1. ¿Imamandata jahua pachapash, cai alpapi tucui tiashcacunapash Jehová Diospa can nipanchi? (Callari fotota ricupangui).

‘JAHUA pachapash chaipi tucui imalla tiajcunapash, cai pachapash cai pachapi imalla tiajcunapash Taita Diospami’ can (Deut. 10:14; Apoc. 4:11). Shinallata tucui gentecunatami Jehová Diosca rurashca. Chaimi gentecunapash Jehová Diospa capanchi (Sal. 100:3). Shina cajpipash punda tiempomandapachami Jehová Diosca huaquin gentecunatalla paipa llacta cachun agllashca.

2. ¿Picunallata Jehová Dios agllashca llacta can?

² Salmo 135​pica ninmi, Jehovata tucui shunguhuan sirvij israelitacunaca Jehovapalla ‘cachun shicanyachishca’ llactami carca nishpa (Sal. 135:4). Shinallata Oseas libropica na israelita gentepuramandaca huaquinguna Jehová Dios agllashca llacta tucunatami ricuchijurca (Os. 2:23, NM). Jahua cielopi Jesushuan mandachun na judío gentecunatapash Jehová Dios agllajpimi chai profeciaca pactarirca (Hech. 10:45; Rom. 9:23-26). Jahua cielopi Jesushuan mandachun Diospa espíritu santohuan agllashcacunataca “jucha illaj llacta”, “alicachishpa agllashcacunami”  can ninmi (1 Ped. 2:9, 10). Cunan punllacunapi Jehovata tucui shunguhuan sirvinajuj ashtaca huauquipanicunami cai alpapi causana esperanzata charishpapash Jehová Dios ‘agllashca’ llacta can (Is. 65:22).

3. a) ¿Picunallata Jehová Diosta tucui shunguhuan sirvinajun? b) Cai temapica ¿imatata yachajupashun?

³ Cunan punllacunapica ungidocunapash, cai alpapi causana esperanzata charij gentecunapashmi “shujlla corral” cuenda Jehová Diosta tucui shunguhuan sirvinajun. Ashtahuanbash Bibliapica ungidocunatami ‘ashalla llamagucuna’ nin. Cutin cai alpapi causana esperanzata charij gentecunataca ‘shuj llamagucuna’ ninmi (Luc. 12:32; Juan 10:16). Jehová Dios paita sirvichun saquishcamandaca tucui shunguhuanmi agradicingapaj munapanchi. Chaimi cai temapica Jehovata imashina agradicinata yachajupashun.

4. a) Jehová Diosta agradicingapaca ¿imatata rurana capanchi? b) Jesusca ¿imatata rurarca?

⁴ Tucui ñucanchi causaipi Jehovatalla sirvingapaj mingarishpami Jehová Diosta tucui shunguhuan agradicinajupanchi. Shinaca Jehovatalla sirvingapaj munaimanda, paitalla cazushpa causangapaj munaimanda bautizarijushcatami shujcunaca ricunga (Heb. 12:9). Chaimi Jesusca cai alpapi Jehová Dios agllashca llactapurapi nacirishca cashpapash Jehovapa munaita pactachingapaj bautizarirca. Jesús bautizarishpaca Jehová Diosman cashna nijuj cuendami carca: “Ñuca Taita Dioslla, cambaj munaita rurashpami cushijushcani” nishpa (Sal. 40:7, 8).

5, 6. a) Jesús bautizarijta ricushpaca ¿imashinashi Jehová Diosca sintirirca? b) Ñucanchicuna bautizarijpica ¿imashinata Jehová Diosca sintirin? Shuj chimbapuraita parlapai.

⁵ Jesús bautizarijta ricushpaca ¿imashinashi Jehová Diosca sintirirca? Bibliapica ninmi: “Jesús bautizai tucushpa yacumanda llujshijushpaca, jahua pacha ñapash pascarijtami ricurca. Taita Diospaj espiritupash, palomagushna paipaj uma jahuaman urai shamujtami ricurca. Jahua pachamandapash, cashna rimajmi uyarimurca: Caimi, ñuca juyashca Churigu. Paimandami ninanda cushijuni” nishpa (Mat. 3:16, 17). Jehová Diosca paipa churi Jesús paiman mingarishpa, paitalla sirvingapaj bautizarijta ricushpaca ninandami cushijurca. Shinallatami Jehová Diosca ñucanchicuna paiman mingarishpa bautizarijta ricushpaca ninanda cushijun. Chashna rurashcamandaca ashtacatami Jehová Diosca bendicianga (Sal. 149:4).

⁶ Imashinami ricupanchi ñucanchicuna bautizarijta ricushpaca Jehová Diosca ninandami cushijun. Chaita ali intindingapaca shuj chimbapuraita ricupashunchi. Shuj jarica ashtaca ashtaca sisagucunata tarpunatami gushtan. Shuj punllaca pai tarpushcamandallatami paipa uchilla huahuaguca paita tucui shunguhuan agradicishpa shuj sisaguta japishpa paimanllata caran. Chaimi chai jarica pai tarpushca sisagutallata carajpipash cushijushpa chasquin. Chai jaripaca chai sisaguca ashtahuan yali juyailla sisagumi cashcanga. Shinallatami Jehová Diosca ñucanchicuna paiman mingarishpa bautizarijpica ninanda cushijun (Éx. 34:14).

7. Malaquías libropi nishcashnaca Jehová Diosca paita tucui shunguhuan sirvijpica ¿imashinata sintirin?

⁷ (Malaquías 3:16, liingui). Jehová Diosmi tucuicunaman causaiguta carashca. Chaimi mamapa vijsa ucupi tiai callarishca punllamandapacha ñucanchicunapa causaica Jehová Diospa can. Shinapash Jehová Dios ñucanchita mandachun munaimanda paiman mingarijpi, paipa munaita pactachijpica Jehová Diosca ninandami cushijun.  Shinaca Jehovaman mingarishpa nara bautizarishca cashpaca chaicunata rurana minishtirishcapacha cashcatami pensarina capanchi (Prov. 23:15). Shinallata Jehová Diosca paita tucui shunguhuan sirvijcunataca ali rijsishpami paicunapa shutitaca ‘paipa yarina libropi escribin’.

8, 9. Jehová Dios paipa ‘yarina libromanda’ ñucanchi shutita ama anchuchichunga ¿imatata rurana capanchi?

⁸ Jehová Dios paipa ‘yarina libromanda’ ñucanchi shutita ama anchuchichunga ¿imatata rurana capanchi? Malaquías nishcashnami Taita Diosta manllashpa, paipa shutitapash yaria causana capanchi. Shinapash Jehová Diostalla na sirvijpica Jehová Diosca paipa yarina libromandami ñucanchi shutita anchuchinga (Éx. 32:33; Sal. 69:28).

⁹ Jehová Diostalla cazushpa causasha nishpami Jehovaman mingarishpa bautizarircanchi. Chaicunata shuj viajella rurashpapash Jehová Diostaca tucui ñucanchi causaipimi sirvina capanchi. Chaipaca cada punllami paipa mandashcacunata pactachishpa causana capanchi (1 Ped. 4:1, 2).

10. Jehovata tucui shunguhuan sirvijcunaca ¿imashinata cana can?

¹⁰ Punda temapica Caín runamanda, Salomonmanda, israelitacunamandami yachajuparcanchi. Paicunaca Jehovata adoranchi nishpapash Jehovata tucui shunguhuanga na sirvinajurcachu. Imashinami ricupanchi Jehovata tucui shunguhuan sirvingapaca nali ruraicunataca na ricunayachinachu capanchi. Chaipa randica alicunatalla rurashpami causana capanchi (Rom. 12:9). Ashtahuanbash Jehová Diosca nircami: ‘Imatapash cashcatapacha rurajcuna, nalita rurajcunahuanga shicanmi’ can. Shinallata ‘Taita Diosta sirvishpa causajcunahuan, na sirvishpa causajcunahuanbash shicanmi can’ nishpa (Mal. 3:18).

11. ¿Imamandata Jehová Diosta tucui shunguhuan sirvingapaj esforzarina capanchi?

¹¹ Jehová Diosca paita sirvichunmi ñucanchitaca agllashca. Chaita agradicishpami paita tucui shunguhuan sirvinchi. Jehovata shina sirvijtaca shuj huauquipanicunapashmi ricunga (1 Tim. 4:15; Mat. 5:16). Shinaca tapuripashunchi: “¿Jehová Diosta tucui shunguhuan sirvijushcatachu ricuchijuni? Ñuca rijsicunaca ¿testigo de Jehová cashcataca yachanllu?” nishpa. Shinapash shuj gentecunaman testigo de Jehovami cani nishpa na villajpica, Jehová Diosca ninandami llaquiringa (Sal. 119:46; Marcos 8:38, liingui).

12, 13. Huaquin huauquipanicunaca ¿imashinata can?

¹² Huaquin huauquipanicunaca cai mundopa nali ruraicunata rurashpami causan. Chaimi paicunaca Jehovata na sirvij gentecunashna can (1 Cor. 2:12). Nalicunata ruraj gentecunaca paicunapa munaitalla pactachishpami causan (Efes. 2:3). Shinallata huaquin huauquipanicunaca Bibliapa consejocunata na cazushpami ajustado ajustado o pinganai ropata churajun. Huaquingunacarin tandanajuicunaman ringapapashmi shina ropata churajun. Cutin shuj huauquipanicunaca maipash cachun ñajcharishpa, ajchata  ruturina cashpapash maipash cachun ruturishcami purin (1 Tim. 2:9, 10). Chaimandami chai huauquipanicunaca Jehovata na sirvij gentecunashna ricurin (Sant. 4:4).

¹³ Cutin huaquin huauquipanicunaca cai mundopi nalicunata rurashpami catin. Chaimi paicunaca fiestacunaman rishpa pinganaita bailan, Jehovata na sirvijcunashnami portarin. Shinallata pinganai nali fotocunata o imapash yuyaicunatami Internetpi churan. Chai huauquipanicunaca tal vez jatun juchacunataca na rurashcangachu. Chaimandami huauquipanicuna cashpa catin. Shinapash chai huauquipanicunaca shujcuna Jehovata tucui shunguhuan sirvichunga na ayudanllu (1 Pedro 2:11, 12, liingui).

14. Jehová Diosta tucui shunguhuan sirvijcunaca ¿imatata rurana capanchi?

¹⁴ Cai nali mundoca ñucanchi ‘munaitalla rurachun, imatapash ricushcandi munachun, yangata jariyashpa’ causachunmi pandachin (1 Juan 2:16). Cai nali mundopi causashpapash ‘nali munaicunata saquishpa’, ‘aliguta yarishpa, imatapash cashcatapacha rurashpa’, paitalla manllashpa causachunmi Jehová Diosca munan (Tito 2:12). Shinaca ñucanchi aliguman parlajpi, aliguta arreglarijpi, ima ropata churajunata ali agllajpi, ali trabajadorcuna cajpica Jehovatalla sirvijushcatami shujcunapash cuenta japinga (1 Corintios 10:31, 32, liingui).

15. ¿Imamandata ñucanchi huauquipanicunata juyaihuan tratana capanchi?

¹⁵ Ñucanchi huauquipanicunata juyaihuan tratashpaca Jehová Diostapashmi juyashun. Jehová Diosca tucuilla huauquipanicunatami juyan. Chaimi ñucanchi huauquipanicunata juyaihuan tratana capanchi (1 Tes. 5:15). Jesusca  paipa catijcunataca nircami: “Shina juyarishpa causanajujta ricushpami, ñucapaj yachajujcuna cashcataca tucuicuna rijsinajunga” nishpa (Juan 13:35).

16. Moisesman cushca Leypica ¿imatata Jehová Diosmanda yachajupanchi?

¹⁶ Ñucanchi huauquipanicunata imashina tratana cashcata yachangapaca shuj ejemplota ricupashunchi. Diospa templo huasipi tucui imalla tiashca cosascunaca Jehová Diosta adorangapallami levitacunaca utilizan carca. Chaimi Moisesman cushca Leypica chai cosascunata imashina cuidanata ricuchirca. Pipash chai mandashcacunata na cazushpaca huañuchi tucunami carca (Núm. 1:50, 51). Shinaca Diospa templo huasipi tiashca cosascunata gentecuna imashina cuidajta Jehová Dios ricushpaca ¿nachu paita tucui shunguhuan sirvijcunatacarin ashtahuan cuidanga? Shuj viajeca Jehová Diosca israelitacunamanga cashnami nirca: “Maijambash cangunata llaquichishpaca, ñuca ricujuj ñavita tujsinshnami llaquichin” nishpa (Zac. 2:8).

17. Jehová Diosca ¿imatallata ricujun?

¹⁷ Malaquías runaguca nircami, huauquipanicunahuan randimanda imashina tratarijtaca Jehová Diosca tucuitami ricujun nishpa (Mal. 3:16). Imashinami ricupanchi Jehová Diosca “paipaj tucushcacunataca rijsinmi” (2 Tim. 2:19, NM ). Chaimi Jehová Diosca ñucanchi parlocunata, ñucanchi rurashcacunatapash tucui tucuita ricujun (Heb. 4:13). Shinaca ñucanchi huauquipanicunata nali tratashcataca Jehová Diosca alimi yachan. Shinallata ñucanchi huauquipanicunata llaquishpa, juyashpa paicunata perdonajpi, paicunata ayudajpi, mingachijpica Jehová Diosca alicachishpami ricun (Heb. 13:16; 1 Ped. 4:8, 9).

18. Jehová Diosta tucui shunguhuan agradicingapaca ¿imatata rurana capanchi?

¹⁸ Jehová Dios paita sirvichun, paipa llacta cachun ñucanchicunata agllashcamandami Jehová Diostaca tucui shunguhuan agradicipanchi. Shinallata Jehovaman mingarishpa ñucanchi causaipi paita sirvinata agllanaca shuj alipacha decisionmi can. ‘Cai pachapi causanajuj, jatun nali miraicunapa chaupipi’ causanajushpapash “na juchachi tucushpa, na jariyashpa, ima mapapash illajmi” causana capanchi. ‘Shina causashpami punchayachij luzerogushna’ cashun (Filip. 2:15). Shinaca cai mundopi nali ruraicunataca nimamanda na ricunayachinachu capanchi (Sant. 4:7). Tucuilla huauquipanicunatami Jehová Diosca juyan. Chaimi ñucanchi huauquipanicunataca juyaihuan, respetohuan tratashpa causanchi (Rom. 12:10).

19. Jehová Diosca paita tucui shunguhuan sirvijcunataca ¿imashinata bendicianga?

¹⁹ Bibliapica cashnami nin: “Mandaj Diosca, pai agllashcacunataca na jichungachu” nishpa (Sal. 94:14). Shinaca ima pasajpipash Jehová Diosca ñucanchicunata cuidashpami catinga. Shinallata Jehová Diosca paita tucui shunguhuan sirvijcuna huañujpipash paicunataca na cungangachu. Jehová Diosca paipa nishcacunataca pactachingapachami (Rom. 8:38, 39). Bibliapica cashnami nin: “Causajushpapash, Jehová Diospami causanajunchi. Huañushpapash, Jehová Diospami huañushunchi. Shinamandami causajushpapash, huañushpapash, Jehová Diospa canchi” nishpa (Rom. 14:8, NM ). Jehová Diosca paita tucui shunguhuan sirvijcunataca ñallami causachinga. Chai punlla chayamuchunmi munapanchi (Mat. 22:32). Jehovata sirvinajushcamandaca cunanbillatami ashtaca bendiciongunata chasquishcanchi. Bibliapipash cashnami nin: “Mandaj Dios paicunapaj Taita Dios cajpi causanajuj llactaca, ninandami cushijun. Paicunataca paipajllata cachunmi, paillata agllashca” nishpa (Sal. 33:12).