1, 2. a) ¿Imamandata Jehová Diostalla sirvingapaj munapanchi? b) Cai temapica ¿imatata yachajupashun?

JEHOVÁ DIOSLLAMI tucui ushaita charij, tucuita ali yachaj, juyaj Dios can. Chaimi Jehovata tucuipi cazushpa paitalla sirvingapaj munapanchi (Sal. 96:4-6). Shinapash huaquingunaca Jehovata tucuipi cazunapa randica paicunapa munaitara rurashpami Jehovamanda caruyashca.

² Huaquingunaca Jehovatalla sirvinchi nishpapash, Jehová Dios na ricunayachishca ruraicunatami rurarca. Cai temapica huaquin ejemplocunatami ricupashun. Chaita yachajunami Jehovata tucuipi cazuchun ayudanga.

3. a) Caín runamanga ¿imatata Jehová Diosca nirca? b) ¿Imamandata shina nirca?

³ Caín runahuan ima tucushcata ricupashunchi. Paica yanga dioscunataca na adoranllu carca. Paica Jehová Diostalla sirvini nishpami causan carca. Shinapash Caín paipa shungupi nali munaicunatalla charijpimi Jehová Diosca nalicachishpa paitaca ricurca (1 Juan 3:12). Jehová Diosca Caín runamanga cashnami nirca: “Alita rurashpaca, ¿nacha jatunyachi tucunguiman? Nalita rurajpimi, juchaca pungupi chapanshna, canda mandangapaj  shuyajun. Chai juchataca, canmi mishana cangui” nishpa (Gén. 4:6, 7). Shina nishpaca, Caín arripintirishpa Jehovatalla cazujpica paillata ayudanatami nijushcanga.

4. Caín runaca ¿ima nalitata rurarca?

⁴ Caín runaca paipa nali munaicunata saquishpaca Jehovapa ñaupajpi alimi ricurinman carca. Paica Jehová Dios nishcata na cazushpa paipa shungupi nali munaicunata charimandami shuj jatun juchata rurarca (Sant. 1:14, 15). Caín joven cashpaca Jehovata na cazushpa juchapi urmanataca pensaitallapash na pensashcangachu. Shinapash tiempo yalijpica Jehová Diosta na cazushpami paipa huauquitallata huañuchirca.

5. Jehovatalla sirvingapaca ¿ima nali munaicunatata saquina capanchi?

⁵ Huaquin huauquipanicunaca Caín runashnami Jehovata sirvinchi nishpapash nalicunata ruranajun (Jud. 11). Chai huauquipanicunaca villachinaman llujshishpa, tucuilla tandanajuicunaman rishpapash, shuj huarmihuan shuj jarihuan puñushpa imashina canatami alicachishpa pensarinajun. Shinallata charishpata ashtahuan charingapaj munashpa, shuj huauquipanicunata na ricunayachishpami causanajun (1 Juan 2:15-17; 3:15). Shina nali munaicunata ñucanchi shungupi charishpaca juchapimi urmashun. Ñucanchi yuyaicunata o ruraicunata shujcuna na yachajpipash Jehová Diosca tucuitami yachan. Shinallata paitalla sirvijushcata o na sirvijushcatapash Jehová Diosca alimi yachan (Jeremías 17:9, 10, liingui).

6. Nali munaicunata mishachunga ¿imata ayudanga?

⁶ Ñucanchicuna pandarijpipash Jehová Diosca ayudangapami munan. Chaimi cashna nin: “Ñucapajman tigrarimujpica, ñucapash cangunapajman tigrashami” nishpa (Mal. 3:7). Shinapash ñucanchi nali munaicunata, nali ruraicunatapash saquishpa paitalla sirvichunmi munan (Is. 55:7). Shina rurajpica Jehová Diosllatami paipa espíritu santohuan paita sirvishpa catichun, chai nali munaicunata mishachunbash ayudanga (Gén. 4:7).

7. Salomonga ¿imamandata Jehová Diosta sirvinata saquirca?

⁷ Cunanga rey Salomonhuan ima tucushcata ricupashunchi. Salomón joven cashpaca Jehová Diospa ayudata mañashpami causan carca. Chaimi Jehová Diosca Salomonmanga alipacha yachajushca shunguta cushpa Jerusalén llactapi templo huasita shayachichunbash mandarca. Shinapash jipamanga Jehová Diosta sirvinatami saquirca (1 Rey. 3:12; 11:1, 2). Moisesman cushca Leypica nijurcami, Israel llactata mandajcunaca Jehová Diostalla sirvishpa catingapaca ashtaca huarmicunahuanga na cazaranachu can nishpa (Deut. 17:17). Chaita na cazushpami Salomonga 700 huarmicunahuan cazararca. Cutin 300 caishuj huarmicunatapashmi charirca (1 Rey. 11:3). Salomonba ashtaca huarmicunaca yanga dioscunata adorashpa causaj shuj llactacunamanda huarmicunami carca. Shinallata Moisesman cushca Leypi nishcashnaca, Israel llactamanda gentecunaca israelitacunahuanllami cazarana carca. Salomonga shuj llactamanda huarmicunahuan cazarashpami chai mandashcatapash na cazurca (Deut. 7:3, 4).

8. Salomonga ¿ima nalicunatallata rurarca?

⁸ Asha asha Diospa mandashcacunata na cazushpami Salomonga nalicunata rurarca. Paica Astoret shuti yanga diospa, Kemós shuti yanga diospapashmi altarcunata rurarca. Chaicunata rurashpami paipa huarmicunandi yanga dioscunata adorashpa causajurca. Shinallata Jehovapa templo huasi Jerusalén llactapi cajpipashmi, Salomonga chai altarcunataca  Jerusalén chimbapura lomacunapi rurarca (1 Rey. 11:5-8; 2 Rey. 23:13). Salomonga Diospa templo huasipi animalcunata huañuchishpa Jehovaman rupachijpica, Jehová Diosca paipa mandashcacunata na cazushpa nalicunata rurajpipash na imatapash rurangachu nishpami pensashcanga.

9. Salomón Diospa mandashcacunata na cazushcamandaca ¿imata pasarca?

⁹ Jehová Diosca ñucanchi juchacunataca na yangata cungashpa saquinllu. Bibliapica cashnami nin: “Mandaj Taita Diosmanda, paipaj shungupash anchurishca cajpimi Mandaj Diosca, Salomondaca fiñarca. Diosca, ishcai viajeta paiman ricurishpami: “Shuj dioscunataca ama catinguichu” nishpa mandashca carca. Ashtahuangarin Salomonga, Mandaj Dios mandashcataca na pactachircachu” nishpa. Shina rurashcamandaca Salomonda nalicachishpami Jehová Diosca ñana ayudarca. Shinallata Israel llacta ishcaipi separarijpimi Salomonba churicunaca tucui Israel llactata mandashpa catitaca ñana usharca. Salomonba cati miraicunapash ashtaca llaquicunatami charirca (1 Rey. 11:9-13).

10. Jehovapa mandashcacunata na cazujcunahuanga ¿imamandata na yapata llevarina capanchi?

¹⁰ Jehová Diospa mandashcacunata na cazuj huauquipanicunahuan, na Testigo gentecunahuan llevarishpaca paicunashnami pensai callarishun. Tiempohuanga Salomonshnami ñucanchipash Jehovamanda caruyashun. Ñucanchipa amigocuna huauquipanicuna cashpapash huaquingunaca Jehová Diosta na tucui shunguhuan sirvijuimandami Jehovapa mandashcacunata na cazushpa causan. Shinallata Jehovata na sirvij familiacunahuan, vecinocunahuan, escuelapi o  trabajopi Jehovata na sirvij cumbacunahuanbash na yapata llevarinachu capanchi. Imashinami ricupanchi, Jehovata na sirvijcunahuan, Jehovapa mandashcacunata na respetaj huauquipanicunahuanlla yapata yalishpaca tiempohuanga ñucanchipashmi Jehovamanda caruyashun.

11. Ali amigocunata charingapaca ¿imatata tapurina capanchi?

¹¹ (1 Corintios 15:33, liingui) *. Ashtaca gentecunami na Testigo cashpapash ali cualidadcunata charin. Shinallata chai na Testigo gentecunaca nalicunata rurashpallaca na causanllu. Shinapash tapuripashunchi: Paicunahuan llevarinaca ¿alichu can? ¿Paicunaca Jehovata tucui shunguhuan sirvichun ayudahuanllu? ¿Chai gentecunaca imacunamandallata ashtahuan parlan? ¿Mushuj llujshishca ropamanda, diversiongunamanda, computadoramanda, celularmanda, tabletmanda, ashtahuan culquita charinamandallachu parlan? ¿Shujcunamanda huashalla parlanata, mapa nali tranciacunata parlanatachu alicachin? nishpa. Shina tapurishpami ñucanchi amigocuna Jehovata tucui shunguhuan sirvichun ayudajushcata o na ayudajushcata cuenta japishun. Shinallata Jesús nishcapi pensaripashunchi. Paica nircami: “Imata rimachumbash shungupi ninanda yarichijujpimi, shimica riman” nishpa (Mat. 12:34). Shinaca Jehovapa mandashcacunata na cazujcunahuan yapata llevarishpaca Jehová Diosta tucui shunguhuan sirvitaca na ushashunllu. Chaita cuenta japishpaca paicunahuan ama yapata yalingapami esforzarina capanchi. Nali cajpicarin uchallami paicunamanda caruyana capanchi (Prov. 13:20).

12. a) Israelitacuna Egipto llactamanda llujshishca jipaca ¿imatata Jehová Diosca nirca? b) Jehová Dios shina nijpica ¿imatata israelitacunaca nirca?

¹² Egipto llactamanda llujshishca jipa israelitacunahuan imata tucushcata ricupashunchi. Israelitacuna Sinaí urcuman chayajpica ‘culun nishcacunami uyarirca, punchapamba ricurirca. Sangu sangu fuyupashmi urcu jahuaman shamurca. Chaipica cachuta ninanda huacachishcapashmi uyarirca’. Chai chaupimandami Jehová Dios rimashca uyarimujurca (Éx. 19:16-19). Chaipimi Jehová Diosca israelitacunamanga cashna nirca: “Ñucapajlla cachun munaj Diosmi cani”. Ñucapa mandashcacunata cazushpa, ñucata tucui shunguhuan sirvijpica cangunataca na saquishachu nishpa (Éxodo 20:1-6, liingui). Shinaca ñucanchicuna chaipi cashca cashpaca Jehová Dios shina nijta uyashpaca ¿imatashi ruranchiman carcanchi? Israelitacunashnami cashna ninchiman carcanchi: “Mandaj Dios rimashca tucui shimicunataca, rurapashunllami” nishpa (Éx. 24:3). Shinapash israelitacunaca Jehovata cazunajushcata o na cazunajushcatami ñalla ricuchina carca.

13. Moisés urcumanda na ucha uriajumujta ricushpaca ¿imatata israelitacunaca rurarca?

¹³ Israelitacunaca culun nishcata uyashpa, yana yana fuyuta ricushpaca ninandami manllarinajurca. Shina manllarishca caimandami israelitacunaca Jehová Dioshuan parlachunga Moisesta cacharca (Éx. 20:18-21). Moisesca Sinaí urcuman vitsiashpaca tauca punllacunatami chai urcupi carca. Chaimi israelitacunaca ñucanchitallami cai chaquishca pambapi jichushca nishpami pensashcanga. Israelitacunaca Jehová Diospi confianapa randica Moisespirami ashtahuan confiarca. Israelitacunaca urcumanda Moisés na ucha  uriajumujta ricushpami, ‘Aarondaca cashna ninajurca: Ñucanchita ñaupashpa richun, ñucanchiman shuj diosta rurangapaj jatari’. “Egipto llactamanda ñucanchita llujchimuj Moisés runaca, ima tucurcacha na yacharinllu” nishpa (Éx. 32:1, 2).

14. a) Israelitacunaca ¿imatata pensarca? b) Jehová Diosca ¿imatata rurangapaj munarca?

¹⁴ Yanga dioscunata adorana shuj jatun jucha cashcataca israelitacunaca alimi yacharca (Éx. 20:3-5). Chaita yachashca jahuami israelitacunaca orohuan rurashca shicuta adoranajurca. Shina rurashpa Jehovapa mandashcata na pactachinajushcataca israelitacunaca alimi yacharca. Shinapash paicunaca chai orohuan rurashca shicupa ñaupajpi cungurishpapash Jehovatallatami sirvinajunchi nishpami pensashcanga. Shina pandata pensaimandami Aaronga cashna nirca, ‘Mandaj Diospa jatun fiestami can’ nishpa. Chaimi Jehová Diosca Moisesmanga nirca, israelitacunaca “ali causachun ñuca mandashca ñanmandaca, ñapashmi anchurinajushca” nishpa. Jehová Diosca ninanda culirashpami israelitacunata llaquichingapaj munarca (Éx. 32:5-10).

15, 16. Moisespash, Aaronbash ¿imashinata Jehovatalla sirvijushcata ricuchirca? (Callari dibujota ricupangui).

¹⁵ Jehová Diosca llaquishpa perdonaj Dios caimandami israelitacunataca na llaquichirca. Shinallata israelitacunaca Jehovatalla sirvijushcata o na sirvijushcatami ricuchina carca (Éx. 32:14). Orohuan rurashca shicupa ñaupajpi israelitacuna bailanajujta, candanajujta, shinllita caparinajujta ricushpami, Moisesca ninanda culirashpa chai orohuan rurashca shicutaca ñutushpa tucuchirca. Chai jipaca cashnami nirca: “¿Pita Mandaj Dioshuan canguichi? Ñucahuan tandanajumuichi” nishpa. Moisés shina nijhuanmi “Levipaj tucuilla miraicunaca, Moiseshuan tandanajurca” (Éx. 32:17-20, 26).

¹⁶ Aaronga chai shicuta rurashca cashpapash arripintirishpami levitacunahuan tandanajurca. Shina rurashpami Aaronbash, Moisespash, levitacunapash Jehovatalla sirvinajushcata ricuchirca. Paicunaca Jehovapa mandashcacunata na cazuj israelitacunamanda caruyashpaca alitami rurarca. ¿Imamandata shina nipanchi? Chai punllapillatami chai yanga diosta adoraimanda ashtaca ashtaca israelitacuna huañurca. Cutin Jehovatalla sirvijcunaca Jehová Diospa bendiciondami chasquirca (Éx. 32:27-29).

17. Apóstol Pablopa shimicunamandaca ¿imatata yachajupanchi?

¹⁷ Israelitacunahuan ima tucushcamandaca ¿imatata yachajupanchi? Apóstol Pabloca cashnami nirca: Huaquingunaca “yanga dioscunata mañajcunami carca”. Chashnallata ama catichunmi, “ñucanchi ñaupa taitacuna imashna tucushcatapash, tucurimui punllacunapi causanajuj ñucanchita yachachingapaj escribishcapica chashna villajun”. “Maijambash shinllipacha crijmi cani nirijushpaca, aliguta yaringuichi, pactara urmanguichiman” nishpa (1 Cor. 10:6, 7, 11, 12). Huaquingunaca Jehovata ali sirvinajushpapashmi nalicunata ruran. Shina nalicunata rurashpapash Jehovahuan ali amigomi cani nishpa pensan. Shinallata pipash Jehovapa amigo cangapaj munajpi o Jehovata tucuipimi cazuni nijpipash Jehová Diosllami paita tucui shunguhuan  sirvijushcata o na sirvijushcatapash yachan (1 Cor. 10:1-5).

18. ¿Imatata na pensana capanchi? Shina pensanaca ¿imamandata na ali can?

¹⁸ Imashinami ricupashcanchi, israelitacunaca Sinaí urcumanda Moisés na ucha tigramujpimi nalicunatara rurarca. Israelitacunashnami ñucanchicunapash Jehovapa punllaca na ucha chayamunllu nishpa pensanchiman. Shinallata Jehová Dios carasha nishca paraíso alpataca nunca na ricuringachu nishpami pandarinchiman. Jehovapa nishcacuna nara pactaringachu o chaicunaca yanga muscuishnami can nishpami pensai callarinchiman. Shina pensajushpaca Jehová Diospa munaita ruranapa randica ñucanchi munaitarami rurashpa causanchiman. Tiempohuangarin Jehová Diosmanda caruyashpami nunca na pensashca ruraicunata ruranchiman.

19. ¿Imatata na cungana capanchi?

¹⁹ Jehová Diosca paipa mandashcacunata pactachishpa paitalla sirvichunmi munan. Chaitaca nunca na cunganachu capanchi (Éx. 20:5). Shinallata pensaripashunchi Jehovapa munaita na pactachishpaca Diablopa munaitami ruranajunchiman. Ashtahuanbash Diablopa munaita rurashpaca llaquicunatallami charishun. Chaimi apóstol Pabloca cashna nirca: “Cangunaca Jehová Dios carashca copamandapash, ayacunaman carashca copamandapash ishcandita ufiaitaca na ushanguichichu. Jehová Dios carashca micunamandapash, ayacunaman carashca micunamandapash ishcandita micuitaca na ushanguichichu” nishpa (1 Cor. 10:21, NM ).

20. Jehová Diosca ¿imashinata ñucanchicunata ayudan?

²⁰ Cainbash, Salomonbash, israelitacunapash paicunapa pandarishcacunamanda arripintirishpami cambiai ushanman carca (Hech. 3:19). Pensaripashunchi, Aarón runagu pandarijpipash Jehová Diosca perdonashpa paita sirvichunmi saquirca. Shinaca ñucanchicuna pandarijpipash Jehová Diosca ayudangapami munan. Chaimi cunan punllacunapipash Jehová Diosca Bibliapa consejocunahuan, publicaciongunahuan, huauquicunapa consejocunahuan ñucanchitaca ayudan. Jehová Diosca paipa consejocunata cazujpica llaquishpami perdonanga.

21. Cai nali mundopi causashpapash ¿imatata rurana capanchi?

²¹ Jehová Diosca ñucanchita juyaimandami ‘cai pachapi nali munaicunata’ saquishpa, paitalla manllashpa causachun ayudan (Tito 2:11-14, liingui; 2 Cor. 6:1). Cai nali mundopi causajuimandaca siempremi shuj shuj llaquicunata charishun. Chaimi Jehovata tucui shunguhuan sirvinaca shinlli ricuringa. Shinapash ‘Taita Diostallami manllana capanchi. Paitallami sirvishpa causana capanchi’. Shinaca cada unomi Jehová Diostalla sirvishpa causangapaj esforzarina capanchi (Deut. 10:20).