Ñuca papitoca Iglesia Unida de Canadá nishcapimi anciano carca. Chaimandami tucui domingocunata ñuca panitapash, ñucatapash Bibliamanda yachajuchun huahuacunapa clasescunaman cachan carca. Chai jipaca las 11 de la mañanatami paihuanga iglesiaman rin carcanchi. Cutin chishimanga ñuca mamitahuanmi Salón del Reinoman rin carcanchi. Chaimandami ishcai religionguna diferentepacha cajta cuenta japircanchi.

Ñuca mamitaca paipa ali amigocuna Bob y Marion Hutcheson cusahuarmiman imata yachajushcatami parlarca. Chaimi paicunapash Testigocuna tucurca. 1958 huatapica Bob y Marionga “Voluntad Divina” nishca Asamblea Internacionalmanmi ñucataca paicunapa quimsa huahuacunandi aparca. Chai asambleaca Nueva York llactapimi ocho punllata pararca. Chai asambleaman ñucata apangapaj ninanda esforzarishcataca cunanmi cuenta japini. Chai asambleaman rishcataca cushijushpami yaripani.

Joven cashpaca shuj haciendapimi causarcani. Chaipica animalcunata cuidanataca ninandami gushtarcani. Chaimandami veterinario tucungapaj estudiana munaita charircani. Chaita rurangapaj munashcata ñuca mamita shuj ancianoman parlajpica huauquiguca ‘último punllacunapi’ causanajushcataca juyaihuanmi yarichihuarca. Shinallata, “universidadpi huaquin huatacunata estudiajushpaca ¿Jehovahuan ali amigo cashpa catita ushanguicha?” nishpami tapuhuarca (2 Tim. 3:1). Huauquigu imata nishcapi pensarishca jipaca universidadman na rinatami decidircani.

Shinapash colegiota tucuchishca jipa imata ruranataca nara yacharcanichu. Tucui fin de semanacunata predicacionman llujshishpapash na ashta gushtarcanichu. Chaimandami, “precursor tucuitaca na ushashachu” yarcani. Ñuca taitapash, ñuca tiopash na Testigocunachu carca. Paicunaca Toronto llactapi shuj jatun empresa de seguros nishcapi tiempo completo trabajachunmi munarca. Ñuca tioca chai empresapica  shuj importante trabajotami charirca. Ñucapashmi chai empresapillata trabajai callarircani.

Chaipica ashtaca horascunata trabajashpalla, na Testigo gentecunahuanmi yalin carcani. Chaimandami reuniongunaman, predicacionmanga na siempre rita ushan carcani. Chai tiempopica na Testigo ñuca abuelohuanmi causajurcani. Pai huañujpica maipi causanatami mascana tucurcani.

1958 huatapi asambleaman pushashca Bob y Marion cusahuarmiguca ñucapaca taitamamashnami carca. Paicunaca paicunahuan causachunmi pushahuarca. Jehovahuan ali amigo tucuchunbashmi ayudahuarca. 1960 huatapica paicunapa churi Johnhuanmi igual bautizarircanchi. John precursor tucujta ricushpaca ñucapashmi ashtahuan predicai callarircani. Jehovata ashtahuan ali sirvijushcata ricushpami huauquicunaca siervo de la Escuela del Ministerio Teocrático shina sirvichun nombrahuarca. a

1966 huatapica Randi Berge alipacha precursora paniguhuanmi cazararcani. Paica villachijcunata minishtijuj pushtupimi sirvingapaj munarca. Superintendente de circuito huauquigumi ñucanchitaca ayudarca. Chaimandami Orillia llactapi shuj congregacionbi sirvichun ñucanchita animarca. Chaimi ñapash chaiman rircanchi.

Ñuca huarmigu precursora shina sirvishpa cushilla cajta ricushpami Orillia llactaman chayashcandi ñucapash precursor tucurcani. Shinallata, “alipacha yachachijmi tucusha” yarcanimi. Bibliata ali utilizai ushashcamanda, shujcunapash cabal yachachishcacunata rijsichun ayudashcamandaca cushillami sintirircani. Orillia llactamanda shuj cusahuarmi cambiocunata rurachun, bautizarichun ayudanaca shuj jatun bendicionmi carca.

Shuj viaje Toronto llactaman rishpaca Betelpi jatun responsabilidadcunata charij Arnold MacNamara huauquigutami rijsircani. Huauquigu “¿precursor  especialcuna cangapaj munapanguichimanllu?” nijpica, chai ratomi: “Ari. Pero Quebec llactaman na rina tucushpaca alipachami canman” nircani. Canadá llactapi inglesta parlaj gentecunaca Canadá llactapillata Quebec pushtupi causaj francesta parlaj gentecunataca huaquinbica nalicachishpami ricun. Ñucapashmi chai yuyaicunata cati callarishcarcani. Chai tiempopica huaquin gentecunaca Quebec llacta Canadamanda separarichun munaimandami huelgacunata ruranajurca.

Arnold huauquiguca: “Precursor especialcunataca Quebec llactamanllami cachanajun” nircami. Shina nijpica, “rishunllami” nircanimi. Ñuca huarmigu chaipi sirvingapaj munashcataca ñami yacharcani. Tiempohuanga chaiman rishpaca alipacha decidishcatami cuenta japircani.

Francés shimita yachajungapaca cinco semanacunatami shuj cursota charircanchi. Chai jipaca ñuca huarmiguta, ñucata, shuj cusahuarmitapashmi Rimouski nishca llactaman cacharca. Chai llactaca Montreal llactamandaca 540 kilómetro carupimi carca. Francés shimita nara ali parlajtaca shuj reunionbi anunciocunata liijujpimi cuenta japinalla carca. Anunciocunata liijushpaca: “Ñucanchi cati asambleamanga ‘Austria llactamanda huauquipanicunami’ shamunga” ninapa randica, “‘avestruz nishca pajarocunami’ shamunga” nircanimi.

Rimouski llactapica ñucanchihuan rishca cusahuarmihuan, ashtacata predicanata yachaj chuscu soltera panigucunahuan, Huberdeau shuti cusahuarmihuan y paicunapa ishcai ushicunahuanbashmi causarcanchi. Huberdeau familiaca siete cuartocunata charij shuj huasitami arrendarca. Tucuicuna culquita churashpami arriendomanda pagan carcanchi. Chai huasipa pircacuna y columnacunapash yura caimandami “La Casa Blanca” nishpa rijsin carcanchi. Chaipica siempremi 12 o 14 gentecuna causan carcanchi. Ñuca huarmindi precursor especial caimandami ali horamandapacha tutacaman predican carcanchi. Chiri chiri, amsa punllacunapipash ñucanchita cumbangapaj chai huasipi siempre pipash tiaimandami alipacha carca.

Chai ali precursorcunahuanga shuj familiashnami tucurcanchi. Tucuicuna cushilla yalingapami yamdata rupachishpa nina ladopi tiarin carcanchi. Shinallata tandanajushca yanungapami shuj punllata agllashcalla charin carcanchi. Sábado tutacunataca shuj huauqui musicata tocajpimi candanata, bailanata yachan carcanchi.

Rimouski llactapica ashtacacunami Bibliamanda yachajungapaj munarca. Chaimandami picha huatacunapica Bibliamanda huaquin yachajujcunaca bautizarirca. Y congregación mirashpa catimandami 35 publicadorcuna tiarca. Chaimandami ninanda cushijurcanchi.

Quebec llactapi cashpaca ashtahuan ali predicanatami yachajurcanchi. Predicachun, minishtirishca cosascunata charichun Jehová imashina ayudashcatami cuenta japircanchi. Shinallata francesta parlajcunataca alimi rijsi usharcanchi. Paicunapa shimita y costumbrecunata alicachishpa ricunatami yachajurcanchi. Chaica shuj shuj gentecunapa costumbrecunatapash alicachishpa ricuchunmi ayudarca (2 Cor. 6:13).

Jipamanga sucursalmanda huauquicunaca: “¿Tracadie nishca puebloman rita ushapanguichimanlla?” nishpami cungashcapi tapurca. Chai tiempopica shuj huasita arrendangapami contratota chairalla firmashca carcanchi. Shinallata profesor shinami medio tiempota trabajajurcani. Ñucanchihuan Bibliamanda huaquin yachajujcunapash chairallami publicadorcuna tucushcarca. Y shuj Salón del Reinotami ruranajurcanchi. Chaimandami chaishuj llactaman rinata decidinaca na fácil carca.

Chaita decidingapaca Jehovataca ninandami mañarcanchi. Tracadie llactaman rishpaca Rimouski llactahuan shujpacha cashcatami cuenta japircanchi. Shinapash, “Jehová caipi sirvichun munajpica chaitaca rurashunllami” nircanchimi. Jehová ñucanchita ayudachun saquishpami jarcaicunata mishachun  ayudajushcata ricurcanchi (Mal. 3:10). Ñuca huarmigu espiritualmente shinlli, na mitsa, siempre cushilla cashcamandami chai llactaman rinaca na ashta difícil carca.

Tracadie llactapica Robert Ross huauquigullami anciano shina sirvijurca. Paipash y paipa huarmigu Lindapash precursor shina sirvingapami chaiman rirca. Paicunapa punda churi nacirishca jipami chaipi quidanata decidirca. Paicunapa huahuaguta viñachina cashcamanda ocupado cashpapash shujcunata mingachinata, predicanataca ninandami gushtarca. Chaimi ñucanchitaca ninanda animarca.

Tracadie llactapi ishcai huatacunata precursorcuna shina sirvinajujpimi superintendente de circuito shina sirvichun cungashcapi invitahuarca. Siete huatacunatami inglesta parlaj congregaciongunata visitarcanchi. Jipaca Quebec llactapi francesta parlaj congregaciongunata visitachunmi mingahuarca. Chaipica Léonce Crépeault shuti superintendente de distrito huauquiguca shuj discursota cujpimi felicitahuan carca. b Pero jipaca: “Canba discursocuna shujcunata ashtahuan ayudachunga ¿imatata rurai ushapangui?” nihuanmi carca. Shina ayudajpimi ñuca discursocunaca shujcunataca ashtahuan ayudarca. Shinallata ashtahuan intindirinallami carca.

1978 huatapi Montreal llactapi “Fe Victoriosa” nishca Asamblea Internacionalpi Departamento de Alimentospi ayudashcataca cushijushpami yaripani. Chai asambleaman 80 mil gentecuna shamuchunmi shuyanajurcanchi. Shinapash chai asambleapi cajcunaman micunagutaca carangapaj mushuj arreglocunami tiarca. Micuna ama huaglichunga 20 jatun refrigeradoracunatami charircanchi. Pero huaquinbica nali funcionanllu carca. Chai jahuapash tucuita segurangapaca estadioman tiempohuan yaicuitaca na usharcanchichu. Asambleata charingapaj shuj punllalla faltajujpimi chaipica shuj partido tiashcarca. Chaimandami chaupi tutata yaicui usharcanchi. Shinapash nara punllayajpillatami micunacunataca hornocunapi ña charina carcanchi. Shaijushcapacha cashpapash ñucahuan trabajashca huauquicuna shinllita trabajashcamanda, espiritualmente shinlli y siempre cushilla cashcamandami paicunamandaca ninanda yachajuparcani. Chai asambleapi trabajashca huauquicunahuanga cunangamanmi ali amigocuna capanchi. Quebec llactapica ñucanchi contracunaca 1940 y 1950 huatacunapimi ninanda llaquichishpa catiriashcarca. Chaimi chai llactapillata ñucanchi asambleata charinaca alipacha carca.

Montreal llactapi jatun asambleacunapimi superintendente huauquicunamandaca ashtacata  yachajurcani. Cuerpo Gobernantemanda David Splane huauquica shuj asambleapimi superintendente shina sirvirca. Jipaman ñuca chai responsabilidadta charijpica huauqui Davidca ninandami ayudahuarca.

36 huatacunata superintendente de circuito shina sirvishca jipaca 2011 huatapimi Escuela para Ancianos de Congregacionbi yachachichun invitahuarca. Chaimi ñuca huarmigundi ishcai huatapilla 75 diferente pushtucunapi mingarircanchi. Chaita rurana difícil cajpipash chashna sirvishpaca cushillami yalircanchi. Semanapi cada escuela tucurishca jipaca ancianocunaca Cuerpo Gobernantemanda huauquicuna paicunamanda preocuparishcata ricushpaca ninan agradecidomi sintirirca.

Jipaca Escuela para Evangelizadores del Reinopi yachachichunmi invitahuarca. Chai escuelapica estudiantecunaca cada punlla siete horascunata estudiana, quimsa horascunata debercunata rurana y cada semanapa cuatro o cinco asignaciongunatami preparana carca. Chaimandami estudiantecunaca shaijushca, estresado sintirinajurca. Chaimi caishuj yachachij huauquigundi estudiantecunamanga: “Jehovapa ayudahuanllami tucuita pactachi ushapanguichi” ninmi carcanchi. Estudiantecunaca Jehovapi confiashpami paicuna na rurai ushashachu yashca cosascunata yali pactachita ushan carian. Chaimi paicunallatapash manllarishca quidan carian.

Ñuca mamitaca shujcunapi ciertopacha preocuparishcatami ricuchin carca. Chaimi Bibliata yachajujcuna Jehovata sirvichun ayudarca. Ñuca taita Bibliamanda yachajuna munaita charichunbashmi ayudarca. Ñuca mamita huañushcamanda quimsa punlla jipa ñuca taita Bibliamanda discursota uyangapaj Salón del Reinoman shamushpami ñucanchitaca ninanda cushichirca. Chai horamandapachami reuniongunamanga 26 huatacunata na faltashpa rirca. Ñuca papito na bautizarishpapash reuniongunaman siempre primero chayan cashcatami ancianocunaca villahuarca.

Ñuca mamitaca ñuca quimsa panicunaman, ñucamanbashmi shuj alipacha ejemplota saquirca. Chaimandami paicunaca paicunapa cusacunahuan Jehovata ali sirvinajun. Ñuca ishcai panigucunaca Portugal y Haití llactacunapa Betelpimi sirvinajun.

Cunanbica ñuca huarmiguhuanga Hamilton llactapimi precursor especialcuna shina sirvinajunchi. Superintendente de circuito sirvishca tiempopica huauquipanicuna revisitacunata rurachun, Bibliamanda yachachichun cumbanataca ninandami gushtan carcanchi. Shinapash cunanbica ñucanchicunallata gentecunaman Bibliamanda yachachishpa y paicuna Jehovata sirvi callarishcata ricushpaca ninandami cushijupanchi. Shinallata congregacionbi huauquipanicunata ali rijsishpa y ima pasajpipash Jehová paicunata ali cuidashcata ricushpaca ninandami animaripanchi.

Ashtaca huauquipanicuna ñucanchimanda preocuparishcata yarishpaca ninan agradecidomi sintiripanchi. Ñucanchipashmi shujcunamanda ‘ninanda preocuparishcata’ ricuchingapaj esforzaripashcanchi. Chaipaca Jehovata ali sirvichunmi paicunataca animapashcanchi (2 Cor. 7:6, 7). Shuj familiapica mamapash, churipash, ushipash precursorcunami carca. Chaimandami taitataca: “¿Nachu canbash precursor cangapaj munapanguiman?” nishpa tapurcani. Shinapash paica: “Precursorcuna cachunga ñuca huarmita, ñuca huahuacunatapash ñami apoyajuni” nircami. “Quiquinba familiataca ¿nachu Jehová quiquinda yali ashtahuan cuidaita ushanga?” nircanimi. Paipa familiashnallata ashtahuan cushilla sintirichunmi precursor tucuchun animarcani. Y seis quillacuna jipami precursor tucurca.

Ñuca huarmiguhuanga “jipa miraicunaman” o joven huauquipanicunaman Jehová ‘juyaillacunata rurashcataca’ villashpami catipashun. Jovenguna Jehovata sirvishpa ñucanchishnallata cushilla causachunmi munapanchi (Sal. 71:17, 18).