1, 2. Nara bautizarishpallata ¿imatata rurana capangui?

 PICHA huatacuna huashamanga, ashtaca millón gentecunami testigo de Jehová shina bautizarishca. Ashtacacunami Timoteoshnallata huahuamandapacha Jehová Diosmanda yachajushpa viñashca (2 Tim. 3:​14, 15). Cutin shujcunaca joven cashpa o ña mayorllagucuna cashpami Jehová Diosmanda yachajushca. Por ejemplo, shuj mayorlla huarmiguca testigo de Jehovacunahuan Bibliamanda yachajui callarishpami 97 añosta charishpa bautizarirca.

² Quiquinga ¿Bibliamanda yachajujupanguichu? O na cashpaca ¿quiquinba taitacunahuanllu Bibliamanda yachajujupangui? Bibliamanda imashina yachajujushpapash seguromi bautizaringapaj talvez pensarijupangui. Pero nara bautizarishpallatami Jehová Diostaca candallami sirvisha nishca promesata rurana capangui. Cai temapica Jehová Diosman chai promesata rurana ima significadota charijtami yachajupashun. Shinallata Jehová Diostalla sirvisha nishca promesata ruranata y bautizarinata na manllana cashcatapashmi yachajupashun.

JEHOVÁ DIOSTALLA SIRVISHA NISHCA PROMESACA ¿IMA SIGNIFICADOTATA CHARIN?

3. Jehová Diosca ¿picunatallata paipalla cachun agllarca?

³ Bibliapica Jehová Diostalla sirvisha nishca promesaca, Jehová Diostalla adorashpa, paipalla causana cashcatami ricuchin. Israelitacunaca Jehová Diospa agllashca llactami carca. Pero huaquin israelitacunataca Jehová Diospachami shuj trabajota rurachun agllashcarca. Por ejemplo, Aarón runagutaca sumo sacerdote cachunmi Jehová Diosca agllarca. Paipa uma jahua turbantepica orohuan rurashca shuj placami tiajurca. Y chaipica ‘Taita Diospa separashcami’ can nijurcami (Lev. 8:9). Shinallata huaquin Nazareocunataca  Jehová Diospachami agllashca carca. Nazareo shimica, hebreopica nazír nijunmi. Cai shimica Jehová “Diospalla separashca” cashcatami nijun. Moisesman Cushca Leypica, nazareocunaca huaquin cosascunata rurana cashcatami nijurca (Núm. 6:​2-8).

4. a) Jehová Diosta candallami sirvisha nishca promesaca ¿imatata ninajupanchi? b) Ñana paicunapa munaita rurashpa causanachu nishpaca ¿imatata ningapaj munan? (Fotocunata ricupangui).

⁴ Jehová Diosta candallami sirvisha nishpa prometishpaca, Jesusta catijcuna tucushpa, Jehovapa voluntadta primero churangapaj decidijushcatami ricuchinajupanchi. Chaimanda parlashpami Jesusca: “Ñucata catingapaj munajcunaca, ñana paicunapa munaita rurashpa causanachu can” nirca (Mat. 16:24). Cai shimicunaca ñucanchi munaita saquishpa Jehovapa voluntadta primero siempre churana cashcatami ningapaj munan. Jehová Diosman cai promesata rurashpaca, Jehová Dios na gustashca cosascunata saquitapacha saquisha ninajupanchimi (2 Cor. 5:​14, 15). Chaita pactachingapaca ‘nali munaicunamanda’ caruyanapachami capanchi. Por ejemplo, huainayana juchacunapica na urmanachu capanchi (Gál. 5:​19-21; 1 Cor. 6:18). Chaita pactachinaca ¿ninan dificilchu can? Na, porque Jehová Diosta juyashpaca paipa mandashcacuna ñucanchipallata ali cashcatami seguro capashun (Sal. 119:97; Is. 48:​17, 18). Nicholas shuti huauquiguca nin: “Shuj zoologicopica gentecunata ama llaquichichunmi leongunataca shuj jatun reja huashaman churan. Shina cuendallatami Jehová Diosca ñucanchita cuidangapaj munaimanda huaquin mandashcacunata churashca”.

5. a) Jehová Diosta candallami sirvisha nishpa prometingapaca ¿imatata rurana can? b) Jehová Diosta candallami sirvisha nishpa prometinahuan y bautizarinahuanga ¿imapita diferente can? (Fotocunata ricupangui).

⁵ Jehová Diosta candallami sirvisha nishpa prometingapaca ¿imatata rurana can? Chaipaca Jehová Diostami mañana can. Shina mañajushpami Jehová Diostalla adoranata y ñucanchi causaipi Jehovapa voluntadta siempre primero churasha nishpami prometina can. Jehová Diosta  shina mañashpaca, tucui shunguhuan, tucui causaihuan, tucui yuyaihuan, tucui ushaihuan candallami juyasha nishpami prometinajupanchi (Mar. 12:30). Jehová Diosta candallami sirvisha nishpa prometingapaca, quiquinllami Jehová Diosta mañana capangui. Pero bautizaritaca, tucuicunapa ñaupapimi bautizaripangui. Shinami Jehová Diostalla sirvisha nishpa prometishcata tucuicuna yachapanga. Jehová Diosta candallami sirvisha nishpa prometinaca ninan importantemi can. Chai promesataca seguromi tucuita pactachingapaj munapangui. Y Jehová Diospashmi chaitallata rurachun munapan (Ecl. 5:​4, 5).

JEHOVÁ DIOSTA CANDALLAMI SIRVISHA NISHPA PROMETICHUNGA ¿IMATA AYUDANGA?

6. Jehová Diosta candallami sirvisha nishpa prometichunga ¿imata ayudapanga?

⁶ Jehová Diostaca juyaimandami candallami sirvisha nishpa prometipanchi. Jehová Diosta asha asha rijsishpa catimanda, paipa ‘voluntadmanda cabalta yachajuimanda’ y paipa ‘espíritu santo ayudajpi aliguta intindishpami’, paitaca ciertopacha juyai callaripashcanchi (Col. 1:9). Bibliata estudiaimandami, 1) Jehová Dios ciertopacha tiashcata, 2) Bibliata pai escribichishcata y 3) paipa voluntadta pactachingapaj, paipa organizacionda utilizan cashcatami cuenta japipariangui.

7. ¿Imamandata Jehová Diosta candallami sirvisha nishpa prometina can?

⁷ Pipash Jehová Diosta candallami sirvisha nishpa prometingapaj munajushpaca, Bibliapi yachachishcataca alimi yachana can. Shinallata Jehová mandashcacunatapash cazushpami causana can. Ashtahuanbash, imata yachajushcata shuj gentecunaman predicajunami can (Mat. 28:​19, 20). Shinallata Jehová Diosta ninanda juyaimandami, paitalla tucui shunguhuan adorangapaj munapangui. ¿Quiquinbash chaitallata rurangapachu munapangui? Jehová Diosta tucui  shunguhuan juyashpaca, quiquinda Bibliamanda yachachijpa ñaupapi ali ricuringapallaca, Jehovata candallami sirvisha nishpa y bautizaringapaca na munapanguimanllu. O joven cashpaca, quiquinba taitacunapa ñaupapi o amigocunapa ñaupapi ali ricuringapallaca na bautizaripanguimanllu.

8. Jehová Dioshuan agradecido canaca ¿imashinata Jehová Diosta candallami sirvisha nishpa prometichun ayudan? (Salmo 116:​12-14).

⁸ Jehová Dios quiquinda ayudangapaj imacunatalla rurashcata pensarishpaca, paita ninanda agradicimandami Jehová Diostaca candallami sirvisha nishpa prometina munaita charipangui (Salmo 116:​12-14​ta liipangui). Bibliapica “Taita Diosmi jahua cielomandaca ashtahuan alipacha regalocunata caramun. Paipa carashcacunaca siempremi perfecto can” ninmi (Sant. 1:17). Jehová Diosca shuj ninan valishca regalota caranshnami, paipa churi Jesusta ñucanchimanda huañuchun cachamurca. Chai valishca regalota carashcamandami, quiquinga Jehová Diospa ali amigo canata y para siempre causana oportunidadta charipangui (1 Juan 4:​9, 10, 19). Shinaca Jehová Dios quiquinda juyaihuan ayudashcamanda, paita agradicishcata ricuchingapaca, Jehová Diostaca candallami sirvisha nishpami prometina can (Deut. 16:17; 2 Cor. 5:15). Chaitaca Cushilla causapashunchi nishca libropi, lección 46, punto 4​pimi parlapan. Chai leccionbillatami Jehová Diosmanga ¿imacunatallata caraita ushapanchi? nishca videopashmi ricuita ushapangui.

JEHOVÁ DIOSTA CANDALLAMI SIRVISHA NISHPA PROMETINGAPAJ Y BAUTIZARINGAPACA ¿LISTOCHU CAPANGUI?

9. Huaquingunaca ¿imatata talvez pensapanga?

⁹ Quiquinga talvezpashmi “Jehová Diosta candallami sirvisha nishpa prometingapaj y bautizaringapaca nara listochu cani” nishpa pensapangui. O “na cashpaca Jehovapa mandashcacunata cazushpa causangapaca ashtaca cambiocunata ruranarami cani”. O shinlli feta charingapaca, “ashtahuan tiempotami minishtini nishpachari” pensapangui (Col. 2:​6, 7). Caita yaripai: Na tucui estudiantecunachu igual ñapash bautizarin. Shinallata na tucui jovengunachu chai edadpillata espiritualmente shinlli tucunllu. Shinaca imacunapilla mejorana cashcata pensaripangui. Pero shujcunahuanga ama compararipanguichu (Gál. 6:​4, 5).

10. Jehová Diosta candallami sirvisha nishpa prometingapaj nara listochu cani nishpa pensarishpaca ¿imatata ruraita ushapangui? (“ Testigo taitamamacuna” nishca recuadrotapash ricupangui).

¹⁰ Jehová Diosta candallami sirvisha nishpa prometingapaj nara listo cashcata cuenta japishpaca, chai metata pactachingapaj esforzaripangui. Shinallata minishtirishca cambiocunata rurai ushangapaca Jehová Diospa ayudata mañapangui (Filip. 2:13; 3:16). Quiquinba mañashcacunata Jehová Dios uyashpa contestanataca seguromi caita ushapangui (1 Juan 5:14).

HUAQUINGUNACA JEHOVÁ DIOSTALLA SIRVISHA PROMESATA NA RURAN Y NA BAUTIZARIN ¿IMAMANDA?

11. Jehová Diosca paita sirvishpa catichunga ¿imashinata paica ayudanga?

¹¹ Huaquin Bibliamanda estudiantecunaca bautizaringapaj listo cashpapashmi chaita ruranataca na decidin. Talvez shuj jatun juchata rurashpa expulsai tucunata manllaimandami na decidinga. Bibliapica Jehová Diosca paipa tucui sirvijcunataca pai ‘munashcashna aliguta causachun’ y paipa ñaupapi ali ricurichunmi minishtirishcaguta carashpa ayudan ninmi (Col. 1:10). Jehová Diosta candallami sirvisha nishpa mañanata y bautizarinata manllajujpica, Jehová Diosllata alita rurachun fuerzata cushpa ayudataca seguromi cana capangui. Imashinami shujcunata ayudashcashnallata quiquindapash ayudapanga (1 Cor. 10:13). Caita yaipi charishpaca Jehová Diosta cazushpami na expulsai tucupashun. Jehová Diospa ayudahuanga, paita na saquishpa sirvishpa catita ushapanchimi.

12. Shuj jatun juchapi ama urmachunga ¿imata ayudanga?

 ¹² Juchayu caimandami tucuicunallata nali rurana tentacionda charipanchi (Sant. 1:14). Imapash tentacionguna ricurijpica, chai tentacionbi urmanata o na urmanataca quiquinmi decidita ushapangui. Huaquingunaca ñucanchillata controlaritaca na ushanchichu ninmi. Shinapash chaica na ciertochu can. Imapash tentacionbi ama urmangapaca, ñucanchicuna imata sintishcata, ñucanchi ruraicunatapash controlaita ushapanchimi. Chaipaca huaquin cosascunata ruranami ayudapanga. Jehová Diosta cada punlla mañana, estudio personalta charina, reuniongunaman siempre rina y predicanami ayudapanga. Cai tucui cosascunata rurangapaj esforzarishpaca, Jehová Diosta candallami sirvisha nishpa prometishcataca alimi pactachita ushapashun. Shinaca imapash tentaciongunata mishachunga Jehová Diosca siempremi ayudapanga (Gál. 5:16).

13. ¿Ima ali ejemplotata Joseca saquirca?

¹³ Imapash tentacionguna ricurijpi, cunanmandallata imata ruranata yaipi charishpaca, Jehová Diospa ñaupapica alimi ricurishpa catita ushapashun. Bibliapica punda tiempopi Taita Diospa sirvijcuna ñucanchishnallata juchayucuna cashpapash, paita na saquishpa sirvishcatami yachajuita ushapanchi. Por ejemplo, José runagutaca Potifar runapa huarmimi cutin cutin ñucahuan puñushun nishpa atichijun carca. Pero José runaguca imata ruranataca alimi yacharca. Chaimandami Bibliapica José runaguca “¿imashamanda cai jatun nalitaca rurashayari? ¿Imashamanda Taita Diospa ñaupapipash pecadota rurashayari?” nishcatami ricuchin (Gén. 39:​8-10). José runaguca, Potifar runapa huarmi nara imatapash nijpillatami imata rurana cashcataca ña yacharca. Chaimandami Potifar runapa huarmi, paihuan puñushun nishpa atichijujpica José runaguca imata ruranataca ali yacharca.

14. Jehová na ricunayachishca cosascunata ama rurangapaca ¿imatata rurana capanchi?

¹⁴ ¿Imashinata José runagupa ejemplota catishpa, Jehovata cazushcata ricuchita ushapanchi? Imapash tentacionguna ricurijpi, imata ruranataca cunanmandallatami pensarina capanchi. Jehová na ricunayachishca juchacunata rurana tentación ricurijpica, uchalla caruyanatami yachajuna capanchi (Sal. 97:10; 119:165). Chaita ruranami jatun juchacunapi ama urmachun ayudanga. Shinaca imapash tentacionguna ricurijpica, imata ruranataca alimi yachapashun.

15. Jehovata ‘tucui shunguhuan sirvingapaj munashcataca’ ¿imashinata ricuchita ushapangui? (Hebreos 11:6).

¹⁵ Quiquinga de seguromi Bibliapa yachachishcacuna  cabal cashcata yachaimanda Jehová Diosta tucui shunguhuan sirvingapaj munapangui. Shinapash Jehová Diosta candallami sirvisha nishpa prometinata y bautizarinataca ¿imapash jarcajunllu? David runagushnallatami Jehová Diosta mañaita ushapangui. Paica nircami: “Taita Dioslla, ñuca shungutaca imashna cajta ricushpa rijsihuayari. Ñuca yuyaicunatapash, imashna cajta ricushpa rijsihuayari. Ñuca causaipica, jatun nalita rurarcanipashchari, ricuhuayari. Causaita causana ñangupi pushahuayari” nishpa (Sal. 139:​23, 24). Jehová Diosta candallami sirvisha nishpa prometingapaj y bautizaringapaj esforzarijushpaca, Jehová Diosta sirvingapaj munajushcatami ricuchijupangui. Bibliapica caita rurangapaj esforzarijcunataca, Jehová Diosca ninandami bendician nishpami yachachin (Hebreos 11:6​ta liipangui).

JEHOVÁ DIOSMAN ASHTAHUAN QUIMIRISHPA CATIPAICHI

16, 17. ¿Imamandata nipanchi jovengunatapash Jehová Diosca congregacionmanga apamun? (Juan 6:44).

¹⁶ Jehová Diosmi gentecunataca paipa organizacionman apamun (Juan 6:44​ta liipangui). Caita yachashpaca ¿nachu cushilla sintiripangui? Jehová Diosca gentecunapa ali cualidadcunata ricushpami paipa organizacionman pushamushca. Jehová Diosca quiquinda y paita shuj sirvijcunatapash ninan valishcatashnami ricun (Deut. 7:6).

¹⁷ Jovenguna quiquinga testigo taitacunahuan viñaimandami, ñuca taitacunamandallami Jehovapa organizacionbi cani nishpachari pensapangui. Bibliapica: “Taita Diosmanmi quimirina capanguichi. Chaimi paipash quiquingunapamanga quimiringa” ninmi (Sant. 4:8; 1 Crón. 28:9). Shinaca, Jehová Diosmanga quiquinra primero quimirina capangui, shina rurajpimi Jehová Diosca quiquinman quimiripanga. Congregacionbi tucui Jehovata sirvijcunaca, Jehová Dios pushamujpillami chaipi can. Santiago 4:8​pi nishcashna, pipash Jehová Diosman primero quimirijpica, Jehová Diospashmi paiman quimirin ninmi (2 Tesalonicenses 2:13​huan chimbapurashpa ricupangui).

18. Cati temapica ¿imatata yachajupashun? (Salmo 40:8).

¹⁸ Jesús bautizarishpaca, Jehovapa voluntadta pactachingapaj listomi carca (Salmo 40:8​ta liipangui; Heb. 10:7). Jehová Diosta candallami sirvisha nishpa prometishpa y bautizarishpaca, Jesuspa ejemplota catijushcatami ricuchipangui. Cati temapica, bautizarishca jipa Jehová Diosta tucui shunguhuan sirvishpa catinatami yachajupashun.