1, 2. Jehová Diosta ricunshna causanaca ¿imatata ningapaj munan?

‘TUCURIMUI punllacunapi’ causanajuimandami jatun llaquicunata charipanchi (2 Tim. 3:1). Chaimi cai alpapi nali ruraicunata Jehová Dios tucuchingacamanga llaquicuna mirashpa catinga. Shinapash Jehová Diosca ñallami shuj casilla ali causaiguta apamunga. Shinaca tapuripashunchi: ¿Pipa ayudatata mascanajupanchi? nishpa. Shina tapujpica Jehová Diospa ayudata ninchimanmi. Shina nishpaca alitami ninajunchiman.

² Jehová Diosta ricunshna causanaca ¿imatata ningapaj munan? Cunan punllapi problemacunata charishpapash ¿imashinata Jehová Diosta ricunshna causai ushapanchi? Ashtaca huatacuna huashamanga, Salmo librota escribij runaguca nircami, ima problemata charishpapash Jehovapa ayudatami minishtinchi nishpa (Salmo 123:1-4, liingui). Jehová Diosta ricunshna causanataca shuj sirvij runahuanmi salmistaca chimbapurarca. Shuj sirvij runaca paipa amo micunaguta carachunlla, cuidachunllaca na shuyanllu. Chaipa randica paipa amo imashina cashcata ricushpami amopa munaita tucuipi cazungapaj munan.  Shinallatami Jehová Diospa munai ima cajta ali intindingapaca Bibliata cada punlla liina capanchi. Shinami paipa munaita pactachishpa causashun. Chaimi Jehová Diosca ñucanchita ayudanga (Efes. 5:17, NM ).

3. Jehovata ricujunshna causachunga ¿imacunata jarcai ushan?

³ Imapash ruraicunapi ocuparijushpami Jehová Diosta ricunshna causanata saquinchiman. Punda tiempopi Jesuspa amiga Martahuan ima tucushcata ricupashunchi. Martaca Jehovata ali sirvij huarmigu cashpapashmi Jesuspa yachachishcacunata uyanapa randica ‘micunaguta carangapaj musparijurca’ (Luc. 10:40-42). Jesús paipa huasipi cajpipashmi Martaca shina rurashpa catirca. Shinallatami ñucanchitapash pasai ushan. Shinaca Jehovata ricujunshna causachunga ¿imacunata jarcai ushan? Cai temapica shujcunapa ruraicuna Jehovata sirvinapi imashina jarcajtami yachajupashun. Shinallata Jehovata ricujunshna causangapaj imata ruranatapashmi yachajupashun.

4. Moisesca ¿imatata siempre ruran carca?

⁴ Moisesca siempremi Jehová Diospa ayudata mañan carca. Chaimi Moisesca ‘pipa ñavipipash na ricurij Diosta ricunshna aligutapacha catirca’ (Hebreos 11:24-27, liingui). Bibliapica cashnami nin: “Israel llactapica, Moisés runashna shuj villaj runaca, ima horapash na tiarcachu. Mandaj Diosca, Moisesta rijsishcamandami, ñavi ñavi rimajurca” nishpa (Deut. 34:10). Moisesca Jehovapa ali amigo cashpapash Jehová carasha nishca alpacunamanga na yaicui usharcachu (Núm. 20:12). Shinaca ¿imamandata Moisesca Jehová carasha nishca alpacunamanga na yaicurca?

5-7. a) Egipto llactamanda llujshishca jipaca israelitacunahuanga ¿imata pasarca? b) ¿Moisesca imatata rurarca?

⁵ Egipto llactamanda casi ishcai quillacuna llujshishca jipaca israelitacunaca Sinaí urcuman ñami chayagrinajurca. Chaipimi israelitacunaca yacu illan nishpa Moisesmanda quejari callarirca. Shina ninajujpimi Moisesca Jehovata cashna mañarca: “Cai gentecunahuanga, ¿imatata rurashayari? Jipamangarin rumicunahuanmi huañuchihuanga” nishpa (Éx. 17:4). Shina mañajpimi Jehová Diosca cashna Moisestaca mandarca: Yacu llujshichunga Horeb urcupi shuj jatun rumipi canba vara caspihuan huactangui nishpa. “Shina nijpimi Moisesca, israelcunata mandaj rucucunapaj ñaupajpi, chashnallata rurarca”. Shina rurajpimi yacu llujshijpi israelitacunaca na munangacaman yacuta ufianajurca (Éx. 17:5, 6).

⁶ Moisesca chai pambataca Masah nishpapash, Meribá nishpapashmi shutichirca. Chai Masah nishpaca “imatapash rurachun munana” nisha ninmi. Cutin Meribá nishpaca “paicunapura fiñanajushpa rimana” nisha ninmi. Shinaca chai shuticunataca ¿imamandata churarca? Mandaj Dios imatapash rurachun munashpami “israelcunaca, paicunapura fiñanajushpa cashna ninajurca: “¿Mandaj Diosca ñucanchi chaupipichu, nachu ñucanchi chaupipi?” nishpa. Chaimi chai pambataca Moisesca shina shutichirca (Éx. 17:7).

⁷ Meribá pambapi israelitacuna Moisesta na cazushpaca Jehovata na cazushcata, na respetashcatapashmi ricuchirca. Shina rurashpaca israelitacunaca nalitami rurarca (Salmo 95:8, 9, liingui). Cutin Moisesca Jehovapa ayudata mañashpami Jehovapa mandashcata tucuipi cazurca.

8. Jehová Dios carasha nishca alpacunaman israelitacuna ña chayagrinajujpica ¿imata pasarca?

 ⁸ Cuarenta huatacuna jipa Jehová Dios carasha nishca alpacunaman israelitacuna ña chayagrinajujpica ¿imata pasarca? Cutinmi paicunaca yacu illan nishpa quejari callarirca. Chaimi chai pushtutapash Meribá nishpa churarca. Chai Meribá pushtuca Qadés ladopimi carca  * (Núm. 20:1-5). Shinapash Moisesca Jehovapa ayudata mañashpapash cai viajeca Jehovataca na cazurcachu.

9. a)Jehová Diosca ¿imata rurachunda Moisestaca mandarca? b) Cutin Moisesca ¿imatata rurarca? (Callari dibujota ricupangui).

⁹ Moisés chaita ricushpaca ¿imatata rurarca? Imata ruranata yachangapami Moisesca cutin Jehovata mañarca. Cai viajeca Jehová Diosca Moisestaca rumita huactachunga na mandarcachu. Chaipa randica cashnami mandarca: ‘Canba vara caspita japi. Chai jipaca tucuilla israelitacunata tandachimushpa, paicunapa ñaupajpi chai rumita rimai’ nishpa (Núm. 20:6-8). Moisesca chai rumita rimanapa randica gentecuna quejarinajujta uyashpami culira caimanda cashna caparirca: ‘Na cazuj gentecuna cunanga uyaichi ¿cai rumimandachu yacuta Ilujchigrinchi?’ nishpa. Shina nishca jipallami ishcai viajeta paipa vara caspihuan chai rumita huactarca (Núm. 20:10, 11).

10. Moisés na cazushcamandaca ¿imashinata Jehová Diosca sintirirca?

¹⁰ Jehová Diosca ninandami Moiseshuan culirarca (Deut. 1:37; 3:26). ¿Imacunamandallashi Jehová Diosca Moiseshuan culirarca? Jehovapa mandashcata na cazujpimi shina culirashcanga.

11. Chai shagra rumi ucumanda yacu llujshijta ricushpaca ¿imatata israelitacunaca pensashcanga?

¹¹ Caicunamandapashmi Jehová Diosca Moiseshuan culirashcanga. Párrafo 6​pi parlashca Meribá pambapi jatun rumicunaca llambu shinlli rumicunami carca. Chai rumicunata shinllita huactajpipash chai rumicunamanda yacu llujshinataca pipash na crinmanllu carca. Cutin párrafo 8​pi parlashca Meribá pushtupica shagra shagra jatun rumicunami tiarca. Chaimi chai rumicuna ucupica yacu tian carca. Chai ucumandami gentecunaca yacuta llujchinlla carca. Chaita yachaimandami israelitacunaca pensarianga, chai shagra rumi ucumandaca yacuca yangata llujshirianga nishpa. Shina pensaimandami Jehová Diospa milagro cashcataca na crinajushcanga. *

12. ¿Imamandashi Jehová Diosca Moiseshuan, Aaronhuanbash culirashcanga?

¹² Moisespash, Aaronbash ¿imatata rurarca? Moisesca israelitacunamanga cashnami  nirca: ‘¿Cai rumimandachu yacuta llujchigrinchi?’ nishpa. ‘Llujchigrinchi’ nishpaca paimandapash, Aaronmandapashmi parlajushcanga. Shina nishpaca Jehová Dios chai milagrota rurajpipash Jehovata na respetashcatami ricuchirca. Chaimandami Jehová Diosca paicunahuan culirashcanga. Moisés shina rurashcataca Salmo 106:32, 33​pimi ricupanchi. Cai textopica ninmi: “Meriba yacu manñacunapipashmi, Diosta fiñachinajurca. Paicunamandami, Moisespash llaquichi tucurca. Paipaj yuyaita ninanda fiñachijpimi, Moisesca imapash cachun rimajurca” nishpa  * (Núm. 27:14). Imashinami ricupanchi, Moisés shina rurashpaca Jehová Diostaca na jatunyachircachu. Chaita ricushpami Jehová Diosca Moisestapash, Aarondapash cashna nirca: ‘Ñuca mandashcataca na cazurcanguichichu’ nishpa (Núm. 20:24). Jehovata na cazushpami Moisespash, Aaronbash shuj jatun juchata rurarca.

13. ¿Imamandata Moisesca Canaán alpacunamanga na yaicui usharca?

¹³ Moisespash, Aaronbash Jehovapa llactatami ñaupaman pushanajurca. Chaimandami paicunaca Jehovapa ñaupajpi jatun responsabilidadta charirca (Luc. 12:48). Huaquin israelitacunaca Jehovapa mandashcacunata na cazushpami Jehovapa contra tucurca. Chaimi Jehová Diosca chai israelitacuna Canaán alpacunaman yaicuchun na saquirca (Núm. 14:26-30, 34). Shinaca Jehovata na cazuimandami Moisespash Canaán alpacunamanga na yaicui ushana carca. Shina rurashpami Jehová Diosca justo Dios cashcata ricuchirca.

14, 15. ¿Imamandata Moisesca Jehovata na cazurca?

¹⁴ Moisés imamanda Jehovata na cazushcata yachangapaca Salmo 106:32, 33​ta cutin ricupashunchi: Chaipica ninmi: “Meriba yacu manñacunapipashmi, Diosta fiñachinajurca. Paicunamandami, Moisespash llaquichi tucurca. Paipaj yuyaita ninanda fiñachijpimi, Moisesca imapash cachun rimajurca” nishpa. Israelitacuna Jehová Diosta na cazujpipash Moisesrami culirarca. Shina culira caimandami imatapash na ali pensarishpa yangata parlarca.

¹⁵ Moisesca Jehová Diosta ricunshna causajushpapash shujcunapa ruraicuna pandachichunmi saquirca. Punda viajeca Egipto llactamanda casi ishcai quillacuna llujshishca jipallami, yacu illan nishpa israelitacunaca quejarinajurca. Shina ninajujpipash Moisesca na culirarcachu (Éx. 7:6). 40 huatacuna jipapashmi israelitacunaca yacu illan nishpa cutin quejarinajurca. Shinapash Moisesca ashtaca huatacunata na cazuj israelitacunata pushajuimandami, shaijushca culira cashcanga. Chaimandami Jehová Diosta jatunyachinapa randica paipilla pensarirca.

16. Moisés Jehovata na cazushcamandaca ¿imatata yachajupanchi?

¹⁶ Moisesca Jehová Diosta tucui shunguhuan sirvij profeta cashpapashmi shujcuna pandachichun saquishpa Jehovata na cazurca.  Shinallatami ñucanchitapash pasai ushan. Moisés cuendami ñucanchicunapash ñalla paraíso alpaguman yaicugripanchi (2 Ped. 3:13). Tucuicunallatami chai alpaguman yaicungapaj munapanchi. Chaipaca Jehová Diosta ricunshnami causana capanchi. Shinallata Jehová Diospa munaitami rurana capanchi (1 Juan 2:17). Shinaca Moisesmandaca ¿imatata yachajupanchi?

17. Pipash ñucanchita culirachijpica ¿imatata rurana capanchi?

¹⁷ Ama ñapash culirashunchi. Huaquinbica chai problemacunatallatami tauca viajeta chimbapurana tucushcanchi. Shinapash Bibliapica ninmi: ‘Imata cashpapash aliguta ruranataca na shaijunachu canchi. Na cungashpa alitalla rurashpaca granota tandachinshnami japinajushun’ nishpa (Gál. 6:9; 2 Tes. 3:13). Imamandapash culirashpa o pipash culirachijpica ¿yangatachu parlanchi? O ¿ali pensarishpachu parlapanchi? (Prov. 10:19; 17:27; Mat. 5:22). Pipash ñucanchita culirachijpica na chashnallata ‘tigrachinachu’ capanchi. Chaipa randica Jehová Diospa maquipimi saquina capanchi (Romanos 12:17-21, liingui). Chai problemacunata ima hora arreglanataca Jehová Diosmi ali yachan. Shinaca ñucanchillata arreglanapa randica Jehová Dios ayudachunmi  saquina capanchi. Shina rurashpaca Jehová Diosta respetashcata, cazushcatapashmi ricuchipashun.

18. Jehová Diospa organizacionbi imapash cambiocuna tiajpica ¿imatata rurana capanchi?

¹⁸ Jehovapa organizacionbi ima cambiocuna tiajpipash cazupashunchi. Punda yachajushcashna ruranapa randica ima cambiocuna tiajpipash uchallami pactachina capanchi (Heb. 13:17). Shinallata ‘escribishcapi nijujtami’ cazushpa causana capanchi (1 Cor. 4:6). Shina rurashpaca Jehová Diosta ricunshnami causapashun.

19. Jehovahuan ali amigo cashpa catingapaca ¿imatata rurana capanchi?

¹⁹ Shujcunapa pandarishcacuna ñucanchita pandachichun ama saquipashunchi. Shujcunapa pandarishcacunata ricujushpaca cushilla causaitapash, Jehová Dioshuan ali amigo caitapash na ushashunllu. Congregacionbi privilegiocunata charijcunami ashtahuambachaca pactachina can. Ashtahuangarin salvaringapaj munashpaca cada unomi Jehová Diosta cazungapaj esforzarina capanchi (Filip. 2:12). Congregacionbi ashtahuan privilegiota charijpica Jehová Diosca paita ashtahuan cazuchunmi munan (Luc. 12:48). Tucui shunguhuan Jehová Diosta juyashpaca paipa mandashcacunata tucuipimi cazushun. Shinallata Jehovapa ali amigopashmi cashun (Sal. 119:165; Rom. 8:37-39).

20. Shujcunapa pandarishcata ricujunapa randica ¿imatata rurana capanchi?

²⁰ Tucurimui punllacunapi causajuimandami, jahua pachapi causajuj Jehová Diostalla ricunshna causana capanchi. Shinami Jehovapa munaita pactachishpa causashun. Shinaca shujcunapa pandarishcacunamanda Jehovahuan ali amigo canata ama saquipashunchichu. Shinallata Moisés imata rurashcataca siempremi yarishpa causana capanchi. Shujcunapa pandarishcata ricujunapa randica, Jehová Dios ayudachunmi ‘paitalla chapariajuna’ capanchi (Sal. 123:1, 2).