1, 2. a) Efesios nishca cartataca apóstol Pabloca ¿maipi cashpata escribirca? ¿Ima horata escribirca? b) Cai temapica ¿ima tapuicunamandata yachajupashun?

 APÓSTOL Pabloca Roma llactapi prezo cashpapash huauquipanicunata animangapaj munarca. Shinapash huauquipanicunata paipacha rishpa animaita na ushaimandami huaquin cartagucunata escribishpa cacharca. Huata 60 o 61​pimi apóstol Pabloca Éfeso llactamanda cristianocunaman shuj cartaguta cacharca (Efes. 1:1; 4:1).

² Apóstol Pabloca, casi 10 huatacunatami Éfeso llactapi gentecunaman yachachishpa predicashpa causashcarca (Hech. 19:​1, 8-10; 20:​20, 21). Apóstol Pabloca huauquipanicunataca ninandami juyarca. Chaimandami paicuna Jehová Diosta na saquishpa sirvichun ayudangapaj munarca. ¿Imamandata apóstol Pabloca cai ungido cristianocunamanga michamanda y yana tutamanda parlarca? Shinaca tucui cristianocunallata apóstol Pablopa consejomandaca ¿imatata yachajuita ushapanchi? Cai temapimi cai ishcai tapuicunamandaca yachajupashun.

PANDA YACHACHISHCACUNATAMI SAQUIN

3. Efesios capítulo 5​ta escribijushpaca apóstol Pabloca ¿ima shimicunatata utilizarca?

³ Apóstol Pabloca Éfeso llactamanda cristianocunamanga: ‘Pundacunaca yana tutashnami caparcanguichi. Pero cunanga, michashnami capanguichi’ nircami (Efes. 5:8). Apóstol Pabloca Éfeso llactamanda cristianocuna ashtaca cambiocunata rurashcata intindichingapami yana tutamanda y michamanda parlarca. Primeropica imamanda “pundacunaca yana tutashnami caparcanguichi” nishcata yachajupashun.

4. ¿Imamandata Éfeso llactamanda gentecunaca yana tutapishnami panda religionbi carca nipanchi?

⁴ Panda religionbi caimandami yana tutapishna carca. Éfeso llactamanda  cristianocuna Bibliapa cabal yachachishcacunata nara yachajushpaca panda religionba yachachishcacunapimi crin carca. Shinallata imapash yanga costumbrecunapipashmi crin carca. Éfeso llactapica Ártemis nishca yanga diospa templo huasimi tiarca. Chai tiempocunapica siete maravillas del mundomandami carca. Gentecunaca chai templo huasimanmi yanga dioscunata adorangapaj rin carca. Chai tiempopi gentecunaca Ártemis nishca yanga diospa templo huasipa uchilla imagenda rurashpami jatun carca. Shina rurashpami cai gentecunaca ashtaca culquita ganan carca (Hech. 19:​23-27). Chaipi gentecuna magia cosascunata ruran cashcamandami rijsi tucushca carca (Hech. 19:19).

5. ¿Imamandata Éfeso llactamanda gentecunaca yana tutapishnami pinganayai, mapa nali cosascunata rurashpa causan carca nipanchi?

⁵ Pinganai, mapa nali cosascunata ruran cashcamandami yana tutapishna carca. Éfeso llactamanda gentecunaca pinganai, mapa nali cosascunatami ruran carca. Shinallata paicunapa comportamientocunamandapash nimata na pinganayachinllu carca. Chai tiempopi fiestacuna y panda religiongunapa celebraciongunapash millanai ruraicunamanda y huainayanacunamandallami parlan carca (Efes. 5:3). Chaipi gentecunaca juizu illashna “tucushpami, nalicunata rurashpapash nimata na pinganayachin” carca. Cai shimicunata nishpaca imatapash na sintin cashcatami ningapaj munan (Efes. 4:​17-19). Cai gentecuna ima ali cajta, ima nali cajta nara yachajushpaca nalita rurashpapash paicunapa concienciapica nimata na sintinllu carca. Shinallata paicunapa ruraicunamanda Jehová Dios llaquirina cajpipash na importanllu carca. Cai gentecuna ima ali cajta, ima nali cajta na cuenta japin cashcamandami, apóstol Pabloca: “Paicunapa yuyaicunaca yana tutashnami can. Taita Dios carasha nijuj causaitapash na chasquishpami causanajun” nirca.

6. Pabloca ¿imamandata Éfeso llactamanda huaquin gentecunataca ‘cunanga, michagushna canguichi’ nirca?

⁶ Éfeso llactamanda huaquin gentecuna nali ruraicunata saquishca caimandami apóstol Pabloca: “Señor Jesushuan shujllashna caimandami, michashna capanguichi” nirca (Efes. 5:8). Paicunaca michagushna Jehovapa mandashcacunata cazushpami causai callarishcarca (Sal. 119:105). Shinallata panda religiongunapa yachachishcacunata saquishpa, nali, pinganai ruraicunatapash saquishpami causai  callarirca. Shinallata Jehová Diospa ejemplota catingapaj paitalla adorangapaj y paipa ñaupapi ali ricuringapami esforzarinajurca (Efes. 5:1).

7. ¿Imapita Éfeso llactamanda cristianocunahuanga parecido capanchi?

⁷ Éfeso llactamanda gentecunashnallatami ñucanchicunapash Bibliamanda nara yachajushpaca panda religiongunapa nali yachachishcacunata y nali ruraicunata rurashpa causapashcanchi. Talvez huaquingunaca panda religiongunapa yachachishcacunata catishpami, fiestacunata ruran cashcashun. Na cashpaca huainayana juchacunata rurashpapashmi causan cashcashun. Pero Jehová Diosta rijsishpa paimanda yachajushpami chai nali cosascunata ruranata saquishpa, Jehovapa mandashcacunata cazushpa causai callaripashcanchi. Chai cambiocunata ruraimandami ñucanchillata ninanda beneficiaripashcanchi (Is. 48:17). Pero huaquinbica yana tutashna nali ruraicunamanda caruyashpa ‘michapa huahuacunashna cashpa catinaca’ na facilchu can. Shinapash ‘michapa huahuacunashna cashpa catichunga’ ¿imata ayudanga?

NALI RURAICUNAMANDA CARUYAPASHUNCHI

8. Efesios 5:​3-5​pi nishcashnaca Éfeso llactamanda cristianocunaca ¿imacunamandallata caruyana carca?

⁸ (Efesios 5:​3-5​ta liipangui). Éfeso llactamanda cristianocunaca, Jehová Diospa ñaupapi ali ricurishpa catingapaca nali ruraicunamanda, huainayana juchacunamanda caruyaitapacha caruyangapaj esforzarishpa catina carca. Shinallata huainayana juchamandallaca na caruyanachu carca. Y nali shimicunata nishpa parlanatapashmi saquina carca. Apóstol Pabloca ‘Cristopa y Taita Diospa Gobiernopi’ causangapaj munashpaca cai tucui cosascunatami saquina canguichi nishpami yarichirca.

9. ¿Imamandata huainayana juchapi urmachij cosascunamanda caruyana capanchi?

⁹ Ñucanchicunapash ‘yana yana tutashna na sirvij ruraicunapi’ ama chapuringapami cuidadota charina capanchi (Efes. 5:11). Shuj persona huainayana cosascunamanda o mapa cosascunamanda uyashpa, parlashpa o ricushpaca chai nali cosascunapi fácil urmai ushashcatami cuenta japipashcanchi (Gén. 3:6; Sant. 1:​14, 15). Por ejemplo, shuj llactapica tauca huauquipanicunami redes sociales nishcapi mensajecunata cachangapami shuj grupota rurarca. Primeroca chai grupopi huauquipanicunaca espiritual cosascunamandallami parlan carca. Pero jipamanga asha ashami huainayana cosascunamandalla parlai callarirca. Tiempohuanmi chai grupopi huaquin huauquipanicunaca chai grupopi huainayana cosascunamandalla parlan cashcamandami huainayana juchapi urmarcanchi nishpami reconocirca.

10. ¿Diabloca imata rurachunda munan? (Efesios 5:6).

¹⁰ Diabloca gentecuna ima ali cajta ima nali cajta ama cuenta japichunmi ashtaca trampacunata churan (Is. 5:20; 2 Cor. 4:4). Jehová Diospa ñaupapica nali, mapa ruraicuna, huainayana juchacunaca nalipachami can. Pero gentecunaca chaita rurashpa causanaca ima malopash na canllu nishpami crichingapaj munan (2 Ped. 2:19). Shinallata ashtaca peliculacuna, internetpi o telepi nali programacunaca, chai cosascunamandami parlan. Diabloca huainayashpa causanaca normalmi can, ima malopash na canllu. Ashtahuangarin chaita rurashpaca ali, cushilla cachunmi ayudan nishpa crichunmi munan (Efesios 5:6​ta liipangui).

11. Angela panigupa experienciata ricushcashnaca ¿imamandata Efesios 5:7​pi consejota cazunaca importante can? (Fotocunata ricupangui).

¹¹ Diabloca Jehová Diosta na cazuj gentecunahuan amigo tucuchunmi munan. Chaimandami apóstol Pabloca Éfeso llactamanda huauquipanicunataca nalita rurajcunahuanga na tandanajunachu canguichi nishpami consejarca. Shinallata apóstol Pabloca “paicuna imata rurajtaca na catinachu capanguichi” nircami (Efes.  5:7). Cunanbica Éfeso llactamanda huauquipanicunata yalimi ashtahuan cuidadota charina capanchi. Porque cunanbica Jehovata na cazuj gentecunahuan ashtahuan tiempota yalina peligromi tian. Shinallata redes socialespashmi tian. Chaimandami ashtahuan cuidadota charina capanchi. Cunanga Asia llactamanda Angela a paniguhuan ima pasashcata ricupashun. Paniguca redes sociales nishcacuna peligroso cashcata cuenta japirca. Paniguca: “Redes socialescunaca asha ashami na cuenta japichijta pandachin. Shuj viajeca Jehová Diospa mandashcacunata na respetaj amigocunatami chari callarircani. Tiempohuanga Jehová Diospa ñaupapi nali ricurij cosascunata rurashpa causanaca, na malochu can nishpami pensai callarircani” ninmi. Antsicarinmi anciano huauquicunaca cai panigutaca juyaihuan cambiocunata rurachun ayudarca. Paniguca ninmi: “Cunanga redes sociales nishcacunata ricushpa chaipi pensarijunapa randica espiritual cosascunapi pensaringapami esforzarini” ninmi.

12. Jehovapa mandashcacunata cazungapaj munashpaca ¿imatata rurana capanchi?

¹² Ashtaca gentecunaca huainayashpa causanaca alimi can ninmi. Shinapash chai nishcacuna llulla cashcata yachaimandami cuidadota charina capanchi (Efes. 4:​19, 20). Cashna pensaripashunchi: “¿Jehová Diospa mandashcacunata na respetashpa causaj escuelamanda o trabajomanda compañerocunahuan tiempota ama yalingapaj esforzarijunichu? Gentecuna perfectocunashnami comportaringuichi nijpipash ¿Bibliapa mandashcacunata cazushpa difindingapaj esforzarinichu?” nishpa. Shinallata 2 Timoteo 2:​20-22​pi nishcashnami, congregacionbipash amigocunataca ali ali agllana capanchi. Porque na tucuicunachu Jehová Diosta cushilla sirvishpa ñaupaman catichun ayudanga.

‘MICHAPA HUAHUACUNASHNA CASHPA CATIPASHUNCHI’

13. “Michapa huahuacunashna cashpa catipaichi” nishpaca ¿imatata ningapaj munan? (Efesios 5:​7-9).

¹³ Éfeso llactamanda huauquipanicunata tutashna nali ruraicunamanda jarcarinami canguichi nishpa consejashca jipaca, apóstol Pabloca “michapa huahuacunashna cashpa catipaichi” nircami (Efesios 5:​7-9​ta liipangui). Apóstol Pablo cashna nishpaca ¿imatata ningapaj munarca? Jehová Diosta ali sirvij cashcata ricuchingapaj munashpaca siempre ali portarina  cashcatami ningapaj munarca. Chaita pactachi ushangapaca huaquin cosascunatami rurana capanchi. Por ejemplo, Bibliatami ali ali liishpa estudiana capanchi. Shinallata publicaciongunatapashmi liina capanchi. Shina estudiajushpaca Jesuspa ejemplomanda y paipa yachachishcacunamanda ali ali yachajupashunchi. Porque Jesusmi “cai mundopica michagushna” carca (Juan 8:12; Prov. 6:23).

14. Jehovapa espíritu santoca ¿imashinata ñucanchitaca ayudan?

¹⁴ ‘Michapa huahuacunashna cashpa catingapaca’, Jehová Diospa espíritu santotami minishtipanchi. Pero ¿imamandata minishtipanchi? Cai mundopi nali, mapa ruraicuna tiashcamandami Jehová Dios munashcashna limpio causaiguta charinaca na fácil can. Chaimandami paipa espíritu santopa ayudata minishtipanchi (1 Tes. 4:​3-5, 7, 8). Jehová Diospa espíritu santomi cai mundopa panda yachachishcacunahuan, yanga crishcacunahuan ama chapurichun ayudan. Shinallata Jehová Diospa espíritu santoca ‘ali shungu cachun, alita rurachun y aliguta causachunbashmi’ ayudan (Efes. 5:9).

15. Jehovapa espíritu santota chasquingapaca ¿imatata rurana capanchi? (Efesios 5:​19, 20).

¹⁵ Jesusca ‘jahua cielopi cangunapa Taita Diosta, paipa espíritu santota mañajpica carangallami’ nircami (Luc. 11:13). Shinaca Jehovapa espíritu santota charingapaca Jehová Diostami mañana capanchi. Shinallata ñucanchi huauquipanicunahuan tandanajuicunapi Jehová Diosta alabashpami paipa espíritu santota chasquita ushapanchi (Efesios 5:​19, 20​ta liipangui). Jehová Diospa espíritu santoca Jehová Dios munashcashna ali causaiguta charichunmi ayudanga.

16. Ali decisiongunata agllai ushachunga ¿imata ayudanga? (Efesios 5:​10, 17).

¹⁶ Imapash importante decisiongunata agllagrijushpaca ‘Jehová Diospa voluntad maijan cashcatami’ primero yachana capanchi. Shinami ali decisionda agllaita ushapashun (Efesios 5:​10, 17​ta liipangui). Imapash decisionda nara agllashpallata Bibliapa consejocunata mascana capanchi. Shinallata Jehovapa voluntad maijan cashcata y imata yuyajta yachangapapashmi esforzarina capanchi. Shinaca Bibliapa consejocunata  yaipi charishpa decidishpaca ali decisiongunatami agllaita ushapashun.

17. ¿Imashinata tiempotaca ali aprovechaita ushapanchi? (Efesios 5:​15, 16, dibujota ricupangui).

¹⁷ Apóstol Pabloca Éfeso llactamanda huauquipanicunataca tiempota ali aprovechachunmi consejarca (Efesios 5:​15, 16​ta liipangui). ‘Diabloca’ ñucanchicuna cai mundopi cosascunata rurashpa ocupado ocupado yalichunmi munan. Shinallata Jehová Diosta sirvingapaj tiempota ama charichunmi munan (1 Juan 5:19). Jehovata ashtahuan sirvinata saquishpa, culquita ashtahuan charinapi, ashtahuan estudianapi o yapata trabajanaca facilmi caita ushan. Cai cosascunata ña rurai callarijushpaca cai mundopa yuyaita ña catinajushcatami cuenta japita ushapanchi. Cabalta parlashpaca cai cosascunata ruranaca na malochu can. Pero cai ruraicuna ashtahuan importante tucuchunga na saquinachu capanchi. Shinaca ‘michapa huahuacunashna cashpa catingapaca’ ashtahuan importante cosascunata rurangapami ‘tiempotaca aliguta aprovechana capanchi’.

18. Donald huauquiguca tiempota ali aprovechangapaca ¿imatata rurarca?

¹⁸ Jehová Diosta ashtahuan sirvingapami esforzarina capanchi. Chaitami Sudáfrica llactapi causaj Donald huauquiguca rurarca. Paica ninmi: “Ñuca situacionbi aliguta pensarishpami ashtahuan predicangapaj Jehová Diosta ayudahuai nishpa mañarcani. Jehová Diosta mañajushpaca ashtahuan predicai ushangapaj shuj trabajota taringapaj ayudahuai nishpami mañarcani. Y Jehová Diosca ñapashmi shuj trabajoguta tarichun ayudahuarca. Chaimi ñuca huarmiguhuanga tiempo completopi sirvi callarircanchi”.

19. ‘Michapa huahuacunashna cashpa catingapaca’ ¿imatata rurana capanchi?

¹⁹ Apóstol Pablopa cartaca Éfeso llactamanda huauquipanicunataca Jehová Diosta na saquishpa sirvichunmi seguro ayudashcanga. Ñucanchitapashmi ayudaita ushapan. Imashinami ña yachajupashcanchi ali diversiongunata o pugllaicunata agllachun y ali amigocunata agllachunmi ayudapan. Shinallata Bibliamanda ali yachajuchun y Bibliapa consejocunata catishpa causachunmi animan. Shinallata ñucanchicuna ali cualidadcunata chari ushachun, Jehovapa espíritu santo ninanda ayudan cashcata yarichunbashmi ayudan. Shinaca apóstol Pablopa consejocunata catishpaca Jehová Diosta cushichij decisiongunatami agllaita ushapashun. Shina rurashpaca yana tutashna nali ruraicunamanda caruyashpami michashna caj ali ruraicunata ruraita ushapashun.