1-3. a) Bibliapa yachachishcacunamandaca ¿imatata yuyapanchi? Shuj ejemplomanda parlapai. (Callari dibujocunata ricupangui). b) Cai temapica ¿ima tapuicunatata yachajupashun?

HUAQUIN llactacunapica gentecuna imagutapash randishpaca jipamanga tigrachinllami. Shinallata huaquin llactacunapi gentecunaca randishca cosascunamandaca casi 9%tami tigrachin. Chai gentecunaca chai randishca cosascunata tal vez na gushtashpa o huaglishca cajpimi tigrachin. Chaimi chai randishca cosascunata cambiachun o culquita tigrachichun mañan.

² Ñucanchica Bibliapa yachachishcacunataca nimahuan na cambiangapaj munanchichu. Chaimi Jehovapa nishcacunata Bibliapi yachajushpaca nunca na saquinachu capanchi (1 Tim. 2:4; Proverbios 23:23, liingui). Imashina chaishuj temapi yachajuparcanchi, Bibliamanda yachajungapaca tiempomi minishtirin. Huaquingunaca Bibliapa yachachishcacunata yachajuimandami ali trabajocunata saquishca. Shinallata shujcunaca paipa amigocunahuan, familiacunahuan ñana pundashna llevarinllu. Cutin shujcunaca mapa pensamientocunata, nali costumbrecunata, Jehovapa ñaupapi nali ruraicunatami saquishca. Chai cosascunata o shuj cosascunata saquishca cajpipash Jehová  Diosca ashtaca bendiciongunatami ñucanchicunamanga cushca.

³ Diospa Reinomanda ali villaigucuna ninan valishca cashcata ricuchingapami, Jesusca juyailla perlascunata randishpa jatuj runagumanda parlarca. Chai runaguca “shuj juyailla perlasguta ricushpaca, pai imata charishcatapash tucuilla jatushpami, chai perlasgutaca” randirca (Mat. 13:45, 46). Shinallata Diospa Reinomanda ali villaigucuna, Bibliapa yachachishcacunaca ninan valishcami can. Chaicunata yachajushpaca ashtaca cambiocunatami rurarcanchi. Chai yachachishcacunata valichishpaca nimahora na saquishunllu. Shinapash huaquin huauquipanicunaca Bibliapa yachachishcacunata ñana munashpami Jehová Diosta sirvinatapash saquishca. Chaitaca nunca na ruranachu capanchi. Ashtahuangarin “na llullashpa villajuj shimita” yachajushpami catina capanchi (3 Juan 2-4, liingui). Chaipaca Bibliapa yachachishcacunata pactachishpami causana capanchi. Cai temapica cai tapuicunatami yachajupashun: Huaquin huauquipanicunaca ¿imamanda, imashinata Bibliapa yachachishcacunataca saquishca? Bibliapa yachachishcacunata ama saquingapaca ¿imatata rurana capanchi? Bibliapa yachachishcacunata pactachishpa catichunga ¿imata ayudanga?

4. Punda siglopi huaquin gentecunaca ¿imamandata Bibliapa yachachishcacunataca saquirca?

⁴ Punda siglopi huaquin gentecunaca Jesuspa yachachishcacunata chasquishpapash jipamanga Jesusta catinataca saquircami. Por ejemplo, shuj punllaca shuj milagrota rurashpami ashtaca ashtaca gentecunaman Jesusca micunata cararca. Chai gentecunaca mar de Galilea chaishuj manñamanmi Jesushuan yalirca. Chaipimi Jesusca cashna nirca: ‘Runa Aichayu tucushca ñucapa aichata na micushpa, ñucapa yahuartapash na ufiashpaca, causaitaca’ na charinguichichu nishpa. Chaita uyashpami chai gentecunaca cashna nirca: “Pai yachachijuj shimicunataca, napacha cati ushanallachu. ¿Pita cashna nijujtaca, uyai ushangayari?” nishpa. Chaimi chai gentecunapuramandaca “ashtacacuna paita saquishpa, na ashtahuan catirca” (Juan 6:53-66).

5, 6. a) Cunanbi huaquin huauquipanicunaca ¿imamandata Bibliapa yachachishcacunataca saquishca? b) ¿Imashinata huaquingunaca Bibliapa yachachishcacunataca saquishca?

⁵ Cunan punllacunapipash huaquin huauquipanicunaca Bibliapa yachachishcacunata saquishca. Huaquingunaca Bibliamanda mushuj entendimientocuna llujshijpi, shuj huauqui o pani imatapash nishpa o rurashpa nali sintichijpimi Jehovata sirvinata saquishca. Cutin shujcunaca shuj huauqui consejajpi, shuj huauquihuan o panihuan shuj problemata charimandami Bibliapa yachachishcacunata saquishca. Shinallata shuj huauquipanicunaca apostatacunapa o ñucanchi crishcacunata nalicachij gentecunapa lado tucushpami tal vez Jehovamanda caruyashcanga. Paicunaca chaicunamanda o shuj cosascunamandami congregacionmandapash, Jehovamandapash caruyashca (Heb. 3:12-14). Shinapash chai huauquipanicunaca apóstol Pedroshna Jesuspi confiashca cashpaca alitami ruranman carca. Jesusca apostolcunataca tapurcami: “¿Cangunapash ñucata saquishpa ringapaj munanguichi?” nishpa. Shina tapujpimi apóstol Pedroca ñapash cashna nirca: “Apunchi Jesús,  ¿pipajmanda rishunyari? Canllami, causaita causagrinata caraj shimicunataca charingui” nishpa (Juan 6:67-69).

⁶ Cutin shuj huauquipanicunaca na cuenta japishpami asha asha Bibliapa yachachishcacunata saquishca. Chai huauquipanicunataca yacu manñamanda asha asha caruyajuj barcohuanmi Bibliaca chimbapuran (Heb. 2:1). Paicunaca Bibliapa yachachishcacunata na saquingapaj munashpapash asha asha caruyashpami, Jehovahuan amigo canatapash saquishca. Shinaca, ñucanchicunatapash ama shina pasachunga ¿imatata rurana capanchi?

7. Bibliapa yachachishcacunata ama saquichunga ¿imata ayudanga?

⁷ Jehová Diosta sirvinata ama saquingapaca Bibliapa tucui yachachishcacunatami cazuna capanchi. Shinallata Biblia yachachishcashna causanami ashtahuan importante cana can. Shuj viajeca rey Davidca Jehová Diosmanga nircami: “Cambaj na llullaj ñambimi, ñucaca purijusha” nishpa (Sal. 86:11). Rey David shinami ñucanchicunapash Jehová Diosta sirvishpa catingapaj munana capanchi. Jehová Diosta ñana sirvingapaj munashpaca Bibliapa yachachishcacunamanda imacunatalla saquishcata pensari callarishun. Shinami cutin chaicunata charingapaj munashun. Shinapash Bibliapa yachachishcacunata imata cazunata, imata na cazunata na agllai ushanchichu. Chaipa randica Taita Diospa ‘na llullaj’ shimitami tucuita cazuna capanchi (Juan 16:13). Chaishuj temapica Bibliapa yachachishcacunamanda yachajungapaj, pactachishpa causangapaca picha cosascunata huashaman saquina cashcatami yachajuparcanchi. Chai saquishca cosascunamanllata ama cutin tigrangapaj imata rurana cashcatami cai temapica yachajupashun (Mat. 6:19).

8. Jehová Diosmanda ama caruyangapaca ¿imatata rurana capanchi? Shuj experienciamanda parlapai.

⁸ Tiempo. Jehová Diosmanda ama caruyangapaca ñucanchi tiempotami alipacha utilizana capanchi. Chaimi na cuidadota charishpaca diversiongunapi, ñucanchi gushtashca ruraicunapi, Internetpi o teleta ricushpami ashtahuan tiempota yalinchiman. Chai cosascuna ali cajpipash chai cosascunapi ashtahuan tiempota yalishpaca estudio personalta charingapaj, espiritual cosascunata rurangapaca tiempota na charishunllu. Cunanga Emma * shuti paniguhuan ima tucushcata ricupashunchi. Chai paniguca uchillamandapachami caballopi tiarishpa calpanata gushtan carca. Chaimandami paica chaita rurangapaj tucui oportunidadta aprovechan carca. Shinapash jipamanga chaita rurashpa ashtaca tiempota utilizajushcata cuenta japishpami nali sintirirca. Chaimi huaquin cambiocunata rurarca. Shinallata Cory Wells * panigupa experienciami Emma panigutaca ayudarca. Cory Wells paniguca caballopi tiarishpa calpana campeonatocunapimi participan carca. Cunan punllapica Emma paniguca espiritual cosascunata rurashpa, Jehovata sirvij amigocunahuan, familiacunahuanmi ashtahuan tiempota yalin. Chai paniguca Jehovaman ashtahuan quimirishcata, tiempota ali utilizajushcata yachashpami cushilla sintirin.

9. Ashtahuan charingapaj munaicunamandaca ¿imamandata cuidarina capanchi?

 ⁹ Ashtahuan charingapaj munaicuna. Bibliapa yachachishcacunata yachajushpami Jehová Diospa munaita pundapi churashpa, charishca cosascunapica ñana yapata preocuparishcanchi. Imata saquishca cashpapash Bibliapa yachachishcacunata yachajuimandami cushilla sintiripashcanchi. Shinapash chairalla llujshishca celularcunata, tabletcunata, computadoracunata randijta ricushpa o charishca cosascunahuan shujcuna cushilla cajta ricushpami shinallata ñucanchicunapash charingapaj munanchiman. Chaita ricushpami ñucanchi charishca cosascunahuan ñana cushilla sintirishpa, ashtaca cosascunata charingapaj munashpami Jehová Diosta sirvinataca ladoman saqui ushanchiman. Cunanga Demas shuti huauquihuan ima tucushcata yaripashunchi. Paica “cai pachapi tiajtalla munashpa” ricuimandami apóstol Pablohuan ñana igual carca, Jehovata sirvinatapash saquirca (2 Tim. 4:10). Bibliapica Demas huauqui ashtaca cosascunata charingapaj munashcata o apóstol Pablohuan Jehovata ñana sirvingapaj munashcataca na nijunllu. Shinaca ¿imatata caimandaca yachajupanchi? Punda charishca cosascunata cutin charingapaj munashpaca Jehová Diosta sirvinatami saqui ushanchiman..

10. ¿Pipa nishcacunatata na cazuna capanchi?

¹⁰ Ñucanchi familiacuna, amigocuna. Shujcunapa nishcacunata ama catingapaca Bibliapa yachachishcacunatami cazushpa catina capanchi. Bibliapa yachachishcacunata yachajushpaca na Testigo familiacunahuan, amigocunahuanga ñana pundashna llevarircanchichu. Huaquinguna ñucanchi crishcacunata respetajpipash, shujcunaca nalicachishpami ricurca (1 Ped. 4:4). Shinapash ñucanchi familiacunata, amigocunata ali tratangapaj, paicunahuan ali cangapami ninanda esforzaripanchi. Paicunata respetashpapash paicunapa nishcacunatara rurangapaca na munanachu capanchi. Ashtahuangarin Jehová Diostami cushichingapaj munana capanchi. Chaipaca Jehová Diosta sirvij amigocunahuanllami llevarina capanchi (1 Corintios 15:33, MTQI ).

11. Cai mundopa nali ruraicunahuan ama chapurichunga ¿imata ayudanga?

¹¹ Nali pensamientocuna, nali ruraicuna. Bibliapa yachachishcacunata cazujcunaca tucuipimi alitalla rurashpa causana can (Is. 35:8; 1 Pedro 1:14-16, liingui). Bibliapa yachachishcacunata yachajushpaca tucuicunallata ñucanchi causaipi cambiana tucurcanchi. Huaquingunacarin na usharinalla cambiocunatami rurashca. Shina cambiashca cashpaca cai nali mundopa ruraicunahuanga nimamanda na chapurinachu capanchi. Cai mundopa nali ruraicunahuan ama chapurichunga ¿imata ayudanga? Jehová Dios paipa churi Jesusta ñucanchimanda huañuchun cachamushcata yarinami ayudanga (1 Ped. 1:18, 19). Ñucanchi yuyaipi, ñucanchi shungupi Jesús ñucanchimanda huañushcata yarinami Jehová Diospa ñaupajpi ali cashcata ricuchi ushapashun.

12, 13. a) Nali costumbrecuna, Diospa ñaupajpi nali cashcata yachanaca ¿imamandata ministirishca can? b) ¿Imatata yachajupashun?

¹² Nali costumbrecuna, Diospa ñaupajpi nali ruraicuna. Ñucanchi na Testigo familiacuna, trabajomanda o escuelamanda cumbacuna imapash yanga fiestacunata rurashpa invitashcanman. Shinaca nali costumbrecunapi, Diospa ñaupajpi nali ruraicunapi ama chapurichunga ¿imata ayudanga? Chai  nali costumbrecuna imashina tiai callarishcata publicaciongunapi imata yachajushcatami yarina capanchi. Shinallata Diospa ñaupajpi chai costumbrecuna imamanda nali cashcatapashmi yachana capanchi. Bibliapi imamanda nali cashcata yachanami Jehová Diosta ashtahuan sirvishpa catichun ayudanga (Efes. 5:10). Jehová Diospi, paipa Shimipi confianami shujcunata ama manllachun ayudanga (Prov. 29:25).

¹³ Bibliapa yachachishcacunata para siempre pactachingapami munana capanchi. Shinaca Bibliapa yachachishcacunata tucui shunguhuan pactachishpa catichunga ¿imata ayudanga? Chaipaca quimsa yuyaicunata yachajupashun.

14. a) Bibliapa yachachishcacunata tucui shunguhuan pactachichunga ¿imata ayudanga? b) Ali yachaita, ali yuyaita, disciplinata charinaca ¿imamandata minishtirishca can?

¹⁴ Primero. Diospa Shimita yachajungapaj, liishcapi pensaringapami tiempota llujchina capanchi. Shina yachajushpaca, Bibliapa yachachishcacunata tucui shunguhuan pactachichun, ama imahuanbash cambiachunmi ayudanga. Proverbios 23:23​pica ninmi: “Na llullaj shimita, ali yachaita, ali yuyaita yachachishcatapash [ o disciplinatapash, NM ] randishpaca” ama saquinguichu nishpa. “Ali yachaita” charina nishpaca Bibliapa yachachishcacunata yachajushpalla quedanataca na nijunllu. Ashtahuangarin imata yachajushcatapash ñucanchi causaipi pactachinatami nijun. “Ali yuyaita” charina nishpaca ña yachajushcahuan, imata chairalla yachajushcahuan chimbapurashpa ricuna cashcatami nijun. Shinallata disciplinata chasquina nishpaca Bibliapa yachachishcacuna ñucanchi causaipi nalicunata saquichun o cambiana cashcatami ningapaj munan. Shinaca nalita saquinami cangui nijpica uchashpami cambiana capanchi. Bibliapica ninmi: [Disciplinaca, NM ] orotapash ashtahuan yalimi can nishpa (Prov. 8:10).

15. Bibliapa yachachishcacunaca ¿imashinata ayudan?

¹⁵ Segundo. Bibliapa yachachishcacunata cada punlla ñucanchi causaipi pactachishpami causana capanchi. Cunanga caipi pensaripashunchi. Punda tiempopi soldadocuna macanajungapaj rishpaca alipacha cinturonda ajustarishpami rin carca. Cutin na ajustarishpaca llaqui apai ushanmanmi carca. Shinallatami Bibliapa yachachishcacunataca ‘cinturasta alipacha chumbilishcashna’ causana capanchi (Efes. 6:14). Bibliapa yachachishcacunata cada punlla pactachishpami causana capanchi. Chai yachachishcacunami panda yachachishcacunata saquichun, imatapash ali decidichun ayudanga. Shinallata imapash nali munaicuna ricurijpi tucui shunguhuan chaicunata saquichunbashmi ayudanga. Shuj soldado  macanajungapaj rishpaca nunca na cinturón illajca rinmanllu. Shina cuendami ñucanchicunapash Bibliapa yachachishcacunataca nunca na saquina capanchi. Ashtahuangarin imata yachajushcatami ñucanchi causaipi pactachishpa catina capanchi. Shinallata soldadopa cinturonbica shuj espadata huarcuchishpa apai ushanallami carca. Ñucanchicunapash cai soldadoshna espadata imashina apanata yachajupashun.

16. Gentecunaman Bibliapa yachachishcacunata yachachinaca ¿imashinata ñucanchitaca ayudan?

¹⁶ Tercero. Bibliapa yachachishcacunata tucui gentecunaman yachachingapaj esforzaripashunchi. Shuj soldado macanajungapaca paipa espadataca shinllitami charin carca. Shinallatami ñucanchicunapash ‘Diospa Shimimandaca’ alipacha yachana capanchi (Efes. 6:17). Tucuicunallatami ‘na llullashpa villajuj shimita’ yachachingapaj, ashtahuan alipacha yachachijcuna’ cangapaj esforzarina capanchi (2 Tim. 2:15). Shinaca Bibliapa yachachishcacunata gentecunaman yachachishpaca ñucanchi shungupi, yuyaipi Bibliapa yachachishcacunata charichunmi ayudan. Shinami Jehová Diospa yachachishcacunata tucui shunguhuan pactachishpa catichun ayudan.

17. Bibliapa yachachishcacunataca ¿imamandata alicachipangui?

¹⁷ Bibliapa yachachishcacunataca Jehová Diosmi carashca. Chaimandami ñucanchicunaca Jehová Diospa amigo caita ushapanchi. Jehová Dioshuan amigo canaca nimahuan na igualanllu. Shinallata Bibliapa yachachishcacunataca para siempremi yachajushpa catishun. Chai yachachishcacunataca shuj valishca perlahuanmi chimbapuran. Shinaca Bibliapa yachachishcacunataca ninanda alicachishpami nimahuan na cambiana capanchi. Ashtahuangarin Jehová Diospa yachachishcacunata yachajushpa catipashunchi. Shina rurashpaca rey David cuendami ni ushashun, “cambaj na llullaj ñambimi, ñucaca purijusha” nishpa (Sal. 86:11).