1, 2. a) ¿Ima yuyaicunatata gentecunaca charin? b) Cai temapica ¿imatata yachajupashun?

EUROPA llactamanda shuj paniguca ninmi: “Uchillamandapachami nali ruraicunatalla ricushcani. Chaimandami ñuca llactapi gobiernocunataca na apoyan carcani. Chaipa randica gentecunapa ñaupajpi nalishnalla ricurij yuyaicunatami apoyan carcani. Ñuca noviopash shuj terroristami carca” nishpa. África llactamanda shuj huauquica nara Testigo tucushpaca shujcunata llaquichinataca alitashnami ricun carca. Paica ninmi: “Ñuca llactami shuj llactacunata yali can nishpami pensan carcani. Chaimi shuj partido politicopi anotarircani. Chai partido politicopica ñucanchi contracunata huañuchichunmi yachachin carca. Ñucanchi llactapurapi politicocuna ñucanchi contra cajpica, paicunatapashmi huañuchina carcanchi” nishpa. Shinallata Europa llactamanda paniguca ninmi: “Shuj religionda charijcunata o shuj llactamanda gentecunataca nimamanda na ricunayachinllu carcani” nishpa.

² Ashtaca gentecunami cunanbipash shinallata yuyan. Chaimi chai gentecunaca paicunapa munaita rurangapaj  munaimanda, gobiernocunapa contra tucushpa shujcunata llaquichin. Cunanbica ashtaca gentecunami politicocunapa culpamanda tandanajushca causaitaca ñana ushashca. Ashtahuanbash ashtaca llactacunapimi shuj llactamanda gentecunataca ñana ricunayachishpa causan. Cai tucurimui punllacunapica Biblia nishcashnami ‘ali tucungapaj na munaj’ gentecuna tian (2 Tim. 3:1, 3). Shina gentecunapurapi causanajushpapash huauquipanicunahuan shujllashna tandanajushca cangapaca ¿imatata rurana capanchi? Chaipaca Jesuspa ejemplomanda yachajupashunchi. Jesuspa punllacunapipash ashtaca gentecunami politicocunapa yuyaicunata catishpa paicunapura tandanajushca causaitaca ñana ushanajurca. Cai temapica cai tapuicunatami yachajupashun: Jesusca ¿imamandata politicapica na chapurirca? Diosta sirvijcuna politicapi na chapurina cashcataca ¿imashinata Jesusca ricuchirca? Shujcunata nunca na llaquichina cashcataca ¿imashinata Jesusca yachachirca?

3, 4. a) Jesuspa punllacunapica ¿imatata judiocunaca yuyan carca? b) Jesusta catijcunapash ¿imatata yuyai callarirca?

³ Ashtaca judiocunamanmi Jesusca villachirca. Chai judiopuracunamandaca ashtacacunami Roma llacta mandachunga ñana munanajurca. Celotes nishcacunami judiocuna shina yuyachun yachachin carca. Ashtaca celotescunaca Galilea llactamanda Judas runapa yuyaicunatami catin carca. Judasca mesías cani nishpami punda siglopi ashtaca gentecunata pandachirca. Chai runamanda parlashpaca Judea llactamanda Josefo historiadorca ninmi, Judasca “gentecuna Roma llactapa contra tucuchunmi munarca. Shinallata impuestocunata pagangapaj munaj gentecunataca tandachishpami rimarca” nishpa. Chaimi Judastaca Roma llactamanda gentecuna huañuchirca (Hech. 5:37). Huaquin celotescunaca paicunapa munaicunata pactachingapami shujcunata llaquichirca.

⁴ Judiocunaca Roma llactamanda gobiernopa randi Mesías paicunata rey shina mandachunmi munarca. Shinallata Israel llacta cutin rijsishca llacta cachunmi judiocunaca shuyanajurca. Chaimi Mesías ucha chayamuchun munanajurca (Luc. 2:38; 3:15). Ashtacacunami, Mesiasca Israel llactapi shuj gobiernota callarichinga nishpa crin carca. Mesías shina rurajpimi shuj shuj llactacunaman rishca judiocuna cutin Israel llactaman tigramunga nishpapashmi crin carca. Chaimi Bautizaj Juanga Jesustaca cashna tapurca: “¿Canllu, ñucanchi shuyanajushca Quishpichij Cristo capangui? Na cashpaca, ¿shujtachu shuyapashun?” nishpa (Mat. 11:2, 3). Judiocunapa munaicunata Mesías pactachinata o na pactachinata yachangapaj munaimandami Juanga shina tapushcanga. Causarishca jipa Emaús llactaman Jesús rijujpi tuparishpami paipa ishcai catijcunaca cashna nirca, Mesiasca ñucanchi munaitaca na pactachishcachu nishpa (Lucas 24:21, liingui). Chai jipaca apostolcunaca Jesustaca cashnami tapurca: ‘Apunchi Jesús, ¿cunan punllacunallatacha cai Israel llactataca cutin alichingui?’ nishpa (Hech. 1:6).

5. a) Galilea llactamanda gentecunaca ¿imamandata Jesús paicunapa rey cachun munarca? b) Jesusca ¿imatata nirca?

⁵ Judiocunaca paicunapa problemacunata Mesías arreglachunmi munashcanga. Chaimi Galilea llactamanda gentecunaca Jesús paicunata rey shina mandachun munashcanga. Jesusca alipacha yachachij, ungushcacunata jambingapaj, ashtaca gentecunaman micunata carangapaj ushaitami charirca. Gentecuna  chaita ricushpami Jesustaca shuj alipacha mandaj canga nishpa ricunajurianga. Jesusca casi 5 mil gentecunamanmi micuchirca. Chai jipaca chai gentecuna “paita japishpa, jatun mandajta rurangapaj munanajujta yachashpami, chai urcumanllata pailla cutin tigrarca” (Juan 6:10-15). Chai cayandi punllaca Galilea mar yacu ladopimi gentecunaca cutin Jesusta tuparingapaj rirca. Chaipimi Jesusca gentecunamanga intindichirca imapash cosascunata carangapaj na shamushcata. Chaipa randica Diospa Reinomanda yachachingapaj shamushcatami intindichirca. Jesusca nircami: “Ismushpa tucurinalla micunata japingapaca, na ruranachu canguichi. Ashtahuangarin causaita causagrinata caraj micunata japingapajmi munana canguichi” nishpa (Juan 6:25-27).

6. Politicapi na chapurishcataca Jesusca ¿imashinata ricuchirca? (Callari dibujota ricupangui).

⁶ Jesuspa catijcunaca Jerusalén llactapi Jesús shuj gobiernota callarichigrijun nishpami pensarca. Jesusca paipa huañuna punlla nara chayamujpillatami paipa catijcuna shina pensajta cuenta japirca. Paipa catijcuna pandata pensarinajujta intindichingapami Jesusca mina nishca culqui chimbapuraimanda parlarca. Chai chimbapuraipi “ninanda alicachi tucushca runaguca” caru carutami rina carca. Chai runagu paita ricuchijushcatami Jesusca intindichirca (Luc. 19:11-13, 15). Roma llactamanda gobiernocunahuan na chapurishcataca Jesusca ñami ricuchishcarca. Poncio Pilato gobernadorca cashnami Jesustaca tapurca: “¿Canllu Judea llactapi causajcunata Jatun Mandaj cangui?” nishpa (Juan 18:33). Roma llactata mandajushpaca Pilato gobernadorca Jesusta catishpa gentecuna paipa contra tucunatami manllajushcanga. Jesusca nircami: ‘Ñuca mandanaca na cai pachamandachu’ nishpa (Juan 18:36). Jesusca politicapica na chapurircachu. Paica jahua cielomandami mandagrijurca. Ashtahuanbash ‘na llullashpa villangapaj’ cai alpaman shamushcatami Jesusca intindichirca (Juan 18:37, liingui).

7. Politicapi chapurinata pensaitallapash na pensanaca ¿imamandata shinlli can?

 ⁷ Jesusca cai alpapi imata rurana cashcataca alimi yacharca. Shinallata ñucanchipash imata rurana cashcata ali yachashpaca politicapica na chapurishunllu. Politicapi chapurinataca pensaitallapash na pensashunllu. Chaita pactachinaca huaquinbica shinllimi ricurin. Shuj superintendente huauquica ninmi: “Gentecunaca shuj shuj panda yuyaicunatami charin. Chai gentecunaca paicunapa llacta ashtahuan ali cashcatami pensarin. Paicunaca ninmi, gobiernocuna ñana mandajpimi ali causai ushashun nishpa. Shinapash Diospa Reinomanda ali villaicunata villachinami huauquipanicuna shujllashna tandanajushca cachun ayudashca. Huauquipanicunaca llaquicunata, problemacunatapash Taita Dios tucuchinatami crin” nishpa.

8. Punda siglopi judiocunaca ¿ima nali ruraicunatata ricurca?

⁸ Nali ruraicunata ricushpami gentecunaca ashtahuan politicapi chapuringapaj munashca. Jesuspa punllacunapica impuestota na pagangapaj munaimandami politicapi chapurin carca. Romanocunaca tucuilla gentecunata paicuna charishca cosascunamanda impuestota pagachunmi censota ruranajurca. Chaita ricushpami Galilea llactamanda Judas runaca Roma llactamanda gobiernopa contra tucurca. Chai llactamanda gentecunaca alpacunamanda, huasicunamanda tucui charishcacunamandami impuestota pagana carca. Impuestota cobrajcuna nalicuna cajpimi chai punllacunapi causaj gentecunaca impuestota paganataca shuj llashaj quipitashna ricun carca. Huaquin impuestota cobrajcunaca ashtahuan autoridadta charingapami culquita pagan carca. Chaimi paicunaca charij charij tucun carca. Jericó llactamanda impuestota cobraj Zaqueo runaca shuj gentecunata umachishpami paica charij tucurca (Luc. 19:2, 8). Impuestota cobrajcunamandaca ashtacacunami Zaqueo runashna rurashcanga.

9, 10. a) Jesuspash politicapi chapurichunga ¿imatata paipa contracunaca rurarca? b) Jesuspa shimicunamandaca ¿imatata yachajupanchi? (Callari dibujota ricupangui).

⁹ Impuestota paganamanda o na paganamanda Jesús imata yuyashcatami paipa contracunaca yachangapaj munarca. Chaimi cashna tapurca: “Cesarman impuestota cunaca, ¿ñucanchita mandashca shimipi nijunshna alichu, nachu ali? ¿Ima ninguita? nishpa. Impuesto nishpaca Roma llactapi causaj tucuilla gentecuna shuj denario nishca culquita paganamandami parlajurca (Mateo 22:16-18, liingui). Chai impuestota paganaca Roma llacta paicunata tucuipi mandajushcatami ricuchijurca. Chaimi judiocunaca chai impuestota pagangapaca na munan carca. Impuestotaca na paganachu can nishpa Jesús tigrachijpica, ‘Herodespapuracunaca’ Jesusca gobiernopa contrami can nishpa juchachinman carca. Cutin impuestota paganami can nijpica gentecunaca Jesustaca ñana catinmanllu carca.

¹⁰ Chai ruraicunapi ama chapuringapami Jesusca ali pensarishpa cashna nirca: “Cesarpaj cajpica, Cesarmanllatami cuna canguichi. Ashtahuangarin Taita Diospaj cajtaca, Taita Diosmanmi cuna canguichi” nishpa (Mat. 22:21). Impuestota cobrajcuna nalicuna cashcataca Jesusca alimi yacharca. Jesusca chai cosascunapi chapurinapa randica Diospa Reino tucui problemacunata tucuchina cashcatami yaria causarca. Shinami Jesusca shuj alipacha ejemplota saquirca. Jesuspa chaquita catishpami ñucanchicunaca politicapi na chapurinchi. Shinallata cai gobiernoca alimi can cutin chaishuj  gobiernoca nalichu can nishpaca na parlajunachu capanchi. Chaicunamanda parlajunapa randica Diospa Reinota, Diospa ñaupajpi ima ali cajtami ricuna capanchi (Mat. 6:33).

11. Panda yuyaicunata mishachunga ¿imata ayudanga?

¹¹ Ashtaca huauquipanicunami politicata apoyana yuyaicunata huashaman saquishca. Gran Bretaña llactamanda paniguca ninmi: “Universidadpi Sociología nishcata estudiashpami shuj shuj panda yuyaicunata chari callarircani. Yana gentecunata llaquichishcata yachashpami paicunata ayudangapaj munarcani. Chai gentecunata apoyangapaj alipacha yuyaicunata charishpapash, chai yuyaicuna na pactarijpimi llaquirin carcani. Shuj llactamandacunata na ricunayachinaca gentecunapa shungupimi can. Chai yuyaicunata gentecunapa shungumanda llujchina cashcatami na cuenta japin carcani. Shinapash Bibliata yachajushpami chai yuyaicunataca ñucara ñuca shungumanda llujchina cashcata intindircani. Shuj yura ñañagumi pacienciahuan chai panda yuyaicunata huashaman saquichun ayudahuarca. Cunanbica señas congregacionbimi precursora regular shina sirvijuni. Tucui gentecunaman villachingapami esforzarijuni” nishpa.

12. Jesusca ¿imatata paipa catijcunataca advirtirca?

¹² Jesuspa punllacunapi religiongunaca politicahuan chapurishcami carca. La vida cotidiana en Palestina en tiempo de Jesús nishca libroca ninmi, “chai punllacunapi judiocunapa religiongunaca” cunanbi “partido politicocunashnami” can nishpa. Chaimi Jesusca paipa catijcunataca cashna advirtirca: “Aliguta uyahuaichi. Pactarallapash fariseocunapaj, Herodespaj levaduratara chasquinguichiman” nishpa (Mar. 8:15). Herodes nishpaca Herodespapuracunamandami Jesusca parlajushcanga. Cutin fariseocunaca judiocuna gobiernopa contra tucuchunmi munarca. Saduceo nishcacunamandapashmi Jesusca parlarca. Chaitami Mateo libropica ricuchin. Saduceocunaca romanocuna paicunata mandashpa causachunmi munarca. Roma llacta mandajuimandami paicunaca politicapica ashtaca autoridadta charirca. Chai quimsa grupocunapa panda yachachishcacunahuan na chapurinachu canguichi nishpami Jesusca paipa catijcunataca advirtirca (Mat. 16:6, 12). Galilea llactamanda gentecuna Jesús rey cachun nishca jipallami, Jesusca chai shimicunata nirca.

13, 14. a) Religionguna politicahuan chapurijpica ¿imata pasan? b) Jesusca ¿imatata paipa catijcunamanga yachachirca? (Callari dibujota ricupangui).

¹³ Religionguna politicahuan chapurijpimi ashtahuan nali ruraicuna tiashca. Chaicunapi ama chapurichunmi Jesusca paipa catijcunataca yachachirca. Chaimi sacerdotecuna, fariseocunaca Jesusta huañuchingapaj munarca. Paicunaca pensarcami, Jesusta catishpaca ñucanchitaca ñana catingapaj munangachu nishpa. Shina pasajpica sacerdotecunapash, fariseocunapash autoridadtaca ñana chari ushanmanllu carca. Paicunaca nircami: “Paita imatapash na nishpa yangata saquijpica, tucuillami crishpa catigrin. Chashna catijpica, Roma llactamanda soldadocuna shamushpami, Diospaj huasitapash, ñucanchi llactatapash tucuchinga” nishpa (Juan 11:48). Chaimi Caifás sumo sacerdoteca Jesusta huañuchingapaj ashtaca gentecunata tandachirca (Juan 11:49-53; 18:14).

¹⁴ Caifás runaca Jesusta japichunga tutami soldadocunata cacharca. Jesusca paita japinataca alimi yacharca. Chaimi último micuita micushca jipaca espadacunata mascachun Jesusca apostolcunata cacharca. Paicuna ishcai  espadata apamujpimi Jesusca shuj alipacha yuyaita paicunaman yachachirca (Luc. 22:36-38). Chai tutallatami Jesusta japingapaca soldadocuna shamurca. Chaita ricushpa ninanda culirashpami Pedroca shuj soldadopa rinrita espadahuan fitirca (Juan 18:10). Chaita ricushpami Jesusca Pedrotaca nirca: “Cambaj espadataca, maipi tiajushcapillata churai. Espadahuan macanajujcunaca, espadahuanllatami huañuchi tucunajunga” nishpa (Mat. 26:52, 53). ¿Imatata Jesusca paipa catijcunamanga yachachirca? Jesuspa catijcuna cai mundopi na chapurina cashcatami yachachirca. Chai tutallatami Jesusca paipa catijcuna cai mundopi ama chapurichun Jehovata mañashcarca (Juan 17:16, liingui). Nali ruraicunataca Taita Diospa maquipimi Jesusta catijcunaca saquina carca.

15, 16. a) Huauquipanicunataca ¿imashinata Diospa Shimica ayudashca? b) Jehová Diosca ¿imata ricushpata cushijun?

¹⁵ Punda parrafopi parlashca huauquipanicunaca chaitallatami yachajurca. Paicunaca Jesuspa chaquita catingapaj munaimandami paicunapa yuyaita cambiarca. Europa llactamanda paniguca ninmi: “Shujcunata llaquichinaca ali causaita charichunga na ayudanllu. Shujcunata llaquichijcunaca ali causanapa randica huañuitarami huañushca. Ali causaita Taita Dioslla apamunata Bibliapi yachajushpaca ninandami cushijurcani. Chaitami 25 huatacunata gentecunaman villachijushcani” nishpa. África llactamanda huauquica shujcunata llaquichishpami causan carca. Shinapash cunanbica chai huauquica ‘Diospa Shimita espadatashna’ utilizashpami tucuicunaman Diospa ali villaicunata villachin (Efes. 6:17). Cutin Europa central llactamanda paniguca Testigo tucushca jipaca punda na ricunayachishca llactamanda huauquihuanmi cazararca.

¹⁶ Ñucanchi yuyaita cambianaca alipachami can. Cai mundopi gentecunataca caiman chaiman cuyurijuj mar yacuhuanmi Bibliapica chimbapuran (Is. 17:12; 57:20, 21; Apoc. 13:1). Gentecunaca politicapi chapurimandami paicunapura culirarishpa, llaquichirishpa causan. Gentecuna shina causajpipash ñucanchicunaca shujllashna tandanajushca causangapami esforzaripanchi. Cai mundopi gentecuna shuj shuj yuyaicunahuan causajpipash, Jehovata sirvijcuna tandanajushca causajta ricushpami Jehová Diosca cushijun (Sofonías 3:17, liingui).

17. a) ¿Imatata cai temapica yachajupashcanchi? b) ¿Imatata cati temapica yachajupashun?

¹⁷ Cai temapica huauquipanicunahuan tandanajushca cangapaj quimsa yuyaicunatami yachajupashcanchi. Primero, nali ruraicunata Diospa Reino tucuchinapi crina. Segundo, politicapi na chapurina. Tercero, shujcunata nunca na llaquichina. Shinapash shuj llactamanda gentecunata na ricunayachina yuyaicunami huauquipanicunahuan tandanajushca cachun na saquin. Cati temapica punda siglopi Jehovata sirvijcunapa ejemplota catishpa tucuicunata juyashcata ricuchingapaj imata ruranatami yachajupashun.