1. Ñucanchita juyaj Taita Jehová Dioshna cashcata ricuchingapaca ¿imatata rurana capanchi?

JEHOVÁ DIOSCA ñucanchita ninanda juyaj Taita Diosmi can (Juan 3:16). Jehová Dioshna cangapaj munaimandami, ñucanchicunaca shujcuna imashna sintirijta intindingapaj, llaquishpa juyaihuan tratangapaj esforzaripanchi. Ashtahuanbachaca ‘crijpura’ shina trataringapami esforzarina capanchi (Gál. 6:10; 1 Ped. 3:8). Chaimi llaquicunata o problemacunata charij huauquipanicunata ayudangapaj munapanchi.

2. Cai temapica ¿imatata yachajupashun?

² Jehovapa familiashna cangapaj munajcunaca ashtaca llaquicunata o problemacunatami charinga (Mar. 10:29, 30). Tucurimui punllacunapi causajuimandami ashtaca llaquicunata o problemacunata aguantana tucunchi. Shinaca ¿imashinata caishuj chaishuj ayudarita ushapanchi? Chaipaca Bibliapi Lotmanda, Jobmanda, Noemí huarmigumanda yachajupashun. Shinallata huauquipanicuna ima llaquicunata o problemacunata charishcata, chai llaquicunata o problemacunata aguantachun imashina ayudai ushashcatami yachajupashun.

3. a) 2 Pedro 2:7, 8​pi nishca shinaca ¿imatata Lotca rurarca? b) Sodoma llactapi Lot causangapaj rishpaca ¿ima llaquicunatata charirca?

³ Lot runaguca Sodoma llactapi causanatami agllarca. Chai llactapi gentecunaca huainayashpalla, nalicunata rurashpallami causan carca. Chai llactapi causangapaj rishpaca Lotca nalitapachami rurajurca (2 Pedro 2:7, 8, liingui). Chai llacta charij charij cajpipash Lotca shuj shuj llaquicunatami charigrijurca (Gén. 13:8-13; 14:12). Por ejemplo, Lotpa huarmica chai llactapi gentecunata, chaipi tiashca cosascunata alicachimandami Jehovata na cazurca. Chai llactata ninahuan Taita Dios tucuchijujpimi Lotpa huarmipash huañurca. Cunanga Lotpa ishcai ushicunapi pensaripashunchi.  Paicunaca Sodoma llactamanda jaricunahuanmi cazaragrinajurca. Shinapash chai jaricunaca chai llactapimi huañurca. Shinaca Lotca paipa huasita, tucui charishca cosascunapashmi chaipi tucurirca. Ashtahuanbachaca paipa huarmipashmi chaipi huañurca (Gén. 19:12-14, 17, 26). Chai llactapi causangapaj rishcamanda shina llaquicunata Lot runagu charijpipash Jehová Diosca na culirashpami paitaca ayudarca.

4. Lot runaguhuan Jehová Dios na ñapash culirashcataca ¿imashinata yachapanchi? (Callari paginapi dibujota ricupangui).

⁴ Sodoma llactapi Lot runagu causangapaj rishca cajpipash, Jehová Diosca Lot runaguta llaquimandami paita, paipa familiatapash salvachun ishcai angelcunata cacharca. Sodoma llactamanda ucha llujshi nishpa Jehová Dios mandashcataca Lot runaguca na cazurcachu. Sodoma llactamanda llujshinapa randica ‘Lot na ucha llujshijpimi, angelcunaca Lottapash, paipa huarmitapash, paipa ishcandi ushicunatapash maquimanda japishpa’ angelcunaca llujchirca (Gén. 19:15, 16). Angelcunaca Lottaca nircami, urcu jahuaman ucha richilla nishpa. Shina nijpipash Lotca na cazurcachu. Chaipa randica Jehovataca Lotca cashnami nirca, chai llacta ladollaman richun saquihuai nishpa (Gén. 19:17-20). Shina nijta uyashpapash Jehová Diosca na ñapash culirashpami Lot maiman ringapaj munashcaman richun saquirca. Chai jipa Lot runagu manllarishca caimandami, Jehová Dios punda nishca urcumanllata rirca (Gén. 19:30). Chaita ricushpami Jehová Diosca na ñapash culiraj cashcata yachajupanchi. Cunanga ñucanchicuna Jehová Dioshna na ñapash culiraj cangapaj imata rurana cashcata yachajupashun.

5, 6. ¿Imashinata 1 Tesalonicenses 5:14​pi shimicunaca Jehová Dioshna cachun ayudan?

⁵ Cunanbipash Lot cuendami shuj huauqui o shuj pani imatapash nali decisiongunata agllashcamanda imapash problemacunapi satirin. Shina pasajpica ¿imatata rurana capanchi? Tal vez cashna ningapaj munaringa, quiquin imata tarpushcatami japijungui nishpa (Gál. 6:7). Shina ninapa randica ¿imatata rurai ushapanchi? Imashinami Jehová Dios na ñapash culirashpa Lotta ayudarca, shinallata ñucanchicunapash huauquipanicunata ayudangapaj esforzaripashunchi. ¿Imashinata ayudaita ushapanchi?

⁶ Jehová Diosca paipa angelcuna Sodoma llacta tucurigrijun nishpa Lot runaguman villachunllaca na cacharcachu. Ashtahuangarin chai llactamanda pacajushpa richunmi ayudachun cacharca. Shina cuendami shuj huauqui o shuj pani imapash problemapi satirigrijujta cuenda japishpaca, uchallami consejashpa ayudana capanchi. Shinallata na ñapash culirashpami ayudashpa catina capanchi. Lotta ayudaj angelcunashnami ñucanchicunapash chai huauquimanda o panimanda na caruyashpa, imagutapash rurashpa ayudana capanchi (1 Juan 3:18). Chai huauquipa o panipa maquimanda japishpa llujchijuj cuendami paicunapa causaipi Bibliapa consejocunata pactachichun ayudashpa catina capanchi (1 Tesalonicenses 5:14, liingui).

7. Ñucanchicunapash Jehová Dioshna ¿imatata rurana capanchi?

⁷ Jehová Diosca Lot imacunapilla pandarijushcataca na ricurcachu. Tiempo jipaca Jehová Dios yarichijpimi Lot runagumanda parlashpa apóstol Pedroca cashna nirca, Lot runaguca imatapash alita rurajmi can nishpa. Ñucanchi pandarishcacunata Jehová Dios cungan cashcata yachashpaca ninandami cushijupanchi (Sal. 130:3). Ñucanchicunapashmi Jehová Dioshna huauquipanicuna alita rurashcacunata ricuna capanchi. Shinami na ñapash culirashpa huauquipanicunata ayudai ushashun. Shina rurajpimi huauquipanicunaca ñucanchicuna ayudachun saquinga.

8. Huauquipanicunata juyaihuan ayudachunga ¿imata ñucachicunataca ayudanga?

⁸ Jobca ashtaca llaquicunatami charirca. Shinapash Lot runagushna nali decidishcamandaca  Job runaguca llaquicunataca na charircachu. Imashinami yachapanchi, Job runagupa tucui cosascunapashmi tucurirca. Paica gentecunapa ñaupapipashmi nali quedarca. Shinallata shuj nali ungüitapashmi charirca. Ashtahuangarin paipa tucui churicuna, ushicunami huañurca. Jobpa nali cumbacunaca Jobta cushichinapa randica yangamandami juchachirca. Chai nali cumbacunaca ¿imamandata Jobtaca na juyaihuan tratarca? Job runagu imamanda shina llaquicunata charishcata na intindimandami, chai nali cumbacunaca Jobta na juyaihuan tratarca. Chaimandami chai nali cumbacunaca Jobtaca shinllita rimashpa imacunatapash nishpa yangamanda juchachirca. Chai nali cumbacunashna ama cangapaca ¿imata ñucachicunataca ayudanga? Jehová Dioslla gentecunapa causaipi imapacha pasajujta yachashcataca yariami cana capanchi. Shinallata llaquicunata o problemacunata huauquipanicuna ñucanchiman parlajushcataca ali alimi uyana capanchi. Uyashpallaca na quedanachu capanchi. Chaipa randica paicuna imashina sintirijujtami intindingapaj esforzarina capanchi. Shinallami huauquipanicunataca juyaihuan ayudaita ushashun.

9. Huauquipanicunata juyashpaca ¿imatata rurashun?

⁹ Huauquipanicunata juyashpaca huauquipanicunapa problemacunamandaca na shujman shujman parlanachu capanchi. Huauquipanicunapa problemacunamanda shujman shujman parlashpaca congregacionbi huauquipanicuna shujllashna tandanajushca cachunga na ayudashunllu (Prov. 20:19; Rom. 14:19). Shina rurashpaca llaquihuan caj huauquita o panitaca ashtahuan nalimi sintichishun (Prov. 12:18; Efes. 4:31, 32). Chaimi huauquipanicuna alita rurashcacunata ricungapaj esforzarina capanchi. Shinallata llaquicunata o problemacunata huauquipanicuna aguantachun imashina ayudanata pensarina capanchi.

10. Job 6:2, 3​pi shimicunamandaca ¿imatata yachajupanchi?

 ¹⁰ (Job 6:2, 3, liingui). Job runaguca “na aliguta yarishpa” huaquinbica ñapash rimanllami carca. Shinapash jipamanga nalita rimashcamandami nali sintirirca (Job 42:6). Llaquicunata o problemacunata charij huauqui o panica llaquilla sintirimandami Job runagushna tal vez na aliguta pensarishpa parlaimanda jipamanga nali sintiringa. Shina pasajpica ¿imatata rurana capanchi? Chai huauquita o panita nalicachishpa parlanapa randica, juyaihuan ayudangapami esforzarina capanchi. Caipi pensaripashunchi, Jehová Diosca gentecuna llaquicunahuan o problemacunahuan causachunga na munarcachu. Chaimandami llaquicunata o problemacunata charij huauqui o pani na aliguta pensarishpa parlajpica, ñucanchica intindingapami esforzarina capanchi. Jehovamanda o ñucanchicunamanda na aliguta pensarishpa parlajpica na ñapash culiranachu capanchi. Shinallata chai huauquimanda o panimanda nalicachishpaca na parlanachu capanchi (Prov. 19:11).

11. Llaquicunata charij huauquita o panita consejajushpaca ancianocunaca ¿imatata Elihú runagushna rurana can?

¹¹ Problemata charij huauquita o panita huaquinbica consejanami tucunga (Gál. 6:1). Shinaca ancianocunaca ¿imashinata chai huauquita o panitaca ayudana can? Ancianocunaca Elihú runagushnami ayudana can. Elihú runaguca Job runagu imashina sintirijta intindingapami ali ali uyarca (Job 33:6, 7). Shinallata Elihú runaguca Job runaguta nara consejashpallatami Job imamanda shina pensajta intindingapaj esforzarirca. Shinallatami llaquicunata o problemacunata charij huauquita o panita ali ali uyangapaj, paicuna imashina sintirijta intindingapaj ancianocunaca esforzarina can. Ancianocuna shina rurashpaca chai huauquiman o paniman cushca consejoca paicunapa shungumanmi chayanga.

12. Noemipa cusa, paipa ishcai churicuna huañujpica ¿imashinata paica sintirirca?

¹² Noemí huarmiguca Jehovata ninanda juyaimandami tucui shunguhuan sirvirca. Shinapash paipa cusa, paipa ishcai churicunami huañurca. Chaimandami llaqui llaqui sintirimanda Noemí huarmiguca shutitapash cambiaringapaj munarca. Paica Mará shutiman cambiaringapami munarca. Mará shutica “jayaj” nisha ninmi (Rut 1:3, 5, 20, nota, 21). Rutca, Noemipa jachunmi carca. Noemí llaquicunahuan cajpica, Rutca siempremi ayudajurca. Shinallata imagutapash rurashpa, imagutapash nishpapashmi Noemitaca cushichin carca. Rutca, Noemitaca juyaihuanmi imagutapash nin carca (Rut 1:16, 17).

13. Cusahuarmimanda shuj huañujpica ¿imamandata ayudachun minishtin?

¹³ Shuj huauquipa o shuj panipa cusa o huarmi huañujpica huauquipanicuna ayudachunmi minishtin. Cunanga caipi pensaripashunchi. Ishcai quirucuna igual viñashpaca paicunapa sapicunaca liarishcami viñan. Tiempohuanga chai ishcandi quirucunapa sapicunaca shinllita liarishcami quedan. Shinaca chai quirucunamanda shuj quiruta sapimanda lluchijpica tal vez chai quiruca chaquirita ushanmanmi. Shina cuendami cusahuarmicunapa causaica can. Cusahuarmimanda shuj huañujpica cusa o huarmi quedajca ninandami sufrin. Chaimi ashtaca tiempo yalijpipash llaquilla causan. Cunanga Paula * paniguhuan ima tucushcata ricupashunchi. Paula panigupa cusaca na yashcapimi huañurca. Paula paniguca ninmi: “Ñucapa causaica na yashcapimi cambiarca. Ñucalla, llaquillami sintirin carcani. Ñuca cusaca ñucapa ali ali amigomi carca. Paihuanga tucuitami parlan carcani. Ñuca cusahuanga cushillami yalin carcanchi. Shinallata ñuca llaquilla sintirijpica ñuca cusami ayudahuan carca. Ñuca cusagu huañujpica llaquillapachami sintirircani” nishpa.

14, 15. Cusahuarmimanda maijanbash viudo o viuda quedajpica ¿imashinata ayudaita ushapanchi?

 ¹⁴ Cusahuarmimanda maijanbash viudo o viuda quedajpica ¿imamandata cushichichun minishtin? Paicunahuan imata parlaita na atinashpapash imagutapash parlangapami esforzarina capanchi. Paula paniguca ninmi: “Gentecunaca huañushcacunamanda parlangapaca na munanllu. Imapash nalicunatara parlaringa yashpami na imatapash ningapaj munan. Shinapash upalla quedanapash na valinllu” nishpa. Cusahuarmimanda maijanbash viudo o viuda quedajcunaca imatapash nishpa cushichichunga na shuyanllu. Paula paniguca ninmi: “Ñucanchicunapash ninandami llaquirinchi nijpica alimi sintichihuan carca” nishpa.

¹⁵ William huauquigupa huarmiguca tauca huatacunatami ña huañushca can. Chai huauquiguca ninmi: “Ñuca huarmigumanda alicachishpa parlajta uyashpaca ninandami cushijuni. Huauquipanicuna shina parlajta uyashpaca ñuca huarmiguta juyashcatami ricui ushapani. Chaicunata uyanaca ñucataca ninandami ayudahuan. Ñucaca ñuca huarmigutaca tucui shunguhuanmi juyan carcani. Ñuca huarmiguca ñucapaca minishtirishcapachami carca” nishpa. Cutin Bianca paniguca ninmi: “Bibliamanda shuj o ishcai textocunata liishpa uyachijpi, shuj turiñañagucuna ñucahuan Jehovata mañajpica ninandami ayudahuan. Shinallata ñuca cusagumanda parlajpica cushillami sintirini. Cutin ñuca cusagumanda parlajujpi turiñañagucuna ali uyajpica alimi sintirini” nishpa.

16. a) Viudo o viuda quedashcacunataca ¿imamandata ayudashpa catina capanchi? b) Santiago 1:27​pi nishca shinaca ¿imatata Jehová Diosca ñucanchicunata mandan?

¹⁶ Rutca, Noemita ayudashpami catirca. Shinallatami  viudo o viuda quedajcunataca ayudashpa catina capanchi. Párrafo 13​pi parlashca Paula paniguca ninmi: “Ñuca cusa huañujpica turiñañacunaca ninandami ayudahuarca. Tiempo yalijpica turiñañacunapa causaica normalmi tigran. Shinapash ñuca causaica cambiarcami. Viudo o viuda quedashcacunaca ashtaca quillacunata o ashtaca huatacunata ayudachunmi minishtin” nishpa. Cada viudo o viuda quedashcacunaca diferentemi can. Huaquin viudocuna o viudacunaca paicunalla causangapaca ñapashmi yacharin. Cutin shujcunaca imata ishcandi ruraj cashcata yarishpami llaquilla sintirin. Paicunata cuidachunmi Jehová Diosca ñucanchicunataca mandan. Chaitaca na cunganachu capanchi (Santiago 1:27, liingui).

17. Jichui tucushca cusahuarmicunaca ¿imamandata ayudachun minishtin?

¹⁷ Cusahuarmimanda shuj jichushpa rijpica cusa o huarmica llaquillapachami sintirin. Por ejemplo, Joyce panigupa cusaca shuj huarmihuan japirishpami paita jichushpa rirca. Chai paniguca ninmi: “Ñuca cusa huañujpica ña cungaimanmi carcani. Ñuca cusa ñucamanda divorciarijpimi ninanda llaquirircani. Shinallata ñuca cusa shuj ungüihuan o chocarishpa huañujpica pai ñucata saquishcataca na pensarimanllu carcani. Shinapash paipa munai ñucata jichushpa rijpimi, imapapash na sirvij cuenda sintirircani” nishpa.

18. Viudo, viuda o jichui tucushca cusahuarmicunataca ¿imashinata ayudai ushapanchi?

¹⁸ Viudo, viuda o jichui tucushca cusahuarmicunaca ali amigocunatami minishtin (Prov. 17:17). ¿Imashinata paicunapa ali amigocuna caita ushapanchi? Imagutapash rurashpami paicunata juyashcata ricuchita ushapanchi. Tal vez paicunata micungapaj invitashpa, cushilla yalingapaj o paicunahuan villachingapami tiempota llujchina capanchi. Shinallata ñucanchi Familiahuan Adorana Tutaman invitaita ushapanchi. Shina rurashpaca Jehovatami cushichishun. Jehová Diosca shungu ucupi llaquilla sintirijcunata, viudo o viudacunata cuidaj Diosmi can (Sal. 34:18; 68:5).

19. Bibliapi 1 Pedro 3:8​pi nishca shinaca ¿imatata rurana capanchi?

¹⁹ Diospa Reino o Gobierno cai alpata mandajpica cunanbi llaquicunataca ñana charishunllu. Chai tiempopica “punda ima tucushcataca, cungashcami canga. Yuyaimanllapash na shamungachu”. Shinaca chai tiempo ucha chayamuchunmi munapanchi (Is. 65:16, 17). Chai tiempo chayamungacamanga ñucanchipura ayudarishpa, imagutapash rurashpa o imagutapash nishpa ñucanchipura juyarishcata ricuchipashunchi. Shinami Jehovapa familiashna cashcata ricuchishun (1 Pedro 3:8, liingui).