PUNDA tiempomanda Babilonia llactapica arqueologunaca ashtaca millón ladrillocunatami tarishca. Chai ladrillocunahuanmi Babilonia llactataca construirca. Robert Koldewey shuti arqueólogo jarica: “Chai ladrillocunataca hornocunapimi cusan carca. Babilonia llacta canllapi ladrillocunata rurangapaj ali turu, ashtaca yamda tiashcamandami chai hornocunaca Babilonia canllapi carca” ninmi.

Shinapash Babilonia llactapa gobiernopi sirvijcuna chai hornocunata manllanai cosascunatapash rurangapaj utilizan cashcatami arqueologocunaca yachaj chayashca. Asiria llactapa historiamanda, shimimanda alipacha yachajushca Paul-Alain Beaulieu profesorca: “Babilonia llactapi tarishca ashtaca documentocunaca pipash reypa contra tucujpi o babilonio gentecunapa santo cosascunata na respetajpica rey paicunata rupachishpa huañuchichun mandan cashcatami ricuchin” ninmi. Rey Nabucodonosorpa tiempomanda shuj escribishcapica: “Paicunata rupachispa, cusashpa tucuchichi. Paicunataca hornoman cachaichi. Paicuna chai hornopi cushni tucuchun. Manllanai rupajuj nina paicunata rupachishpa tucuchichun” ninmi.

Chaita uyashpaca Bibliapi, Daniel capítulo 3​pi ima pasashcatami talvez yaripanchi. Chaipica rey Nabucodonosor Babilonia llacta canllapi orohuan rurashca shuj jatun estatuata rurashcatami ricuchin. Sadrac, Mesac y Abednego hebreo jovengunaca chai estatuapa ñaupapica na cungurircachu. Chaita ricushpaca rey Nabucodonosorca ninanda fiñarishpami chai hornota “canchis viaje yalicaman rupachinajuchun”, chai jovengunata ‘rupajuj hornoman’ shitachun mandarca. Shinapash ashtaca poderta charij shuj angelmi paicunataca salvarca (Dan. 3:1-6, 19-28).

Babilonia llactapi tarishca ladrillocunapashmi Biblia cabal cashcata ricuchin. Ashtaca ladrillocunapimi reyta jatunyachingapaj escribishcacunata saquishca. Por ejemplo, shuj ladrillopica: “Babilonia llactamanda rey Nabucodonosor. Jatun Rey ñucallatami cai mandana huasitaca rurarcani. Cai huasimandami ñucapa miraicuna para siempre mandachun” ninmi. Cai ladrillopi escribishcaca Daniel 4:30​pi shimicunahuanga parecidopachami can. Chai textopica: “Cai jatun Babilonia pueblotaca ¿nachu ñuca rurachircani? Caitaca, ñuca mandana huasita caipi charingapajmi, ñuca ninan ushaihuan rurachircani. Ñuca mandajushcamanda ninanda alicachi tucungapajmi, caitaca rurachircani” ninmi.