TEMA 31
“Shinlli shayarishpa na cuyurinachu capanguichi”
“Ñuca juyashca huauquicuna shinlli shayarishpa na cuyurinachu capanguichi” (1 COR. 15:58).
CÁNTICO 122 Shinlli tucushunchi
CAITAMI YACHAJUPASHUN a
1, 2. Jesusta catijcunaca Japón llactapi jatun edificiohuanga ¿imapita igual capanchi? (1 Corintios 15:58).
1970 HUATACUNA tucurijujpimi Japón llactapica shuj jatun edificio de 60 pisota rurarca. Chaita ricushpaca gentecunaca: “Chai edificioca terremotocunataca ¿aguantangacha?” yashpami pensarca. Y chai edificioca aguantarcami. Porque ingenierocunaca chai edificiota rurashpaca shinllita y caiman chaiman cuyuri ushachunmi rurarca. Chaimandami terremoto tiajpica caiman chaiman cuyurishpapash na faquirishpa aguantai usharca. Jesusta catijcunaca chai jatun edificiohuanga ¿imapita igual capanchi?
2 Imashinami chai edificio shinlli shinlli can, shinallatami Jehovata sirvijcunaca paipa mandashcacunata, consejocunataca tucuipi cazungapaj decididocuna capanchi. Chai edificio shinlli cashpapashmi terremoto tiajpica ama urmangapaca cuyurita ushan. Shinallatami ñucanchicuna Jehovata tucuipi sirvishpapash ñucanchi causaipi o Jehovapa organizacionbi cambiocunata respetashpa, shujcunapa yuyaicunata respetashpa na ñucanchi nishcahuanlla yalingapaj munajcuna cashcata ricuchina capanchi (1 Corintios 15:58ta liipangui). Jehovapa leycunata, consejocunata ama huashaman saquingapaca listomi cana capanchi. Shinapash na ñucanchi nishcahuanlla yalingapaj munapanchichu (Sant. 3:17). Shinami imagutapash aliguta yuyashpa ruraita ushapashun. Cai temapica ima situaciongunapilla Jehovata cazungapaj decidido cana cashcatami ricugripanchi. Shinallata Diablo ima picha cosascunahuan Jehovata saquichun ñucanchita pandachingapaj munashcata y chai trampacunapi ama urmangapaj imata rurana cashcatami ricugripanchi.
¿IMA SITUACIONGUNAPITA JEHOVATA CAZUNGAPAJ DECIDIDO CANA CAPANCHI?
3. Hechos 15:28, 29pica Jehová Diosca ¿imatata mandashca?
3 Jehová Diosmi leycunata churangapaca tucuimanda yali autoridadta charin. Y paica paipa sirvijcunamanga siempremi intindirinalla leycunata cushca (Is. 33:22). Por ejemplo, Jesusta punda catijcunapa tiempopi Cuerpo Gobernanteca Jehovapa quimsa mandashcacunata cazungapaj decidido cana cashcatami ricuchirca. 1) Yanga dioscunata, santocunata na adorashpa Jehovatalla adorana cashcatami yachachirca. 2) Yahuarta respetana cashcatami yachachirca. 3) Huainayana juchapi na urmashpa limpio causaita charina cashcatami yachachirca (Hechos 15:28, 29ta liipangui). ¿Imashinata chai mandashcacunataca shinlli tucushpa pactachi ushapanchi?
4. Jehovatalla sirvishcata ricuchingapaca ¿imatata rurana capanchi? (Apocalipsis 4:11).
4 Santocunata, gentecunataca na adorapanchichu. Jehovatallami adorapanchi. Jehová Diosca israelitacunataca paitalla adorachunmi mandarca (Deut. 5:6-10). Diablo, Jesusta tentangapaj munajpica Jesusca Jehovatallami adorana cangui nishpami tigrachirca (Mat. 4:8-10). Chaimandami ñucanchicunaca santocunataca na adorapanchi. Shinallata religiongunata ñaupaman pushajcunata, politicocunata, famoso gentecunatapash shuj diostashnaca na adorapanchichu. Chaipa randica Jehovapa lado tucushpami paitalla adorapanchi (Apocalipsis 4:11ta liipangui).
5. ¿Imamandata causaita y yahuartaca respetapanchi?
5 Causaita, yahuartapashmi respetapanchi. ¿Imamandata respetapanchi? Porque Jehová Diosca causaica yahuarpimi can ninmi. Y causaica Jehová carashca shuj valishca regalomi can (Lev. 17:14). Jehová primera vez animalcunapa aichata micuchun saquishpaca yahuartaca nimamanda na micunachu canguichi nishpami mandarca (Gén. 9:4). Jipamanga Moisesman Cushca Leypipash yahuarta ama micuchunmi mandarca (Lev. 17:10). Shinallata Jesusta punda catijcunapa tiempopipash cutinllatami Jehová Diosca Cuerpo Gobernantehuan Jesusta catijcunamanga yahuarmanda jarcarinami canguichi nirca (Hech. 15:28, 29). Ñucanchicunapash operarina cashpa o imapash tratamientocunata catina cashpaca chai mandashcacunata cazungapaj imapash jarcachunga na saquipanchichu. b
6. Huainayana juchapi ama urmachunga ¿imata ayudanga?
6 Jehovata cazushpa huainayana juchapi ama urmangapami ninanda esforzaripanchi (Heb. 13:4). Apóstol Pabloca: “Quiquingunapi tiashca huainayana juchata rurana munaicunataca huañuchinami capanguichi” nircami. Cai shimicunaca ñucanchipa nali munaicunata saquitapacha saquingapaj decidido cachunmi animan. Chaimandami huainayana juchapi urmachij cosascunata ricunamanda, ruranamandaca jarcaripanchi (Col. 3:5; Job 31:1). Jehovahuan ali amigo cashpa catingapaj munaimandami huainayana juchapi urmana tentación ricurijpi o imapash nali pensamientocuna shamujpica uchalla chaicunamandaca caruyanchi.
7. ¿Imata rurangapata decidido cana capanchi?
7 Jehová Diosca “tucui shunguhuan” paita cazuchunmi munan (Rom. 6:17). Paipa leycunaca ñucanchipa alipallatami can. Paipa leycunataca caitaca cazushami, caitaca na cazushataca na nita ushapanchichu (Is. 48:17, 18; 1 Cor. 6:9, 10). Ñucanchicunaca Jehovata tucuipi cushichingapami decidido cangapaj munapanchi. Salmista runagu nishcashnami ningapaj munapanchi. Paica: “Ñuca shungupica, pactachinajuchun can cushca shimicunata pactachishpa tucuchingacamanmi, tucui causaipi ashtahuan ashtahuan yarijurcanilla” nircami (Sal. 119:112). Shinapash Diabloca Jehovapa leycunata ama cazushpa juchapi urmachunmi munan. Chaipaca ¿imatata rurajun?
DIABLOCA JEHOVATA CAZUNATA SAQUICHUNGA ¿IMATALLATA RURAJUN?
8. Diabloca ¿imapata catiriashpa llaquichin?
8 Catiriashpa llaquichina. Diabloca Jehovata sirvinata saquichunmi Diosta na sirvij gentecunata utilizashpa llaquichin. Paica ñucanchicuna Jehovata sirvinata saquitapacha saquichunmi munan (1 Ped. 5:8). Jesusta punda catijcuna Jehovata sirvingapaj decidido cashcamandami paicunataca ninanda macashpa, huañuchitapash huañuchirca (Hech. 5:27, 28, 40; 7:54-60). Cunanbipash Jehovata sirvinata saquichunmi Diabloca catiriashpa llaquichijushca. Por ejemplo, Rusia llactapi y shuj llactacunapipashmi ñucanchi huauquipanigucunaca ninanda llaquichi tucushca. Shinallata huauquipanigucunataca shuj shuj ruraicunahuanmi llaquichishca.
9. Na sintijta trampacunahuan Diablo ama umachichun pendiente cana cashcata shuj ejemplohuan intindichipai.
9 Na sintijta umachij trampacuna. Diabloca catiriashpa llaquichishca jahuapash, na sintinalla ‘trampacunahuanmi’ umachin (Efes. 6:11). Bob huauquipa ejemplota ricupashun. Paica shuj jatun operaciondami charigrijurca. Chaimandami doctorcunamanga: “Yahuartaca nimamanda na chasquipashachu” nishpami villarca. Doctorca: “Canba decisiondaca respetashunmi” nircami. Shinapash operacionba shuj tuta faltajpi visitangapaj shamushca familiacuna rishca jipaca, anestesiata churaj doctor shamushpaca: “Seguramentemi yahuartaca na churashun. Pero operación horasca por si acasomi yahuartaca ladopi charishun” nircami. Anestesiata churador doctorca familiacuna rishca jipaca, “yahuartaca talvezpashmi churachun munanga” yashcangami. Shinapash huauquigu Bobca: “Ima pasajpipash yahuartaca na chasquishachu” nircami. Shinami Jehovata cazungapaj decidido cashcata ricuchirca.
10. Jehovata na sirvij gentecunapa yuyaicunaca ¿imamandata nali can? (1 Corintios 3:19, 20).
10 Jehovata na sirvijcunapa yuyaicuna. Jehovata na sirvij gentecunashna pensai callarishpaca Jehovapa mandashcacunata na cazushpami paita sirvinatapash saquipanchiman (1 Corintios 3:19, 20ta liipangui). Cai mundopi ‘gentecunapa’ yuyaicunaca ñucanchipa munaicunatalla rurachunmi animan. Pérgamo y Tiatira congregaciongunahuan ima pasashcata ricupashunchi. Huaquin Jesusta catijcunaca congregación ucupi huainayashpa causajcuna, yanga dioscunata adorajcuna paicunata pandachichunmi saquinajurca. Jesusca congregaciongunapi cashna gentecunata aguantashpa charishcamandami shinllita rimarca (Apoc. 2:14, 20). Cunanbipash Diosta na sirvij gentecunaca paicunashna pensachunmi imatapash ruraita o nita ushan. Huaquinbica ñucanchi familiarcuna o rijsicunaca ñucanchi munaicunatalla rurashpa, Jehovapa mandashcacunata huashaman saquichunmi animaita ushan. “Ñucanchipa munaicunata ruranaca imapash nalica na canllu. Bibliapa consejocunaca yapa antiguomi” nishpapashmi nita ushan.
11. ¿Imata ruranamandata jarcarina capanchi?
11 Huaquinbica “Jehová Diospa instrucciongunaca na ashta claro o na intindirinallachu can” yashpami pensaita ushapanchiman. Chaimandami huaquinbica imatapash ñucanchi munashcashna rurashpa, shujcunapash chaitallata rurachun munapanchiman (1 Cor. 4:6). Jesuspa punllacunapica judiocunata ñaupaman pushajcunami chaita rurashpa pecadopi urmarca. Diospa leycunatalla catinapa randica, paicunapa yuyaicunata churashpami gentecunataca ninanda llaquichi callarirca (Mat. 23:4). Shinapash Jehová Diosca Bibliahuan, paipa organizacionhuanmi ñucanchimanga intindirinalla instrucciongunata cun. Ñucanchi munashcashna imatapash rurashpa chai instrucciongunata cambianaca na minishtirinllu (Prov. 3:5-7). Chaimandami Taita Dios escribichishca shimipi imata nijushcatalla rurangapaj esforzaripanchi. Shinallata ñucanchi munashcashna imatapash ruranamanda o huauquipanicuna rurachun obliganamandaca jarcarinami capanchi.
12. Diabloca panda yachachishcacunata uyachingapaca ¿imatata utilizan?
12 Llulla yachachishcacuna. Diabloca gentecuna ama shujllashna unido cachunmi “llulla yachachishcacunahuan” y ‘cai mundopi gentecunapa yuyaicunahuan’ paicunataca umachin (Col. 2:8). Por ejemplo, punda cristianocunapa punllacunapica gentecunapa yuyaicuna, Bibliamanda na llujchishca judiocunapa panda yuyaicunami tiarca. Shinallata huaquingunaca cristianocunapash Moisesman Cushca Leyta catishpa catina cashcatami crirca. Chai tiempopica Diabloca chai yachachishcacunahuanmi pandachirca. Chai panda yachachishcacunaca gentecuna Jehovata cazuchunga na ayudarcachu. Cunan punllacunapica Diabloca yanga parlocunata, politicocunapa llullacunata uyachingapami radiota, teleta, internetta, redes sociales nishcacunatapash utilizan. Por ejemplo, COVID-19 pandemiapica ashtaca llulla informaciongunami llujshirca. c Chai tiempopica Jehovapa organizacionga imata ruranata yachachunmi ashtaca instrucciongunata curca. Chai instrucciongunata cazushca Testigocunaca chai llulla informaciongunata na catishcamandami na yapa problemacunata charirca. Shinallata yapa estresadopash na sintirircachu (Mat. 24:45).
13. ¿Imamandata na ashta importante cosascunapi na yapa tiempota yalina capanchi?
13 Na ashta importante cosascunapi yapa tiempota yalina. ‘Ima ashtahuan importante cashcataca’ siempremi yarina capanchi (Filip. 1:9, 10). Na ashta importante cosascunata rurashpa yapa tiempota yalishpaca ashtahuan importante cosascunata rurangapaca na tiempota charishunllu. Por ejemplo, micushpa, ufiashpa, pugllashpa o trabajashpa yapa tiempota yalishpaca Jehovataca na aliguta sirvi ushashunllu (Luc. 21:34, 35). Shinallata huelgacunamanda, politicacunamanda noticiacunaca cada punllami llujshin. Chai cosascunapash Jehovata sirvingapaj ñucanchita jarcachunga na saquinachu capanchi. Chai cosascunata yapata uyashpa o ricushpaca talvezmi politicapica pitapash apoyai callarinchiman. Ñucanchicuna Jehovata tucui shunguhuan sirvingapaj ama decidido cachunmi Diabloca cai parrafocunapi ricushca 5 cosascunahuan ñucanchita pandachingapaj munan. Shinaca Diablopa trampacunapi ama urmangapaj, Jehovata shinlli tucushpa sirvingapaj imata rurana cashcata ricupashun.
JEHOVATA SIRVINGAPAJ DECIDIDO CACHUNGA ¿IMATA AYUDANGA?
Jehovata sirvingapaj decidido cachunga imamanda bautizarishcata yarina, Bibliata yachajushca jipa imata yachajushcapi pensarina, ñucanchi shungupi decidido cana y Jehovapi confianami ayudanga (Párrafo 14 a 18ta ricupangui).
14. Jehovata sirvingapaj decidido cachunga ¿imata ayudanga?
14 Imamanda Jehovata candallami sirvisha nishcata, imamanda bautizarishcata yaripashunchi. Caicunataca Jehovata sirvingapaj decidido caimandami ruraparcanchi. Testigo de Jehovacuna cabalta yachachishcata imamanda seguro cashcata yarinami capangui. Jehovata asha asha rijsishpa shuj Taitatashna ricushpami, paitaca respetai y juyai callariparcangui. Jehovapi tucui shungu cri callarimandami quiquinba pecadocunamandapash arripintiriparcangui. Chaimandami Jehová millanayachishca cosascunata saquishpa pai munashcashna causai callariparcangui. Shinallata quiquinba pecadocunamanda Jehová perdonashcata yachaj chayashpaca tranquilo, alimi sintiriparcangui (Sal. 32:1, 2). Ashtahuanbash reuniongunamanmi ri callariparcangui. Bibliapi yachachishcacunamandapashmi shujcunaman parlai callariparcangui. Cunanbicarin Jehovata candallami sirvisha nishcamanda y bautizarishcamandami causaiman apaj ñanbi purijupangui. Y Jehovata sirvinata ama saquingapaca decididomi capangui (Mat. 7:13, 14).
15. Bibliata yachajuna, yachajushcapi pensarinaca ¿imashinata ayudan?
15 Bibliata yachajushca jipa imata yachajushcapi pensaripashunchi. Shuj quiru ama urmachunga shinlli sapicunatami minishtin. Shina cuendallatami Jehovapi tucui shunguhuan crinaca paita sirvingapaj decidido cachun ayudanga. Shuj quiru viñajpica quirupa sapicunapashmi viñashpa catin. Tiempohuanga chai sapicunaca ashtahuan sapiyashpami catin. Shinallatami Bibliata yachajushpa y yachajushcapi pensarishpaca Jehovapica ashtahuan cripanchi. Y Jehovapa yachachishcacuna tucuita yali ali cashcatapashmi seguro capanchi (Col. 2:6, 7). Punda tiempocunapi Jehová paipa sirvijcunaman imashina instrucciongunata, consejocunata cushcapi, paicunata imashina cuidashcapi pensaripashunchi. Por ejemplo, profeta Ezequielca shuj muscuipishnami shuj ángel Jehovapa templota imashina medishcata ricurca. Cai muscuipishna ricushcacunaca Jehovapi tucui shunguhuan crichunmi Ezequieltaca ayudarca. Cunan punllacunapipash Jehovata aliguta adorangapaj paipa mandashcacunata respetana cashcatapashmi yachachin (Ezeq. 40:1-4; 43:10-12). d Shinaca Bibliapa valishca yuyaicunata yachajungapaj y chai yachajushcacunapi pensaringapaj tiempota llujchinaca ñucanchitaca ninandami ayudanga.
16. Jehovata sirvingapaj decidido canaca ¿imashinata Bob huauquigutaca ayudarca? (Salmo 112:7).
16 Jehovata sirvingapaj ñucanchi shungupi decidido cashunchi. Rey Davidca shuj cancionbimi Jehovata juyanataca nunca na saquishachu nirca. Paica: “Taita Dioslla, ñuca shunguca canman candangapaj yariajunmi” nircami (Sal. 57:7). Ñucanchicunapashmi Jehovapi tucui shunguhuan confiashpa paita sirvingapaj decidido caita ushapanchi (Salmo 112:7ta liipangui). Párrafo 9pi parlashca Bob huauquiguta yaripashunchi. Jehovata sirvingapaj decidido canaca ¿imashinata paitaca ayudarca? Huauquigutaca: “Operación horasca por si acasomi yahuartaca ladopi charishun” nishcarcami. Shina nijpimi huauquiguca doctorcunataca: “Quiquinguna yahuarta churanata pensaitallapash pensajpica ñucaca cai hospitalmanda cunandami risha” nircami. Bob huauquiguca: “Yahuartaca nimamanda na chasquigrijurcanichu. Huañuna cashpapash Jehovatami cazungapaj munarcani” ninmi.
Jehovapi tucui shunguhuan crishpaca ima llaquicuna shamujpipash paita sirvingapami decidido cashpa catishunchi (Párrafo 17ta ricupangui).
17. Huauqui Bobpa ejemplomandaca ¿imatata yachajupanchi? (Fotocunata ricupangui).
17 Huauqui Bobca yahuarta ama churaringapaj hospitalpi cashpa chaira decidingapaca na shuyarcachu. Paica pundallatami ña preparado carca. Primeroca, Jehovata tucui shungu sirvingapami decidido carca. Catipica, Bibliapi y publicaciongunapi yahuar Jehovapa valishca cashcatami ricurca. Ultimopica, Jehovapa mandashcata cazushpaca paita bendicianataca seguromi carca. Huauqui Bobshnallatami ñucanchipash imapash llaquicuna ricurijpica Jehovata cazungapaj decidido cana capanchi.
Barac y paipa soldadocunami Sísara runapa soldadocunataca na manllashpa catinajun (Párrafo 18ta ricupangui).
18. Jehovapi confiachunga ¿imashinata Baracpa ejemploca ayudan? (Callari paginapi dibujota ricupangui).
18 Jehovapi confiapashunchi. Juez Barac runagupi pensaripashunchi. Barac runagu Jehovapa mandashcata cazushcamandaca israelitacunaca shuj guerrapimi contracunataca mishaita usharca. Chai punllacunapica israelitacuna ni shuj escudotapash, ni shuj lanzatapash na charimandami guerrapi macanajungapaca na preparado carca. Shinapash Canaán llactamanda Sísara shuti runa y paipa soldadocunapash ashtaca armacunatami charirca. Shina cajpipash Jehová Diosca paicunahuan macanajuchunmi Barac runagutaca mandarca (Juec. 5:8). Débora shuti profetisaca Barac runagutaca Tabor urcumanda uriajushpa, pambaman rishpa Sísara runahuan y carretacunapi macanajuj 900 soldadocunahuan macanajuchun mandarca. Carretacunapi macanajuj soldadocuna israelitacunata pambacunapi ashtahuan fácil mishaita ushanshna ricurijpipash Barac runaguca Jehovatami cazurca. Israelita soldadocuna urcumanda uriajujpica Jehová Diosca shinllitami tamiachirca. Chaimandami carretacunaca turupi pambarirca. Shinami Jehová Diosca Barac runagu chai guerrapi mishachun ayudarca (Juec. 4:1-7, 10, 13-16). Cunanbipash Jehovapi confiajpi, paipa organización cushca instrucciongunata cazujpica ima jarcaicunatapash mishachunmi ñucanchitaca ayudanga (Deut. 31:6).
JEHOVATA SIRVISHPA CATINGAPAJ DECIDIDO CASHUNCHI
19. ¿Imamandata Jehovata sirvishpa catingapaj decidido cana capanchi?
19 Cai mundo nara tucurijpillata Jehovata sirvishpa catingapaca decididomi cana capanchi (1 Tim. 6:11, 12; 2 Ped. 3:17). Shinaca catiriashpa llaquichijpi, na sintijta umachij trampacuna, Jehovata na sirvijcunapa yuyaicuna, llulla yachachishcacuna o na ashta importante cosascunapi yapa tiempota yalina tentación ricurijpipash Jehovata sirvishpa catipashunchi (Efes. 4:14). Jehovata juyangapaj y paipa mandashcacunata cazungapaj siempre decidido cashunchi. Shina cashpapash na ñucanchi nishcahuanlla yalingapaj munajcuna canachu capanchi. Cati temapica na ñucanchi nishcahuanlla yalingapaj Jehovapa y Jesuspa ejemplota imashina catinatami ricugripanchi.
CÁNTICO 129 Diosta sirvinataca ama saquishunchichu
a Diabloca Adán y Evapa tiempomandapachami ima ali cashcata, ima nali cashcatapash cada unomi decidita ushan yashpa pensachun gentecunataca umachijushca. Shinallata Jehová Diospa mandashcacunamanda, paipa organizacionbi cushca instrucciongunamandapash chashnallata pensachunmi munan. Cai temapi yachachishcacunami Jehovata na rijsij gentecunashna ama pensachun y Jehová Diosta tucuipi cazungapaj decidido cachun ayudanga.
b Jehová Dioshna yahuarta respetangapaj imata rurana cashcata ashtahuan yachangapaca Cushilla causapashunchi libropi, lección 39ta ricupangui.
c JW.ORG paginapi “Llulla informaciongunamandaca ¿imashinata cuidarita ushanchi?” nishca temata ricupangui.
d Caimanda ashtahuan yachangapaca La adoración pura de Jehová: ¡por fin restaurada! nishca libropi, capítulo 13 y 14ta ricupangui.