1, 2. Espiritualmente ñaupaman catishpaca ¿imatata yachajupanchi? Shuj chimbapuraimanda parlapai.

HUAHUACUNAMAN pipash imagutapash carajpica taitamamacunaca huahuacunataca cashnami nin, “¿imatata nina cangui?” nishpa. Shina nijpimi huahuacunaca “pagui” nin. Huahuacunaca taitamamacuna nijpillami shina nin. Shinapash jatunyashpaca shujcuna imagutapash carajpi imamanda agradicina cashcatami huahuacunaca cuenta japin. Chaimi paicunallata agradicin. Taitamamacuna agradicinata yachachishcamandami huahuacunaca ña jatunyashpapash agradicin. Huahuacunaca taitamamacunashna pensaimandami shina ruran.

² Shinallatami Bibliata yachajushpaca Diospa mandashcacunata cazuna minishtirishcapacha cashcatami yachajupanchi. Shinapash Bibliamanda ashtahuan yachajushpa, espiritualmente ñaupaman catishpami Jehová Dios imata pensajta, imata alicachijta, imata na ricunayachijtapash ashtahuan yachajupanchi. Shinallata Jehová Dios munashcashna alita rurangapaj, ali decidingapaj esforzarishpaca Jehová Dioshna pensashcatami ricuchishun.

3. Jehová Dioshna pensanaca ¿imamandata shinlli can?

³ Jehová Dioshna pensangapaj imata ruranata yachajushpapash juchayu caimandaca huaquinbica Jehová Dioshna pensanaca shinllimi ricurin. Por ejemplo, ñucanchi yuyaipi,  ruraicunapi limpio canamanda, ashtahuan cosascunata charinamanda, villachinamanda, yahuarta churarinamanda, Jehová Dios imatapacha pensajtaca na tucuita ali intindi usharinllu. Shinapash Jehová Dioshna pensashpa catichunga ¿imata ayudanga? Jehová Dioshna pensanaca ¿imashinata cunanbipash, shamuj punllacunapipash ali decidichun ayudanga?

4. Ñucanchi yuyaita mushujyachina nishpaca ¿imatata ningapaj munan?

⁴ (Romanos 12:2, liingui). Jehová Dioshna pensangapaj imata rurana cashcatami apóstol Pabloca intindichirca. Punda temapica cai mundomanda gentecunapa yuyaicunata, ruraicunata na catina cashcatami yachajuparcanchi. Shinapash apóstol Pabloca ñucanchi yuyaicunata mushujyachina cashcatapashmi nirca. Chaipaca Bibliamandami yachajuna capanchi. Chaicunapi pensarishpami ñucanchi causaipipash pactachina capanchi. Shinallata Jehová Dioshna pensangapami esforzarina capanchi.

5. Bibliata o shuj publicaciongunata yachajujushpaca ¿imatata rurana capanchi?

⁵ Bibliata o shuj publicaciongunata yachajunaca yangata rayanalla o liinallaca na canllu. Ashtahuangarin Bibliata yachajujushpaca Jehová Dios imata pensajta, imamanda shina rurajta, imata rurachun munajta intindingapami esforzarina capanchi. Shinallata imamanda huaquin cosascunata rurachun mandashcata o imamanda shuj ruraicunata nalicachishcatapashmi intindina capanchi. Bibliata yachajujushpaca Jehová Dios munashcashna pensangapaj, causangapaj imacunatalla cambiana cashcatami ricuna capanchi. Shinapash Bibliata yachajujushpa chai tucui cosascunapi pensarinaca tal vez na fácil cangachu. Na fácil cajpipash imata yachajushcapi pensaringapami tiempota llujchina capanchi (Sal. 119:97; 1 Tim. 4:15).

6. Bibliapa yachachishcacunapi pensarinaca ¿imamandata ali can?

⁶ Bibliapa yachajushcapi pensarinaca ñucanchipallatami ali can. Chaicunapi pensarishpaca Jehová Diospa yuyaicuna alipacha cashcatami intindishun. Shinallata Jehová Dios imashina pensashcata intindishpaca ñucanchi yuyaicunatami cambiashun. Shinami asha asha Jehová Dioshna pensai callarishun.

7, 8. a) Ashtahuan cosascunata charinamandaca ¿imatata Jehová Diosca pensan? (Callari dibujocunata ricupangui). b) Jehová Dioshna pensashpaca ¿imatata rurashun?

⁷ Ñucanchicunaca imata pensashcatami ruranchi (Mar. 7:21-23; Sant. 2:17). Chaita intindingapaca huaquin yuyaicunata ricupashun. Primero, ashtahuan cosascunata charinamandaca Jehová Dios imata pensajtami Mateo, Marcos, Lucas, Juan librocunapica ricuchin. Jehová Diosca paipa churipa taitamamacuna cachunga cai alpapi pobrella cusahuarmitami agllarca (Lev. 12:8; Luc. 2:24). Chaimi Bibliapica cashna nin: ‘Paicuna mingarina huasipi junda junda cajpimi, animalcuna shayaj ucupi’ mingarirca. Chaimi María huarmiguca “animalcuna micuchun churana jahuapi” Jesús huahuagutaca sirichirca (Luc. 2:7). Jehová Diosca pai munashpaca shuj ali pushtupi Jesús nacirichunmi imatapash ruranmanlla carca. Shinapash Jesustaca, espiritual familia ucupi viñachunmi Jehová Diosca munarca. Chaimi Jehovata sirvinata pundapi churashpa causaj familiata Jehová Diosca agllarca.

⁸ Chaita ricushpaca ashtahuan cosascunata  charina Jehová Diospa na importante cashcatami cuenta japipanchi. Huaquin taitamamacunaca paicunapa huahuacuna ali causachun munashpami tucuita ruran. Chaimi huaquin huahuacunaca Jehovata ali sirvitapash na ushashca. Shinapash, Jehová Diospaca espiritual cosascunami ashtahuan importante can. Cutin ñucanchipaca ¿imata ashtahuan importante can? ¿Jehová Dioshna pensangapachu esforzarinajunchi? ¿Imatata ñucanchi ruraicunaca ricuchin? (Hebreos 13:5, liingui).

9, 10. ¿Imashinata Jehová Dioshna pensashcata ricuchi ushapanchi?

⁹ Segundo. Ñucanchicuna imatapash nijpi o rurajpimi huaquin huauquipanicunaca juchacunapi urmaita ushan. Shinallata Jehová Diosta sirvinatapash saquita ushan. Chaimandaca ¿imatata Jehová Diosca yuyan? Chaimanda parlashpaca Jesusca nircami: “Maijambash cai uchillagucunashna ñucata crishpa catinajujta nitijachinshna pandachij runataca, molino jatun rumita cungapi huatashpa, mama cuchapi shitashpachari ashtahuan ali canman” nishpa (Mar. 9:42). Shujcunata pandachina nalipacha cashcataca Jesusca alimi yacharca. Shinallata Jesusca Jehová Dios imashina cashcatami aligutapacha ricuchin. Shinaca ñucanchi ruraicunahuan o nishcacunahuan shujcunata pandachinata yachashpapash chaitallata rurashpaca, Jehovapa ñaupajpimi nalitapacha ruranajushun (Juan 14:9).

¹⁰ Cutin ñucanchicunaca ¿Jehová Dioshna, Jesushnachu pensanchi? Ñucanchi ruraicunahuanga ¿imatata ricuchinajunchi? Cunanga caipi pensaripashun, yapata arreglarimanda o ñucanchi gushtashca ropata churajuimanda huauquipanicuna nalicachijta yachashpaca ¿imatata rurashun? Shinallata pinganai ropacunata churajuimanda huauquipanicuna nali pensamientocunata charijta yachashpaca ¿imatata rurana capanchi? Shinaca huauquipanicunata juyaimandaca ¿imatata ruranchiman? Huauquipanicunata juyaimandami ñucanchi munaita huashaman saquina capanchi (1 Tim. 2:9, 10).

11, 12. Jehová Dioshna nalicunata millanayachinaca ¿imapita ñucanchitaca ayudan?

¹¹ Tercero. Jehová Diosca nalicunataca na ricunayachinllu (Sal. 5:4). Juchayucuna caimandaca huaquinbica panda yuyaicunatami charinchi. Shinapash Jehová Diosca paishnalla nali ruraicunata, yuyaicunata millanayachina canguichi nishpami mandan (Salmo 97:10, liingui). Shinaca Jehová Dios imamandata nalicunata millanayachishcapi pensarinami, nalicunata Jehová Dioshna millanayachichun ñucanchitaca ayudanga.

¹² Jehová Dioshna ñucanchicunapash nalicunata millanayachishpaca, Bibliapi na imatapash nijujpipash huaquin ruraicuna imamanda nali cashcatami intindishun. Por ejemplo, cunanbica pinganai nalicunata rurashpa bailana lap dance nishcatami ashtaca llactacunapica bailan. Shinapash huaquingunaca, chashna bailanaca shuj jarihuan o shuj huarmihuan puñunshnaca na canllu nishpami alitashnalla ricun *. Huaquinguna shina pensajpipash, Jehová Diosca ¿imatata pensan? Jehová Diosca tucui nali ruraicunatami millanayachin. Chaitaca ama cungapanguichu. Shinaca chai nali ruraicunamanda jarcarishpa, Jehová Dioshna chai nali ruraicunata millanayachishpaca juchapica na urmashunllu (Rom. 12:9).

13. Bibliata yachajujushpaca ¿imapita pensarina capanchi?

¹³ Bibliata ñucanchilla yachajujushpaca cashnami pensarina capanchi, Jehová Dioshna pensanaca ¿imashinata shamuj punllacunapi ali decidichun ayudahuan? nishpa. Shinami na yashcapi imapash pasajpica ñapash ali decidi ushashun (Prov. 22:3). Shinaca Bibliapi huaquin ejemplocunata ricupashunchi.

14. Josemandaca ¿imatata yachajupanchi?

¹⁴ Cunanga Josehuan ima tucushca ricupashun. Potifarpa huarmica cutin cutinmi Josetaca ñucahuan puñushun nirca. Shina nijpipash Joseca calpashpami rirca. ¿Imamandata Joseca shina rurarca? Joseca alimi yacharca, shuj jari shuj huarmi cazarashca cashpalla pacta puñuchun Jehová Dios churashcata. Chaitami Joseca ali ali pensaririanga (Génesis 39:8, 9, liingui). Chaimi Potifarpa huarmitaca Joseca chashna nirca: “Shina cashpaca, ¿imashpata ñucaca cai jatun nalita rurashpa juchata rurashpa, Taita Diosta fiñachishayari?” nishpa. Shina nishpaca Jehová Dioshna pensashcatami ricuchirca. Shinapash caipi pensaripashunchi, trabajopi shuj cumba ñucanchita imatapash nishpa molestajpi o mapa pinganai fotocunata, mensajecunata cachamujpica ¿imatata ruranchiman? * Shina pasajpi Jehová Dioshna pensashpa, imata ruranata ña pensarishcalla cashpaca uchallami chaicunamandaca anchurishun. Shina rurashpallami Jehová Diosta tucuipi cazushun.

15. Quimsa hebreocunamandaca ¿imatata yachajupanchi?

¹⁵ Cunanga Sadrac, Mesac, Abednego jovengunamanda ricupashunchi. Rey Nabucodonosorca orohuan rurashcapi cungurishpa alicachichunmi mandarca. Shinapash cai quimsa hebreocunaca nimamanda na cungurircachu. Shina rurashpami Jehová Diostalla sirvishpa causanata ña decidishcalla cashcata ricuchirca (Éx. 20:4, 5; Dan. 3:4-6, 12, 16-18). Shinaca pensaripashunchi ñucanchita trabajachij dueño cashna nishcanman, panda religiongunapa fiestacunata apoyangapaj culquita churanami canguichi nishpa. Shina nijpica ¿imatashi ruranchiman? ¿Nachu Jehová chaicunamanda imata pensajta cunanbillata aliguta pensarina capanchi? Ñucanchicunatapash shina pasajpica, chai quimsa hebreocunashna imata ruranata o imata ninatami ali yachashun.

16. Yahuarmanda Jehová Dios imata pensajta cunanmandallata yachajunaca ¿imamandata ali can?

¹⁶ Ñucanchicunaca yahuarta o glóbulos rojos, glóbulos blancos, plaquetas, plasma nishcacunata na churarina cashcataca alimi yachapanchi. Shinapash shamuj punllacunapi imapash llaqui apashpa o ungüimanda hospitalman rina urmajpica cunanmandallatami imata ruranataca ali ali pensarina capanchi (Hech. 15:28, 29). Huaquinbica yahuarpa chuscu partecunamanda ashata japishpami imapash jambicunata, tratamientocunata llujchin. Chaicunata chasquinata o na chasquinataca cada unomi ricuna capanchi. Chaipaca yahuarmanda Jehová Dios imata pensajtami Bibliapa textocunapi ricuna capanchi. Pensaripashunchi ¿hospitalpi  cashpachu imatapash decidina capanchi? Na. Huaquinbica nanaihuan caimanda o shujcuna nijpillami imatapash uchalla decidinchiman. Chaimandami cunanmandallata chai temamanda yachajushpa imata ruranata ña decidishcalla cana capanchi. Shinallata imata rurachun munashcata escribishpami yahuarpa documentota jundachishcalla charina capanchi. Ima tratamientota chasqui ushashcatapashmi ña doctorcunahuan parlashcalla cana capanchi. *

17-19. a) ¿Imamandata cunanmandallata Jehová Dioshna pensana capanchi? b) ¿Imacunapillata imata ruranata ña decidishcalla cana capanchi?

¹⁷ Jesustaca apóstol Pedroca cashnami nirca: “Apunchi Jesús, chashna tucunataca ama munaichu, canbirami pensarina cangui” nishpa. Shina nijpica ¿imatata Jesusca rurarca? Jehová imata rurachun munashcata, cai alpapi ima profeciacunatalla pactachina cashcata, gentecunamanda huañuna cashcataca ña pensashcallami carca. Chaicunapi pensarinami Jehovata tucuipi cazuchun, paipa causaita cushpa gentecunata salvachunbash Jesustaca ayudarca (Mateo 16:21, 22 *, 23, liingui).

¹⁸ Jehová Diosca cunanbipashmi ñucanchicuna paipa amigo cachun, tucui shunguhuan villachichun munan (Mat. 6:33; 28:19, 20; Sant. 4:8). Tal vez pipash alita rurajuni yashpami ñucanchicunatapash Jesustashna nishpa Jehovata ali sirvinata jarcanman. Pensaripashunchi, ñucanchita trabajachij cashna nishcanman, shuj ali trabajotami quiquinba charini, chai trabajota chasquishpaca ashtaca culquitami ganangui nishpa. Shinapash chai trabajota chasquishpaca tal vez tandanajuicunaman, villachinamanbash ñana rita ushashunllu. Cutin joven cashpaca pensaripai, ashtahuan estudiangapaj shuj becata chasquishpa shuj llactacunaman rina cajpica ¿imatata rurapanguiman? ¿Shina pasajpirachu Jehovata mañashpa, chai temamanda Jehová  Dios imata pensajta ricushpa familiahuan, ancianocunahuan parlapanguiman? Na, na shina rurapanguimanllu. Chaipa randica cunanmandallatami chaicunamanda Jehová Dios imata pensajta yachajushpa, Jehová Dios munashcashna rurangapaj esforzarina capangui. Quiquinda shina pasajpica imata ruranatami ali yachapangui. Shinallata Jehovata ashtahuan sirvina importante cashcata yaipi charishpami ali decidi ushapangui.

¹⁹ Huaquinbica na yashcapimi imapash pasanlla. Chaicunapimi Jehovata tucui shunguhuan sirvijushcata ricuchina capanchi. Shinapash tucui tucuipi imata ruranata yachangapaj prepararishcalla caitaca na ushanchichu. Chaimi estudio personalta rurajushpaca Jehová Dios imashina pensashcata yachangapaj esforzarina capanchi. Shinami imata yachajushcata yarishpa ali decidi ushashun. Shinaca Jehovapa yuyaicunamanda ashtahuan yachajupashunchi. Shinallata chai yachajushcacunata cazushpa Jehová Dioshna pensangapaj esforzaripashunchi. Cunanbipash, shamuj punllacunapipash Jehová Dioshna pensana imashina ali decidichun ayudajtami pensarina capanchi.

20, 21. a) Paraíso alpagupica ¿imashinata causashun? b) Cunanbillata cushilla causangapaca ¿imatata rurana capanchi?

²⁰ Tucuicunallatami paraíso alpagu ucha chayamuchun munapanchi. Cai alpa shuj paraíso tucujpi tucuicunallatami para siempre causangapaj munapanchi. Diospa Reinomi cai mundopi tucuilla llaquicunata tucuchinga. Shinapash paraíso alpagupipashmi imata rurangapaj munashpapash ñucanchillata ali decidishun.

²¹ Paraíso alpagupipashmi Jehovapa mandashcacunata cazushpa, Jehová Diospa yuyaicunata catishpa ima ali cajta ima nali cajtapash ñucanchillata decidishun. Shinami tucuicunallata ali, tranquilo cushilla causashun (Sal. 37:11). Shinapash Jehová Dioshna pensangapaj esforzarishpaca llaquicunata charishpapashmi cunanbillata cushilla causashun.