1. ¿Imatata tucuicunallata munapanchi?

PENSARIPASHUNCHI, ñucanchi rijsishca gentecunahuan tuparishcanchiman. Shinapash paicuna ñucanchita ricushpapash ñucanchi pi cashcata yaritallapash na yarijpica ¿imashinashi sintirinchiman? Shina pasajpica llaquillami sintirinchiman. Pipash ñucanchita rijsishpa alicachichun munaimandami shina sintirinchiman. Shinaca ñucanchi pi cashcatallaca na yachachun munanchichu. Chaipa randica ñucanchi imashina cajta ricushpa, ñucanchi ruraicunata alicachichunmi munapanchi (Núm. 11:16; Job 31:6).

2, 3. Juchayu caimandaca ¿imata pensai callarinchiman? (Callari dibujota ricupangui).

² Shujcuna ñucanchita rijsichun alicachichun munashpapash juchayucuna caimandaca shujcunata yali cani nishpami pensai callarinchiman. Shinallata gentecunapa ñaupajpi rijsishca rijsishca cachun, shujcunata yali cani nishpa pensarichunmi Diabloca pandachingapaj munan. Shina tucujpica Jehová Diostaca na  jatunyachishunllu. Pai munashcashnapash na adoraita ushashunllu (Apoc. 4:11).

³ Jesuspa punllacunapi judiocunata yachachijcunaca gentecuna ricuchunllami imatapash ruran carca. Chaimi Jesusca paipa catijcunamanga cashna advirtirca: “Mandashca shimita yachachijcunataca, napacha catinachu canguichi. Paicunaca, chaqui pundacaman churajunata churajushpami, cushijushpa purinajun. Paicunataca, plazacunapipash alillachu capanguichi ninajuchunmi munan. Tandanajuna huasicunapipash, paicunata alicachishpa ricunajuchunmi, ñaupajpi tiarinajun. Shinallata boda huasicunapipash, alipilla tiarishpami purinajun”. “Paicunaca, chashna cashcamandami, ashtahuan ninanda llaquichi tucunajunga” nishpa (Luc. 20:46, 47). Cutin Jesusca chai gentecunashnaca na carcachu. Por ejemplo, shuj viuda huarmiguca Diospa templo huasipi ashagutallami churarca. Chai viuda huarmigu churashcata shuj gentecuna na ricujpipash Jesusca alicachishpami chai viuda huarmigumandaca parlarca. Imashinami ricupanchi Jesusca shuj gentecunashnaca na pensanllu carca (Luc. 21:1-4). Chaimi cai temapica shujcunata alicachinamanda Jesuspash, Jehovapash imata yuyashcata yachajupashun.

4. ¿Pipa ñaupajpi ali ricurinata ashtahuan ali can?

⁴ Gentecunapa ñaupajpi rijsishca canamanda, ashtahuan estudianamanda, negociocunata charinamandaca Jehovapa ñaupajpi ali ricurinami ashtahuan ali can. Apóstol Pabloca Diospa ñaupajpi ali ricurinamanda parlashpaca cashnami nirca: “Ashtahuangarin cunanga, Taita Diosta rijsinguichimi. Taita Diospash, cangunataca rijsinmi. Shina rijsishpapash ¿imashpata ushaita na charij, chai imapajpash na servij, cutin cutin yachachishcata catishpa, cutinllata gañanshna causangapaj munanguichi?” nishpa (Gál. 4:9). Tucuita Ruraj Jehová Diosca paita rijsichun, paipa amigo cachunmi munan. Chaica shuj alipacha bendicionmi can. Jehová Diosca ñucanchita juyaimandami paita rijsina munaihuan rurashca (Ecl. 12:13, 14).

5. Jehová Dioshuan ali amigo cangapaca ¿imatata rurana capanchi?

⁵ Moisesca Jehovapa ñaupajpi ali ricuringapami munarca. Chaimi Jehová Diosta mañarca, canba mandashcacunata ashtahuan ali rijsichun ayudahuai nishpa. Moisespa mañaita uyashpami Jehová Diosca cashna nirca: “Can ñuca ñavipi ali ricurishcamanda, candaca cambaj shutipi rijsishcamandami, chaitapash rurasha” nishpa (Éx. 33:12-17). Cada unota Jehová Dios rijsishpami ñucanchicunamanga ashtaca bendiciongunata cushca. Shinapash Jehová Dioshuan ali amigo cangapaca ¿imatata rurana capanchi? Jehovata tucui shunguhuanmi juyana capanchi. Shinallata ñucanchi causaipimi Jehovata sirvina capanchi (1 Corintios 8:3, liingui).

6, 7. Jehová Dioshuan ali amigo cashpa catingapaca ¿imamandata esforzarina capanchi?

⁶ Jehová Dioshuan ali amigo cashpa catingapami esforzarina capanchi. Chaipaca cai mundopi ‘ushaita na charij, imapajpash na sirvij’ cosascunamandami caruyana capanchi. Gentecunapa ñaupajpi ali ricurinataca na munanachu capanchi (Gál. 4:9). Punda siglopi Galacia llactamanda huauquipanicunaca Jehová Diospa amigocuna cashpapashmi ‘imapajpash na sirvij’ cosascunata rurai callarishcarca. Chaimi apóstol Pabloca chashna nirca, ¿imashpata Taita Diosta rijsishpapash punda saquishca imapapash na sirvij cosascunatara cutin ruranajunguichi? nishpa.

 ⁷ Ñucanchipash punda siglopi huauquipanicunashna ama cangapami cuidarina capanchi. Apóstol Pabloca cai mundopi rijsishca canataca na mascarcachu. Shinallata ñucanchipash Jehovata sirvi callarishpaca tal vez cai mundopi rijsishca canatami saquishcashun (Filipenses 3:7, 8, liingui). Chaimi universidadpi estudianata, ali trabajota charinata, negociocunapi ashtaca culquita gananatapash saquishcashun. Shinallata imatapash ali tocanata, ali candanata, pugllaicunata alipacha pugllanata yachashpaca gentecunapa ñaupajpi rijsishca, charijcunami canchiman carca. Shinapash Jehovata sirvingapami chaicunata saquishcashun (Heb. 11:24-27). Chaicunamanda arripintirijushpaca nalitami ruranajunchiman. Arripintirijushpaca cai mundopi ‘ushaita na charij, imapajpash na sirvij’ cosascunatarami cutin mascanajunchiman.

8. Jehovapa ñaupajpi ali ricuringapaca ¿imatata rurana capanchi?

⁸ Jehovapa ñaupajpi ali ricuringapaca ¿imatata rurana capanchi? Chaipaca ishcai yuyaicunata yaripashunchi. Punda yuyai, Jehovata tucui shunguhuan sirvijpica paica siempremi bendicianga (Hebreos 6:10, liingui; 11:6). Jehová Diosca ‘paita juyajcunataca paipashmi rijsin’. Chaimi paita sirvijcunataca juyaimanda bendician (1 Cor. 8:3, MTQI). Shinallata ‘imatapash cashcatapacha rurashpa causajcunataca’ llaquicunapi cajpipash Jehová Diosmi ayudanga (Sal. 1:6; 2 Ped. 2:9).

9. Jehová Diosca ¿imashinata paita sirvijcunata ayudarca?

⁹ Jehová Diosca paita sirvijcunataca siempremi ayudan (2 Crón. 20:20, 29). Cunanga, israelitacunata imashina ayudashcata ricupashunchi. Faraonga paipa soldadocunandimi Mar Rojopi israelitacunata llaquichingapaj catinajurca. Chaipimi Jehová Diosca israelitacunata salvarca (Éx. 14:21-30; Sal. 106:9-11). Mar Rojopi israelitacunata Jehová Dios imashina salvashcataca 40 huatacuna yalijpipashmi gentecunaca yarinajurcara (Jos. 2:9-11). Ñallami Magog llactata mandaj Gogca Jehovata sirvijcunata llaquichinga. Chaimi Jehová Dios paita sirvijcunata imashina salvashcata yarina capanchi. Chaita yarinami Jehovapi confiachun ñucanchitaca ayudanga (Ezeq. 38:8-12). Magog llactata mandaj Gog Jehovata sirvijcunata llaquichijuj tiempopica, Jehovapa ñaupajpi ali ricuringapaj esforzarishcamandami cushilla sintirishun.

10. ¿Ima yuyaitata yarina capanchi?

¹⁰ Cai cati yuyaitapashmi yarina capanchi. Jehová Diosca paita sirvijcunamanga na yashca bendiciongunatami cun. Shuj gentecuna ricuchunlla imatapash rurajcunataca Jehová Diosca na ayudangachu. Jesusca nircami, shujcuna ricuchunlla imatapash rurajcunaca gentecunapa ñaupajpi ali ricurinatallami chasquinga nishpa (Mateo 6:1-5, liingui). Jesusca caitapashmi nirca, cutin “pacalla carashcamandaca, pacalla carajujta ricujuj” Taita Diosmi bendicianga nishpa. Taita Diosca shujcunata ayudangapaj imatalla rurashcata ali yachaimandami, na yashca bendiciongunata cunga. Huaquin ejemplocunata ricupashunchi.

11. Jehová Diosca ¿imashinata Mariataca bendiciarca?

¹¹ Jehová Diosca Jesuspa mama cachunga María huarmigutami agllarca. Paica Nazaret uchilla pueblogupi causaj humilde huarmigumi carca. Nazaret puebloca Jerusalenmandapash, Diospa templo huasimandapash carupimi carca (Lucas 1:26-33, liingui). ¿Imamandashi Jehová Diosca Mariata agllashcanga? Ángel Gabrielca Mariataca cashnami nirca, “Diosmi candaca ninanda juyajun” nishpa. Jipaman Elisabet huarmiguhuan parlashpaca María huarmiguca Jehovata ali sirvij cashcatami ricuchirca (Luc. 1:46-55). Shinaca María huarmiguca Jehovata tucui shunguhuan sirvishcamandami na yashca bendicionda chasquirca.

12, 13. a) Jesús nacirishca horasca ¿imata pasarca? b) Cutin Jesusta Diospa templo huasiman apajpica ¿imata pasarca?

¹² Jesús cai alpapi nacirishca horasca ¿imashinata Jehová Diosca Jesustaca alicachirca? Jehová Diosca Jesús nacirishcataca Jerusalén llactata, Belén llactata mandajcunamanga na villarcachu. Chaipa randica angelcunata cachashpami pambapi llamacunata michijcunaman villarca. Shinami Jehová Diosca Jesusta alicachirca (Luc. 2:8-14). Chaimi llamata michij runagucunaca Jesús nacirishcata ricugrirca (Luc. 2:15-17). Chaita ricushpaca Mariapash, Josepash ninandami cushijushcanga. Cutin Diabloca, Jesús nacirishcata ricuchunmi estrellacunata estudiaj runacunata cacharca. Chaimi Jerusalén llactapi tucui gentecuna Jesús nacirishcata yachaj chayarca (Mat. 2:3). Chaita yachaj yachashpami Herodesca ashtaca uchilla jari huahuacunata huañuchichun mandarca (Mat. 2:16).

¹³ Jesús nacirishcamanda 40 punllacuna pactajpimi María huarmiguca Jerusalén llactaman rirca. María huarmiguca Taita Diospa templo huasiman ishcai urpiguta apashpami rina carca. Belén llactamanda Jerusalenman chayangapaca casi ishcai horascunatami rina carca (Luc. 2:22-24). Chaiman rijushpaca Diospa templo huasipi sacerdotechu Jesusta alicachinga nishpami Mariaca pensarijushcanga. Shinapash Jehová Diosca paita tucui shunguhuan sirvij Simeón runagutapash, 84 huatacunata charij Ana huarmigutapashmi  Jesús Mesías cashcata shuj gentecunaman villachun agllarca. María huarmiguca Jehová Dios shina ruranataca yaitallapash na yashcangachu (Luc. 2:25-38).

14. María huarmiguca ¿ima bendiciongunatallata chasquirca?

¹⁴ Jesusta ali cuidashcamandaca ¿María huarmiguta Jehová Diosca bendiciarcachu? Ari bendiciarcami. Jehová Diosca María huarmigupa rurashcacunata, parlashcacunatapashmi Bibliapi escribichirca. Shinapash Mariaca Jesushuan villachingapaca na ri usharcachu. Jesusca quimsa huata chaupitami Diospa Shimimanda villachirca. Shinaca ¿imamandashi Mariaca Jesustaca na cumbashcanga? Viuda caimandami tal vez Jesustaca na cumbashcanga. Diospa Shimimanda shuj gentecunaman villachigrijpi Jesusta na cumbai ushashca cashpapash, María huarmiguca Jesús huañushca horasca chaipimi carca (Juan 19:26). Ashtahuanbash huata 33 Pentecostés punlla nara chayajpica Mariaca Jesusta catijcunahuanmi carca. Pentecostés punllapimi Jesusta catijcunaca Diospa espíritu santota chasquirca (Hech. 1:13, 14). Shinaca Mariapashmi Diospa espíritu santota chasquishcanga. Chaimandami ni ushapanchi María huarmiguca na huañushpa cielopi Jesushuan mandangapaj agllai tucushcata. Jehová Diosca paita tucuipi cazushcamandami Mariataca chashna bendiciarca.

15. Jehová Diosca ¿imashinata Jesustaca alicachirca?

¹⁵ Jesusca chai punllacunapi judiocunata yachachijcuna, gobiernocuna paita alicachichunga na munarcachu. Jesusca Jehová Diospa ñaupajpi ali ricuringapami munarca. Chaimi quimsa viajeta Jehová Dios jahua cielomanda parlajta uyashpaca ninanda cushijushcanga. Jehová Diosca Jordán yacupi Jesús bautizarishca jipallami cashna nirca: “Caimi, ñuca juyashca Churigu. Paimandami ninanda cushijuni” nishpa (Mat. 3:17). Jehová Dios Jesusman shina nijtaca Bautizaj Juanllami uyashcanga. Shinallata Jesús huañungapaj casi shuj huata faltajpimi quimsa apostolcunaca Jehová Dios cashna nijta uyarca: “Caimi, ñuca juyashca Churigu. Paimandami, ninanda cushijuni. Pai imata yachachishcataca, aliguta  uyanguichi” nishpa (Mat. 17:5). Jesús huañungapaj huaquin punllacuna faltajpimi Jehová Diosca jahua cielomanda Jesusta cashna nirca: “Ña punchapamba cajtaca, cutimbash ricuchishami” nishpa (Juan 12:28).

16, 17. ¿Ima bendiciondata Jesusca chasquirca?

¹⁶ Taita Diosta nalicachishpa rimarca nishpami yangata juchachishpa Jesustaca huañuchina carca. Shina huañunataca Jesusca alimi yacharca. Shinapash Jesusca “ama ñuca munashcata rurapaichu, cambaj munaita pactachipai” nishpami Jehovata mañarca (Mat. 26:39, 42). Jesusca Jehovapa ñaupajpi ali ricuringapami jatun racu caspipi llaquinayaita huarcui tucuna cashpapash, “nalicachishpa rimanajujpipash na pinganayachishpa huañurca” (Heb. 12:2). Jesusca Jehovapa ñaupajpi ali ricuringapaj munashcataca ¿imashinata ricuchirca?

¹⁷ Jesús cai alpapi cashpaca Jehovata cashnami mañarca, jahua cielopi charishca causaitallatami cutin charingapaj munapani nishpa (Juan 17:5). Bibliapica Jesús ashtahuan alicachichun munashcataca ni maipi na ninllu. Shinaca Jesusca ashtahuan alicachichun munaimandallaca na Jehová Diospa munaita pactachircachu. Shinapash Jehová Diosca na yashca bendiciondami Jesusmanga curca. Chaimi Jesús huañushpa causarishca jipaca “tucuita yali ashtahuan alicachishpa, paitaca jatumbi churarca”. Shinallata Jesusca jahua cielopi “huañuitapash na huañushpa” causanatami chasquirca. Shina causaitaca Jesusmi pundapi chasquirca (Filip. 2:9; 1 Tim. 6:16). * Tucui shunguhuan Jesús cazushcamandami Jehová Diosca shina bendiciarca.

18. Jehová Diospa ñaupapi ali ricuringapaca ¿imatata yarina capanchi?

¹⁸ Jehová Diosca paita tucui shunguhuan sirvijcunataca siempremi ayudanga. Shinallata na yashca bendiciongunatami cunga. Chaicunata yarinami Jehová Diospa ñaupapi ali ricurichun ayudanga. Shinapash shamuj punllacunapi Jehová Dios ñucanchita imashina bendicianataca na yachanchichu. Chai punlla chayamungacamanga ‘cai pacha tucui imapash nali munaicunandi tucurijujtaca’ na cunganachu capanchi (1 Juan 2:17). ‘Taita Diosca imatapash cashcatapacha ruraj cashpami ñucanchicuna imatalla ruranajushcataca na cungan. Paipa shutita juyaimanda chashna rurashpa catinajushcataca na cungangachu’ (Heb. 6:10). Shinaca Jehová Diosca paita ali sirvishcamandami na yashca bendiciongunata cunga. Imashina bendicianataca yaitallapash na yai ushanchichu.