Jehová Dios carasha nishca alpacunamanmi Josué runaguca israelitacunataca pushana carca. Chaica Josué runagupaca shinllimi cashcanga. Chaimi Jehová Diosca Josuetaca cashna nirca: ‘Na manllashpa, shinllipacha tucungui’. “Cai libropi mandashcata leyinataca, ima horapash na saquinachu cangui. Ashtahuangarin chai mandashcataca punllapash, tutapash yarijunallami cangui. Chai escribishcacunapi mandashcashnallata, tucuita cazushpa pactachingapajmi, chashna rurana cangui. Chashna pactachishpami, cambaj causaipipash aliguta causangui. Tucui imatalla can rurashcapash, alimi Ilujshinga” nishpa (Jos. 1:7, 8).

‘Tucurimui punllacunapi’ causanajuimandami tucuicunallata ‘jatun llaquicunata’ charipanchi (2 Tim. 3:1). Josué runagushna ñucanchicunapash cushilla causangapaca cada punllami Bibliata liina capanchi. Shinami ima llaquicuna ricurijpipash Bibliapa consejocunata cazushpa chai llaquicunata chimbapurashun.

Bibliata yachajuna minishtirishca cajta yachashpapash Bibliata imashina yachajunataca na atinanchichu. Huaquinbicarin Bibliata yachajunatapash na gushtanchichu. Shinapash “ Cai yuyaicunata rurapangui” nishcami Bibliata ali yachajuchun ayudanga.

Shuj salmistaca nircami: “Mandaj Dios mandashcacunaca, imapajpash alipacha cashpami, shungutaca cushichin” nishpa (Sal. 19:8). Bibliata ashtahuan intindishpaca Bibliapa valishca yuyaicunatami yachajupangui. Chaica cushillami sintiripangui.

Ñucanchicunaca na Josué runagushna shuj llactata ñaupaman pushana tucunchichu. Shinapash tucuicunallatami imapash problemacunata charipanchi. Shinaca Josué runagushnami Bibliata yachajushpa imata yachajushcata ñucanchi causaipi pactachina capanchi. Shina rurashpaca ñucanchillatami cushilla causashun.