1. Jesuspa shimicunataca ¿imashpata cazuna capanchi?

ÚLTIMO punllacunapi imashina causai tianamanda parlashpami Jesusca cashna nirca: ‘Ricui, cangunallata aliguta yarishpami causana canguichi. Cangunapa shungu ama shinlliyachunmi [...] imatapash ninandapacha rurashpa charijyangapaca, napacha munanachu canguichi’ nishpa (Luc. 21:34). Jesusta ali catijcunaca chai shimicunataca cazunami capanchi. Jesusta ali catijcunaca cai mundomanda gentecunashnami problemacunata, llaquicunatapash charipanchi.

2. Huauquipanicunaca ¿ima llaquicunatata charishca?

² Huaquinbica shuj shuj problemacunata o llaquicunata charimandami llaquilla sintiripanchi. Huaquin huauquipanicunamanda ricupashunchi. John * shuti Testigo huauquica esclerosis múltiple * nishca ungüitami charin. Chai huauqui 19 huatacunata cazarashca cajpipash paipa huarmica jichushpami rirca. Shinallata paipa ishcai ushicunapashmi Jehovata sirvinata saquirca. Chaimi John huauquiguca llaquillapacha sintirirca. Cutin Bob, Linda cusahuarmipash shuj shuj llaquicunatami charirca. Paicunaca trabajo illaj, huasipash illami quedarca. Ashtahuanbash Linda panigutaca shungupi shuj ungüita charingui, artritis ungüitapash charingui nishpami doctorca nirca.

3. Filipenses 4:6, 7​pi nishca shinaca ¿imatata seguro capanchi?

³ Problemacuna o llaquicuna ñucanchicunata ninanda llaquichijta Tucuita Ruraj, Juyaj Jehová Dios ali yachashcataca seguromi capanchi. Chaimi chai llaquicunata ñucanchicuna aguantachun Jehová Diosca ayudangapaj munan (Filipenses 4:6, 7, liingui). Punda tiempopi Jehovata sirvijcuna llaquicunata aguantangapaj imata ayudashcatami Bibliapica yachachin. Shinallata paicunata Jehová Dios imashina ayudashcatami Bibliapica nin.  Huaquin Jehovata sirvijcunamanda yachajupashun.

4. a) ¿Eliasca ima problemacunatata chimbapurarca? b) Jehová Diosca ¿imashinata Eliastaca ayudarca?

⁴ Eliaspa punllacunapica Jehovata sirvinaca shinllimi carca. Shinallata ashtaca problemacunatami Eliasca chimbapurarca. Por ejemplo, Acabca Israel llactapi Taita Diosta na cazuj reymi carca. Paica Jezabel huarmihuanmi cazararca. Chai huarmica Baal yanga diosta sirvij nali huarmimi carca. Acabpash, Jezabelpash israelitacuna Baal yanga diosta sirvichunmi umachirca. Ashtahuangarin Jehovapa profetacunata paicuna huañuchinajujta uyashpami Eliasca pacajungapaj rirca. Ashtahuanbash Eliasca Jehovapi confiashcamandami ninan yarjai tiempopipash causashpa catirca (1 Rey. 17:2-4, 14-16). Baal yanga diospa profetacunahuan, Baal diosta sirvijcunahuan parlangapami Jehovapa ayudata Eliasca mascarca. Shinallata israelitacunataca Jehovatalla sirvichunmi animarca (1 Rey. 18:21-24, 36-38). Eliasca Jehová Dios paita ayudajushcata, cuidajushcatami cuenta japirca.

5, 6. a) 1 Reyes 19:1-4​pi nishca shinaca Eliasca ¿imashinata sintirirca? b) Jehová Diosca ¿imashinata Eliasta juyashcata ricuchirca?

⁵ (1 Reyes 19:1-4, liingui). Jezabel huarmica Eliastaca huañuchingapami munarca. Elías chaita yachaj chayashpami ninanda manllarca. Chaimi Beer-seba pushtupi pacajungapaj rirca. Eliasca llaqui llaqui sintirimandami huañungapaj munarca. Eliasca ¿imamandata shina sintirirca? Eliasca juchayu caimanda, “ñucanchishnallata” caimandami shina sintirirca (Sant. 5:17). Tal vez shina llaquicunata charimanda, shaijushca cashcamandami llaqui llaqui sintirishcanga. Eliasca  cashcami pensarijushcanga: Ñucallami Jehovataca sirvijuni, israelitacuna Jehovata cutin sirvichunga yangami ayudajushcani. Israel llactapi gentecunaca na cambiashcachu nishpa (1 Rey. 18:3, 4, 13; 19:10, 14). Elías imata rurashcata, imata pensarijushcata yachashpaca, imamandashi shina rurarca nishpami pensaripanchi. Shinapash Jehová Diosca Eliastaca alimi intindirca.

⁶ Elías shina sintirishcamandaca Jehová Diosca na culirarcachu. Chaipa randica Elías cutin shinlli tucuchunmi Jehová Diosca ayudarca (1 Rey. 19:5-7). Elías ama pandata pensarishpa llaquirijuchunmi Jehová Diosca paipa poderta ricuchirca. Shinallata 7 mil israelitacuna Baal yanga diosta na sirvinajushcatapashmi Jehová Diosca villarca (1 Rey. 19:11-18). Shinami Eliasta ninanda juyashcata Jehová Diosca shuj shuj ruraicunahuan ricuchirca.

7. Eliasta Jehová Dios imashina ayudashcata yachanaca ¿imashinata ñucanchitaca ayudan?

⁷ ¿Ñucanchipashchu problemacunata o llaquicunata chimbapuranajupanchi? Shina cashpaca Elías imashina sintirishcata Jehová Dios intindishcata yachashpaca ninandami cushijupanchi. Shinallata ñucanchicunata Jehová Dios intindishcata yachashpaca tranquilomi sintiripanchi. Jehová Diosca ñucanchicuna imata rurai ushajta, imata pensajta, imashina sintirijtaca alimi yachan (Sal. 103:14; 139:3, 4). Elías runagushna Jehovapa ayudata mascajpica Jehová Diosca llaquicunata o problemacunata aguantachunmi ñucanchitaca ayudanga (Sal. 55:22).

8. Problemacunata charijpica ¿imashinata Jehová Diosca ñucanchicunataca ayudan?

⁸ Huaquinbica problemacunata charimandami chai problemacunaca na tucuringachu yashpa llaquilla sintiripanchi. Shina pasajushpaca Jehová Dios ñucanchita ayudai ushashcataca na cunganachu capanchi. Jehová Diosca ñucanchicuna imashina sintirijtami villachun munan. Shinallata ñucanchi mañashcacunata uyashpa ayudasha ninmi (Sal. 5:3; 1 Ped. 5:7). Shinaca ñucanchi problemacunata Jehová Diosman villapashunchi. Elías runagu cuenda Jehová Dios ñucanchihuan na parlajpipash Bibliahuan, paipa organizacionhuanmi ñucanchitaca ayudanga. Bibliapi parlashca Jehovata sirvijcunamanda yachajunami cushilla sintirichun, shamuj punllacunapi ali causaigu tianata crichun ayudan. Shinallata ñucanchi huauquipanicunapashmi ñucanchita animaita ushan (Rom. 15:4; Heb. 10:24, 25).

9. Shuj ali amigoca ¿imashinata ñucanchitaca ayudaita ushan?

⁹ Jehová Diosca Eliasta mandarcami, Eliseo runagumanga can imata rurajushcata paiman mingangui nishpa. Shinami shuj amigota charichun Eliastaca ayudarca. Chai amigomi Elías llaquilla cajpi ayudagrijurca. Shinaca shuj ali amigota charinami capanchi. Ñucanchicuna llaquilla sintirijpica chai amigomi ñucanchitaca ayudanga (2 Rey. 2:2; Prov. 17:17). Shinapash shuj ali amigota na charinichu yashpaca ¿imatata rurana capanchi? Chaipaca espiritualmente ali caj huauqui o pani ñucanchita animachun Jehovata mañapashunchi.

10. a) Elías ima tucushcata yachajunaca ¿imashinata ñucanchitaca ayudan? b) Isaías 40:28, 29​pi shimicunaca ¿imashinata ñucanchitaca ayudan?

¹⁰ Elías problemacunata aguantachun, ashtaca huatacunata sirvichunbashmi Jehová Diosca ayudarca. Eliashuan ima tucushcata yachajunami shamuj punllacunapi ali causaigu tianata crichun ñucanchitaca ayudan. Shuj shuj problemacunata o llaquicunata charimandami llaquilla, shaijushca tal vez sintiripanchi. Shinapash Jehová Dios ayudanapi confiajpica Jehová Diosca paita sirvishpa catichunmi ñucanchitaca ayudanga (Isaías 40:28, 29, liingui).

11. Ana huarmiguca ¿imashpata llaquilla causajurca?

¹¹ Bibliapica Jehovata sirvijcuna sufrishcatapashmi yachajupanchi. Por ejemplo, Ana  huarmiguca huahuaguta na charita ushaimandami llaquilla causan carca. Elqaná jarica Anapa, Peninapa cusami carca. Peniná huarmica Ana huarmigumandaca ninanda burlashpami causarca. Chaimandapashmi Ana huarmiguca llaquilla causan carca (1 Sam. 1:2, 6). Shina llaquilla sintirimandami Anaca huacashpalla, micuitapash na micushca causajurca (1 Sam. 1:7, 10).

12. Rey Davidhuanga ¿imata pasarca?

¹² Rey Davidpashmi ashtaca llaquicunata charirca. Chaipaca ima llaquicunata charishcata yachajupashunchi. Rey Davidca juchacunapi urmashcamandami ashtaca llaquicunahuan causana tucurca (Sal. 40:12). Por ejemplo, Absalonga Davidpa churimi carca. Absalonga paipa taitapa contrami tucurca. Cutin chai jipaca Absalón runaca huañurcami. Chai llaquicunatami rey Davidca aguantana tucurca (2 Sam. 15:13, 14; 18:33). Shinallata rey Davidpa shuj alipacha amigomi contra tucurca (2 Sam. 16:23–17:2; Sal. 55:12-14). Rey Davidca ashtaca salmos librocunatami escribirca. Chai escribishcacunapica pai llaquillapacha cashcatami ricuchin. Shinallata Jehovapi tucui shunguhuan confiashcatapashmi Salmos librocunapica ricuchin (Sal. 38:5-10; 94:17-19).

13. Salmista runaguhuanga ¿imata pasarca?

¹³ Tiempohuanga, shuj salmista runaguca Jerusalén llacta templo huasipimi sirvijurca. Tal vez salmistaca Asaf runagupa miraimandami carianga. Asaf runaguca levitami carca. Salmista runaguca llaquillapachami causajurca. ¿Imamandata llaquilla causajurca? Paica, Jehovata na sirvijcunapa charishca cosascunata ricushpami paica envidiashpa, munashpa ricui callarirca. Chaimi Salmistaca na cushilla causajurca. Shinallata Jehovata sirvijcunaman Jehová Dios ashtaca bendiciongunata cushcacunatapash na sirvijta shinami ricui callarirca (Sal. 73:2-5, 7, 12-14, 16, 17, 21).

14, 15. Cai quimsandi Jehovata sirvijcunamandaca ¿imatata yachajupanchi?

 ¹⁴ Cai quimsandi Jehovata sirvijcunaca Jehová Dios ayudachunmi paita mañarca. Imashna paicuna sintirishcatami Jehovaman tucuita villarca. Shinallata paicunaca templo huasipi Jehovata sirvinataca nunca na saquircachu (1 Sam. 1:9, 10; Sal. 55:22; 73:17; 122:1).

¹⁵ Anapa, Davidpa, Salmistapa mañashcataca Jehová Diosca uyarcami. Shina Jehovata mañaimandami Ana huarmiguca paipa shungupica cushilla sintirca (1 Sam. 1:18). Davidpash escribircami: “Imatapash cashcatapacha rurajtaca, ashtaca llaquicunami japin. Ashtahuangarin tucui chaicunamandaca, Mandaj Diosmi cacharichinga” nishpa (Sal. 34:19). Shinallata salmista runagupash cashnami nirca, “canga ñucataca, ali lado maquimandami charihuarcangui. Ali yuyaita can cushcashnallatami pushahuashcangui” nishpa. Cutinmi cashna nirca: “Taita Diospajman quimirinaca aligupachami. Mandaj Jatun Diostami, shuyashpa causajuni” nishpa (Sal. 73:23, 24, 28). Paicunamandaca ¿imatata yachajupanchi? Ñucanchicunapash problemacunata charimandami llaquilla caita ushapanchi. Shinaca punda tiempopi Jehová Dios paita sirvijcunata imashna ayudashcatami siempre yarina capanchi. Shinallata Jehovata mañangapaj, paita tucuipi cazungapaj esforzaripashunchi (Sal. 143:1, 4-8).

16, 17. a) ¿Imamandata huauquipanicunamandaca na caruyana capanchi? b) Ama llaquilla cangapaca ¿imatata rurana capanchi?

¹⁶ Cai quimsandi Jehovata sirvijcunamandaca ¿ima minishtirishca yuyaitata yachajupanchi? Jehová Diosmanda, paipa sirvijcunamandapash na caruyana cashcatami yachajupanchi (Prov. 18:1). Nancy paniguca paipa cusa jichushpa rijpimi ninanda sufrirca. Paica ninmi: “Ashtaca punllacunatami ñucalla cangapaj munan carca. Parlangapajpash nipihuan na munarcanichu. Turiñañacunamanda ashtahuan caruyashpaca ashtahuan llaquillami sintirijurcani” nishpa. Chai paniguca paipa llaquipilla pensarijunapa randica, shujcuna llaquilla o problemacunata charijcunata ayudangapami esforzarirca. Nancyca ninmi: “Llaquicunahuan o problemacunahuan imashina sintirijtami paicunataca ali ali uyan carcani. Shinami paicuna imashna sintirishcata ali intindi usharcani. Chaimi ñuca llaquipica na pensarin carcani” nishpa.

¹⁷ Ama llaquilla cangapaca tandanajuicunaman rinami ayudan. Shinami Jehová Dios ñucanchita ayudachun saquishcata ricuchishun (Sal. 86:17). Shinallata Jehová Diosca paipa espíritu santohuan, Bibliahuan, huauquipanicunahuanmi ayudan. Cutin tandanajuicunaman rishpaca caishujmanda chaishujmandami ayudaripanchi (Rom. 1:11, 12). Sofía paniguca ninmi: “Jehovapash, turiñañacunapashmi ñaupaman catichun ayudahuan. Tandanajuicunaca ñucapaca minishtirishcapachami can. Shinallata villachinaman ashtahuan llujshishpa, congregacionbi ashtahuan ayudashpaca ñuca llaquicunata o problemacunata aguantachunmi ayudahuan” nishpa.

18. Llaquilla cashpaca ¿imatata rurana capanchi?

¹⁸ Llaquilla cashpaca, shamuj punllacunapi llaquicunata Jehová Dios tucuchinataca siempremi yarina capanchi. Shinallata cunanbipash Jehová Dios ayudataca na cunganachu capanchi. Llaquicunata o problemacunata aguantachunmi Jehová Diosca fuerzata cushpa ayudanga. Ama yapata preocuparichunbashmi ayudanga (Filip. 2:13).

19. Romanos 8:37-39​pi shimicunaca ¿imatata yachachin?

¹⁹ (Romanos 8:37-39, liingui). Apóstol Pabloca nircami, Jehovata juyashpa catichunga pipash na jarcaita ushangachu nishpa. Shinapash llaquicunata o problemacunata charij huauquipanicunataca ¿imashinata ayudai ushapanchi? Cati temapimi Jehová Dioshna paicunata imashina juyashpa, ayudana cashcata yachajupashun.