MIÉRCOLES 18 de enero de 2023 huatapimi jw.org paginapica huauqui Gage Fleegle y Jeffrey Winder huauquicunaca Cuerpo Gobernantepimi sirvigrinajun nishpami villarca. Cai ishcai huauquicunaca ashtaca huatacunatami Jehovata tucui shunguhuan sirvinajushca.

Huauqui Gage Fleeglega Pensilvania oeste ladopimi viñarca. Paitaca huahuamandapachami paipa taitamamacuna Bibliamanda yachachirca. Huauquigu joven caj horasca paipa taitamamacunaca predicangapaj minishtijuj uchilla puebloguman causangapami rirca. Asha tiempo jipagullami huauquiguca 20 de noviembre de 1988 huatapimi bautizarirca.

Paipa taitamamacunaca Jehovata tiempo completopi sirvichunmi siempre animan carca. Animangapaca taitamamacunaca superintendentecunata y betelitacunatami huasiman invitan carca. Shinami huauquiguca Jehovata sirvina ninanda cushichin cashcata ricurca. Huauquiguca bautizarishca jipa 1 de septiembre de 1989​pimi precursor regular shina sirvi callarirca. Ishcai huata jipallami huauquiguca Betelpi sirvi callarirca. Paica 12 huatacunata charishpami Betelpi sirvina munaita chari callarirca. Huauquiguca octubre de 1991 huatapimi Brooklyn llactapi Betelpi sirvi callarirca.

Huauquiguca Brooklyn Betelpica encuadernación nishca departamentopimi 8 huatacunata sirvirca. Jipamanga Departamento de Serviciopi sirvichunmi asignarca. Chai tiempopica huaquin huatacunatami ruso shimita parlaj congregacionbi sirvirca. Huauquiguca 2006 huatapimi Nadia paniguhuan cazararca. Chai horasmandapachami Betelpi ishcandi sirvinajun. Paicunaca ishcandimi portugués shimita parlaj congregacionbi sirvirca. Cunanbica 10 huatacunata yalimi español shimita parlaj congregacionbi sirvinajun. Ashtaca huatacunata Departamento de Serviciopi sirvishca jipami huauquigutaca Comité de Enseñanza nishca departamentoman yalichirca. Y chai jipaca Comité de Servicio departamentomanmi  yalichirca. Marzo de 2022 huatapica Comité de Servicio del Cuerpo Gobernante nishcapi sirvichunmi huauquigutaca churarca.

Huauquigu Winderca California llactapimi viñarca. Huauquigumanga paipa taitamamacunami Bibliamandaca yachachirca. Paica 29 de marzo de 1986​pimi bautizarirca. Bautizarishca shuj quilla jipagullami precursor auxiliar shina sirvi callarirca. Huauquiguca precursor auxiliar shina sirvinata ninanda gushtaimandami 1 de octubre de 1986​pica precursor regular shina sirvi callarirca.

Huauqui Winder joven caj horasca paipa ishcai mayor huauquicunata Betelpi visitangapami rirca. Huauquiguca paipa huauquicunata Betelpi visitangapaj rishpami. Betelpi sirvingapaj solicitudta jundachina munaita chari callarirca. Huauquigutaca mayo de 1990​pimi Wallkill llactapi Betelman invitarca.

Huauquiguca Betelpi shuj shuj asignaciongunatami charirca. Por ejemplo, Departamento de Limpiezapi, Departamento de Haciendapi y Betelpa oficinapipashmi asignaciongunata charirca. 1997 huatapica Angela paniguhuanmi cazararca. Chai horasmandapachami ishcandi Betelpi sirvinajun. Huauquigutaca 2014 huatapimi Warwick llactaman yalichirca. Chaipimi huauquiguca jatun Betelpa construccionbi ayudashpa trabajarca. 2016 huatapica Patterson llactamanmi causangapaj rirca. Y chai huatapillatami Centro Educativo de la Watchtower Patterson llactamanmi causangapaj rirca. Chaipimi Servicio de Audio y Video nishca departamentopi sirvirca. Chuscu huatacuna jipami Warwick llactaman tigrarca. Chaipimi huauquigutaca Comité de Personalpi sirvichun asignarca. Marzo de 2022 huatapica Comité de Personal del Cuerpo Gobernante nishcapi sirvichunmi huauquigutaca churarca.

Cai ishcai huauquigucunaca Jehová Dios carashca regalomi can (Efes. 4:8). Cai ishcai huauquigucuna shinllita trabajanajushcamandami Jehová paicunata bendiciachun mañapanchi.