1. Bibliata estudiajushpaca ¿imatata yachajuparcangui?

 BIBLIATA estudiai callarishpa imacunatalla yachajushcataca ¿yaripanguichu? Por ejemplo, Taita Dios shuj shutita charijta yachaj chayashpaca ¿imashinata sintiriparcangui? Shinallata Taita Dios gentecunata shuj infiernopi na llaquichijta yachaj chayashpaca tranquilomi sintiripariangui. Ashtahuanbash huañushca familiacuna causarijpi paicunahuan paraíso alpagupi causai ushanata yachashpaca ninandami cushijupariangui.

2. Bibliata yachajujushpapash espiritualmente ñaupaman catingapaca ¿imata ashtahuan ruraparcangui? (Efesios 5:1, 2).

² Bibliata yachajujushpaca Jehová Diostaca ashtahuanmi juyapariangui. Jehovata shina juyaimandami Bibliapi yachajushcacunataca pactachi callariparcangui. Y Bibliapa consejocunata pactachishcamandami ali decisiongunata japi callaripariangui. Shinallata Jehovapa ñaupapi ali ricuringapaj munashcamandami imashna pensashcata o nali ruraicunata saquishpa cambiocunata rurapariangui. Shinaca imashinami shuj huahua paipa taitapa ejemplota catinshnallatami quiquinbash Jehovapa ejemplota cati callaripariangui (Efesios 5:1, 2​ta liipangui).

3. ¿Ima tapuicunapita pensarita ushapanchi?

³ Cashnami pensarita ushapanchi: “Bautizarishca horasmandaca Jehová Diostaca ¿ashtahuanllu juyapani? ¿Jehová Dioshnallata pensashpa, imatapash rurashpachu huauquipanicunata juyashcata ricuchijuni?”. Jehová Diosta, shujcunata ñana pundashna juyashcata cuenta japishpaca na desanimarinachu capanchi. Jesusta punda catijcunatapash shinallatami pasarca. Shina pasajpipash Jesusca paicunataca na saquircachu. Ñucanchicunatapash na saquingachu (Apoc. 2:4, 7). Bibliata yachajui callarishpa Jehovata y shujcunata juyashcashnallata ñucanchicuna  cutin juyai ushashcataca Jesusca alimi yachan.

4. Cai temapica ¿imatata yachajupashun?

⁴ Cai temapica Jehová Diosta, shujcunatapash imashina ashtahuan juyai ushashcatami yachajupashun. Shinallata shina rurashcamanda ñucanchicunapash y shujcunapash imashina beneficiarijtami yachajupashun.

5, 6. Apóstol Pabloca Jehovata sirvingapaca ¿ima jarcaicunatata charirca? Jehová Diosta sirvishpa catichunga ¿imata ayudarca?

⁵ Apóstol Pablo Jehová Diosta cushilla sirvishpapash ashtaca jarcaicunatami charirca. Por ejemplo, chai tiempopi shuj shuj llactacunaman rina na fácil cajpipash paica caru llactacunaman rishpami villachin carca. Pabloca chai llactacunaman ringapaj ‘yacucunata rijushpaca ashtaca peligrocunapimi carca’. Shinallata ‘shuacuna shuana peligropipashmi carca’. Huaquinbicarin contra gentecunapashmi paitaca llaquichirca (2 Cor. 11:23-27). Ashtahuangarin apóstol Pablo huauquipanicunata ayudangapaj esforzarijpipash huaquingunaca na valichircachu (2 Cor. 10:10; Filip. 4:15).

⁶ Jehovata sirvishpa catichunga Pablotaca ¿imata ayudarca? Pabloca Jehová Dios paita imashina ayudajushcata ricushpa, shinallata Diospa Shimita yachajushpapashmi Jehová Dios imashina cashcata yachajui usharca. Chaimi Jehová paita juyashcata yachaimandaca Jehovata sirvishpa catita usharca (Rom. 8:38, 39; Efes. 2:4, 5). Pablopashmi Jehovataca tucui shungu juyarca. Chaitaca Jehová agllashca huauquipanicunata sirvishpami ricuchirca (Heb. 6:10).

7. Jehová Diosta ashtahuan juyashpa catichunga ¿imata ayudanga?

⁷ Jehovata juyashpa catingapaca Bibliatami ashtahuan yachajushpa catina capanchi. Bibliata liijushpaca: “Cada textocuna Jehová Diosmandaca ¿imacunatallata yachachihuan?” nishpami pensarina capanchi. Cashna pensaripashunchi: “Cai textocunaca Jehová ñucata juyashcataca ¿imashinata ricuchihuan? Shinallata Jehovataca ¿imamandata juyani?” nishpa.

8. Jehovata ashtahuan juyangapaca ¿imata ruranata ayudanga?

⁸ Jehovata ashtahuan juyashpa catichunga paita cada punlla tucui shungu mañanami ayudanga (Sal. 25:4, 5). Y paica chai mañaicunata uyashpami contestan (1 Juan 3:21, 22). Asia llactapi causaj Khanh b paniguca: “Bibliapi yachajushcamandallami, Jehovataca juyan carcani. Shinapash ñuca mañaicunata imashina pai contestajta ricushpami paitaca ashtahuan juyashpa catircani. Shinami Jehovapa ñaupapi ali ricurij cosascunata ashtahuan rurashpa catina munaita charircani” ninmi.

9. Timoteoca ¿imashinata huauquipanicunata ashtahuan juyashcata ricuchirca?

⁹ Apóstol Pablo huaquin huatacunata ña cristiano cashpami ali ejemplota cuj Timoteo jovenguta rijsirca. Cai jovenguca Jehová Diosta y shujcunatapash ninandami juyan carca. Pablo Filipos llactamanda huauquipanicunaman Timoteo jovenmanda parlashpaca: “Paitashnaca nipita na charipanichu. Paica tucui shunguhuanmi quiquingunamandaca preocuparin” nircami (Filip. 2:20). Chai cartapica Pabloca Timoteo imatapash alita rurajta o ali discursocunata cujtaca na parlarcachu. Chaipa randica Timoteo imashina huauquipanicunata ninanda juyan cashcatami parlarca. Chaimandami shuj congregaciongunaca Timoteo paicunata visitachun ninanda shuyanajushcanga (1 Cor. 4:17).

10. Anna panigu y paipa cusapash ¿imashinata huauquipanicunata juyashcata ricuchirca?

¹⁰ Ñucanchicunapash huauquipanicunata ayudangapaca shuj shuj cosascunatami rurapanchi  (Heb. 13:16). Chaishuj temapi parlashca Anna panigutaca ¿yaripanguichu? Manllanaita tamiashca jipami paicunaca shuj Testigo familiata visitangapaj rirca. Cai familiapa huasi techoca urmashcami carca. Chaimandami paicunaca limpio ropaguta churajungapaca na charirca. Anna paniguca paicunata ayudangapaj imata rurashcatami villan. Paica: “Chai ropacunata apashpami tajsharcanchi. Shinallata chai ropaguta planchashpa, doblashpami cutin saquingapaj rircanchi. Chaita ruranaca na dificilchu carca. Pero chai familiata tucui shungu ayudashcamandami cunanbica paicunahuan alipacha amigocuna capanchi” ninmi. Anna y paipa cusagupash huauquipanicunata ninanda juyashcamandami chashna ayudarca (1 Juan 3:17, 18).

11. a) Juyaita ricuchinaca ¿imashinata ayudan? b) Proverbios 19:17​pi nishcashnaca shujcunata juyaita ricuchijpica ¿imashinata Jehová Diosca ricun?

¹¹ Shujcunata llaquishpa, juyaihuan tratashpaca Jehová Dioshna pensajushcata y paipa ejemplota catijushcatami ricuchinajupanchi. Shinaca ñucanchicuna llaquishpa, juyaihuan tratangapaj esforzarishcataca shujcunaca cushijushpami yaringa. Párrafo 8​pi parlashca Khanh paniguca shujcuna paita ayudangapaj imatalla rurashcataca cushijushpami yarin: “Ñañagucuna predicangapaj pushahuashcamandaca ninandami agradicipani. Cai ñañagucunaca juyaihuanmi imagutapash micungapaj o almorzangapaj invitahuan carca. Chai jipaca cutinmi ñuca huasigupillata saquingapaj rihuan carca. Paicunaca imagutapash ruranata saquishpami chaita rurashcanga. Pero chaitaca juyaihuanmi rurashcanga” ninmi. Shinaca na tucuicunachu ñucanchicuna paicunata ayudashcamandaca agradicinga, Khanh paniguca paita ayudashca huauquipanicunamandaca ninmi: “Ñucata ayudashca turiñañagucunata chashnallata ayudangapami munani. Ñucaca paicuna maipi causajtallapash na yachanichu. Pero Jehová Diosca yachanmi. Chaimandami Jehovataca: ‘Paicunata  ayudashpa bendiciapangui’ nishpa mañapani” ninmi. Shinaca ñucanchicuna imapash uchilla cosasgucunata rurajpipash Jehová Diosca tucuitami ricujun. Paipa ñaupapica imaguta rurashpapash ninan valishcami ricurin. Chaimandami paica paiman imagutapash mañachishcatashna ricun (Proverbios 19:17​ta liipangui).

12. Bautizarishca huauquicunaca congregacionbica ¿imashinata shujcunaman juyaita ricuchita ushan? (Fotocunata ricupangui).

¹² Huauquicuna, quiquingunaca huauquipanicunata juyashcataca paicunata ayudashpami ricuchita ushapanguichi. Jordan shuti joven huauquiguca shuj ancianotaca: “Congregacionbi huauquipanicunata ayudangapaca ¿imata rurai ushani?” nishpami tapurca. Shina nijpica chai ancianoca ashtaca cosascunapi mejorashcamanda felicitashpami mejorashpa catichunbash huaquin consejocunata curca. Por ejemplo, huauquipanicunata saludangapaj uchalla chayachun, reuniongunapi comentachun, grupopi predicangapaj seguido llujshichun, shuj huauquipanicunata imagupipash ayudanata ricuchunmi consejarca. Jordan huauquiguca congregacionbi responsabilidadcunata chasquingapaj prepararijushca jahuapash cai consejocunata pactachishpaca huauquipanicunata ashtahuan juyanatami yachajurca. Shinallata siervo ministerial tucushpa huauquipanicunata ayudanapa randica, nara siervo ministerial tucushpallata ña ayudajuna cashcatami cuenta japirca (1 Tim. 3:8-10, 13).

13. Christian huauquigutaca cutin anciano shina sirvichunga ¿imata ayudarca?

¹³ Quiquinga ¿ñanachu anciano o siervo ministerial shina sirvijupangui? Jehová Diosca imagutapash juyaihuan rurashcataca na cunganllu (1 Cor. 15:58). Shinallata shujcunaman juyaita ricuchishpa catijujtapash paica ricujunmi. Christian shuti huauquiguca anciano shina sirvinata saquishpaca nalimi sintirirca. Shinapash paica na desanimarishpami  ñaupaman catirca. Paica: “Anciano shina Jehovata na sirvishpapash Jehovata juyaimandami tucui usharishcaguta rurangapaj esforzarircani” ninmi. Tiempohuanga cutinmi anciano shina sirvina privilegiota chasquirca. Huauquiguca: “Chai privilegiota chasquinata o na chasquinataca na segurochu carcani. Shinapash Jehová Dios congregacionbi anciano shina sirvichun privilegiota cujujpica Jehová Diosta juyaimanda, huauquipanicunata juyaimanda ari nina cashcatami cuenta japircani” ninmi.

14. Georgia llactamanda shuj panigumandaca ¿imatata yachajupanchi?

¹⁴ Testigo de Jehovacunaca na Testigo gentecunatapashmi juyapanchi (Mat. 22:37-39). Por ejemplo, república de Georgiamanda Elena shuti paniguca: “Callaripica predicangapaca Jehovata juyaimandallami llujshin carcani. Shinapash Jehovata ashtahuan juyashpami gentecunatapash juyai callarircani. Gentecuna ima problemata charishcapimi pensari callarircani. Shinallata paicuna ima temacunata alicachinatapashmi pensarircani. Cashna pensarinami gentecunata ayudana munaita charichun ayudahuarca” ninmi (Rom. 10:13-15).

15, 16. Fotocunapi ricushcashnaca juyaita ricuchinaca ¿imapita shujcunataca benefician?

¹⁵ Huauquipanicunaman juyaita ricuchijpica shuj gentecunapashmi beneficiarin. COVID-19 ungui tiashca tiempopica huauqui Paolo y paipa huarmigupash ashtaca mayorlla panigucunatami paicunapa celularta, tabletta utilizashpa predicachun ayudarca. Shuj panigupaca paipa telefonota, tabletta utilizashpa predicanaca  dificilmi carca. Shinapash yachajushpaca paipa familiacunatami Conmemoracionman invitaita usharca. Chaimandami videollamadapica 60 gentecuna conectarirca. Shinaca huauqui Paolo y paipa huarmigupash ayudashcamandami chai panigu y paipa familiacunapash ninanda beneficiarirca. Chai mayorlla paniguca: “Pagui mayorlla gentegucunaman yachachishcamanda. Jehová ñucamanda preocuparishcata, canguna ñucaman pacienciata ricuchishcataca nuncapash na cungashachu” nishpami huauqui Paolomanga escribirca.

¹⁶ Cashna alipacha experienciacuna tiashcamandami huauqui Paoloca ashtacata yachajurca. Chai experienciahuanmi huauqui Paoloca imatapash ali yachashpa, ali rurai ushashpapash juyaita charina ashtahuan importante cashcata cuenta japirca. Shinallata paica: “Huaquin tiempogutami superintendente shina sirvircani. Huauquipanicunaca ñuca discursocunata na yarishpapash paicunata imagupipash ayudashcataca yarinmi” ninmi.

17. Juyaita ricuchijpica ¿picunallata beneficiaringa?

¹⁷ Juyaita ricuchishpaca na yashcapimi ñucanchillata beneficiaripanchi. Nueva Zelanda llactapi pasashca shuj experienciami chaita ricuchin. Jonathan huauquiguca shuj sábado punllapi shuj precursor huauquigu ninan rupai rupaipi pailla predicajujtami ricurca. Chaimandami sábado chishicuna paihuan predicangapaj cumbanata decidirca. Chai ratopica chaita rurashcamanda jipaman paillata beneficiarinataca na yashcarcachu. Huauquigu Jonathanga: “Chai tiempopica predicanataca na gushtanllu carcani. Shinapash cai precursor huauquigu aliguta yachachijta ricushpa, gentecuna uyangapaj munajta ricushpami predicanataca gushtai callarircani” ninmi. Shinallata: “Chaita rurashpaca shuj alipacha amigotami taripashcani. Cai amigoca espiritualmente ali cachun, predicanata gushtachun, Jehová Dioshuanbash ali amigo tucuchunmi ayudahuashca” ninmi.

18. Jehová Diosca ¿imata rurachunda munan?

¹⁸ Jehová Diosca paita y shuj gentecunatapash juyachunmi munan. Y chaita rurai ushangapaca cai temapi yachajushcashnaca Bibliata liina, liishcapi pensarina, Jehová Diosta punllandi punllandi mañanami ñucanchitaca ayudanga. Y ñucanchicuna huauquipanicunata ashtahuan juyashcataca paicunata imagupipash ayudashpami ricuchi ushapanchi. Paicunata ashtahuan juyashpaca Jehová Dioshuan y tucui huauquipanicunahuanmi ashtahuan ali amigocuna tucushun. Y paicunahuanga para siempremi ali amigocuna caita ushapashun.