1, 2. Bautizarishca jipaca ¿ima bendiciongunatata charin?

 PIPASH bautizarishpaca Jehová Diospa ashtahuan ali amigomi tucun. Jehová Dioshuan ali amigo tucuita ushashcamandami David runagushnallata sintiringa. Davidca nircami: “Can agllashpa cambajman apamui tucujcunaca, ninandami cushijun. Cambaj huasi patiocunapi causachunmi agllarcangui” nishpa (Sal. 65:4).

² Jehová Diosca na yangata pihuambash amigo tucunllu. Imashinami caishuj temapi yachajuparcanchi, Jehová Diosca paiman quimiringapaj munajcunahuanllami ali amigo tucun (Sant. 4:8). Jehová Diosta candallami sirvisha nishpa prometishpa y bautizarishpaca, Jehová Dioshuanga alipacha amigomi tucun. Jehovaman quimiringapaj munaj gentecunataca paica cangunataca ‘ashtacatapacha bendiciasha’ nishpami prometishca (Mal. 3:10; Jer. 17:​7, 8).

3. Bautizarishpaca ¿ima responsabilidadtata tucuicunallata charipanchi? (Eclesiastés 5:​4, 5).

³ Bautizarishpami Jehová Diostaca chaira sirvita callarijupangui. Imapash tentacionguna ricurijpi o llaquicuna ricurijpipash, Jehovata candallami sirvisha nishca promesata pactachishpa causangapami munapanchi (Eclesiastés 5:​4, 5​ta liipangui). Shinallata Jesuspa mandashcata cazushpa y paipa ejemplota catingapapash esforzarina capanchi (Mat. 28:​19, 20; 1 Ped. 2:21). Caita pactachi ushachunga cai temata yachajunami ayudapanga.

 TENTACIONGUNA O LLAQUICUNA RICURIJPIPASH JESUSPA EJEMPLOTA CATISHPA CAUSASHUNCHI

4. Jesusca ¿imamandata paipa catijcunataca “jatun racu caspita” apanami canguichi nirca? (Lucas 9:23).

⁴ Bautizarishca jipaca, ñana llaquicunata charishachu nishpaca na pensanachu capangui. Chaimanda parlashpami Jesusca “cada punllami ñuca apajuj jatun racu caspita” apana can nircami (Lucas 9:23​ta liipangui). Shina nishpaca ¿paipa catijcuna sufrishpa causana cashcatachu ningapaj munarca? Na. Jesusca paipa catijcuna ashtaca bendiciongunata chasquishpapash problemacunata chimbapurana cashcatami nijurca (2 Tim. 3:12).

5. Jehovapa Gobiernota primero churajpica ¿ima bendiciongunata caranatata Jesusca prometirca?

⁵ Quiquinga talvezpashmi familiacunapa jarcaicunata ña chimbapurapariangui. O na cashpaca Jehovapa gobiernota primero churangapami quiquinba charishca cosascunata saquipariangui (Mat. 6:33). Shinaca Jehová Diosta sirvingapaj cai tucui cosascunata saquishcata pai ali yachajtaca seguromi caita ushapangui (Heb. 6:10). Shinallata Jesuspa nishcacuna cierto cashcatapashmi cuenda japipariangui. Jesusca “ñucata catimanda y ali villaicunata chasquimanda pipash paipa huasita, huauquicunata, panicunata, taitata, mamata, huahuacunata y alpacunatapash saquijca, llaquicunata charishpapashmi, cai tiempopillata 100 viaje yalita huasicunata, huauquicunata, panicunata, mamacunata, huahuacunata y alpacunatapash chasquinga. Shamuj punllacunapicarin para siempre causaitapashmi ushanga” nircami (Mar. 10:​29, 30). Jehovata sirvingapaj saquishca cosascunata yalimi Jehová Diosca ashtacata bendiciashca (Sal. 37:4).

6. Bautizarishca jipapash ¿imamandata “nali munaicunata” mishangapaj esforzarishpa catina capanchi?

⁶ Bautizarishca jipapashmi “nali munaicunata” mishashpa catingapaj esforzarina capangui (1 Juan 2:16). Imperfecto caimandami shina esforzarina capangui. Huaquinbica apóstol Pabloshnami sintiripashun. Paica “ñuca shungu ucupica Taita Diospa leytami ninanda alicachipani o valichipani. Pero ñuca cuerpopica shuj leymi tian. Chai leymi, ñuca umapi tiajuj Taita Diospa leyhuanga, shuj macanajuipishna causan. Chai leyca ñuca cuerpopi tiajuj pecadomi can. Chai leymi ñucataca mandahuajun” nircami (Rom. 7:​22, 23). Huaquinbica nali munaicunata mishangapaj siempre esforzarijuna cashcamandami shaijushca sintiripangui. Shinapash Jehová Diosta candallami sirvisha nishpa prometishcata yarinami imapash tentaciongunata mishachun ayudapanga. Jehová Diosta candallami sirvisha nishca promesami ima tentacionguna ricurijpipash ama chai tentacionbi urmachun ayudanga. ¿Imamandata shina nipanchi?

7. Jehovaman rurashca promesaca ¿imashinata paita na saquishpa sirvishpa catichun ayudan?

⁷ Jehová Diosta candallami sirvisha nishpa prometishpaca ñucanchi munaicunata saquishpa, paipa voluntadtalla rurashpa causangapami prometinajunchi. Shinallata nali munaicunata saquinata y ashtahuan charijyana munaicunamanda caruyaitapacha caruyasha nishpami prometinajupanchi (Mat. 16:24). Shinaca imapash problemacuna o tentacionguna ricurijpipash Jehová Diosta juyashpa, paita na saquishpa siempre cazungapami munapashun. Imata rurashpapash Jehová Diosta tucuipi cushichingapaj decidido capashun. Ñucanchicunaca Job runagushnallatami llaquicunata charishpapash “huañungacamanmi” Jehová Diostaca na saquipashun (Job 27:5).

8. Jehová Diosta candallami sirvisha nishca promesata yarinaca ¿imapata ayudanga?

⁸ Jehová Diosta candallami sirvisha nishca promesata yarinami ima tentacionguna ricurijpipash chai tentacionbi ama urmachun ayudanga. Por ejemplo, shuj casado jarihuan o huarmihuan na yapata asirishpa na coquetianajupashunllu. Jehovata candallami sirvisha nishpa  prometishcamandami shina rurapashun. Shinaca, cunanmandallatami nali munaicunata ama charingapaj ninanda cuidarina capanchi. Shina rurashpallami jipacunaman imapash llaquicunataca na charipashun. Shinaca ‘Diosta na manllajcuna purina ñanmandaca’ caruyaitapachami caruyana capanchi (Prov. 4:​14, 15).

9. Jehová Diosta candallami sirvisha nishca promesata yarinaca ¿imata rurachunda ayudanga?

⁹ Trabajomanda tucui tandanajuicunaman na ri ushashpaca ¿imatata rurapashun? Primeromandallatami chashna trabajotaca na chasquina capanchi. Shina decidishcamandami Jehovapa voluntadta primero churashpa tucui tandanajuicunaman ripashun. Por ejemplo, Jesusca Jehová Diospa ñaupapi ali ricuringapami decidido carca. Ñucanchicunapashmi Jesuspa ejemplota catishpa Jehová Diospa ñaupapi nali ricurij cosascunamanda caruyaitapacha caruyanata decidido cangapaj munapanchi (Mat. 4:10; Juan 8:29).

10. Bautizarishca jipa Jesuspa ejemplota catichunga Jehová Diosca ¿imashinata ayudanga?

¹⁰ Problemacuna o tentacionguna ricurijpimi Jesuspa ejemplota catingapaj decidido cashcata ricuchina oportunidadta charipanchi. Shinallata chai problemacunata y tentaciongunata mishai ushachun Jehová Dios ayudanatapash seguromi capanchi. Chaimandami Bibliapica: “Taita Diosca pai ima nishcataca siempremi cumplin. Chaimi quiquinguna aguantai ushashca pruebacunatalla charichun saquinga. Ashtahuangarin, chai pruebacuna shamujpica chai pruebacunata aguantachunmi Taita Diosca ayudanga” ninmi (1 Cor. 10:13).

JESUSPA EJEMPLOTA CATISHPA CAUSANGAPACA ¿IMATA RURAITA USHAPANGUI?

11. Jesuspa ejemplota catishpa causangapaca ¿imatata ruraita ushapangui? (Fotocunata ricupangui).

¹¹ Jesusca tucui shunguhuanmi Jehová Diostaca sirvishpa catirca. Ashtahuanbash paita mañajuimandami  paiman ashtahuan quimirirca (Luc. 6:12). Bautizarishca jipa Jesuspa ejemplota catishpa causangapaca, Jehová Diosman quimirichun ayudaj cosascunata rurangapami esforzarina capangui. Bibliapica: “Ña mashnata ñaupaman catinajushca cashpapash, chai ñanbillata aliguta purishpa catipashunchi” nijunmi (Filip. 3:16). Huaquinbica Jehová Diosta ashtahuan sirvingapaj esforzarishca huauquipanicunapa experienciatami uyapangui. Talvez cai huauquipanicunaca Escuela para Evangelizadores del Reinomanmi rishcanga. O na cashpaca ashtahuan predicachun minishtijuj pushtuman causangapami rishcanga. Quiquinbashmi Jehová Diosta ashtahuan sirvingapaj munapangui (Hech. 16:9). Pero quiquinba situación diferente cashcamanda na ashtahuan rurai ushashpaca na llaquirinachu capangui. Ashtahuanbachaca Jehová Diosta sirvishpa catinami importante can (Mat. 10:22). Tucui usharishcaguta rurashpa, tucui shunguhuan Jehovata sirvijpica paica ninandami cushijun y chaitaca na cunganachu capangui. Shina rurashpaca bautizarishca jipa Jesuspa ejemplota catishpami causaita ushapangui (Sal. 26:1).

12, 13. Desanimarijushcata cuenta japishpaca ¿imatata rurana capangui? (1 Corintios 9:​16, 17; “ Carrerata calpashpa catingapaca ¿imatata rurana can?” nishca recuadrota ricupangui).

¹² Shinapash Jehová Diosta mañana cashcamandalla mañajushcata cuenta japishpa, predicanata y Bibliata liinata na ashta gushtajushpaca ¿imatata ruraita ushapangui? Bautizarishca jipa shina sintirijushpaca, Jehová Diospa ayudataca ñana charinichu nishpaca na pensanachu capangui. Juchayucuna caimandami, huaquinbica desanimaritami ushapanchi. Shinaca desanimado sintirijushpaca, apóstol Pablopa ejemplota yaripangui. Apóstol Pabloca Jesuspa ejemplota catingapaj esforzarijushpapash, huaquinbica shaijushca o desanimado sintirinataca alimi yacharca (1 Corintios 9:​16, 17​ta liipangui). Apóstol Pabloca: “Na predicangapaj  munashpapash, predicanami capani. Porque chaita rurachunmi Taita Diosca ñucamanga mingahuashca” nircami. Apóstol Pablo, huaquinbi desanimado sintirina cashcata yachashpapash Jehová Dios paiman mingashcata pactachingapapacha decididomi carca.

¹³ Shinaca desanimado caimandalla, imapash decisiongunataca na ñapash japinachu capangui. Ashtahuanbash huaquinbi desanimado sintirishpapash, Jehová Diosta sirvishpa catingapami esforzarina capangui. Jehová Dios gustashca cosascunata rurashpaca quiquinllatami ali sintiripangui. Shinallata bautizarishca jipa espiritual cosascunata rurangapaj esforzarishpaca Jesuspa ejemplota catishpami causaita ushapangui. Quiquin shina ninanda esforzarijta ricushpaca, congregacionmanda huauquipanicunapash ninandami animaripanga (1 Tes. 5:11).

“QUIQUINGUNALLATAMI PENSARINA CAPANGUICHI”

14. ¿Imacunatalla huaquinbica pensarina capanchi? (2 Corintios 13:5).

¹⁴ Bautizarishca jipa imacunatalla quiquinba causaipi rurajushcata pensarinaca importantemi can (2 Corintios 13:5​ta liipangui). Por ejemplo, Jehová Diostaca ¿siemprechu mañani? ¿Bibliataca estudiajunichu? ¿Tandanajuicunaman y predicacionmanbash rijunichu? nishpami pensarita ushapangui. Cai tucuita rurajushpaca cushillami sintiripashun. Shinallata cashnapashmi pensarita ushapanchi: Causarinamanda, Diospa Gobiernomanda y shuj temacunamandapash Bibliahuan ¿explicaita ushapanichu? Predicacionda ashtahuan gushtangapaca ¿imatata ruraita ushani? Jehová Diosta mañajushpaca ¿imashina sintirishcata nishpachu mañani? ¿Jehová Diospi confiashcatachu ricuchipani? ¿Tandanajuicunaman siempre ringapaj esforzarijunichu? ¿Tandanajuicunapi ali ali uyangapaj o ali comentariocunata cungapaj esforzarijunichu? nishpami pensarita ushapangui.

15, 16. Robert huauquigupa experienciamandaca ¿imatata yachajupangui?

¹⁵ Imacunapilla mejorana cashcata cuenta japingapaj pensarinaca alimi can. Imamanda caita rurana importante cashcata yachangapaca, Robert huauquiguhuan ima pasashcata ricupashun. Huauquiguca ninmi: “20 huatacunata charishpaca, medio tiempotallami trabajan carcani. Shuj punllaca trabajo jipami trabajomanda shuj compañeraca paipa huasimanmi invitahuarca. Chaipica chai compañeraca, huasipica nipimi illan, igual puñuita ushanchimi nihuarca. Primeroca fácil na nitaca na usharcanichu. Jipamanmi imamanda na munashcata explicarcani”. Huauquigu cai tentacionda mishai ushashpapash jipaman ima pasashcata yarishpami caita o chaitami rurana carcani nishpami pensarirca. Huauquiguca ninbashmi: “José  runaguca Potifar runapa huarmitaca ñapashmi na nirca. Pero ñucaca José runagushna ruraitaca na ucha rurai usharcanichu (Gén. 39:​7-9). Ashtahuanbash chai tentacionda mishana difícil canata na yarcanichu. Chaimandami Jehová Dioshuan ashtahuan ali amigo cangapaj ashtahuan esforzarina cashcata cuenta japircani” ninmi.

¹⁶ Por ejemplo, quiquinbash Robert huauquigu charishca tentaciondallata charipashcanguiman. Shina cajpica cashna pensaripangui: ¿Tentación ricurijpi chai tentacionda mishanaca dificilchu cahuarca? nishpa. Shinaca imagupipash mejorana cashcata cuenta japishpaca, ama desanimaripanguichu. Chaipa randica, imapi mejorana cashcata cuenta japishcamanda cushijupangui. Shinaca imapi mejorana cashcata tucuita villashpa Jehová Diosta mañapangui. Shinallata paita cazushpa catingapaj cambiocunata rurangapaj esforzaripangui (Sal. 139:​23, 24).

17. Jehovapa shuti alipi quidachunga ¿imatata rurana capanchi?

¹⁷ Robert huauquiguca caitapashmi nin: “Cai compañera ñucahuan puñushun nishpa atichihuajujpi, paita na nishca jipaca ‘llullami cashca’ nihuarcami. Shina nijpimi imamandata shina nihuangui nishpami tapurcani. Chaimi chai compañeraca cashna nihuarca: ‘Ñucapa shuj amigoca testigomi carca. Y paica tucui joven testigocunami pacalla nalita rurashpa causan nircami. Y imapash nalita pacalla rurana oportunidad ricurijpica ñapashmi ruranata yachan’ nihuarcami. Chaimandami paipa nishcacuna cierto o na cierto cashcata yachangapami candaca invitarcani nihuarcami. Ñucapa ruraicunahuan Jehová Diospa shutita alipi quidachishcamandaca ninandami cushijupani”.

18. Bautizarishca jipapash ¿imata rurashpa catinatata decidido capangui? (“ Ishcai importante temacuna” nishca recuadrota ricupangui).

¹⁸ Jehová Diosta candallami sirvisha nishpa prometishpa y bautizarishpaca, ima pasajpipash Jehovapa shutiguta santificangapaj munashcatami ricuchinajupanchi. Jehová Diosca quiquin ima problemacunatalla charishcata, shinallata ima tentaciongunatalla mishangapaj esforzarijushcataca alimi yachan. Shinallata paita tucuipi cazungapaj esforzarijushcata ricushpaca ninandami bendiciapanga. Shinaca alita rurashpa cati ushachun Jehová Dios fuerzata cushpa ayudanataca seguro capangui (Luc. 11:​11-13). Bautizarishca jipapash Jehová Diospa ayudahuanga, Jesuspa ejemplota catishpami causaita ushapangui.