JEHOVATA SIRVIJCUNAPA CAUSAI
Jehová Diosmi bendiciahuashca
Huata 1939mi carca. Chaupi tutami Estados Unidos llactapa Joplin uchilla puebloguman shuj horas yalita carropi rircanchi. Chaiman chayashpaca upalla yaicushpami cada huasi pungupi tratadocunata saquina carcanchi. Ña tucui huasicunapi tratadocunata saquishca jipallami carropi rishpa chaishuj huauquipanicunahuan tuparin carcanchi. Shinapash ¿imamandata shina villachinajurcanchi? ¿Imamandata chaimanda uchalla rina carcanchi? Chaitaca jipamanmi parlapasha.
HUATA 1934pimi nacirircani. Ñuca taitaca Fred, ñuca mamaca Edna shutimi carca. Paicunaca 20 huatacunatami testigo de Jehovacuna carca. Jehovata juyachun ayudashcamandaca paicunataca ninandami agradicini. Kansas llactamanda Parsons pueblogupimi causarcanchi. Ñucanchi congregacionbica casi tucuicunami ungidocuna carca. Tandanajuicunamanbash, villachinamanbash na faltanllu carcanchi. Casi tucui sábado chishicunami ñangunapi villachingapaj llujshin carcanchi. Shina villachinataca cunanbica predicación pública ninmi. Villachishca jipami ñuca taitaca heladosta caran carca.
Ñucanchi congregacionga ashtaca pueblocunapi, haciendacunapipashmi villachin carcanchi. Haciendacunamanda gentecunaca publicaciongunata chasquishpaca chairalla cosechashca verduracunata, atalpa lulunda, causaj atalpacunatapashmi cun carca. Ñucanchica culqui faltallami causarcanchi. Chaimi chai cushca cosascunataca ñucanchi micun carcanchi. Shinapash ñuca taitaca publicaciongunata chasquishpaca contribuciongunatami cun carca.
VILLACHINGAPAJ CAMPAÑACUNA
Ñuca taitamamaca gramófono nishcahuanmi villachin carca. Ñucaca uchilla caimandami gramófono nishcata na utilizan carcani. Shinapash ñuca taitamama Bibliamanda yachachingapaj o cutin visitangapaj rijpimi, Rutherford huauquipa grabashca discursocunata churashpa ayudan carcani.
Ñucanchi carro ladopimi ñuca taitamamacunahuan cani.
Ñuca taitaca ñucanchi carropimi shuj jatun parlanteta churarca. Shinami ashtahuan villachita usharcanchi. Gentecuna uyachunmi pundapica musicata churan carcanchi. Chai jipami shuj grabashca discursota uyachin carcanchi. Chai grabashca discurso tucurishca jipami Bibliamanda yachajungapaj munaj gentecunaman publicaciongunata cun carcanchi.
Kansas llactamanda Cherryvale pueblogupica ashtaca gentecunami Domingotaca parqueman rin carca. Chai parquepi grabashca discursocunata uyachichunga policiaca na saquircachu. Chaimi cashna nirca, cai parquepica na uyachinachu cangui nishpa. Shina nijpimi ñuca taitaca carrota parque ladopi shayachishpa cutin grabashca discursota churarca.
Ñuca taitahuan, ñuca Jerry huauquihuan shina villachishpaca cushillami yalin carcani.Nara 1940 huata chayajpillatami shuj campaña especialpi villachishpa apoyarcanchi. Chaimi villachichun na saquij pueblocunapi villachina carcanchi. Imashina callaripi niparcani, chaupi tutami chai pueblocunaman rishpa tratadocunata o folletocunata huasi pungucunapi upalla saquin carcanchi. Chai jipaca huauquipanicunata prezu apashcata o na apashcata yachangapami tucuilla tandanajun carcanchi.
Chai huatacunapica cartelcunahuanmi ñangunapi purishpa Diospa Reinomanda villachin carcanchi. Ñuca causajuj pueblopipashmi shinallata huauquipanicunaca villachirca. “Religiongunaca shuj trampashnami can. Llullacunahuanmi pandachin” nijuj letrerocunahuanmi huauquipanicunaca ñangunapi villachirca. Ñucanchi huasimandaca shuj kilómetro yalitami rirca. Shina villachichunga nipi na jarcarcachu. Ashtahuangarin chai gentecunaca ashtahuan yachangapami munarca.
JATUN TANDANAJUICUNA
Jatun tandanajuicunaman ringapaca Kansas llactamanda Texas llactamanmi rin carcanchi. Ñuca taitaca trenbimi trabajan carca. Chaimi jatun tandanajuicunaman ringapaj, familiata visitangapaca gratis rin carcanchi. Ñuca mamapa rucu turica Fred Wismar shutimi carca. Paica paipa Eulalie huarmiguhuanmi Texas llactapa Temple pueblogupi causarca. Ñuca tío Fred Wismarca joven cashpallatami 1900 huata jipa Bibliamanda yachajushpa bautizarishcarca. Paimi paipa panicunaman, ñuca mamamanbash Bibliamanda parlashcarca. Ñuca tioca superintendente de circuito shinami Texas llactapi sirvijurca. Chai llactamanda huauquipanicunaca paitaca alimi rijsin carca. Paica ali ali, cushi cushi cajpimi paihuanga cushilla yalin carcanchi. Ñuca tioca villachinatami ninanda gushtan carca. Paipa ejemplomi ñuca joven cajpica ninanda ayudahuarca.
1941 huatapica Misuri llactamanda San Luis pueblopi shuj jatun tandanajuimanmi trenbi rircanchi. Chai jatun tandanajuipica Rutherford huauquipa shuj discursota uyachunmi tucui jovengunata, huahuacunataca shuj pushtupi tiarichun mandarca. Chai discursoca “Hijos del Rey” nishca temami carca. Chai discursotaca 15 mil yalicunami uyarcanchi. Chai discurso tucurishca jipaca Rutherford huauquipash paita ayudaj huauquicunapash Hijos nishca librotami tucuicunaman cararca.
1943 huatapi abril quillapica Coffeyville llactapimi shuj jatun tandanajuita charircanchi. Chai jatun tandanajuipa temaca “Llamada a la Acción” nishcami carca. Chaipimi Bibliamanda Yachachingapaj Escuela tianga nishpa villarca. Shinallata chai escuelapi yachajungapami 52 lecciongunata charij folletota ricuchirca. Chai huatallatami ñucaca chai escuelapi primer discursota curcani. Chai jatun tandanajuipimi ñucapash, shujcunapash chiri chiri tanque yacupi bautizarircanchi. Chai punllaca ñucapaca shuj alipacha punllami carca.
BETELPI SIRVINGAPAJ MUNARCANI
1951 huatapimi colegiota tucuchircani. Chaimi ñuca causaipi imata ruranata decidina carcani. Ñucaca Betelpi sirvingapami munarcani. Ñuca huauqui Jerryca chaipimi sirvishcarca. Chaimi Brooklyn llactapa Betelmanmi shuj solicitudta cacharcani. Asha tiempo jipami 10 de marzo de 1952 huatapi Betelpi sirvichun invitahuarca. Chaita ruranami espiritualmente ñaupaman catichun ayudahuarca.
Revistacunata, shuj publicaciongunata imprimishpami trabajangapaj munarcani. Shinapash mesero shinami ayudarcani. Chai jipaca cocinapi trabajachunmi cachahuarca. Chaipi trabajanataca ninandami gushtarcani. Ashtaca cosascunatami yachajurcani. Shinallata cocinapi tuta trabajaimandami punllapica Betelpa bibliotecapi estudiangapaj tiempota charircani. Shina estudianami Jehovahuan ashtahuan ali amigo cachun, shinlli feta charichun, Betelpi tucui shunguhuan sirvichun ayudahuarca. Ñuca huauqui Jerryca 1949 huatapimi Betelmanda llujshirca. Paica Patricia paniguhuanmi cazararca. Paicunaca Brooklyn llacta ladollapi causashpa catirca. Chaimi paicunaca ninanda ayudahuarca.
Betelman chayashca jipami alipacha discursota cuj huauquicunata Betelmanda huauquicunaca agllanajurca. Chai agllashca huauquicunatami Brooklyn llactamanda 322 kilometrocunapi tiaj congregaciongunapi discursocunata cuchun cachan carca. Chai huauquicunaca huatapi huaquin viajetami discursocunata cungapaj rina carca. Paicunaca shuj horaspimi discursota cun carca. Shinallata congregacionhuan
villachingapaj llujshin carca. Ñucatapash shina richunmi agllahuarca. Primera vez congregaciongunapi discursota cungapaj rishpaca ninandami manllarcani. Casi siempremi trenbi rin carcani. 1954 huatapi domingo punlla ima tucushcataca na cunganichu. Nueva York llactamanmi trenbi tigrajurcani. Betelmanga tutayajujpi chayasha yarcanimi. Shinapash ushashcata huairashpa, razo urmajpimi trenba motorcunaca huaglirca. Chaimi tren shayari pushtumanga lunes las cinco de la mañanata chayarcani. Chai jipami Brooklyn llactaman rij trenda japircani. Shinapash Betelman jipayashca chayarcani. Tuta entero na puñushpa pacarishcamanda shaijushca cashpapashmi cocinapi trabajangapaj rircani. Shina pasajpipash shuj huauquipanicunata sirvina, rijsinaca shuj jatun bendicionmi cashca.WBBR radiopi llujshingapami prepararinajunchi.
Betelpi sirvi callarijujpimi WBBR radiopi ayudachun cachahuarca. Chai tiempopica chai radioca 124 Columbia Heights callepi tiaj edificiopa segundo pisopimi carca. Cada semanapa programapimi huauquipanicunaca Bibliata yachajun carca. Ñucapashmi chai huauquipanicunapurapi carcani. Chai radiopa programacunapica A. H. Macmillan huauquipashmi llujshin carca. Chai huauquitami Mac nishpapash nin carcanchi. Paica ashtaca huatacunata Betelpi sirvimandami chairalla Betelman shamujcunapaca shuj alipacha ejemplo carca.
WBBR radiopa programa hoja.
1958 huatapimi Galaad Escuelapi ayudachun cachahuarca. Chaipica mushuj misionerocunapa visata llujchishpa, paicuna shuj llactacunaman richunmi ayudan carcani. Chai tiempopica avionbi rinaca valishcami carca. Chaimi huaquin graduarishca misionerocunalla avionbi rin carca. Shinallata shuj misionerocunaca África, Asia llactacunamanga barcopimi rin carca. Shinapash avionbi rina baratoyajpimi misionerocunaca avionbi ri usharca.
Galaad Escuelapi graduarishca huauquipanicunapa diplomacunatami cartacunapi churajuni.
JATUN TANDANAJUICUNAMAN RINA VIAJECUNA
1960 huatapica ashtahuan ruraicunatami charircani. 1961 huatapi Europa llactapimi asamblea internacionalcunaca tiagrijurca. Chaimi Estados Unidos llactamanda Europa llactacunaman richun aviongunata alquilan carcani. Ñucapashmi Nueva York llactamanda Hamburgo llactacamanga alquilashca avionbi rircani. Chai jatun tandanajui jipami ñucapash, shuj quimsa betelitacunapash shuj carrota alquilashpa Italia llactaman rircanchi. Chaipimi Roma llactapi Betelta rijsingapaj rircanchi. Chai jipaca Francia llactamanmi rircanchi. Jipamanga Pirineos nishca urcucuna ladota yalishpami España llactaman chayarcanchi. Chai llactapi gobiernocunaca villachichunga na saquinllu carca. Chaimi Barcelona llactamanda huauquipanicunamanga pacallami huaquin publicaciongunata curcanchi. Chai huauquipanicunata rijsishpaca ninandami cushijurcanchi. España llactamandaca Ámsterdam llactamanmi rircanchi. Chai jipami avionbi Nueva York llactaman tigrarcanchi.
Casi shuj huata jipaca 583 huauquipanicuna asamblea internacionalcunaman richunmi cutin ayudarcani. Huata 1963pimi chai asambleacunaca mundo enteropi tiarca. Chai asambleapa temaca “Buenas Nuevas Eternas” nishcami carca. Chai asambleaca Pacífico sur, Europa, Asia, Hawái, California llactacunapimi tiarca. Shinallata chai asambleacunaman rishpaca Bibliapi parlashca pushtucunata rijsingapami Líbano, Jordania llactacunaman rin carca. Avionbi ringapaj asientocunata, hotelpi cuartocunatapashmi separashpa saquina carcanchi. Shinallata
huauquipanicunapa visacunata llujchishpapashmi ayudana carcanchi.CUNANGA CAZARARCANI
Huata 1963ca alipacha huatami carca. Chai huatami Misuri llactamanda Lila Rogers panihuanmi 29 de juniota cazararcani. Paica ñami quimsa huatacunata Betelpi sirvijushcarca. Cazarashcamanda shuj semanahuanllami Grecia, Egipto, Líbano llactacunaman rircanchi. Chaimanga shuj huauquipanicunahuan tandanajushpami rircanchi. Beirut llactamanda Jordania llactapi tiaj shuj uchilla aeropuertomanmi rircanchi. Chai llactapica villachichun, tandanajuchunbash na saquinllu carca. Chai llactapica Testigocunamanga visacunataca na cunllu carca. Chaimi chaiman chayashpaca imashi tucushun nishpa pensarircanchi. Shinapash aeropuertoman chayajpica chai llactamanda huauquipanicunaca “testigo de Jehovacuna ali shamushca capaichi” nishca cartelhuanmi shuyanajushcarca. Chaita ricushpaca ninandami cushijurcanchi. Shinallata Abrahán, Isaac, Jacob causashca pushtucunata rijsinaca alipachami carca. Chai pushtucunapimi Jesuspash, apostolcunapash villachirca. Chaipimi Jesusta ali catij punda congregacionbash tiai callarirca. Chai punllamandapachami “tucui cai pachapi” Jesusta ali catijcunaca mirashca (Hech. 13:47).
55 huatacunatami ñuca huarmiguhuanga Jehovata sirvinajushcanchi. España, Portugal llactamanda huauquipanicunataca tauca viajetami visitarcanchi. Chai llactacunapi autoridadcunaca villachichun, tandanajuchunbash na saquinllu carca. Chai llactacunamanda huauquipanicunataca publicaciongunata, minishtishca cosascunata cushpami ayudarcanchi. España llactamanda Cádiz llactapi prezo huaquin huauquicunatapash visitangapami rircanchi. Paicunaman Bibliamanda shuj discursota cushpa ayudashcamandaca ninandami cushijuni.
1969pimi jatun tandanajuiman Jerry, Patricia Molohan cusahuarmihuan rinajunchi.
1963 huatamandapachami cunangaman África, América Central, América del Sur, Australia, Europa, Hawái, Asia, Nueva Zelanda, Puerto Rico llactacunapi tiaj asamblea internacionalcunaman huauquipanicuna ri ushachunmi ayudashcani. Ñuca huarmiguhuanga ashtaca alipacha Jatun tandanajuicunamanmi ri ushashcanchi. Por ejemplo 1989 huatapica Polonia llactamanda Varsovia llactapi shuj jatun tandanajuimanmi rircanchi. Chai jatun tandanajuimanga Rusia llactamanda ashtaca huauquipanicunami rirca. Paicunaca primera vezmi shuj jatun tandanajuita charinajurca. Huaquin huauquipanicunaca ashtaca huatacunatami Unión Soviética nishca carcelcunapi prezo cashcarca.
Mundo enteropi shuj shuj llactacunapa Betelpi sirvij huauquipanicunata visitanaca shuj jatun privilegiomi cashca. Shinallata shuj shuj llactacunamanda misionerocunata visitashpaca cushillami sintirishcanchi. Último viajeta huauquipanicunata shina visitajushpaca Corea del Sur llactamanmi rircanchi. Chaipica Suwon pueblopi prezo caj 50 huauquicunatami rijsircanchi. Shina carcelpi cashpapash paicunaca cushillami carca. Paicunaca carcelmanda llujshishpa, Jehová Diosta ashtahuan sirvingapami munarca. Paicunata rijsinami ninanda ñucanchicunataca ayudarca (Rom. 1:11, 12).
JEHOVATA SIRVIJCUNA MIRAJUJPIMI CUSHIJUNI
Cai tucui huatacunapimi Jehovapa ayudahuan paita sirvijcuna ashtahuan mirajta ricushcani. Ñuca
bautizarishca 1943 huatapica casi 100 mil publicadorcunallami carcanchi. Cunanga 240 llactacunapimi 8 millón yali gentecuna Jehovata sirvinajunchi. Galaad escuelapi graduarishca misionerocunami Jehovapa llacta mirashpa catichun ayudanajushca. Chai misionero huauquipanicuna villachichun cachashca llactacunaman chayai ushachunmi ayudashcani. Ashtaca huatacunata shina ayudai ushashcamandaca ninandami cushijuni.Joven cai horasmandapacha Jehovata sirvishcamanda, Betelpi sirvingapaj solicitudta jundachishcamandaca ninandami cushijun. Cai tucui huatacunatami Jehová Diosca ninanda bendiciahuashca. Betelpica ali experienciacunatami charishcanchi. Ñuca huarmiguhuanga Brooklyn llactamanda huaquin congregaciongunapi tauca huatacunatami cushilla sirvishcanchi. Chaipica ashtaca ali amigocunatami tarishcanchi.
Ñuca huarmigundimi Betelpi sirvishpa catinajunchi. Ñuca huarmiguca ninandami ayudahuashca. 84 huatacuna yalita charishpapash Betelpi cartacunata cachashpa, alichishpami ayudani.
Ñuca huarmiguhuan
Jehovapa organizacionbi canaca shuj jatun bendicionmi cashca. Shinallata Malaquías 3:18pa shimicuna pactarijushcatami ricui ushashcani. Chai textopica ninmi: “Ñucapajman tigrarishpami, imatapash cashcatapacha ruranahuan, nalita ruranahuanga shican cajta, shinallata Taita Diosta servishpa causanahuan, na servishpa causanahuambash shican cajta yachanguichi” nishpa. Cai nali mundopi llaquicuna ashtahuan mirajujpimi ali causaica nunca na tiangachu nishpa gentecunaca llaquilla causan. Shinapash ñucanchicunaca shamuj punllacunapi ali causai tianata yachashpami llaquicunata charishpapash cushilla causanchi. Diospa Reinomanda villachinaca shuj jatun bendicionmi can (Mat. 24:14). Ñallami Diospa Reino cai nali mundota tucuchishpa, paraíso alpaguta apamunga. Chai punlla ucha chayamuchunmi munapanchi. Paraíso alpagupica Jehovata ali sirvijcunaca sano, cushillami para siempre causashun.