Huaquin jaricunaca huarmigucunata na valichishpa trataj culturapimi viñashca can. Por ejemplo, Boliviapi superintendente de circuito Hans shuti huauquiguca ninmi: “Huaquingunaca, jaricunami huarmicunata ashtahuan yali can nij culturapimi viñashca. Chaimandami jaricunaca huarmicunamanda yali sintirishpa huarmigucunataca imapapash na valijtashna tratan”. Shinallata Taiwán llactamanda Shengxian shuti shuj anciano huauquica ninmi: “Ñuca causaj pushtupica huarmicunaca jaricunapa asuntocunapica nimamanda na satirinachu can nishpami pensan. Shinalla shuj jari shuj huarmigupa nishcata valichijpica chai jaritaca shujcunaca ñana respetohuan ricunllu ninmi”. Huaquin jaricunaca huarmigucunata na valichishcataca, na respetashcataca nali, mapa chistecunata rurashpami ricuchin.

Huarmigucunata na valichij culturapi viñashca cashpapashmi chai yuyaicunata saquishpami cambiocunata ruraita ushan (Efes. 4:​22-24). Cambiashpa catingapaca Jehovapa ejemplotami catina can. Cai temapica, huarmigucunata Jehová imashna tratajtami yachajupashun. Shinallata huauquigucuna Jehovapa ejemplota catishpa imashna huarmigucunata tratana cashcata y ancianocunapash huarmigucunata ali tratashpa ali ejemplota ricuchina cashcatapashmi yachajupashun.

HUARMIGUCUNATACA JEHOVÁ DIOSCA ¿IMASHNATA TRATAN?

Huarmigucunata imashina tratanamandaca Jehová Diosca alipacha ejemplomi can. Jehová Diosca paipa tucui sirvijcunata llaqui, juyaj Diosmi can (Juan 3:16). Jehovata sirvij huarmigucunataca paica ushigucunatashnami ninanda juyan. Cunanga huaquin ejemplocunapimi Jehová Dios imashina huarmigucunata juyan cashcata, respetan cashcata ricupashun.

 Huarmigucunataca igual alimi tratan. Jehová Diosca jarita y huarmitapash paiman parecidotami rurarca (Gén. 1:27). Jehová Diosca huarmigucunata yali jaricunata ñapash intindin o inteligentetaca na rurarcachu. Shinallata huarmigucunatapash jaricunata yali ñapash imatapash rurashpa yachajuna ushaita charichunbash na curcachu. Jehová Diosca ishcanditallatami Bibliapa yachachishcacunata ali intindichun y ali cualidadcunatapash ricuchi ushachun rurarca. Jehová Diosca jaricunatalla yali alicachishpaca na ricunllu (2 Crón. 19:7). Jehovapi tucui shunguhuan confiaj jarigucuna, huarmigucunapash Jehovapaca ninan valishcami can. Jehová Diosca jarimanbash, huarmimanbash jahua cielopi o cai alpapi causana esperanzataca igualmanllatami carashca. Jahua cieloman rina esperanzata charijcunaca reycuna y sacerdotecuna shina sirvina oportunidadtami charin (2 Ped. 1:1). Shinaca Jehová Diosca huarmigucunatapash ninanda valichin cashcatami yachajupanchi.

Huarmigucunataca aligutami uyan. Jehová Diosca huarmigucuna ima problemacunata charishcata o imashina sintirishcata ali intindishpami preocuparin. Por ejemplo, Raquel y Ana huarmigucunapa mañashcacunata ali uyashpami contestarca (Gén. 30:22; 1 Sam 1:​10, 11, 19, 20). Shinallata Jehová Diosca Bibliapi jaricuna, huarmigucunata aliguman uyashcatami Bibliapica escribichishpa saquirca. Por ejemplo, Abrahán runaguca, Jehovapa mandashcata uyashpami Sara huarmigu ima nishcata ali ali uyarca (Gén. 21:​12-14). Shinallata Davidca Abigaíl huarmigutaca ali ali uyashpami candaca Jehovami ñucahuan parlachun cachamushca nirca (1 Sam 25:​32-35). Jesusca, Jehovapa cualidadcunata tucuita ali ali catishpami paipa mama María huarmigutaca ali uyarca (Juan 2:​3-10). Cai ejemplocunapica Jehová Diosca huarmigucunata ali ali uyashpa respetan cashcatami ricuchin.

Huarmigucunapimi confian. Por ejemplo, Jehová Diosca Evamanga cai alpata cuidashpa ayudana responsabilidadtami curca (Gén. 1:28). Paica Evataca na valijtashnaca na ricun carcachu. Sino Adanba ninan valishca ayudaj huarmigutami ricurca. Shinallata Débora y Huldá profetisa huarmigucunamanga israelitacunata, shuj juezta y shuj reyta consejana responsabilidadtami mingarca (Juec. 4:​4-9; 2 Rey. 22:​14-20). Cunan punllapipashmi Jehová Diosca paita sirvij huarmigucunapi confiashpami huaquin responsabilidadcunata cushca. Por ejemplo, huaquingunaca publicadora, precursora y misioneracunami can. Shinallata huaquingunaca construccionbi, construccionba planocunata llujchishpami trabajan. Shujcunaca Sucursalta y Salón del Reinocunata arreglashpami trabajan. Huaquingunaca Betelpi y Oficinas Remotas de Traduccionbimi sirvin. Jehová Diosca cai tucui huarmigucunataca paipa voluntadta pactachingapami utilizan (Sal. 68:11). Shinaca Jehová Diosca huarmigucunataca na valijtashna o nimata na rurai ushashcatashnaca na ricunllu.

HUAUQUICUNACA PANIGUCUNATA JEHOVÁ DIOSHNA TRATANGAPACA ¿IMATATA RURANA CAN?

Huauquicuna, panigucunata Jehová tratanshna tratajushcata cuenta japingapaca quiquingunapa pensamientocunata, ruraicunatami yaipi charina capanguichi. Por ejemplo, caipi pensaripashun: Shuj personapa corazón sano o na sano cajta yachai ushangapaca rayos X nishca maquinami minishtirin. Shina cuendallatami Bibliapa yachachishcacuna y ali amigocunapash panigucunata ali o nali tratajushcata cuenta japichunmi ayudaita ushan.

Shuj ali amigopa ayudata mañapai (Prov. 18:17). Shujcunata respetohuan, aliguman trataj ali amigohuan parlashpa cashna tapupangui: “Panigucunataca ¿imashinata tratajupani? Panigucunaca ¿paicunata respetajushcatachu sintin? ¿Imagupipash mejoranachu cani?” nishpa. “Imagupipash mejoranami cangui” nishpa consejajpica na risintirishpa aliguman chasquipangui. Shinallata cambiocunata rurangapaj dispuesto cana capangui.

Bibliata yachajupai. Panigucunata ali o nali tratajushcata cuenta japingapaca: “¿Bibliapi yachachishcashnachu panigucunataca respetohuan ricushpa aliguman tratani?” nishpa pensaripai (Heb. 4:12). Bibliata estudiashpaca huarmigucunata ali trataj y nali trataj jaricunamandami yachajupanchi. Yachajujushpaca: “Cai jaricunamandaca ¿maijanhuanda parecini?” nishpa pensaripangui. Huaquinbica huarmicunamanda panda yuyaicunata apoyangapami huaquin huauquicunaca shuj textotalla mascan. Shinapash Jehová Dios huarmigucunamanda ciertopacha imata pensashcata ali intindingapami huauquicunaca shuj shuj textocunata mascashpa comparangapaj esforzarina can. Por ejemplo, 1 Pedro 3:7​pica quiquinba huarmigutaca respetohuan aliguman ‘faquirinalla vasogutashna’ tratana canguichi  ninmi. b Shina nishpaca ¿huarmigucuna imapapash na valin o imatapash na ruraita ushan ningapachu munan? Na. Cai shimicunata ama panda intindingapaca Gálatas 3:​26-29​pi ima nishcata ricupashun. Chai textopica Jehová Diosca jarita y huarmitapash Jesushuan cielopi gobernachun agllashcatami intindichin. Shinaca Bibliata estudiashpa, ali amigocunapa consejota mañashpa, imashna ñucanchipa panigucunata respetohuan tratana cashcata yachajupashun.

ANCIANOCUNACA ¿IMASHINATA PANIGUCUNATA RESPETASHCATA RICUCHIN?

Congregacionmanda huauquicunaca ancianocuna panigucunata imashina respetohuan tratajta ricushpami yachajuita ushan. Ancianocunaca ¿imashinata ali ejemplota ricuchita ushan? Cunanga ancianocuna panigucunata imashina juyaihuan respetan cashcata yachajupashun.

Felicitapangui. Apóstol Pabloca ancianocunapaca alipacha ejemplomi can. Pabloca Roma llactamanda huauquipanicunaman shuj cartata escribijushpaca tauca panigucunatami felicitarca (Rom. 16:12). Apóstol Pablo escribishca cartaguta liijta uyashpaca chai panigucunaca ninandami cushijushcanga. Shinallatami ancianocunaca panigucuna ali cualidadcunata charishcamanda, Jehovata sirvingapaj ninanda esforzarij cashcamandami felicitana costumbreta charin. Huauquicuna shina rurajpimi panigucunaca paicunata respetashcata y valichishcata sintin. Ancianocuna panigucunata felicitashpa animajpica paicunaca Jehovata tucui shungumi sirvishpa catinga (Prov. 15:23).

Ancianocuna panigucunata felicitajushpaca tucui shungu y imamandapacha felicitajushcatami nina can. Cunanga panigu Jessica ima nijta ricupashun: “Ñucanchita alitami rurapashcangui nishpa felicitajpica ninandami cushijunchi ninmi. Imamandapacha felicitajushcata nijpica ashtahuanmi cushijupanchi. Por ejemplo, ñucanchi huahuacunata tandanajuipi ali portarichun yachachishcamanda, Bibliata yachajujcunata pushamungapaj esforzarishcamanda felicitajpica ninandami cushijupanchi”. Ancianocuna panigucunata imamandapacha felicitajushcata nijpica panigucunaca congregacionba ninan valishca cashcata y minishtirishcapacha cashcatami sintin.

 Panigucunata ali ali uyapangui. Humilde ancianocunaca panigucuna ali ideacunata charishcatami reconocin. Chaimandami ancianocunaca panigucuna imata yuyashcata tapun. Panigucuna parlanajujpica ancianocunaca ali alimi uyan. Shina rurajpica imagu cashpapash alimi llujshin. Shinallata panigucunapash ashtahuan animadami sintirin. Panigucunapa nishcacunata ali uyanaca ancianocunataca ¿imashinata ayudashca? Betelpi sirvij Gerardo shuti shuj ancianoca ninmi: “Panigucuna imata yuyashcata nishpa parlashcamandami ñucaca ali trabajota ruraita ushashcani. Tauca panigucunaca huauquicunatapash yali tiempotami Betelpica trabajanajun”. Congregacionbica ashtaca precursora panigucunami tian. Chaimandami panigucunaca maijan territoriopi predicanatapash ali yachan. Shinallata Bryan shuti ancianopash: “Panigucunaca Jehovapa organizacionbica ninandami ayudan. Cai panigucunapa experienciamandaca ashtacatami yachajuita ushapanchi” ninmi.

Panigucuna imatapash ashtahuan ali rurangapaj nishpa imatapash nijpica ¿imamandata ancianocunaca ali uyana can? Edward shuti anciano huauquiguca cashnami nin: “Experienciata charij panigucuna ima nishcata ali uyanaca ñucanchitaca imapash situaciongunata ashtahuan ali ricuita ushachun, shinallata shujcuna imashina sintirijushcata ashtahuan ali intindi ushachunmi ayudan” ninmi (Prov. 1:5). Panigucuna ima nishcata na cati ushashpapash ancianocunaca paicuna imata pensashcata parlashcamandami ninanda agradicin.

Panigucunata ali yachachipangui. Ancianocunaca ali yachaita charishcataca panigucunata yachachingapaj tiempota llujchishpami ricuchin. Huauquicuna illajpica ancianocunaca predicación grupota llujchichunga panigucunatami yachachita ushan. Shinallata construccionbi, mantenimientopi ayudai ushachunmi panigucunataca herramientacunata o maquinacunata imashina manejanata yachachita ushan. Betelpica superintendente huauquicunaca mantenimientopi, compraspi, contabilidadpi, computadorapa programacunapi ayudai ushachunmi panigucunataca yachachin. Panigucunata yachachij ancianocunaca panigucuna imagutapash ali rurai ushashcapi confiashcatami ricuchin.

Ashtaca panigucunaca ancianocunamanda tucui imata yachajushcataca shujcunata ayudangapami utilizan. Construccionbi ayudangapaj yachajushca panigucunaca llaqui apashca pushtucunapimi huasicunata cutin shayachishpa ayudan. Cutin shuj panigucunaca predicación publicapi imata yachajushcataca shuj panigucunamanbash yachachishpami paicunapash predicación publicapi villachita ushachun ayudan. Ancianocunamanda imagutapash yachajushca panigucunaca ¿imatata yuyan? Jennifer paniguca cashnami nin: “Shuj Salón del Reinota ruranajushpa chai construccionda ñaupaman pushaj turiguca, chai construccionbi ayudachunmi yachachingapaj tiempoguta llujchirca. Cai turiguca ñuca imata rurajujpipash pendientemi carca. Shinallata ñuca imata rurashcamandapashmi felicitahuan carca. Ñucapi confiashcata ricuchishcamanda, ñucata valorashpa ricushcamandami chai turiguhuan trabajanataca ninanda gushtarcani”.

PANIGUCUNATA FAMILIATASHNA TRATANACA ALIMI CAN

Jehová Dioshnallatami ñucanchi panigucunataca ninanda juyapanchi. Chaimandami familiatashnallata tratapanchi (1 Tim. 5:​1, 2). Jehová Diosta paicunahuan igual adoranaca shuj jatuj bendicionmi can. Paicunata ñucanchicuna juyashcata, apoyashcata paicuna sintijta ricushpaca ninandami cushijupanchi. Vanessa paniguca: “Jehovapa organizacionbi cashcamandaca ninandami agradicipani. Ñañagucunata ali trataj ashtaca ashtaca turigucuna tiashcamandami tranquila sintiripani” ninmi. Taiwán llactamanda shuj paniguca: “Jehovapa organizacionbi ñucanchita valorashpa, ñucanchi imashina sintirishcata respetashpa tratashcamandaca ninandami agradicipani. Chaita ricunaca Jehovapi tucui shunguhuan crishpa catichun y paipa organizacionbi cana shuj jatun bendición cashcata cuenta japichunmi ayudahuan” ninmi.

Jehová Diosca paishnallata huauquigucuna panigucunata tratangapaj esforzarijpica ninandami cushijun (Prov. 27:11). Escocia llactamanda Benjamin shuti ancianoca “Cai mundopica ashtaca jaricunaca huarmigucunataca na respetanllu. Chaimandami Salón de Reinopica huarmigucunaca ñucanchicuna juyashcata, respetashcata sintichun munapanchi” ninmi. Shinaca ñucanchi panigucunata Jehová Dioshnallata juyaihuan, respetohuan tratangapaj tucui shungu esforzaripashunchi (Rom. 12:10).