1, 2. Jehovata sirvijcunataca ¿ima llaquicunata cungashcapi ricurita ushan?

 ÑUCANCHI causaipica imapash llaquicuna cungashcapi ricurishpami ñucanchi causaitaca ñapash cambiaita ushan. Por ejemplo, huaquin huauquipanicunapa causaihuan ima pasashcata ricupashunchi. Shuj punllaca shuj doctorca, Luis a huauquigutaca, “cáncer unguitami charingui y chai cancerca casi na rijsishcami can nircami. Shinallata huaquin quillacunatallami causagringui” nircami. Cutin Monika paniguca, paipa cusaguhuanga Jehová Diostaca ali sirvinajurca. Shinapash shuj punllaca, paipa cusa pacalla pecadocunata rurajushcatami yachaj chayarca. Cutin Olivia shuti shuj soltera paniguca paipa causajuj llactapi shuj jatun acapana shamugrijujta uyashpami chaimanda llujshishpa rina tucurca. Cutinllata paipa llactaman tigramujpica paipa huasigu totalmente tucurishcatami ricurca. Cashna llaquicunaca paicunapa causaitaca cungashcapimi cambiarca. ¿Quiquindapash talvez chashnallatachu pasapashca?

² Testigo de Jehovacunaca tucui gentecunashnallatami llaquicunata, problemacunata, unguicunata charipanchi. Shinallata ñucanchicunata, ñucanchipa crishcacunamandami shuj gentecunaca catiriashpa llaquichin. Ciertomi can Jehová Diosca llaquicuna pasachun saquishpapash, cashna llaquicunata charijpica ayudasha nishpami prometishca (Is. 41:10). Jehová Dios ñucanchita ayudajpica llaquicunahuan cashpapash cushilla cashpa, ali decisiongunata japishpami paita sirvishpa catipashun. Cai temapica ñucanchicuna llaquicunata charijpi Jehová Dios, chuscu cosascunata rurashpa ayudajtami ricupashun. Shinallata, Jehovapa ayudacunamanda beneficiaringapaj imata rurana cashcatapashmi yachajupashun.

 JEHOVÁ DIOSMI ÑUCANCHITACA CUIDANGA

3. Llaquicunahuan problemacunahuan cashpaca ¿imata ruranata difícil caita ushan?

³ Llaquicunahuan cashpa o shuj difícil situacionbi cashpaca, aliguta pensarishpa shuj ali decisionda japinaca talvezpashmi difícil caita ushan. ¿Imamandata shina nipanchi? Porque preocupacionhuan o llaquicunahuan cashpaca na aliguta pensari ushashpami imata ruranatapash na atinarin. Párrafo unopi parlashca ishcandi panigucunaca chashnami sintirirca. Olivia paniguca ninmi: “Jatun acapana shamushpa ñuca huasita tucuchijpica imata ruranatapash na atinashpami quidarcani”. Cutin Monika paniguca ninmi: “Ñuca cusa chashnapacha traicionanataca yaitapash na yashcarcanichu. Chaimandami ninanda llaquirishpa imata rurangapapash fuerza illa sintirishpa na rurai ushajurcani”. Imapash llaquicunahuan na ushajujpica Jehová Diosca ¿imashinata ñucanchitaca ayudasha nishca?

4. Filipenses 4:​6, 7​pica Jehová Diosca ¿imatata ñucanchimanga prometishca?

⁴ Jehová Diosca ¿imashinata ñucanchitaca ayudan? Bibliapica “tranquilo, ali canata” carasha nishpami prometishca (Filipenses 4:​6, 7​ta liipangui). Jehovapa amigo cashcamandallami “gentecuna na intindi ushanalla” tranquilo ali canata charita ushapanchi. Y chaica shuj jatun bendicionmi can. Jehovata ninanda mañashca jipaca ¿nachu quiquinga tranquilo sintiripashcangui? Chashna sintirishca cashpaca ‘Taita Dios tranquilo, ali canata’ cushcamandami shina sintiripashcangui.

5. Taita Dios carashca ‘tranquilo, ali canaca’ ¿imashinata ñucanchi shunguta y pensamientocunatapash cuidan?

⁵ Filipenses 4:7​pi Taita Diosmi “tranquilo, ali canata” caranga nishca jipaca ‘quiquingunapa shunguta y pensamientocunatapash cuidanga’ nijunmi. Griego shimipi ‘cuidanga’ nishpaca, contracuna ama atacachun, shuj llactata cuidaj soldadocunamanda parlangapami utilizan carca. Chai llactapi soldadocuna pungucunata cuidanajujta yachashpaca, chaipi causajcunaca tranquilomi puñun carca. Shina cuendallatami Jehová Dios carashca ‘tranquilo, ali canaca’ ñucanchi shungupi y pensamientocunapipash tranquilo ali sintirichun ayudanga (Sal. 4:8). Ñucanchi situación na ucha arreglarijpipash Ana huarmigushnallatami tranquilo sintirita ushapashun (1 Sam 1:​16-18). Shina sintirishpaca ali pensarishpami ali decisiongunatapash japita ushapashun.

6. Taita Dios caramujuj, tranquilo ali canata charingapaca ¿imatata rurana capanchi? (Fotocunata ricupangui).

⁶ Ñucanchicunaca ¿imatata rurana capanchi? Shuj llactamanda gentecunaca shuj soldadotaca cuidahuai nishpami mañaita ushan carca. Shinallata ñucanchicunapash Jehová Diostaca ‘tranquilo, ali canata’ carahuai nishpami mañaita ushapanchi. Y chaitaca carangacamanmi mañana capanchi (Luc. 11:9; 1 Tes. 5:17). Por ejemplo, chaitami huauquigu Luis y paipa huarmigupash rurarca. Huauquigu Luisca huaquin quillacunatalla causana cashcatami yacharca. Chaimandami paica paipa huarmigundi, Taita Diostaca, tranquilo ali canata carangacaman mañarca.  Huauqui Luisca ninmi: “Cashna llaquihuan cashpaca, ima tratamientota catinata o shuj cosascunamanda decisiongunata japinaca dificilmi can” ninmi. Shinapash paica “Jehovata mañanami ninanda ayudashca” ninmi. Paicunaca cutin cutinmi, “pensamientocunapi tranquilo ali sintiringapaj, ali decisiongunata japingapaj ali yachaita carahuai nishpa mañan carcanchi” ninmi. Y chashna mañashcamandami paicunaca Jehová Dios ayudashcata sintishca. Quiquinbash llaquicunata o problemacunata charishpaca, Jehovata mañanataca na saquinachu capangui. Shina rurajpica Jehová Diosca tranquilo ali canata cushpami quiquinba pensamientocunapi tranquilo ali sintirichun ayudanga (Rom. 12:12).

JEHOVÁ DIOSMI SHINLLICHISHPA AYUDANGA

7. Shuj difícil situacionbi cashpaca ¿imashinata huaquinbica sintiri ushapanchi?

⁷ Por ejemplo, si ñucanchicuna shuj difícil situacionbi cashpaca, aliguta pensarishpa shuj ali decisionda japinaca dificilmi caita ushan. Por ejemplo, mar yacupi olacunaca ratotaca shinllita, cutin ratotaca alillami jatarin. Shina cuendami llaquicunahuan cashpaca ñucanchi pensamientocunaca shujta shujta pensaita callarinchi. Ana panigupa cusagu huañujpica chaimi pasarca. Paica ninmi: “Ñuca cusagu huañushcamandaca ratotaca yapa llaqui llaqui o culira o imatapash na rurai ushanshnami sintirircani. Imashpashi ñuca cusagu huañuna carca nishpapashmi pensan carcani. Cutin shuj punllacunaca pipash ayudana illanshnami sintirin carcani. Ashtahuanbachaca ñuca cusagu rurashca cosasgucunata na rurai ushaimandami culira sintirin cariani” ninmi. Mar yacupi ola yacucuna ratotaca shinllita, ratotaca alilla cuyurinshnallatami panigupa pensamientoca carca. Shinaca ñucanchi pensamientocunapi yapata llaquirishpa ñana ushanshna sintirijujpica Jehová Diosca ¿imashinata ñucanchitaca shinllichishpa ayudan?

8. 1 Pedro 5:10​pica Jehová Diosca ¿ima nishpata prometishca?

⁸ Jehová Diosca ¿imashinata ñucanchitaca ayudan? Jehová Diosca shinllichisha nishpami prometishca (1 Ped. 5:10​ta liipangui). Shuj barco mar yacupi cajpica jatun ola yacucuna jatarishpaca barcotaca caiman chaimanmi cuyuchin. Shinapash cunanbi barcocunaca ama urmachun y shinlli shayarichunmi ishcandi ladomanllata estabilizadores nishca aparatocunata charin. Shinami barco na yapata cuyurijpi, barcopi gentecunapash tranquilo sintirin. Cai estabilizadores nishca aparatocunaca barco rijujpimi alipacha funcionan. Shina cuendallatami Jehová Dios shinllichishpa ayudachunga llaquicunahuan cashpapash na chaipi quidashpami paita sirvishpa catina capanchi.

9. Jehová Dios cushca ayudacunaca ¿imashinata ñucanchicunataca ayudan? (Fotocunata ricupangui).

⁹ Ñucanchicunaca ¿imatata rurana capanchi? Ñucanchicuna yapa llaqui llaqui, culira o imatapash na rurai ushanshna sintirinajushpaca Jehovata mañana, predicacionman llujshina,  tandanajuicunaman rinami ayudanga. Talvezpashmi ali cashca tiempopishnaca na imatapash rurai ushapashun. Shinapash imaguta rurajpipash Jehová Dios valichishpa ricunatami yarina capanchi (Lucas 21:​1-4​ta chimbapurashpa ricupangui). Bibliamanda yachajushpa estudio personalta ruranata, yachajushcapi pensaringapaj tiempota llujchinataca na cunganachu capangui. Llaqui tiempocunapi cashpa ñucanchi shungupi pensamientocunapi tranquilo sintirichunga Jehová Diosca publicaciongunata, videocunata cushpami ayudajushca. Minishtirishca temacunata mascashpa yachajungapaca JW Library^® aplicacionda, Índice de las publicaciones Watch Tower, Bibliamanda ashtahuan ali intindingapaj informacionguna nishcatami utilizai ushapangui. Ñaja parrafocunapi parlashca Monika paniguca llaqui llaqui o culira sintirijushpaca ira, traición o lealtad temacunamanda yachajungapaca chai publicaciongunapimi mascan carca. Shinami paniguca alillata sintirin carca. Paniguca: “Llaqui llaqui o yapa preocupado cashpa, chai publicaciongunamanda yachajui callarircani. Shinapash yachajui tucuchishpaca tranquila sintirin carcani. Ñuca imashina sintirijushcata Jehová ali ali intindishpa ñucata ayudajushcatami cuenta japircani” ninmi. Quiquin llaquicunahuan cajpica Jehová Diosca shungupi, pensamientocunapi tranquilo sintirishpa ñaupaman cati ushachunmi ayudaita ushan (Sal. 119:​143, 144).

JEHOVAMI AYUDANGA

10. Llaquicunahuan o problemacunahuan cashpaca ¿imashinata sintirita ushapanchi?

¹⁰ Imapash llaquicunahuan o problemacunahuan cashpaca huaquin punllacunataca talvez fuerza illa, débil debilmi sintirita ushapanchi. Chashna sintirijushcamandami imagutapash fácil ruraitaca na usharinga. Na cashpaca ñucanchi gushtashca cosascunata rurana munaipashmi illanga. Shuj carrerapi calpaj urmashpa, chaquita quibishpaca ñana ali purita ushanllu. Shina cuendami ñucanchicunapash talvez sintirita ushapanchi. Profeta Elías llaquilla cashpaca puñushpa quidangapallami munarca. Shina cuendallatami ñucanchicunapash sintirita ushapanchi (1 Rey. 19:​5-7). Imatapash na rurai ushanshna débil débil sintirinajujpica Jehová Diosca ¿imata rurashpa ayudasha nin?

11. Jehová Diosca ñucanchita ayudangapaca ¿imatata ashtahuan ruran? (Salmo 94:18).

¹¹ Jehová Diosca ¿imashinata ñucanchitaca ayudan? Ñucanchitaca siempre ayudasha nishpami prometishca (Salmo 94:18​ta liipangui). Imashinami shuj calpaj runaguca imatapash quibishpaca pipash paita ayudachunmi minishtin, shina cuendallatami ñucanchicunaca llaquicunahuan cashpaca Jehová Diosta sirvishpa catingapaca pipash ayudachun minishtipashun. Cashna ayudata minishtijuj tiempocunapimi ñucanchitaca Jehová Diosca: Ñucami “cangunapaj ali lado  maquimanda pushaj cani. Ñucami cangunataca: ‘Na manllanachu canguichi, ñucami ayudasha’” ninmi (Is. 41:13). Rey David llaquicunahuan cashpa paipa contracuna paita huañuchingapaj munanajujpica Jehová paita ayudajushcatami sintirca. Chaimandami Davidca: ‘Cambaj ali lado maquihuanmi charihuashcangui’ nirca (Sal. 18:35). Shinapash Jehová Diosca ¿imashinata ayudan?

12. Llaqui llaqui, nali sintirijujpica ñucanchita ayudangapaca Jehová Diosca ¿picunatata utilizaita ushan?

¹² Jehová Diosca ashtaca viajecunatami ñucanchita ayudangapaca shuj gentecunaman ñucanchita ayudana munaita cun. Por ejemplo, shuj viajeca David desanimarishca cajpica paipa amigo Jonatán visitagrishpami animashpa ayudarca (1 Sam 23:​16, 17). Cutin Eliastaca pai minishtijuj cosascunahuan ayudachunmi Jehová Diosca Eliseota cacharca (1 Rey. 19:​16, 21; 2 Rey. 2:2). Shinallata Jehová Diosca ñucanchi familiata, amigocunata y ancianocunata utilizashpami ayudaita ushan. Ñucanchicuna llaqui llaqui, nali sintirijushpaca talvezpashmi sololla cangapaj munapashun. Chashna sintirinaca normalmi caita ushan. Shinapash Jehová ayudamanda beneficiaringapaca ¿imatata rurana capanchi?

13. Jehovapa ayudata chasquingapaca ¿imatata rurana capanchi? (Fotocunata ricupangui).

¹³ Ñucanchicunaca ¿imatata rurana capanchi? Amigocunamanda ama caruyangapaj esforzaripashunchi. Amigocunamanda caruyashpaca ñucanchipilla y ñucanchi charishca problemacunapillami yapata pensari callarinchiman. Ñucanchillata shina rurashpaca nali decisiongunatami japita ushanchiman (Prov. 18:​1, TNM-S). Huaquinbica ñucanchicunaca sololla canatami minishtipanchi. Ashtahuanbachaca shuj jatun llaquita charishpami sololla cangapami munaripanga. Shinapash yapa tiempota sololla cangapaj munashpaca, Jehovapa ayudatami na chasquinajupanchiman. Shinaca chai horascunapi difícil cajpipash ñucanchi familiacunapa, amigocunapa y ancianocunapa ayudata chasquipashunchi. Paicunataca quiquinda ayudachun Jehová Diosca utilizajun (Prov. 17:17; Is. 32:1; 2, TNM-S).

JEHOVAMI CUSHICHINGA

14. ¿Imamandata manllaita ushapanchiman?

¹⁴ Talvez huaquinbica ninan manllaihuanmi sintirita ushapanchi. Bibliapica Taita Diosta sirvijcuna, imapash problemamanda, contracunapa culpamanda ninanda manllashcatami parlan (Sal. 18:4; 55:​1, 5). Ñucanchicunaca ¿imapash jarcaicunata charipanchichu? Por ejemplo, escuelamanda, trabajomanda compañerocuna, familiacuna o gobiernocuna Jehovata ama sirvichun ¿imapash jarcaicunata churanajunllu? O na cashpaca ¿shuj grave unguita charimandachu huañuna peligrohuan capangui? Chashna difícil situaciongunapi cashpaca, sololla pipash ñucanchita na ayudaita ushajtashnami sintipanchiman. Shinapash  ñucanchita ayudangapaca Jehová Diosca ¿imatata ruran?

15. Salmo 94:19​pi nishcashnaca, Jehová Diosca ¿imatata prometishca?

¹⁵ Jehová Diosca ¿imashinata ñucanchitaca ayudan? Paica ñucanchita consolashpami tranquilo sintirichun ayudan (Salmo 94:19​ta liipangui). Por ejemplo, caipi pensaripashun: Ninanda rayushpa tamiajujpica shuj uchilla huahuaguca manllarishpami puñuitapash na ushan. Chaimi taitaca cai huahuagu tranquilo sintirishpa puñui ushachunga juyaihuan ugllashpa paihuan quidan. Shina cuendallatami imapash problemacunahuan, llaquicunahuan cashpa ninan manllaihuan sintirijujpica, Jehová Diosca ñucanchita ugllanshna consolashpami tranquilo sintirichun ayudan. Jehová Dios ñucanchita cushichichun o consolachunga ¿imatata rurana capanchi?

16. Jehová Dios ñucanchita cushichichun munashpaca ¿imatata rurana capanchi? (Fotocunata ricupangui).

¹⁶ Ñucanchicunaca ¿imatata rurana capanchi? Jehová mañana y Bibliata siempre liina costumbreta charinaca importantemi can (Sal. 77:​1, 12-14). Cai costumbreta charishpaca imapash llaquicunamanda yapata preocuparijushpaca Jehovapa ayudatami primero mascaripanga. Ñucanchicuna imamanda preocuparijushcata, imamanda manllajushcataca tucuitami Jehová Diosman villana capanchi. Chai jipaca Bibliapa consejocunahuan Jehová Dios ñucanchita imashina cushichijta yaipi charipashunchi (Sal. 119:28). Bibliapica llaquicunahuan cajpi cushichij, animachij shimicunami tian. Por ejemplo, cai animachij shimicunaca Job, Salmos y Proverbios librocunapimi can. Ashtahuanbash Mateo capítulo 6​pica Jesuspa shimicunapashmi tianajun. Shinaca, Jehová Diosta mañashpa y Bibliata siempre liishpaca imashina Jehová Dios quiquinda siempre cushichijtami cuenta japipangui.

17. ¿Imatata yaipi charina capanchi?

¹⁷ Ñucanchicuna llaquicunahuan cajpi, Jehová Diosca ñucanchita nunca na jichushpaca saquinataca siempre yaipi charina capanchi (Sal. 23:4; 94:14). Jehová Diosca ñucanchicunataca siempre cuidanata shinllichishpa cushichishpa ayudanatami prometishca. Isaiasca Jehová Diostaca: “Canda na cungashpa yariajlla causajcunataca, canmi cuidashpa casilla ali causaipi charingui. Paicunaca, candami yariajlla causanajun” nircami (Is. 26:3). Shinaca, Jehovapi tucui shunguhuan confiashpa paipa tucui ayudacunatapash ali aprovechapangui. Shina rurashpaca, jatun llaquicuna ricurijpipash aguantashpami ñaupaman catita ushapangui.