1, 2. a) Ñucanchicunapaca ¿imata ashtahuan valishca can? b) ¿Imatata ashtahuan alicachipanchi? c) ¿Imamandata chaitaca alicachipanchi? (Callari dibujocunata ricupangui).

ÑUCANCHIPACA ¿imata ashtahuan valishca can? Jehovata sirvijcunapaca Jehovahuan ali amigo canami ashtahuan valishca can. Chaitaca imahuanbash na cambianchimanllu. Bibliapa yachachishcacunatapashmi ninanda alicachipanchi. Chaimi Jehová Dioshuan ali amigo cachun ñucanchitaca ayudan (Col. 1:9, 10, NM ).

² Jehová Diosca alipacha yachachij Diosmi can. Bibliahuanmi paipa shuti imamanda importante cashcata, paipa cualidadcunatapash yachachin. Shinallata ñucanchita juyaimanda paipa churita ñucanchimanda huañuchun cachamushcatapashmi Jehová Diosca yachachin. Ashtahuanbash Diospa Reinopi Jesús mandajujta, ungidocuna jahua cieloman rinata, “shuj llamacunapash” paraíso alpagupi causanatapashmi yachachin (Juan 10:16). Shinallata ñucanchicuna imashina causanata,  imata ruranatapashmi yachachin. Chaica Tucuita Ruraj Jehová Diosman ashtahuan quimirichun, ali causaita charichunbashmi ayudan. Chaimi chai yachachishcacunataca ninanda alicachipanchi.

3. Bibliapa yachachishcacunataca ¿ciertopachachu randi ushapanchi?

³ Bibliapa yachachishcacunataca ¿ciertopachachu randi ushapanchi? Na, na randi ushapanchichu. Ashtahuangarin Jehová Diosca paipa juyashca Churiguta cachamushpaca na imatapash cobrarcachu. Shinallata Jehová Diosca pipash Bibliamanda yachajungapaj munajta ricushpaca paitaca ayudanmi. Jehová Diosca pipash Bibliamanda yachajuchunga nunca na culquita mañanllu. Shuj punllaca “Diospaj jucha illaj espirituta cujta Simón shuti runa ricushpami, paicunaman culquita cungapaj munarca. Chaimandami cashna nirca: Pipajpi cashpapash uma jahuapi ñuca maquita churajpi, Diospaj jucha illaj espirituta chasquichun, ñucamambash chai ushaita cuhuaichi nircami” nishpa. Chaita nalicachishpami apóstol Pedroca cashna nirca: “Taita Dios juyailla ushaita caramujujtaca, culquihuan randingapajmi munashcangui. Shina cashcamanda cambaj culquica, canhuan chingaita chingagrichunlla” nishpa (Hech. 8:18-20). Shinaca ‘na llullaj shimita randina’ nishpaca ¿imatata ningapaj munan?

4. ¿Ima tapuicunatata yachajupashun?

⁴ (Proverbios 23:23, liingui). Bibliapa yachachishcacunata yachajungapami ninanda esforzarina capanchi. Chaipaca ¿imatata rurana capanchi? Ñucanchi munaicunatami huashaman saquina capanchi. Proverbios librota escribijca nircami, Bibliapa na llullaj shimitaca nimamanda na imahuanbash cambianachu can nishpa. Shinaca na llullaj shimita randina nishpaca ¿imatata ningapaj munan? Bibliapa yachachishcacunata yachajungapaca ¿mashnatata pagana capanchi? Cai tapuicunamanda yachajushpami Bibliapa yachachishcacunata ashtahuan alicachishpa, nimahuan na cambianalla cashcata ricuchun ayudanga. Shinaca Bibliapa yachachishcacuna imahuanbash na igual cashcatami intindipashun.

5, 6. a) Na llullaj shimitaca ¿imashinata randi ushapanchi? Shuj ejemplomanda parlapai. b) Na llullaj shimita randinaca ¿imashinata ayudan?

⁵ Pipash imagutapash na cobrashpa carajpica, ¿nachu imagutapash paicunamanda ruranchiman? Hebreo shimipica “randina” nishpaca Proverbios 23:23​pi “imatapash japina cashcatami” ricuchijun. Shinaca imatapash japingapaj ninanda esforzarina cashcata o imapash valishca cosascunata na yanga cosascunahuan cambiana cashcatami ningapaj munan. Cunanga shuj ejemplota ricupashunchi. Shuj mercadopi platanosta carajunmi nijpica ¿imatata ruranchiman? Platanosta carajun nishpa pensarijpillaca platanosca ñucanchi maquimanga na shamunmanllu. Ashtahuangarin ñucanchillatami japingapaj rina capanchi. Shinallatami Bibliapa yachachishcacunata chasquingapaj culquita na cuna cashpapash, cada unomi imatapash rurana capanchi.

⁶ (Isaías 55:1-3, liingui). Isaías libropi Jehová Diospa shimicunaca Bibliapa yachachishcacunata imashina randi ushashcata intindichunmi ayudan. Jehová Diosca paipa shimitaca yacuhuan, lechehuan, vinohuanmi chimbapuran. Bibliapa yachachishcacunaca limpio limpio yacushnami can. Ashtahuanbash  lecheta ufiashpaca huahuacunaca alimi viñan. Shinallatami Bibliapa yachachishcacunaca espiritualmente ñaupaman catichun ayudan. Cutin Bibliapa yachachishcacunataca ¿imamandata vinohuan chimbapuran? Bibliapica cashnami nin: Vinoca ‘gentecunapa shunguta cushichijmi’ can nishpa (Sal. 104:15). Shinallatami Jehová Diospa mandashcacunata cazushpaca cushilla causashun (Sal. 19:8). Jehová Diosca chai chimbapuraicunata utilizashpami Bibliapa yachachishcacunata yachajushpa, ñucanchi causaipi pactachishpa causana imamanda ali cashcata intindichin. Shinaca na llullaj shimita randingapaca ¿imacunatata saquipashcanchi? Picha yuyaicunata yachajupashun.

7, 8. a) Bibliapa yachachishcacunata yachajungapaca ¿imamandata tiempota llujchina capanchi? b) Shuj experienciamanda parlapai.

⁷ Tiempo. Bibliata liingapaj, publicaciongunata liingapaj, Bibliapa nishcacunata uyangapaj, estudio personalta charingapaj, tandanajuicunaman ringapaj, prepararingapapashmi maimanda tiempota llujchina capanchi (Efesios 5:15, 16 *, liingui). Bibliapa yachajushcacunataca ¿tucui tucuitachu jaicata intindinchilla? Na, cada unomi diferente capanchi. Shinapash Jehová Diospa ali yachaita, pai imashinapacha cajta, paipa rurashcacunatapash siempremi yachajushpa catishun (Rom. 11:33). Punda llujshishca inglés shimipi La Atalaya revistapica Bibliapa yachachishcacunataca “sisagucunahuanmi” chimbapurarca. Shinallata nircami: “Shujlla sisaguta japinaca ali cajpipash ashtahuan sisaguta japinaca alipachami can. Shinallatami Bibliapa yachachishcacunata ashatalla yachajushpaca na quedanachu can. Ashtahuanmi yachajushpa catina capanchi. Taita Diosca paimanda ashtahuan yachajuchunmi munan” nishpa. Shinaca cashna tapuripashunchi: “¿Jehová Diosmandaca tucui tucuitachu yachani?” nishpa. Para siempre ña causanajushpapash Jehová Diosmandaca siempremi yachajushpa catishun. Cunanmandallatami Bibliapa yachachishcacunata ashtahuan yachajungapaj tiempota alipacha utilizana capanchi. Cunanga Bibliapa yachachishcacunata yachajungapaj munaj shuj jovenmanda yachajupashun.

⁸ Japón llactamanda Mariko * jovenga Nueva York (Estados Unidos) llactapimi estudiangapaj rirca. Paica Japón llactapi religionmanmi rin carca. Shuj paniguca huasin huasin villachijushpami chai jovenman villachirca. Chai jovenga Bibliapa yachachishcacunata gushtaimandami semanapi ishcai viajeta yachachihuai nishpa mañarca. Chai jovenga estudiashpa, huaquin punllacunatalla trabajashpa shaijushca cashpapashmi tandanajuiman ri callarirca. Paica Bibliapa yachachishcacunata ashtahuan yachajungapaj munaimandami shuj cosascunatapash saquirca. Shina ruraimandami chai jovenga espiritualmente ñaupaman catirca. Chaimi nara huata pactajpillata bautizarirca. Sujta quillacuna jipaca, 2006 huatapimi precursora shina sirvi callarirca. Cunangamanmi shina sirvishpa catijun.

9, 10. a) Bibliapa yachachishcacunata yachajunaca ¿imashinata ayudan? b) Shuj jovenga ¿imatata rurarca?

⁹ Ashtahuan charingapaj munaicuna. Bibliapa yachachishcacunata randinamandami  huaquinbica universidadpi estudianata, alipacha trabajota saquina tucunchiman. Cunanga Pedropi, Andrespi pensaripashunchi. Paicunaca pescadocunata japishpami trabajan carca. Chaipimi paicunataca pescadota ‘japinshna gentecunata tandachijcuna’ tucuchun Jesusca invitarca. Chaimi paicunaca chai trabajota saquishpa Jesusta catishpa rirca (Mat. 4:18-20). Shinaca pipash Bibliapa yachachishcacunata yachajushpa trabajota saquina cashcataca na nijunllu. Ashtahuangarin paicunapa familiata mantiningapaca trabajanami can (1 Tim. 5:8). Shinapash Bibliapa yachachishcacunata yachajushpaca charishca cosascunapi ama yapata pensaringapaca tal vez paicunapa causaita, paicunapa yuyaita cambiana can. Jesusca nircami: ‘Na cai pachapi charijyanatallaca’ na mascanachu canguichi. “Ashtahuangarin jahua pachapi charij cangapajmi” mascana canguichi nishpa (Mat. 6:19, 20). Cunanga shuj jovenmanda yachajupashun.

¹⁰ Mariaca uchillamandapachami golf nishcata pugllan carca. Cutin ña colegiopi cajpica alipacha pugllaj cajpimi universidadpi estudiachun shuj becata curca. Chai jovenga golf nishcata pugllashpa rijsishca cangapaj, charij tucungapami munarca. Shinapash universidadta tucuchishca jipaca Bibliamandami yachajui callarirca. Bibliapa yachachishcacunata yachajunami paipa causaipi cambiachun ayudashcata ricushpami ninanda alicachirca. Paica ninmi: “Bibliapa yachachishcacunata ñuca causaipi pactachishpaca ninandami cushijurcani” nishpa. Chaipimi Jehová Diostapash, charishca cosascunatapash ishcandita na sirvi ushashcata cuenta japirca (Mat. 6:24). Paica golf nishca pugllaipi rijsishca rijsishca canata, charij tucunatapashmi saquirca. Cunanbica precursorami can. Chaimandami paica nin, “cunan si, cushillapacha causani” nishpa.

11. Bibliapa yachachishcacunata yachajujpica ¿imata pasanga?

¹¹ Ñucanchi amigocuna, familiacuna. Bibliapa yachachishcacunata ñucanchi causaipi pactachijujpimi ñucanchi amigocuna, familiacunaca tal vez ñana pundashna ñucanchihuan llevaringa. Chaimi Jesusca paipa catijcunamandaca Jehovata cashna mañarca: “Na llullashpa villajuj Shimita catishpa cambajlla causachun, paicunataca charipairi. Cambaj shimica, napacha llullajchu” can nishpa (Juan 17:17). Bibliapa yachachishcacunata pactachijpimi cai mundomanda gentecunaca ñucanchitaca diferente cashcata ricun. Huaquinbica Bibliapa yachachishcacunata pactachijta ricushpami amigocuna, familiacuna tal vez ñana parlangapaj munanga. Shinallata ñucanchi crishcatapash na respetangapaj munangachu. Chaimandami Jesusca cashna nirca: “Fiñajcunaca, quiquin huasi ucu purallatami canga” nishpa (Mat. 10:36). Bibliapa yachachishcacunamanda imata saquishca cajpipash Jehová Diosca ninandami bendicianga (Marcos 10:28-30, liingui).

12. Bibliapa yachachishcacunata yachajujpica ¿imata Aarón huauquihuanga pasarca?

¹² Aarón jarica judiomi carca. Paica huahuamandapachami Taita Diospa shutitaca na nina cashcata yachajurca. Shinapash paica tucui shunguhuanmi Diosmanda yachajungapaj munarca. Shuj punllaca shuj testigo de Jehovami Diospa shutica hebreo shimipica chuscu letracunatami charin nishpa yachachirca. Chai chuscu letracunapi vocalcunata churajpica “Jehová” shutimi llujshin nishpa. Chaita uyashpaca paica ninandami cushijurca. Chaimi paica judiocunata yachachijcunaman cushijushpa villagrirca.  Diospa shutita yachajushcamanda cushijunapa randica paicunaca paitaca tucashpa, llujchishpami saquirca. Shinallata paipa familiapash na cushijurcachu. Shinapash Jehová Diosmanda yachajushpami catirca. Ashtahuangarin bautizarishpami paica tucui shunguhuan Jehovata sirvishpa catirca. Ñucanchicunapash Aarón huauquishnami ima pasajpipash Bibliapa yachachishcacunata yachajushpa catina capanchi.

13, 14. Bibliapa yachachishcacunata yachajushpaca ¿imacunatallata rurapashcanchi? Shuj ejemplomanda parlapai.

¹³ Mapa pensamientocuna, nali ruraicuna. Bibliapa yachachishcacunata ñucanchi causaipi pactachingapaca ñucanchi yuyaita, ñucanchi ruraicunatapashmi cambiana capanchi. Chaimi apóstol Pedroca cashna nirca: “Ali cazuj huahuacuna cashcamandami, Diosta nara rijsimanda, imatapash nalita munashpa punda rurashcashnaca, na ashtahuan rurana canguichi”. ‘Cangunaca tucui causaipi jucha illaj causana canguichi’ nishpa (1 Ped. 1:14, 15). Corinto llactamanda ashtaca gentecunaca nali, mapa cosascunatami rurashpa causarca. Chaimi Corinto llactamanda gentecunaca Jehová Diosta sirvingapaca ashtaca cambiocunata rurana carca (1 Cor. 6:9-11). Cunanbipash Bibliapa yachachishcacunata yachajushpami ashtaca gentecunaca paicunapa nali ruraicunata saquishca. Chai punllacunapi huauquipanicunatapashmi apóstol Pedroca cashna nirca: “Cangunaca, tauca huatacunatami na israelcuna cushijushpa nalita rurashpa causashcashnallata rurashcanguichi. Canguna ima munashcata rurashpa, nalita ruranata munashpa, machashpalla purishpa, amingacaman fiestata rurashpa, ufiashpallami causarcanguichi. Shinallata millanayai, dioscunata mañashpami causarcanguichi” nishpa (1 Ped. 4:3).

¹⁴ Devynn, Jasmine cusahuarmicunapash ashtaca huatacunatami machashpalla causarca. Devynn jarica alipacha contador cashpapash machashpalla purimandami ni shuj trabajopi na parai ushan carca. Jasmine huarmiguca ushashcata culiraj, pitapash yangata macajlla carca. Shuj punllaca machashca rijushpami Testigo misionero cusahuarmicunahuan tuparirca. Paicunami Bibliamanda yachachingapaj shamushun nirca. Shuj semana jipa yachachingapaj rijpica ishcandimi machashcacuna carca. Shina machashcata ricushpaca, misionerocunaca na shamungachu yashcangami. Shinapash Testigocunaca cutinmi visitangapaj rirca. Chaimi chai cusahuarmica Bibliamanda yachajui callarirca. Chai punllamandapachami Bibliapa yachachishcacunataca ishcandillata paicunapa causaipi pactachi callarirca. Nara quimsa quilla pactajpillatami paicunaca ñana ufiashpa, civilpi cazararca. Paicuna cambiashcata ricushpami chai pueblomanda ashtaca gentecunaca Bibliamanda yachajungapaj munarca.

15. Bibliapa yachachishcacunata yachajushpaca ¿imacunatallata saquipashcanchi?

¹⁵ Nali costumbrecuna, Diospa ñaupajpi nali ruraicuna. Bibliapa yachachishcacunata yachajuimandami Taita Diospa ñaupajpi nali ruraicunata, nali costumbrecunata huaquingunaca saqui ushashca. Cutin shujcunapaca yanga costumbrecunata, Taita Diospa ñaupajpi nali ruraicunata saquinaca na fácil cashcachu. ¿Imamandata paicunapaca na fácil cashca? Huaquinbica familiacuna, amigocuna, trabajomanda cumbacuna imacunatapash nijpimi chai costumbrecunata, Taita Diospa ñaupajpi nali ruraicunatapash na saqui  ushashca. Shinallata casi tucui gentecunami pipash familia ucupuramanda huañujpica paita yaringapaj nishpa yanga costumbrecunata catishpa imacunatapash ruran. Chaimandami, chai costumbrecunata saquinaca huaquingunapaca shinlli can (Deut. 14:1). Shinapash punda tiempopi huauquipanicuna Bibliapa yachachishcacunata pactachingapami paicunapa causaipi huaquin cambiocunata rurashca. Paicunamanda yachajunami ñucanchitaca ayudanga. Cunanga, punda tiempopi Éfeso llactapi huauquipanicuna imata rurashcata yachajupashunchi.

16. Éfeso llactamanda huauquipanicunaca ¿imatata rurarca?

¹⁶ Punda tiempopi Éfeso llactapica ashtaca brujocunami tiarca. Shinaca Éfeso llactamanda gentecunaca Jesusta catingapaca ¿imatata rurarca? Bibliapica cashnami nin: “Shinallata taucacunami, yumbu tucungapaj yachajuna librocunata apamushpa, tucuicunapaj ñaupajpi rupachinajurca. Chaicunata cuentata rurajpica, picha chunga huaranga culqui valijtashnami rupachirca”. Chashnami Diospa Shimimanda villajujpi “ashtacacuna crishpa miranajurca” nishpa (Hech. 19:19, 20). Chai huauquipanicunaca chai valishca valishca librocunata rupachishpami saquirca. Shina ruraimandaca ashtaca bendiciongunatami chasquirca.

17. a) Bibliapa yachachishcacunata yachajungapaca ¿imacunatallata rurapashcanchi? b) Cati temapica ¿imatata yachajupashun?

¹⁷ Bibliapa yachachishcacunata yachajungapaca ¿imatata quiquinga rurapashcangui? Tucuicunallatami Bibliapa yachachishcacunata yachajungapaca imatapash rurapashcanchi. Huaquingunaca paicuna charishca cosascunata saquishca. Shinallata familiacunahuan, amigocunahuanbash ñana pundashna llevarin. Shinallata Taita Diospa ñaupajpi nali costumbrecunata, nali ruraicunata, nali yuyaicunatapash saquina tucushca. Masqui chaicunata saquina cashca cajpipash Bibliapa yachachishcacunata yachajunami Jehová Dioshuan alipacha amigo cachun ayudashca. Chaimi pipash Bibliapa yachachishcacunata yangata saquijpica na crita ushapanchi. Shinapash tapurinchipashchari, ¿imamandashi Bibliapa yachachishcacunataca saquishca? Ñucanchicuna ama saquichunga ¿imata ayudanga? nishpa. Caitaca cati temapimi yachajupashun.