1, 2. a) Na yashcapi cambiocuna tiajpica ¿imata pasanman? (Callari fotota ricupangui). b) Salmo 131​pi nishcacunaca ¿imashinata tranquilo sintirichun ayudan?

LLOYD, ALEXANDRA cusahuarmicunaca 25 yali huatacunatami Betelpi sirvinajurca. Shina sirvinajujpimi asignacionda cambiarca. Chaimi paicunaca llaquilla sintirirca. Lloyd huauquica ninmi: “Betelpi causanata, trabajanatapash ninandami alicachin carcani. Imamanda cambiocuna tiajtapash alimi intindircani. Chaita intindishpapash huaquin quillacunatami ñuca rurashcacunatapash na valichishca yashpa pensarin carcani. Chaimi ratotaca llaquilla o cushilla sintirin carcani” nishpa.

² Tal vez ñucanchi causaipi na yashcapi cambiocuna tiajpimi yapata preocuparishpa ninanda llaquirinchi (Prov. 12:25). Shinaca ñucanchi causaipi cambiocuna tiajpi ama yapata preocuparishpa tranquilo cachunga ¿imata ayudanga? (Salmo  131:1, 2 *, 3, liingui). Cunanbi, punda tiempopipash Jehovata sirvijcunaca cambiocuna tiajpipashmi tranquilo sintirishca. Shina tranquilo sintirichunga ¿imata ayudashca?

3. Josehuanga ¿imata pasarca?

³ Joseca Jacobpa juyashca juyashca churimi carca. Chaimi Josepa huauquicunaca José 17 huatacunatalla charijpi paitaca envidiamanda esclavo shina jatushpa cacharca (Gén. 37:2-4, 23-28). Joseca Egipto llactapimi esclavo causarca. Chai jipaca paitaca prezomi churarca. Chaimi 13 huatacunata shina causarca. Paica paipa juyashca taitamandaca caru carupimi carca. Shinaca José ama yapata preocuparichun, ama culira sintirichunga ¿imata paitaca ayudarca?

4. a) José prezo cashpaca ¿imapita pensarin carca? b) Jehová Diosca ¿imashinata Josetaca ayudarca?

⁴ Joseca Egipto llactapimi prezo caimanda sufrijurca. Shinapash Jehová Dios paita imashina cuidajushcatami Joseca pensarishcanga (Gén. 39:21; Sal. 105:17-19). Shinallata joven cashpa muscushcacunapi pensarinami Jehová Diospi ashtahuan confiachun Josetaca ayudarianga (Gén. 37:5-11). Joseca siempremi tucui tucuita Jehová Diosman villan carca (Sal. 145:18). Jehová Diosca Josepa mañashcacunata uyashpami paitaca ayudarca. Chaimi ima pasajpipash Jehová Dios paita ayudanataca Joseca seguro carca (Hech. 7:9, 10). *

5. Casilla ali causaica ¿imashinata ñucanchitaca ayudan?

⁵ Cunanbipash Taita Dios carashca ‘casilla ali causaiguta’ charingapaj esforzarinami, ima llaquicuna ricurijpipash tranquilo sintirichun ayudanga (Filipenses 4:6, 7, liingui). Shinaca llaquicunata charishpa ama yapata preocuparingapaca Jehová Diostami mañana capanchi. Shina rurajpimi casilla ali causaiguta carashpa paita sirvishpa catichun, chai llaquicunata aguantachunbash ayudanga. Cunan punllacunapi huaquin huauquipanicuna paicunapa causai cambiajpi Jehovata sirvishpa catingapaj imata rurashcata ricupashunchi.

6, 7. Jehovata mañanaca ¿imashinata ayudan? Shuj experienciamanda parlapai.

⁶ Ryan, Juliette cusahuarmica precursor especial shinami sirvinajurca. Shinapash ñana precursor especial shina sirvigrinajushcata yachaj chayashpami ninanda llaquirirca. Ryan huauquica ninmi: “Jehová Diospi tucui shunguhuan confiashcatami ricuchina carcanchi. Ashtahuanbash congregacionbi huauquipanicunaca chairalla bautizarishcacunami carca. Chaimi Jehovataca cashna mañarcanchi, canbi tucui shunguhuan cringapaj, huauquipanicunapa shuj ali ejemplo cangapaj ayudahuai” nishpa.

⁷ Jehová Diosca ¿imashinata chai cusahuarmitaca ayudarca? Ryan huauquica ninmi: “Jehová Diosta mañashcandimi na yapata preocuparishpa tranquilo sintirircanchi. Jehová Diosmi ñucanchi yuyaipi, shungupi tranquilo sintirichun ayudarca. Chaimi Jehovata tucui shunguhuan sirvi ushashcatapash cuenta japircanchi” nishpa.

8-10. a) Jehovapa espíritu santoca ¿imashinata ama yapata preocuparichun ayudan? b) Jehovata sirvingapaj esforzarijpica ¿imashinata paica ayudan?

 ⁸ Jehová Diosca paipa espíritu santohuanmi Bibliapa huaquin textocunata yarichun ayudan. Chai textocunami Jehovata sirvina ashtahuan importante cajta intindichun ayudan (Juan 14:26, 27, liingui). Chaipaca Philip, Mary cusahuarmihuan ima tucushcata ricupashunchi. Paicunaca casi 25 huatacunatami Betelpi sirvirca. Tiempo jipaca ishcandipa mamami huañurca. Chai tiempopillatami Philip huauquipa shuj familiapash huañurca. Shinallata Mary panigupa taitaca demencia nishca ungüitami charirca. Chaimi cuidana tucurca.

⁹ Philip huauquica ninmi: “Shuj punllaca Villajun revistata liijurcani. Chaipimi Colosenses 1:11​ta liishpa na ñapash fiñarishpa cushilla, aguantana cashcatami cuenta japircani. Chaimi ñucapa causaipi ima pasajpipash Jehová Diospa espíritu santo ayudajushcatami intindircani” nishpa.

¹⁰ Philip, Mary cusahuarmica Jehovata sirvishpa catingapami ninanda esforzarirca. Shina rurajpimi Jehová Diosca paicunata ashtacata bendiciarca. Paicunaca Betelmanda llujshishpaca Bibliamanda yachajungapaj munaj gentecunatami tarirca. Chai gentecunaca semanapi ishcai o ashtahuan viajemi yachajungapaj munarca. Shinami Bibliamanda yachajujcunaca espiritualmente ñaupaman catirca. Chaita yarishpami Mary paniguca nin: “Shinami Jehová Diosca ñucanchita ayudarca. Shina rurashcata yachashpaca ninandami cushijunchi. Chaimi Jehová Dios tucuipi cuidanata cuenta japircanchi” nishpa.

11, 12. a) Joseca ¿imatata rurarca? b) Josetaca ¿imashinata Jehová Diosca ayudarca?

¹¹ Na yashcapi cambiocuna tiajpimi ñucanchi problemacunapilla yapata pensarishpa imata ruranatapash na atinanchi. Por ejemplo, Joseca paipa problemacunapi yapata preocuparijunapa randica, alita rurangapami esforzarirca. Chaimi Potifarpa huasipi cashpa, carcelpi cashpapash Joseca ali trabajarca (Gén. 39:21-23).

¹² Faraonba huasipi sirvij ishcai jaricunatami carcelpi churarca. Chaimi paicunata cuidachun Josetaca mandarca. Joseca paicunataca ali alimi tratarca. Chai jaricunaca paicunapa problemacunamanda, paicunapa muscushcamandapashmi Josemanga tucui tucuita parlarca (Gén. 40:5-8).  Chai jipaca ¿imata pasarca? Chai jaricunahuan parlashcamandaca ishcai huatami yalirca. Chai tiempopimi carcelmanda llujshishca jipalla Faraonga Joseta paipa cati mandaj cachun churarca (Gén. 41:1, 14-16, 39-41).

13. Problemacunata charishpapash Jehová Dios bendiciachunga ¿imatata rurana capanchi?

¹³ José shinami ñucanchicunapash problemacunata charishpaca chai problemacunata ñucanchillata arreglaitaca na ushanchichu. Shinapash pacienciahuan imagutapash ali rurangapaj esforzarijpica Jehová Diosllatami bendicianga (Sal. 37:5). Huaquinbica problemacunata charishpaca imata ruraitapash na atinaj shinami sintirinchi. Shinapash Bibliapica ninmi: ‘Jatun llaquicuna japijpipash na musparishpami causana’ canguichi nishpa (2 Cor. 4:8). Shinaca Jehovamanda villachinapi ocupado cashpaca, problemacunata charishpapash na yapata preocuparishunllu.

14-16. Felipeca paipa causaipi cambiocuna tiajpipash ¿imatata rurashpa catirca?

¹⁴ Taita Diosmanda villachij Felipe runagumanda ricupashunchi. Felipeca paipa causaipi cambiocuna tiajpipashmi Jehová Diosmanda villachishpa catirca. Shinallata Felipeca Jerusalén llactamanda congregacionbimi shuj mushuj responsabilidadta charirca (Hech. 6:1-6). Shinapash Esteban runaguta huañuchishca jipami, Jerusalén llactapica Jesusta catijcunataca llaquichi callarirca. Chaimi paicunaca shuj llactacunapi pacajungapaj rirca. Shinapash Felipe runaguca Samaria llactapi Taita Diosmanda villachingapami rirca. Chai llactapi gentecunaca Taita Diosmandami uyangapaj munanajurca (Mat. 10:5; Hech. 8:1, 5).

¹⁵ Felipeca Diospa espíritu santo ayudachunmi saquirca. Chaimi Jehová Diosca na villachishca llactacunapi villachichun Felipetaca cacharca. Chai punllacunapica judiocunaca samaritano gentecunataca na ricunayachishpami nali tratan carca. Shinapash Felipeca samaritano gentecunataca ali tratarca. Chaimi “tucuicuna tandanajushpa aliguta uyanajurca” (Hech. 8:6-8).

¹⁶ Jehovapa espíritu santo ayudajpimi Asdod, Cesarea llactacunapi na judío  gentecunaman Felipeca villachirca (Hech. 8:39, 40). Samaria llactapi casi 20 huatacunata villachishca jipami Felipe runagupa causaica cambiarca. Paica Cesarea llactapimi paipa familiandi causajurca. Chaipimi Taita Diosmandapash villachijurca. Felipeca paipa causaipi cambiocuna tiajpipashmi villachishpa catirca. Shina rurajpimi paitapash, paipa familiatapash Jehová Diosca ashtacata bendiciarca (Hech. 21:8, 9).

17, 18. Ñucanchi causaipi cambiocuna tiajpipash villachinapi ocupado canaca ¿imashinata ayudan?

¹⁷ Tiempo completopi sirvij huauquipanicunataca villachinapi ocupado canami paicunapa causaipi cambiocuna tiajpipash ñaupaman catichun ayudashca. Sudáfrica llactamanda Osborne, Polite cusahuarmimanda yachajupashunchi. Paicunaca pensarcami, Betelmanda llujshishpaca huaquin punllacunatalla trabajanata, maipi causanagutapash tarishunllami yashpa. Shinapash ¿imata pasarca? Osborne huauquica ninmi: “Trabajotaca na ucha tarircanchichu” nishpa. Shinallata Polite paniguca ninmi: “Quimsa quillacunatami trabajopash, culquigupash illaj carcanchi. Chaica na fácil carcachu” nishpa.

¹⁸ Paicunataca ¿imata ayudarca? Osborne huauquica ninmi: “Congregacionmanda huauquipanicunahuan villachinami ama yapata preocuparichun, Jehovapa munaita pundapi churachun ayudarca. Shina ruranami ñucanchitaca cushilla sintirichunbash ayudarca. Trabajotaca tucui ladocunapimi mascarcanchi. Chai jipami ansicarin trabajotaca tarircanchi” nishpa.

19-21. a) Ama yapata preocuparichunga ¿imata ñucanchitaca ayudanga? b) Ñucanchi causaipi cambiocunata charinaca ¿imashinata ayudan?

¹⁹ Imashinami ricupanchi, problemacunata charishpapash imatapash aliguta rurangapaj, Jehová Diospi confiangapami esforzarina capanchi. Shina rurashpaca tranquilomi sintiripashun (Miqueas 7:7,  liingui). Shinallata ñucanchi causaipi imapash cambiocunami espiritualmente ñaupaman catichun ayudan. Polite paniguca ninmi: “Mushuj asignaciongunata chasquinami Jehová Diospi ashtahuan confiachun ayudahuashca. Shinallata Jehová Dioshuan ashtahuan ali cachunmi ayudahuashca” nishpa.

²⁰ Párrafo 8​pi parlashca Mary paniguca paipa taitataca cunangamanmi cuidashpa catijun. Shinallata precursora shinami paica sirvijun. Paica ninmi: “Imamandapash yapata preocuparijushpaca Jehovata mañashpa, tranquilo sintiringapami esforzarini. Cunanga Jehová Dios ayudanatami tucui shunguhuan confiani. Chaica jipa punllacunapipashmi ayudahuanga” nishpa.

²¹ Párrafo 1​pi parlashca Lloyd, Alexandra cusahuarmica paicunapa causaipi cambiocuna tiajpi shinlli feta charina minishtirishcatami cuenta japirca. Paicunaca ninmi: “Ñucanchi causaipi imapash cambiocuna tiajpimi llaquicunata aguantangapaj shinlli feta charishcata o na charishcatami cuenta japinchi. Cunanbica ashtahuan ali ali gentecunami capanchi” nishpa.

22. Ñucanchi causaipi cambiocuna tiajpica ¿imapita confiana capanchi?

²² Na yashcapimi ñucanchi causaipica imapash cambiocuna tiai ushan. Tal vez shuj mushuj asignacionda chasquijpi, imapash ungüi japijpi o familiata cuidana tucujpimi ñucanchi causaica cambiai ushan. Shinapash Jehová Dios ñucanchita ayudanapimi confiana capanchi. Paica ñucanchita imashina ayudanataca alimi yachan (Heb. 4:16; 1 Ped. 5:6, 7). Shinaca ñucanchi causaipi cambiocuna tiajpi alita rurangapami esforzarina capanchi. Jehová Diosta mañashpa, paihuan ashtahuan ali cangapaj esforzaripashunchi. Shinallata Jehová Dios ñucanchita cuidachun saquipashunchi. Shina rurashpaca ñucanchi causaipi cambiocuna tiajpipash tranquilo alimi sintirishun.