Rehoboamga Salomonba churimi carca. Salomonga 40 huatacunatami Israel llactata mandarca (1 Rey. 11:42). Jesús cai Alpaman nara shamushca 997 huatapimi Salomonga huañurca. Chaimi Rehoboamga Jerusalenmanda Siquem llactaman rirca. Chaipimi paitaca rey cachun churarca (2 Crón. 10:1). Paipa taita Salomonga ali yachaita charij reymi carca. Shinaca paipa taitapa randi mandagrijushpaca ¿nachu Rehoboamga manllashcanga? Rehoboamga problemacunata arreglangapaj ushaita charishcatami ricuchigrijurca. Chaitaca yaitallapash na yashcarcachu.

Rehoboam mandai callarijuj tiempopica israelitacunaca ninandami llaquichi tucunajurca. Tiempo jipaca Israel llactata ñaupaman pushajcunaca ninanda preocuparishpami cashna ningapaj shamurca: ‘Yugota aparishcashna llaquita apanajujpipash, canba taitaca ashtahuanmi ñucanchitaca llaquichirca. Cunanga ashallatapash fangallayachiyari. Chashna rurajpica canda sirvishpami causashun’ nishpa (2 Crón. 10:3, 4).

Chaita uyashpaca Rehoboamga imata ruraitapash na atinashcangachu. Israelitacunapa munaita rurashpaca Rehoboambash, paipa familiapash, paihuan mandajcunapash huaquin ali cosascunatami saquina carca. Israelitacuna nishcata na rurajpica Rehoboamba contrami tucunman carca. Shinaca Rehoboamga ¿imatata rurarca? Pundapica mandaj rucucunapa consejotami mañarca. Chai mandajcunaca paipa taita Salomondami consejashpa causan carca. Chai jipaca paipa edadpura runacunatami consejota mañarca. Paicunaca nircami, israelitacunata ashtahuanmi llaquichina cangui nishpa. Chaita uyashpami Rehoboamga cashna nirca: “Ñuca taitaca, cangunaman llasha yugota apachinshnami llaquichijurca. Ñucacarin ashtahuanmi chai yugotaca llashayachisha. Ñuca taitaca, azialcunahuan astishpami llaquichijurca”. Ñucacarin ashtahuanmi cangunataca llaquichisha nishpa (2 Crón. 10:6-14).

Cunanbipash Jehovata ashtaca huatacunata sirvinajuj mayorlla huauquipanicunami tian. Chai huauquipanicunami ñucanchicuna ali decisiongunata agllachun ayudanga. Shinaca paicunapa consejota uyashpaca llaquipipash na urmashunllu (Job 12:12).

Rehoboamga soldadocunata tandachishpami paipa contra israelitacunahuan macanajungapaj rigrijurca. Chaimi Jehová Diosca profeta Semayata cachashpa cashna nirca: “Cangunapaj huauqui israelcunahuanga,  na macanajungapaj rinachu canguichi. Cangunapaj huasicunaman tucuilla tigraichilla. Caitaca, ñucallatami chashna rurajuni” nishpa (1 Rey. 12:21-24). *

¿Rehoboamga Jehová Diosta cazurcachu? Rehoboamga israelitacunataca nishcarcami, ashtahuanmi cangunataca llaquichisha nishpa. Shina nijpipashmi israelitacunaca Rehoboamba contra tucurca. Paipa nishcata na pactachijpica israelitacunaca ¿imatashi pensanman carca? (2 Crónicas 13:7​huan chimbapurashpa ricupangui). Gentecunata cazunapa randica Rehoboambash paipa soldadocunapash “Taita Dios mandashcata uyashpami, Mandaj Dios mandashcashnallata tigranajurca”.

Caimandaca ¿imatata ñucanchicunaca yachajupanchi? Shujcuna nalicachishpa ricujpipash Jehovataca tucuipi cazuna cashcatami yachajupanchi. Shinami Jehovapa ñaupajpi ali ricurishun. Diospa bendiciondapash chasquishun (Deut. 28:2).

Rehoboam reyca Jehová Diosta cazushpami israelitacunapa 10 familiacunahuanga na macanajurca. Ashtahuangarin Rehoboamga Judá, Benjamín llactacunatami mandashpa catirca. Chaimi chai llactacunapa pueblocuna ashtahuan shinlli cachun jatun pircacunata muyundipi shayachirca. Paica shuj pueblocunatapashmi rurarca (2 Crón. 11:5-12). Rehoboamga huaquin huatacunatami Jehovapa mandashcacunata cazushpa causarca. Israelitacunapa 10 familiacuna yanga dioscunata adorashpa causanajujpipashmi huaquin israelitacunaca Jehová Diosta adorangapaj, Rehoboam reyta apoyangapaj Jerusalén llactaman rin carca (2 Crón. 11:16, 17). Jehovata cazuimandami Rehoboamga ali mandashpa catirca.

Rehoboamga ali mandajushpapashmi Jehovapa mandashcacunata na cazushpa yanga dioscunatara adorai callarirca. Rehoboamga ¿imamandata shina rurarca? ¿Paipa mamatara cazushpachu shina rurarca? Paipa mamaca ammonitami carca (1 Rey. 14:21). Imamanda Rehoboam shina rurashcataca na yachanchichu. Shinapash tucuilla israelitacunami paipa nali ejemplota catirca. Chaimi Jehová Diosca Egipto llactapa rey Sisaq paicunata llaquichichun saquirca. Judá llactapa ashtaca pueblocuna jatun pircacunahuan cajpipashmi Sisaq reyca macanajushpa misharca (1 Rey. 14:22-24; 2 Crón. 12:1-4).

Rey Sisaq paipa soldadocunandi Jerusalén llactahuan macanajungapaj shamujpimi problemacunaca ashtahuan mirarca. Chaipimi Rehoboamga rey shina mandajurca. Chaimi profeta Semayaca Rehoboam reymanbash, paihuan mandajcunamanbash Jehová nishcata villarca. Jehová Diosca nircami: “Cangunallatami, ñucata saquihuarcanguichi. Chaimandami ñucapash cangunataca, Sisac shuti runapaj maquipi saquircani” nishpa. Jehová Dios shina nijpica Rehoboamga ¿imatata rurarca? Paica Jehovapa nishcataca alimanmi chasquirca. Bibliapica ninmi: “Shina nijpimi, israelcunata mandajcunapash, jatun mandaj Roboam runapash ninanda pingai tucushpa, urai cumurishpa: Mandaj Diosca, imatapash cashcatapachami ruran” nishpa. Chaimi Jehová Diosca Rehoboamdapash, Jerusalén llactatapash na tucuchichun saquirca (2 Crón. 12:5-7, 12).

Chai jipapashmi Rehoboamga israelitacunapa ishcai familiacunata mandashpa catirca. Paica nara huañushpallatami paipa churicunamanga tucui ima minishtishcata cararca. Rehoboamga paipa churi Abías shutitami rey cachun agllagrijurca. Paipa caishuj churicuna Abiaspa ama contra tucuchunmi shina rurashcanga (2 Crón. 11:21-23). Shina rurashpaca ali yuyaita charishcatami Rehoboamga ricuchirca. Joven cai horasca na shina rurashcarcachu.

Rehoboamga ali ruraicunata rurashpapash Jehovapa bendiciondaca na chasquircachu. Bibliapica ninmi: Rehoboamga ‘nalitami rurarca’ nishpa. Paica na tucui shunguhuan Jehová Diosta cazurcachu (2 Crón. 12:14).

Shinaca caipi pensaripashunchi, Rehoboamga huaquin cosascunapi Jehovata cazushpa, israelitacunata ayudashpapash Jehovataca na tucui shunguhuan juyarcachu. Jehovapa mandashcacunatapash jahua shungullami cazun carca. Chaimi nalicunata rurashpa, yanga dioscunata adorashpa causarca. Shinaca ¿Rehoboamga Jehovapa ñaupajpi ali ricuringapaj munaimanda, tucui shunguhuan arripintirishca caimandachu cazurca? O ¿Shujcuna nijpillachu shina rurarca? (2 Crón. 11:3, 4; 12:6). Rehoboamga huaquin huatacunata Jehovata cazushca cashpapash  jipamanga nalicunatami rurarca. Cutin paipa abuelo Davidca na shina carcachu. Davidca jatun juchacunata rurashca cashpapash tucui shunguhuanmi arripintirirca. Shinallata Jehovata tucui shunguhuan juyaimandami paitalla adorashpa causarca (1 Rey. 14:8; Sal. 51:1, 17; 63:1).

Rehoboamba causaimandaca ¿imatata yachajupanchi? Familiata mantinina, shujcunata ayudana ali cajpipash chaitallaca na runachu capanchi. Ashtahuangarin Jehová Dios munashcashna adorashpa, tucui shunguhuan paita juyashpami paipa bendicionda chasquishun.

Jehovapa bendicionda chasquingapaca paita tucui shunguhuan juyashpa causangapami esforzarina capanchi. Por ejemplo, nina ama huañuchunga yamdatami catichina capanchi. Shinallata Jehovata tucui shunguhuan juyashpa catichunga, Bibliata cada punlla liina, imata liishcapi pensarina, Jehovata mañarianami ayudanga (Sal. 1:2; Rom. 12:12). Jehovata juyashpami paipa munaita rurashpa causashun. Jehovata juyaimandami juchata rurashpapash tucui shunguhuan arripintirishun. Shina rurashpaca Rehoboam cuendaca na cashunllu. Chaipa randica Jehovata tucui shunguhuan cazushpa causashun (Jud. 20, 21, NM).