucuicunallatami ‘Mandaj Diostami juyani’ ningapaj munapanchi (Sal. 116:1).