1. Huaquin Jehovata sirvijcunaca ¿imatata pensaita ushanman?

 JEHOVÁ Dios paipa sirvijcunahuan cushilla cajta yachashpaca ninandami cushijupanchi (Sal. 149:4). “Jehová Diosca paipa tucui sirvijcunahuan cushillami can. Pero ¿ñucahuanga cushillacha can?” nishpa pensarimandami huaquinbica desanimado sintirita ushapanchi. Punda tiempopi Jehovata sirvijcunapashmi Jehová Dios paicunahuan cushilla cashcata crinaca na fácil carca (1 Sam 1:​6-10; Job 29:​2, 4; Sal. 51:11).

2. ¿Picunallata Jehová Diospa ñaupapi ali can?

² Bibliapica ñucanchicuna juchayu cashpapash Jehová Diosta cushichi ushashcatami yachachin. Pero chaitaca ¿imashinata ruraita ushapanchi? Jesuspi tucui shungu crishpa y bautizarishpa (Juan 3:16). Shina rurashpami tucuicunapa ñaupapi ñucanchi juchacunamanda arripintirishcata ricuchishpa, Jehová Diospa voluntadtallami rurasha nishpa prometishcata ricuchinajupanchi (Hech. 2:38; 3:19). Caita rurangapaj esforzarishcata ricushpaca Jehová Diosca ninandami cushijun. Jehová Diosta candallami sirvisha nishpa prometishcata pactachingapaj ninanda esforzarijpica, Jehová Diosta cushichishpami paihuan ali amigo caita ushapashun (Sal. 25:14).

3. Cai temapica ¿ima tapuicunamandata yachajupashun?

³ ¿Imamandata huaquingunaca Jehovapa ñaupapi ali ricuritaca na ushanichu nishpa pensan? Ñucanchihuan cushilla cashcataca Jehová Diosca ¿imashinata ricuchin? Jehová Dios ñucanchihuan cushilla cashcata seguro cachunga ¿imata ayudanga? Cai tapuicunamandami cai temapica yachajupashun.

¿IMAMANDATA HUAQUINGUNACA JEHOVAPA ÑAUPAPI ALI RICURITACA NA USHANICHU NISHPA PENSAN?

4, 5. Nimapa na sirvinshna sintirijushpapash ¿imatata seguro cana capanchi?

⁴ Ashtacacunami huahuamandapacha, ñucaca imapapash na valinichu nishpa pensashcanchi (Sal. 88:15). Adrián huauquiguca  ninmi: “Ñucaca nimapa na sirvinichu nishpami pensan carcani. Huahua cashpaca Jehová Diostaca ñuca familia paraisopi cai ushachun ayudapangui nishpami mañan carcani. Shinapash ñuca paraisopi canataca na miricinichu nishpami pensan carcani”. Na Testigo taitamamahuan viñashca Tony huauquiguca ninmi: “Ñuca taitamamacunaca ñucata juyashcataca nunca na nihuanllu carca. Shinallata ashtahuan mejoranami cangui nishpami, nimapa na sirvijtashna sintichihuan carca”.

⁵ Ima horapash nimapa na sirvinshna sintirijushpaca, Jehová Dios ayudajpi paipa organizacionbi cashcata yaripangui (Juan 6:44). Jehová Diosca ñucanchicuna imalaya gentecuna cajtaca ali alimi rijsin. Shinallata ñucanchi charishca ali cualidadcunatami ricun (1 Sam 16:7; 2 Crón. 6:30). Shinaca, Jehová Dios ñucanchicunata ninan valishcami canguichi nijpica tranquilomi confiaita ushapanchi (1 Juan 3:​19, 20).

6. Apóstol Pabloca paipa pandarishcacunata yarishpaca ¿imashinata sintirin carca?

⁶ Talvez ashtacacunami Jehovata nara rijsishpa nali cosascunata rurashcamandami nali, llaquillapacha sintirinajupashun (1 Ped. 4:3). Cutin shujcunaca ashtaca tiempotami nali munaicunata mishangapaj esforzarinajun. Quiquinbash, ¿Jehová Diosca ñucataca na perdonahuangachu nishpa pensapanguichu? Shina cashpaca Jehovata punda sirvijcuna chashnallata sintirishcata yachanami ayudapanga (Rom. 7:24). Por ejemplo, apóstol Pabloca paipa pandarishcacunata yarishpaca ninandami llaquirin carca. Apóstol Pabloca nali ruraicunamanda arripintirishpa y bautizarishca cashpapash ‘gulpi apostolcunamandaca, ñucami menos importante cani’ nishpami pensan carca. Shinallata ‘ashtahuan yali juchayumi’ cani nishpapashmi pensan carca (1 Cor. 15:9; 1 Tim. 1:15).

7. Tucui shungu arripintirishpaca ¿imatata seguro caita ushapanchi?

⁷ Jehová Diosca ñucanchicuna ciertopacha arripintirijpica perdonasha nishpami prometishca (Sal. 86:5). Chaimandami imapash pandarishcacunamanda ciertopacha arripintirishpaca Jehová Dios paipa promesata pactachishpa perdonanataca seguro caita ushapanchi (Col. 2:13).

8, 9. Imata rurashpapash Jehová Diosta cushichitaca na ushanichu nishpa ama pensachunga ¿imata ayudanga?

⁸ Tucuicunallatami Jehová Diosta ashtahuan mejorta sirvingapaj munapanchi. Shinapash huaquinbica Jehová Diosta cushichingapaca ñuca rurashcacunaca na suficientechu can nishpa pensanchiman. Amanda shuti paniguca ninmi: “Jehová Diosta ashtahuan mejorta sirvingapaca ashtahuan esforzarishpami catina cani nishpami pensani. Shinapash ñuca munashcashna Jehová Diosta sirvita na ushashpaca, paita cushichitaca na ushanichu nishpami pensani”.

⁹ Imata rurashpapash Jehová Diosta cushichitaca na ushanichu nishpa ama pensachunga ¿imata ayudanga? Jehová Diosca ñucanchita intindishpa, ñucanchi usharishcagutalla mañan cashcatami yarina capanchi. Ñucanchicuna Jehová Diosta sirvingapaj ashtacata o ashagutalla rurajpipash, tucui shungu rurashcamandami Jehová Diosca ninanda valichin. Shinallata punda tiempopi Jehová Diosta tucui shunguhuan sirvishca gentecunatapash yaripashunchi. Por ejemplo, apóstol Pabloca na shaijushpami ashtaca huatacunata caru carucunata rishpa villachirca. Shinallata ashtaca congregaciongunatapashmi callarichirca. Pero tiempohuanga paipa causaipi cambiocuna ricurijpimi pundashna predicaitaca ñana usharca. Shina pasashcamandaca ¿Jehová Diosca paihuan culirarcachu? Na, apóstol Pabloca pai usharishcagutami rurashpa catirca. Chaimandami Jehová Diosca paita bendiciashpa catirca (Hech. 28:​30, 31). Apóstol Pabloshnallatami ñucanchipash pundashna Jehová Diosta sirvishpa catitaca na ushapashun. Pero Jehová Diosca paita tucui shunguhuan juyaimanda, usharishcaguta rurajpica ninandami valichin. Catipica Jehová Dios ñucanchicunahuan cushilla cashcatami yachajupashun.

 ÑUCANCHIHUAN CUSHILLA CASHCATACA ¿IMASHINATA JEHOVÁ DIOSCA RICUCHIN?

10. Jehová Diosca ¿imashinata ñucanchihuan cushilla cashcata ricuchin? (Juan 16:27).

¹⁰ Bibliatami utilizan. Jehová Diosca paita sirvijcunata ninanda juyashcata y paicunahuan cushilla cashcata ricuchinataca ninandami gushtan. Jehová Diosca ishcai viajecunata Jesusta paimi ñuca juyashca churigu, paihuanmi cushilla cani nishcatami Bibliapica ricuchin (Mat. 3:17; 17:5). ¿Jehová Dios quiquindapash chashnallata nichun munapanguimanllu? Jehová Dios paipacha na ñucanchihuan parlashpapash Bibliatami utilizan. Jesús paipa discipulocunata juyaihuan, aliguman parlan cashcata Bibliapi liishpaca Jehová Dios ñucanchita shina juyaihuan parlajushcatashnami sintipanchi (Juan 16:27​ta liipangui). Jesusca tucuipimi Jehová Diospa ejemplota catijushcata ricuchirca. Chaimandami Jesús paipa discipulocuna juchayucuna cajpipash paicunata ninanda juyan cashcata Bibliapi liishpaca, Jehová Dios ñucanchitapash shinallata juyashcata cuenta japita ushapanchi (Juan 15:​9, 15).

11. ¿Imatata na pensana capanchi? (Santiago 1:12).

¹¹ Ruraicunahuanmi juyashcata ricuchin. Jehová Diosca ñucanchi minishtirishca cosasgucunata carashpami ayudangapaj munan. Pero huaquinbica Job runagushnallata imapash llaquicunata charichunmi saquin (Job 1:​8-11). Llaquicunata charishpaca Jehová Diospa ñaupapica ñana ali ricurijunichu nishpaca na pensanachu capanchi. Chaipa randica Jehová Diosta ninanda juyashcata y paipi confiashcata ricuchingapaj aprovechapashunchi (Santiago 1:12​ta liipangui). Shinaca llaquicunata o problemacunata charijpica aguantashpa ñaupaman catichunmi Jehová Diosca juyaihuan ayudashpa catinga.

12. Dimitri huauquigupa experienciamandaca ¿imatata yachajupanchi?

¹² Asia llactamanda Dimitri huauquiguhuan ima pasashcata ricupashun. Huauquiguca huaquin quillacunatami trabajo illa pararca. Shinapash trabajota taringacamanga Jehová Diospi ashtahuan confiashcata ricuchingapaca ashtahuan predicangapami decidirca. Pero shuj trabajota ucha taritaca na usharcachu. Shinallata huauquiguca paipa saludhuan nali caimandami irquiyashpa camapilla parana tucurca. Chai llaquicunata charimandami huauquiguca, nali taita, nali cusami cani. Jehová Diospa ñaupapipash nalimi ricurijusha nishpami pensai callarirca. Pero shuj tutaca huauquigupa ushiguca Isaías 30:15​pi: “Ñucata yariajlla causashpa casilla shuyashpami, shinlli tucunguichi” nishca shimicunata shuj hojagupi imprimishpami paipa taitaman curca. Cai huahuagu cai textopa copiata taitaman cujushpaca: “Papito llaquilla cashpaca cai textota yaringui” nircami. Dimitri huauquiguca Jehová Dios  ayudajpi paipa familia ropaguta, micunaguta y maipi causanaguta charishcatami cuenta japirca. Shinallata huauquiguca ninmi: “Jehová Diospi confiangapaj y tranquilo, pacienciahuan shuyangapami esforzarina carcani”. Quiquinbash chashna llaquicunata, problemacunata charishpaca Jehová Dios quiquinmanda preocuparishcata y quiquin aguantashpa ñaupaman catichun ayudanataca seguromi caita ushapangui.

13. Jehová Diosca ¿imacunatalla rurashpata ñucanchihuan cushilla cashcataca ricuchin?

¹³ Huauquipanicunahuanmi ayudan. Jehová Diosca ñucanchi minishtijushca horaspipacha juyaihuan animangapaca huauquipanicunatami utilizan. Asia llactamanda shuj paniguhuanga chaitami pasarca. Paniguca trabajo illami quidarca. Shinallata shuj millai unguihuanbashmi irquiyarca. Chai jipaca paipa cusapash shuj jatun juchata ruraimandami anciano cana privilegiotapash pirdirca. Cai cosascunamanda ninanda llaquirijuimandami paniguca: “Imamandashi cashna llaquicunataca charini nishpami pensarirca. Talvez imapash nalitami rurashca yarin, chaimi Jehová Diospa ñaupapica ñana ali ricurijusha nishpapashmi pensarirca”. Paniguca Jehová Diostaca ñucata juyashpa catijushcataca ricuchihuai nishpami rogarca. Y Jehová Diosca chai mañashcataca contestarcami. Paniguca ninmi: “Anciano turigucunaca Jehová Dios ñucata juyashpa catijushcata cuenta japichunmi ayudahuarca”. Shinallata paniguca asha tiempo jipallami Jehová Diostaca ayudahuai nishpami cutin mañarca. Paniguca ninmi: “Chai punllallatami congregacionmanda turiñañacunapa shuj cartaguta chasquiparcani. Chai cartaguta liijushpaca ñuca mañashcacunata Jehová Dios uyashcatami cuenta japiparcani”. Imashinami ricupanchi huauquipanicuna ñucanchita juyaihuan animajpica Jehová Dios ñucanchihuan cushilla cashcatami cuenta japipanchi (Sal. 10:17).

14. Jehová Diosca ¿imata ashtahuan rurashpata ñucanchita juyashcata ricuchin?

¹⁴ Minishtijuj horaspipacha huauquipanicuna  consejajpimi Jehová Diosca ñucanchita juyashcata cuenta japipanchi. Por ejemplo, apóstol Pablopa tiempopi causaj cristianocunata juyaihuan consejangapaca Jehová Diosca apóstol Pablotami 14 cartacunata escribichun ayudarca. Jehová Diosca ali, juyaj taitashna caimandami “churita juyashpa” llaquinshnallata consejan (Prov. 3:​11, 12). Shinaca pipash Bibliata utilizashpa ñucanchita consejajpica Jehová Diospa ñaupapica ñana ali ricurijunichu nishpaca na pensanachu capanchi. Cashna consejocunaca Jehová Dios ñucanchita juyashpa catijushcatami ricuchin (Heb. 12:6). Jehová Dios ñucanchihuan cushilla cashcataca ¿imacunallata ashtahuan ricuchin?

ÑUCANCHIHUAN CUSHILLA CASHCATA RICUCHINGAPACA JEHOVÁ DIOSCA ¿IMATATA ASHTAHUAN RURAN?

15. Jehová Diosca paipa espíritu santotaca ¿picunamanda caran? Shinallata ¿imatata seguro caita ushapanchi?

¹⁵ Jehová Diosca paipa ñaupapi ali ricurijcunamanga paipa espíritu santotami caran (Mat. 12:18). Cashna pensaripashunchi: “¿Ñucaca Jehová munashcashna ali cualidadcunata ricuchijunichu?” Por ejemplo, ¿Jehová Diosta na rijsishca tiempohuan ricushpaca cunanga ashtahuan pacienciata charinichu? Jehová Diospa espíritu santopa ayudahuan ali cualidadcunata ricuchijushpaca Jehová Dios quiquinhuan cushilla cashcatami seguro caita ushapangui (“ Espíritu santopa ayudahuanmi cai cualidadcunata charita ushapanchi” nishca recuadrota ricupangui).

16. 1 Tesalonicenses 2:4​pi nishcashnaca, Jehová Diosca ¿picunatata predicachun utilizan? Chaita yachashpaca ¿imashinata sintiripangui?

¹⁶ Jehová Diosca paipa ñaupapi ali ricurijcunamanmi ali villaicunata villachichun mañashca (1 Tesalonicenses 2:4​ta liipangui). Cunanga Jocelyn panigu imata cuenta japishcata yachajupashun. Paniguca ninmi: “Shuj punllaca llaqui llaqui, ninan desanimadami carcani. Imata ruraitapash na ushanshnami sintirircani. Pero precursora caimandami chai punllaca predicangapaj llujshina carcani. Chaimandami Jehová Diosta mañashpa predicangapaj llujshircani”. Predicangapaj llujshishpaca Jocelyn paniguca, Mary shuti huarmiguhuanmi parlarca. Cai huarmiguca ali alimi carca. Y Bibliamanda yachajuita callaringapapashmi quidarca. Huaquin quillacuna jipallami Mary shuti huarmiguca, Jocelyn panigumanga quiquin ñuca huasiman shamushca punllaca Taita Diostami mañajurcani nishpami parlarca. Cai experienciamandaca Jocelyn paniguca ¿imatata yachajurca? Paniguca ninmi: “Canmandami ninanda cushijuni nishpa Jehová Dios nihuajushcatashnami sintircani”.  Cabalta parlashpaca ñucanchi predicajpica na tucui gentecuna aliguta uyangachu. Pero predicangapaj ninanda esforzarijpica Jehová Dios ñucanchihuan cushilla cashcatami seguro caita ushapanchi.

17. Vicky shuti panigupa nishcacunamandaca ¿imatata yachajuita ushapanchi? (Salmo 5:12).

¹⁷ Jehová Diosca Jesuspa causaita cushpami paipa ñaupapi ali ricurijcunataca salvarca (1 Tim. 2:​5, 6). Jesús ñucanchimanda huañushcapi crishpa y bautizarishca cashpapash, Jehová Diosca ñucahuanga na cushilla cangachu nishpa pensashpa catijujpica ¿imata ayudanga? Ñucanchi shunguca ñapashmi pandachita ushan. Pero Jehová Diospa nishcacunapi siempre confiai ushashcatami yarina capanchi. Jesús gentecunata salvangapaj huañushcata crijcunaca Taita Diospa ñaupapi ali ricurishpami ali, justocuna can. Shinallata paicunataca Jehová Diosca bendiciangami (Salmo 5:12​ta liipangui; Rom. 3:26). Vicky shuti panigutaca Jesús ñucanchimanda huañushcata yarinami ninanda ayudarca. Panigupaca Jehová Dios paita ciertopacha juyashcata crinaca dificilmi carca. Shinapash paniguca ninmi: “Jehová Diosca ashtaca tiempotami ñucataca pacienciata charihuashca. Pero Jehová Diosca ñucataca na juyahuanllu nishpami pensarcani. Shinallata Jehová Diosca ñucapa ashtaca juchacunata perdonaitaca na ushanllu nishpapashmi pensarcani”. Ñucanchicunapash Vicky shuti panigushnallata Jehová Dios Jesuspa causaita cushpa ñucanchita salvashcapi pensarishpaca Jehová Dios ciertopacha juyashcata, pai ñucanchihuan cushilla cashcata seguro cachunmi ayudanga.

18. Jehová Diosta tucui shunguhuan juyashpaca ¿imatata seguro caita ushapanchi?

¹⁸ Cai temapi yachajushcacunata tucuita pactachingapaj esforzarishpapash huaquinbica desanimado sintirimandami Jehová Diosca ñucahuanga cushillacha canga nishpami pensarita ushapanchiman. Chai pensamientocunata charishpaca Jehová Diosta ‘juyashpa catijcunahuanga’ Jehová Dios cushilla cashcatami yarina capangui (Sant. 1:12). Shinaca Jehová Diosman ashtahuan quimiringapaj esforzaripangui. Shinallata Jehová Dios quiquinhuan cushilla cashcata ricuchingapaj shuj shuj cosascunata rurashcatapash yaipi charipangui. Ashtahuanbash Jehová Dios ‘tucui ñucanchicunapa ladopi’ cashcatapashmi na cungana capangui (Hech. 17:27).