1. ¿Imamandata shuj jatun llaqui nara japijpillata listo, preparado canaca ali can?

 LISTO canaca salvarichunmi ayudaita ushan. Jatun llaquicuna tiajpi imatapash listo segurashpalla charij gentecunaca salvarishpami shujcunatapash ayudaita ushan. Europa llactamanda llaqui apashca gentecunata ayudaj shuj organizacionga: “Imagutapash listo segurashcalla charinaca ñucanchi causaitami salvaita ushan” ninmi.

2. ¿Imamandata ninan manllanai llaqui tiempopaca listo cana capanchi? (Mateo 24:44).

² ‘Ninan manllanai llaqui tiempoca’ ñucanchi na yashca horaspimi chayamunga (Mat. 24:21). Shinapash chai punllaca na tucuicunatachu cungashcapi japimunga. Porque Jesusca 2 mil huatacuna huashamanga paipa catijcunataca “chai punllapaca listomi cana canguichi” nishpami consejarca (Mateo 24:44​ta liipangui). Jesuspa consejota catishpaca chai llaqui tiempomanda salvarishpami shujcunatapash salvarichun ayudaita ushapashun (Luc. 21:36).

3. Ninan manllanai llaqui tiempopica ¿imamandata aguanteta, llaquinata, juyaita charinaca minishtirishca canga?

³ Ninan manllanai llaqui tiempopa listo cangapaca quimsa cualidadcunatami minishtipanchi. Chai tiempopi “Jehová Diosca nali gentecunata tucuchingami” nishpa villana tucujpi gentecuna ñucanchita jarcangapaj munajpica ¿imatashi rurapashun? (Apoc. 16:21). Chai tiempopi Jehová Diosta cazungapaca aguanteta charina, paipi confianami minishtiringa. Shinallata ñucanchi huauquipanicuna imapash charishca cosasgucunata perdishpa imapash illa quidajpica ¿imatata ruragripanchi? (Hab. 3:17, 18). Chai tiempopaca ñucanchi huauquipanicunata llaquishcata ricuchinami minishtiringa. Shinallami ima minishtirishcagucunapi ayudangapaj esforzarishun. Shinallata tandanajushca ashtaca llactacuna ñucanchita atacajpi, ñucanchi huauquipanicunahuan shuj uchilla espaciogupilla causana tucushpaca ¿imatata ruragripanchi? (Ezeq. 38:10-12). Chai tiempopaca ñucanchi huauquipanicunata juyanami minishtiringa.

4. ¿Imamandata aguanteta, shujcunata llaquishcata, juyaita ricuchina minishtirishcapacha cashcata yachapanchi?

 ⁴ Bibliapica aguanteta, shujcunata llaquinata, juyaita ashtahuan ricuchichunmi animan. Lucas 21:19​pica: “Ultimocaman aguantashpallami salvaringuichi” nijunmi. Shinallata Colosenses 3:12​pica tucui shunguhuan pitapash ‘llaquishpa’ ali tratapaichi nijunmi. Cutin 1 Tesalonicenses 4:9, 10​pica: “Taita Diosllatami quiquingunataca, caishuj chaishuj juyarichun yachachijun. Pero ashtahuan juyashpa causachunmi mañapanchi” nijunmi. Caipi ricushca consejocunaca tucui Jesusta catijcunapami carca. Paicunaca ñami aguanteta, shujcunata llaquishcata, juyaitapash ricuchinajurca. Shinapash chai cualidadcunata ashtahuan ricuchishpa catichunmi consejarca. Ñucanchicunapashmi cashna cualidadcunata ricuchinata minishtipanchi. Shinapash chaipaca ¿imata ayudanga? Cai temapimi punda Jesusta catijcuna imashina cai cualidadcunata ricuchishcata, paicunapa ejemplota imashina catinatapash yachajupashun. Shinallami ninan manllanai llaqui tiempopaca listo capashun.

5. Punda Jesusta catijcunaca aguanteta ricuchingapaca ¿imatata rurarca?

⁵ Punda Jesusta catijcunaca aguantanatami minishtirca (Heb. 10:36). Paicuna shuj shuj llaquicunata charishpapashmi paicunapa crishcacunamandapash llaquicunata charirca. Ashtaca huauquipanicunataca chai tiempopi religionda ñaupaman pushajcuna, Roma llactamanda autoridadcuna, paicunapa propio familiacunapashmi paicunapa crishcacunamandaca catiriashpa llaquichinajurca (Mat. 10:21). Huaquinbica congregacionmanda caruyashca pandacunata yachachij gentecunatapashmi aguantana tucurca. Paicunaca congregacionmanda huauquipanicuna tandanajushca shujllashna ama llevarichunmi panda yachachishcacunata parlanajurca (Hech. 20:29, 30). Chashna cosascunatami punda Jesusta catijcunaca aguantana tucurca (Apoc. 2:3). Shinapash paicunaca ¿imashinata aguantai usharca? Por ejemplo, Job runagumanda y Diosta sirvijcunamandapashmi yachajurca. Paicuna imashina aguantashcapi pensarinami paicunataca ayudarca (Sant. 5:10, 11). Shinallata aguantangapaca Jehová Diostami fuerzata cuchun mañarca (Hech. 4:29-31). Shinallata paicuna aguantashcamanda Jehová Dios bendicianataca yaipimi charirca (Hech. 5:41).

6. Merita panigumandaca ¿imatata yachajuita ushapanchi?

⁶ Aguanteta chari ushangapaca Bibliapi, ñucanchi publicaciongunapi aguanteta ricuchishca ejemplocunamanda liinami ñucanchitaca ayudanga. Albania llactamanda Merita shuti panigutaca chaita ruranami paipa familia catiriashpa llaquichijpica ninanda ayudarca. Paica ninmi: “Bibliapi Jobmanda estudianaca shungumanmi chayahuarca. Job runaguca ashtaca llaquicunatami charirca. Shinapash chai llaquicunata pi cachamujushcataca na yacharcachu. Job runaguca chashna llaquicunahuan cashpapash Job 27:5​pica: ‘Huañungacamanmi, ñucaca ima pandatapash na rimasha’ nircami. Chaicunata liishpaca ñucapa llaquicuna Job runagupa llaquicunahuan ricujpica cazi nima na cashcatami cuenta japircani. Shinallata ñucaca pi llaquicunata cachamujujtaca alimi yachani”.

7. Cunan horas shuj difícil situacionda na charishpapash ¿imatata cunanmandallata rurana capanchi?

⁷ Aguanteta charingapaca Jehová Diosta mañana costumbretapash charinami ayudaita ushan (Filip. 4:6; 1 Tes. 5:17). Cunan horas shuj difícil situacionda na charishpapash preocupado cashpa o imata ruranata na atinajushpaca ¿imatata rurapangui? ¿Jehová Diospa ayudata mascapanguichu? Llaquicunata charishpa cunanmandallata Jehová Diospa ayudata mañana costumbreta charishpaca shamuj punllacunapi llaquicuna shamujpica Jehová Diospa ayudatallatami mascapangui. Chashna rurashpaca Jehová Dios ima hora, imashina ayudanataca seguromi caita ushapangui (Sal. 27:1, 3).

8. Cunan punllacunapi llaquicunata aguantanaca ¿imapata ayudanga? Mira panigupa ejemplomanda parlapai (Santiago 1:2-4) (Fotota ricupangui).

⁸ Cunan punllacunapi llaquicunata aguantashpaca ninan manllanai llaqui tiempopipashmi  aguantaita ushapashun (Rom. 5:3). ¿Imamandata shina nipanchi? Ashtaca huauquipanicunaca imapash llaquicunata mishashpaca shuj llaquicuna shamujpipash aguantai ushashcatami cuenta japishca. Pipash shuj difícil situacionda Jehovapa ayudahuan aguantashpaca Jehová Dios paicunata ayudangapaj munashcatami ashtahuan tucui shungu crin (Santiago 1:2-4​ta liipangui). Chaitallatami Albania llactamanda Mira shuti panigupash pensan. Cai paniguca: “Ñucashna ashtaca problemacunataca pipash na charingachu” yashpami huaquinbica pensan. Chashna pensamientocuna shamujpica paipa causaipi ashtaca huatacunata Jehová Dios paita ninanda ayudashcapimi pensarin. Chaimandami paniguca paillata cashna pensarin: “Ashtaca huatacunatami Jehovapa ayudahuanga llaquicunata mishashpa shamushcani. Cunan horasca Jehová Diosta saquina tiempoca na canllu. Paita sirvishpami catina cani” ninmi. Quiquinbashmi llaquicunata aguantachun imashina Jehová ayudashcapi pensarita ushapangui. Jehová Diosca ima llaquita aguantajujtaca ricujunmi. Chaimandami aguantashcamanda pai bendicianataca seguro caita ushapangui (Mat. 5:10-12). Cunanbi llaquicunata aguantashpaca ninan manllanai llaqui tiempopi chayamujpica aguantangapaca listomi capashun.

9. Antioquía de Siria huauquipanicunaca ¿imashinata huauquipanicunata llaquishcata ricuchirca?

⁹ Judea llactamanda huauquipanicunapaca yarjai tiempomi chayamurca. Shinapash Antioquía llactamanda huauquipanicuna shina llaquita charishcata yachaj yachashpaca paicunata ninanda llaquimandami ayudarca. Paicunaca “Judea llactapi causajuj huauquipanicunaman” imagutapash cachashpa ayudanatami decidirca (Hech. 11:27-30). Judea llactamanda huauquipanicuna caru carupi causanajushpapash Antioquía llactamanda huauquipanicunaca paicunata ayudangapaj decididos carca (1 Juan 3:17, 18).

10. Huauquipanicuna shuj llaquita charijpica ¿imashinata paicunata llaquishcata ricuchita ushapanchi? (Fotota ricupangui).

¹⁰ Huauquipanicuna shuj llaquita charijujta yachaj chayashpaca paicunata llaquishcata ricuchingapami listo cana capanchi. Ancianocunata ayudashpa, contribución culquiguta carashpa o llaqui apashca huauquipanicunamanda mañashpapashmi paicunataca ayudaita ushapanchi (Prov. 17:17). b 2020 huatapi COVID-19 ungui tiajpica llaqui apashca huauquipanicunata ayudangapami mundo enteropi 950 yali Comités de Socorro nishcacunaca tiai callarirca. Chaimandami huauquipanicuna llaqui apashca huauquipanicunata ayudashcamandaca ninanda agradicipanchi. Llaqui apashca huauquipanicunata ninanda llaquimandami paicunamanga micunaguta o minishtirishca cosascunata carashpa, Bibliahuan animashpa y huasigucunata o Salón de Reinocunata cutin shayachishpa ayudashca (2 Corintios 8:1-4​huan chimbapurashpa ricupangui).

11. Huauquipanicunata llaquishcata ricuchishpaca ¿gentecuna imata rurachunda ayudanchi?

¹¹ Na Testigo gentecunaca llaqui apashca huauquipanicunata ñucanchicuna imashna ayudajujtaca ricunajunmi. Por ejemplo, 2019 huatapica Bahamas llactapi Dorian nishca shuj jatun acapanami shuj Salón de Reinota tucuchirca. Chaimandami huauquicunaca chai Salón del Reinotaca arreglanajurca. Ashtahuan ayudata minishtinajushcamandami huauquicunaca trabajadorcunata contratajtaca: “Salón del Reinota arreglangapaca ¿mashnata cobragripangui?” nishpa tapunajurca. Shinapimi chai jarica: “Ñucaca materialcunata cushpa, trabajashpami cangunataca ayudangapaj munani. Quiquingunapa amigocunata imashina tratajta, ayudajta ricushpami cangunataca ninanda alicachini” nirca. Mayoría gentecuna Jehová Diosta na rijsishpapash testigo de Jehovacuna imacunatalla rurajtami ricunajun. Ñucanchi  huauquipanicunata llaquimandami ayudashpa catipanchi. Shinami na Testigo gentecuna ‘ninanda llaquij’ Jehová Diosta rijsichun ayudaita ushapanchi (Efes. 2:4).

12. Shujcunata llaquinaca ¿imamandata ninan manllanai llaqui tiempopa listo cachun ayudan? (Apocalipsis 13:16, 17).

¹² Ninan manllanai llaqui tiempopica ¿imamandata llaquinata minishtipashun? Bibliapica cunanbipash y ninan manllanai llaqui tiempopipashmi gobiernocunata na apoyajcunataca llaquichinga nijunmi (Apocalipsis 13:16, 17​ta liipangui). Chai tiempopica huauquipanicunaca minishtirishca cosasgucunata charingapaca talvezpashmi ñucanchipa ayudata minishtinga. Jesús gentecunata juzgangapaj shamujpica ñucanchicunaca shujcunata llaquishpa tratanajushcata ricuchingapami munapanchi. Ñucanchicuna alita ruranajushcata japij shamushpaca Jesusca: ‘Taita Diospa Gobierno carana bendiciongunata chasquichi’ ningami (Mat. 25:34-40).

13. Apostolcunapa punllacunapica cristianocunaca paicunapura ashtahuan juyaringapaca ¿imatata rurarca? (Romanos 15:7).

¹³ Apostolcunapa punllacunapica cristianocuna paicunapura juyarishcataca tucuicunami yacharca. Shinapash paicunapura chashna juyarinaca ¿facilchu carca? Por ejemplo, Roma llactapa congregacionbica shuj shuj llactamanda, shuj shuj costumbrecunata charij huauquipanicunami tiarca. Huaquingunaca judiocuna caimandami Moisesman Cushca Leyta cazushpa viñashcarca. Cutin shujcunaca shuj llactacunapi viñashca caimandami shuj costumbrecunata charirca. Shinallata huaquingunaca esclavocunami cashcanga. Cutin shujcunaca paicunata sirvichunmi esclavocunata charishcanga. Cashna diferentecuna cashpapash randimanda ashtahuan juyarichunga ¿imata ayudashcanga? Apóstol Pabloca: “Caishujhuan chaishujhuan cushijushpa chasquirina capanguichi” nishpami consejarca (Romanos 15:7​ta liipangui). Cai shimicunahuanga ¿imatata ningapaj munarca? Pitapash huasipi mingachishpa o pihuanbash amigo tucungapaj munashpaca aligutami tratapanchi. Apóstol Pablo “cushijushpa chasquirina” canguichi nishpaca huauquipanicunata chashna aliguta tratana cashcatami ricuchijurca. Por ejemplo, Filemón huauquigupa Onésimo shuti esclavoca paipa huasimanda pacajushpami rishcarca. Chaimandami apóstol Pabloca Filemón huauquigutaca paita juyaihuan chasquipangui nirca (Filem. 17). Cutin Priscila y Áquila cusahuarmica ali cristianocuna canamandaca Apolos huauquiguta yalimi yacharca. Shina cajpipash paicunaca Apolos huauquita aliguta chasquishpami juyaihuan tratarca (Hech. 18:26). Cai huauquipanigucuna shuj shuj causaita charishpapash caishujhuan chaishujhuan cushijushpami chasquirirca.

14. Anna y paipa cusapash ¿imashinata juyaita ricuchirca?

¹⁴ Ñucanchicunapash huauquipanicunata juyashcataca paicunata aliguman chasquishpa, paicunahuan amigo tucushpami ricuchita ushapanchi. Shina rurajpica paicunapashmi ñucanchitaca juyaihuan tratanga (2 Cor. 6:11-13). Anna y paipa cusaguca chaitami ricurca. Paicunataca África Occidentalpimi misionero shina sirvichun cacharca. Chaiman chayashca jipallami COVID-19 ungui tiai callarirca. Chaimandami huauquipanigucunahuanga congregacionbi en personaca ñana tandanajui usharca. Shinaca cai cusahuarmica huauquipanicunata juyashcata ricuchingapaca ¿imatata rurarca? Paicunaca videollamadata rurashpami huauquipanicunataca: “Cangunataca ashtahuan ali rijsingapami munapanchi” nirca. Paicuna shina rurajpica congregacionmanda huauquipanicunaca ninandami agradicirca. Chaimandami paicunapash paicunataca telefonopi cayashpa mensajecunatapash cachai callarirca. Cai cusahuarmica ¿imamandata congregacionmanda huauquipanicunata ashtahuan rijsingapaj esforzarirca? Anna paniguca ninmi: “Ima pasajpipash ñucaman, ñuca familiaman shuj turiñañacuna juyaita ricuchishcataca siempremi yaipi charini. Chaimi shuj turiñañacunamanbash shinallata juyaita ricuchichun ayudahuashca” ninmi.

15. Huauquipanicunaman juyaita ricuchinamandaca ¿imatata Vanessa panigumandaca yachajupanchi? (Fotota ricupangui).

 ¹⁵ Ashtaca congregaciongunapimi shuj shuj costumbrecunata, shuj shuj culturata charij huauquipanicunata charipanchi. Y paicunata ashtahuan juyangapaca paicunapa ali cualidadcunata ricunami ñucanchitaca ayudanga. Nueva Zelanda llactamanda Vanessa shuti panigupaca congregacionmanda huaquin huauquipanicunahuan llevarinaca dificilmi carca. Shinapash paicunahuan llevarinata saquinapa randica paicunahuan ashtahuan tiempota yalingapami esforzarirca. Chaita ruraimandami paicunapa ali cualidadta ricui usharca. Paica ninmi: “Ñuca cusagutaca superintendente shina sirvichunmi nombrarca. Chaimandami cunanbica shuj shuj cualidadcunata charij turiñañacunahuan tandanajupanchi. Cunanbica shujcunahuan llevarinaca ashtahuan facilmi capan. Jehová Diosca shuj shuj costumbrecunata charij gentecunatami paipa organizacionman pushamushca. Paipa ejemplota catishpami shuj shuj turiñañacunahuan llevarinata ninanda gushtapani”. Shinaca ¿imashinata ñucanchi huauquipanicunata juyashcata ricuchita ushapanchi? Chaipaca Jehová Dios ricushcashnami paicunataca ricuna capanchi (2 Cor. 8:24).

16. Ninan manllanai llaqui tiempopica ¿imamandata juyaita ricuchinaca minishtirishcapacha canga? (Fotocunata ricupangui).

¹⁶ Ninan manllanai llaqui tiempopica ñucanchi huauquipanicunata juyanaca ninan minishtirishcapachami canga. Chai tiempopica Jehová Diosca ¿imashinata ñucanchicunataca cuidanga? Chaita yachangapaca Babilonia llactata atacajpi israelitacuna salvarichun Jehová Dios imata mandashcata ricupashunchi. Jehová Diosca paicunataca: “Ñuca llactapi causajcunalla, cangunaca ucucunaman yaicushpa, punguta vicharichi. Dios fiñarishcata yalichingacaman, shuj ashaguta pacajuichi” nircami (Is. 26:20). Ninan manllanai llaqui tiempopica talvez ñucanchipashmi cai mandashcatallata catina tucupashun. Cai textopi ‘ucucuna’ nishpaca talvez congregaciongunamandami parlajun. Chai tiempocunapi ñucanchi huauquipanicunahuan ali llevarishpa, unidos cajpica Jehová Dios prometishcashnami ñucanchitaca cuidanga. Ñucanchi huauquipanicunapa pandarishcacunata aguantanaca na suficientechu can. Paicunataca cunanmandallatami ciertopacha juyana capanchi. Ciertopacha juyaita ñucanchi huauquipanicunaman na ricuchishpaca ninan manllanai llaqui tiempopica talvez na salvarishunllu.

17. Ninan manllanai llaqui tiempopa cunanmandallata preparado, listo cashpaca ¿imatata rurai ushapashun?

¹⁷ Jehovapa punlla chayamushpaca gentecunapaca llaqui tiempomi canga (Sof. 1:14, 15). Jehovata sirvijcunapashmi llaquicunataca charinga. Shinapash cunanmandallata listo, preparado cashpaca na yapata manllarishpami shujcunatapash ayudaita ushapashun. Ima llaquicuna shamujpipash mishai ushangapaca aguanteta charinami ayudanga. Shinallata shujcunata llaquinami huauquipanicuna imagupi minishtinajujpipash ayudangapaj dispuesto capashun. Y paicunata ña juyashcamandami ima pasajpipash shujllashna unido caita ushapashun. Y shina rurashcamandami Jehová Diosca para siempre causana bendicionda ñucanchimanga caranga. Chaipica tucui llaquicuna, problemacunaca ñana tiangachu (Is. 65:17).