1. Jehovata sirvijcunaca pundamandapacha ¿imatata rurashca?

 TUCUICUNALLATAMI Jehová Dioshuan ali amigo canataca ninanda valichipanchi. Pundamandapachami ashtaca millón gentecunaca chashnallata pensapashca (Sal. 104:​33, 34). Ashtacacunami Jehovapa voluntadta primero pactachingapaj ninanda esforzarishca. Por ejemplo, Israel llactamanda nazareo runacunami chaita rurarca. Cai runacunaca ¿picunata carca? Y paicunamandaca ¿imatata yachajupanchi?

2. a) Nazareo gentecunaca ¿picunata carca? (Números 6:​1, 2). b) ¿Imamandata huaquin israelitacunaca nazareo shina Jehovata sirvingapaj munarca?

² Hebreo shimipi nazareo palabraca “shicanyachishca” nishca significadotami charin. Cai israelitacunaca Jehovapa voluntadta paicunapa causaipi primero churashpa paita sirvingapaj munajcunami carca. Moisesman Cushca Leypi nishcashnami jari cashpa o huarmi cashpapash asha tiempota nazareo shina Jehovata sirvingapami Jehová Diostaca candallami sirvisha nishpa prometita usharca (Números 6:​1, 2​ta liipangui). a Jehová Diosta nazareo shina sirvingapaj prometishcacunaca Jehovapa huaquin mandashcacunatami pactachina carca. Y chai mandashcacunata caishuj israelitacuna pactachina obligaciondaca na charircachu. Pero huaquingunaca ¿imamandata nazareo shina Jehovata sirvingapaj munarca? Jehovata tucui shunguhuan juyaimanda y paicunata ninanda bendiciashcamanda agradicishcata ricuchingapami Jehová Diosta shina sirvingapaj munashcanga (Deut. 6:5; 16:17).

3. ¿Imacunapillata nazareo gentecunahuanga igual capanchi?

 ³ Moisés Cushca Leypa randi ‘Cristopa ley’ tiai callarijpica huaquin Jehovata sirvijcunaca nazareo shina sirvitaca ñana usharcachu (Gál. 6:2; Rom. 10:4). Nazareo gentecunashnallatami ñucanchicunapash Jehovata tucui shunguhuan, tucui causaihuan, tucui yuyaihuan, tucui ushaihuanmi paita sirvingapaj munapanchi (Mar. 12:30). Chaitaca Jehovata candallami sirvisha nishpa mañashpami ricuchinajupanchi. Y chaita pactachingapaca Jehovapa voluntadta ñucanchi causaipi primero churashpami paita sirvingapaj esforzarina capanchi. Cunanga nazareocuna paicunapa promesata imashina pactachishcatami ricupashun. Shinallata Jehovaman rurashca promesata pactachi ushangapaj, imashina paicunapa ejemplo ñucanchita ayudai ushashcatapashmi yachajupashun (Mat. 16:24). b

ÑUCANCHI GUSTASHCA COSASCUNATA SAQUINGAPAJ DISPUESTO CAPASHUNCHI

4. Números 6:​3, 4​pi nishcashnaca nazareo gentecunaca ¿imata rurangapata dispuesto carca?

⁴ (Números 6:​3, 4​ta liipangui). Nazareo gentecunaca tragota, uvasta y pasas nishcacunataca na micunachu carca. Cai tucui cosascunataca caishuj israelitacunaca tranquilomi micuita ushan carca. Bibliapica vinoca Jehovapa regalo cashcatami ricuchin. Chaimandami ‘gentecunapa shunguta cushichij’ nin (Sal. 104:​14, 15). Nazareo tucushca gentecunaca Jehovaman rurashca promesata pactachingapami cai cosascunata micunata saquingapaj dispuesto carca. c

5. Madián y Marcela cusahuarmigucunaca ¿imamandata cambiocunata rurarca?

⁵ Nazareo runacunashnallatami ñucanchicunapash Jehová Diosta ashtahuan sirvingapaca huaquin cosascunatami saquina tucupashcanchi. Cunanga Colombia llactamanda Madián y Marcela d cusahuarmimanda yachajupashun. Paicunaca ashtaca culquita ganaimandami shuj juyailla huasigupi causan carca. Shinapash Jehovata ashtahuan sirvingapaj munaimandami cambiocunata ruranata decidirca. Paicunaca nin: “Ashalla cosasgucunahuanlla causangapami uchilla cuartoguman causangapaj rircanchi, shinallata carrotapashmi jaturcanchi”. Madián y Marcela cusahuarmigucunaca ashtahuan predicangapaj munaimandami cai cambiocunata rurarca. Chaita decidishcamandaca cushillapachami can.

6. ¿Imamandata Jehovata sirvijcunaca gushtashca cosascunata saquingapaj dispuesto capanchi? (Dibujota ricupangui).

 ⁶ Jehovata sirvijcunaca paita ashtahuan sirvingapaj tiempota llujchinataca ninandami gushtapanchi (1 Cor. 9:​3-6). Jehová Diosca paita sirvichun ñucanchi gushtashca cosascunata saquichunga na obliganllu. Y ñucanchi saquishca cosascunaca na malochu can. Por ejemplo, huaquin huauquipanicunaca paicunapa huasita saquinami tucushca. Shinallata ali trabajota o animalgucunatapashmi saquina tucushca. Huaquin huauquipanicunaca cazarashcandi na huahuacunata charinatami decidishca. Cutin solterocunaca soltero paranatami decidishca. Cutin shujcunaca familiamanda y amigocunamanda carupi cana cashpapashmi predicangapaj minishtijuj pushtucunaman sirvingapaj rishca. Ashtacacunami Jehová Diosta ashtahuan sirvingapaj munaimanda, ñucanchi gushtashca cosascunata saquingapaj dispuesto capashcanchi. Jehová Diosca, ñucanchicuna paita sirvingapaj ashalla cosasgucunata rurajpipash paica ninandami valichin (Heb. 6:10).

NA MANLLASHPAMI DIFERENTE CASHCATA RICUCHINA CAPANCHI

7. ¿Imamandata nazareocunapaca Jehovaman rurashca promesata pactachinaca huaquinbica difícil carca? (Números 6:5; dibujota ricupangui).

⁷ (Números 6:5​ta liipangui). Jehovaman shuj promesata rurashca caimandami nazareocunaca ajchata na rutuna carca. Shina rurashpami Jehovapa autoridadta tucuipi respetashcata ricuchirca. Shinaca shuj israelita ashtaca tiempota nazareo shina Jehovata sirvijuimandami ajchaca viñan carca. Chaitami caishuj israelitacunaca cuenda japin carca. Nazareocunaca shuj israelitacuna nazareo shina sirvichun apoyajpica tranquilomi sintirin carca. Pero chai tiempocunapica huaquin israelitacunaca nazareocunataca na valichinllu carca, respetaitallapash na respetanllu carca. Profeta Amospa tiempocunapica apóstata israelitacunaca nazareocuna Jehovaman rurashca promesata ama pactachichunmi ‘vinota ufiachun’ cun carca (Amós 2:12). Chaimandami nazareocunapaca caishuj israelitacunamanda diferente canaca difícil carca. Y Jehovaman promesata rurashcata pactachingapapash ninandami esforzarina carca.

8. Benjaminba ejemplomandaca ¿imatata yachajupanchi?

⁸ Ñucanchicuna imamandapash manllaita charishpapash Jehovapa ayudahuanga shujcunamanda diferente cashcatami ricuchita ushapanchi. Cunanga Noruega llactamanda 10 huatagucunata charij Benjamin huahuamandami yachajupashun. Cai huahuagupa escuelapica Ucrania llactapi guerra tiashcata apoyanchi nishpami celebrarca. Chaipica huahuacunaca Ucrania llactapa banderapa colorta charij ropacunahuanmi candana carca. Cai cosascunapi na participangapaj munaimandami Benjamin huahuaguca carullagupi  quidangapaj munajurca. Shina carullapi quidajujta paipa maestra ricushpami: “Caipimi canchi ucha shamui” nishpa cayarca. Benjamin huahuaguca na manllashpami paipa maestraman quimirishpaca, “política cosascunapica na chapurinichu. Shinallata ashtaca testigocunami guerraman na rimanda carcelpi can” nishpapashmi explicarca. Chaimi profesoraca na imatapash nishpa tranquilo saquirca. Pero cai huahuagupa compañerocunaca imamanda paicunahuan na igual candashcamandami tapui callarirca. Chaimi Benjamin huahuaguca ninanda manllarishpa huacangapaj munarca. Shina cashpapash huahuaguca shinlli tucushpami paipa maestraman imashina explicashcashnallata paipa compañerocunamanbash explicarca. Jipamanga Benjamin huahuaguca ñuca crishcacunamanda parlachunga Jehovami ayudahuarca nishpami taitamamamanga villarca.

9. Jehová Diostaca ¿imashinata cushichita ushapanchi?

⁹ Jehovapa mandashcacunata cazushpa causajpica gentecunaca paicunamanda diferente cashcatami cuenta japin. Trabajopi o escuelapi cashpapash testigo de Jehová cashcataca na manllashpami ricuchina capanchi. Shinapash gentecunaca ashtahuan nali ruraicunatami rurashpa catinga. Chaimandami Bibliapa consejocunata pactachishpa causangapaj y predicashpa ñaupaman catinaca ashtahuan difícil caita ushanga (2 Tim. 1:8; 3:13). Shinapash Jehovata sirvijuimanda, shuj gentecunahuan diferente cashcata ricuchishpaca Jehová Diostaca ninandami cushichipashun (Prov. 27:11; Mal. 3:18).

JEHOVAPA VOLUNTADTA PRIMERO PACTACHIPASHUNCHI

10. Números 6:​6, 7​pi mandashcata pactachinaca ¿imamandata nazareocunapaca na fácil carca?

¹⁰ (Números 6:​6, 7​ta liipangui). Nazareocunaca huañushca gentecunapamanga na quimirinachu carca. Shinapash caita pactachinaca facilshnallami ricurin carca. Pero paicunapa familia huañujpica caita pactachinaca dificilmi carca. Chai tiempopica huañushcata pambangapaj seguranajushpaca huañushcapa ladopi cana costumbremi tiarca (Juan 19:​39, 40; Hech. 9:​36-40). Chaimandami nazareocunaca cai costumbrecunata rurashpa catinajujpi paicunahuan caitaca na usharca. Familiacuna huañushcamanda llaquillapacha sintirishpapash, Jehovaman rurashca promesata pactachingapaj esforzarishpaca shinlli feta charishcatami ricuchin carca. Shinallata paicuna aguantashpa ñaupaman catichun Jehová fuerzata cushpa ayudan cashcataca seguromi capanchi.

11. Familiapi problemacuna ricurijpica ¿imatata rurana capanchi? (Dibujota ricupangui).

¹¹ Cristianocunaca Jehovatallami sirvisha nishpa prometishcataca pactachingapapachami  esforzaripanchi. Caita pactachingapaj munashcataca ñucanchi decisiongunahuan y familiapi imapash problemacuna ricurijpi aliguman arreglashpami ricuchipanchi. Shinallata familiata cuidangapaj esforzarishpapash, Jehovapa voluntadta primero pactachingapami esforzaripanchi (Mat. 10:​35-37; 1 Tim. 5:8). Jehovapa ñaupapi ali ricuringapaj munaimandami huaquinbica ñucanchi familia na gushtashca decisiongunata agllana tucupashun.

12. Familiapi problemacuna ricurijpica Alexandru huauquiguca ¿imatata rurarca?

¹² Cunanga Alexandru y Dorina cusahuarmihuan ima pasashcata ricupashun. Paicunaca shuj huatatami Bibliata estudianajurca. Shinapash Dorinaca Bibliata estudianata saquinatami decidirca. Paipa cusa Alexandrupash chaitallata rurachunmi munarca. Pero huauquiguca Bibliata yachajushpa catingapaj munashcataca aligumanmi explicarca. Shinapash Dorinaca ninanda culirashpami paipa cusataca Bibliata estudianata saquichun obligangapaj munarca. Huauquiguca paipa huarmigu imamanda shina jarcajushcataca na intindircachu. Dorinaca, paipa cusata criticashpa, nali trataimandami huauquiguca Bibliata estudianata saquingapaj munarca. Shinapash huauquiguca yachajushpa catingapami esforzarirca. Shinallata paipa huarmigutapash juyaihuan, respetohuan tratashpami catirca. Tiempohuanga huauquigupa ejemplomi, Dorina Bibliata cutin estudiashpa Jehovata sirvi callarichun ayudarca. (Cai experienciataca jw.org paginapi “Bibliamanda yachajushpami gentecunapa causaica cambiashca”, nishca partepi, Alexandru y Dorina Vacar: “Juyaita charishpaca, llaquita apanllami, shujcunatapash llaquinmi”, nishca videota ricupangui).

13. Jehovata y familiacunata juyashcataca ¿imashinata ricuchita ushapanchi?

¹³ Jehovami familiacunataca callarichirca. Shinallata cushilla causachunbashmi munarca (Efes. 3:​14, 15). Ciertopacha cushilla causangapaj munashpaca Jehovatami tucuipi cazuna capanchi. Paica ñucanchi gushtashca cosascunata saquishpa paita sirvingapaj esforzarijushcata ricushpaca ninandami valoran. Shinallata ñucanchi familiacunata juyaihuan, respetohuan tratashpa cuidangapapashmi esforzaripanchi (Rom. 12:10).

NAZAREOCUNASHNA CANGAPAJ RANDIMANDA ANIMARIPASHUNCHI

14. ¿Picunatata ashtahuan animana capanchi?

¹⁴ Tucui Jehovata sirvingapaj munajcunaca ñucanchi gushtashca cosascunata saquingapaj dispuestomi cana capanchi. Huaquinbi difícil cajpipash ñucanchi gushtashca cosascunata saquishpa Jehová Diosta ashtahuan sirvingapaj ¿imashinata randimanda animarita ushapanchi?  Ali shimicunahuanmi randimanda animarita ushapanchi (Job 16:5). ¿Quiquinba congregacionbica pipash minishtirishcahuanlla causashpa Jehová Diosta ashtahuan sirvingapaj esforzarijujta rijsipanguichu? O ¿shuj joven huauquigu paipa compañerocunamanda diferente cashcata ricuchingapaj esforzarijushcata rijsipanguichu? Na cashpaca ¿shuj huauqui o pani o Bibliamanda yachajuj, Jehovata sirvijushcamanda familia contrashcata rijsipanguichu? Paicunata animangapaj tiempoguta ali aprovechapashunchi. Shinallata paicuna gushtashca cosascunata saquishpa, Jehovata sirvingapaj esforzarijushcata nishpa animapashunchi. Shinallata Jehovata ashtahuan sirvingapaca ashtaca cosascunatami ruranajunguichi nishpapashmi animaita ushapanchi (Filem. 4, 5, 7).

15. Tiempo completopi sirvij huauquipanicunata ayudangapaca ¿imatata shujcunaca rurashca?

¹⁵ Tiempo completopi sirvij huauquipanicunataca imagupipash ayudangapami esforzarina capanchi (Prov. 19:17; Heb. 13:16). Sri Lanka llactapi causaj shuj mayorlla paniguca chaita ruranatami decidirca. Paniguca ashagutalla charishpapash paipa pensión culquiguta yalillaguta cujpimi, culqui faltalla ishcai joven precursora panigucunata ayudanata decidirca. Chaimandami paniguca cada quilla cai joven panigucunapa telefonomanda pagangapaj asha culquiguta alichin carca. Cai paniguca juyaimandami shina ayudarca.

16. Nazareocunamandaca ¿imatata yachajupanchi?

¹⁶ Nazareo gentecunapa ejemplomandaca ashtacatami yachajupashcanchi. Shinallata Jehová Diosmandapash ashtacatami yachajupanchi. Jehová Diosca ñucanchicuna candallami sirvisha nishpa prometishcata pactachingapaj munashcata y paipa ñaupapi ali ricuringapaj ninanda esforzarinajushcataca alimi yachan. Shinallata ñucanchicunaca Jehovata juyashcata ricuchina oportunidadtami charipanchi (Prov. 23:​15, 16; Mar. 10:​28-30; 1 Juan 4:19). Jehová Diosca nazareo gentecunapa rurashcacunataca ninandami valichirca. Chaita ricushpami ñucanchipa rurashcacunatapash valichin cashcata cuenta japipanchi. Shinaca Jehová Diosta tucui shunguhuan sirvishpa catipashunchi.