1, 2. Diabloca ¿imashinata gentecunataca llaquichirca?

TELEFONOTA, focota, carrota, refrigeradorata, shuj cosascunatapashmi gentecunaca rurashca. Chaicunami ñucanchi ali causachun ayudashca. Cutin bombacunata, polvorata, tabacocunata, bomba atómica nishcacunata rurashcamandami nali causanchi. Chaicunamanda ashtahuan yalica ¿imata gentecunataca ashtahuan llaquichishca? Llullashpa parlana. Llullana nishpaca, imapash na cierto cajpita umachingapaj parlanatami nisha nin. Shinaca ¿pita pundapica llullata nirca? Diablomi pundapica llullata nirca. Chaimi Jesusca cashna nirca: Diabloca “llullapacha cashpami, llullapaj taita” can nishpa (Juan 8:44, liingui). ¿Ima horata Diabloca llullai callarirca?

² Ashtaca huatacuna huashamanmi Diabloca jardín de Edenbi llullai callarirca. Shinapash Jehová Diosmi paraisopi cushilla causachun Adanda, Evatapash churarca. Paicunataca Jehová Diosca cashnami mandarca: “Alita, nalita yachaita cuj yurapi fucushcataca” ama micunguichichu nishpa. Chai mandashcata na cazushpaca huañunami carca. Chaitaca Diabloca alimi yacharca. Chaimi Diabloca shuj culebrata utilizashpa Evataca cashna nirca:  “Na huañunguichica. Chai yuramanda ima punlla micushpapash, cangunapaj ñavi pascarijpimi, Taita Dios yachanshnallata alita, nalitapash yachanguichi. Chaitaca, Taita Diospash yachanmi” nishpa. Chaipimi Diabloca primera vez llullarca (Gén. 2:15-17; 3:1-5).

3. a) ¿Imamandata Diabloca millai can nipanchi? b) Diablo llullashcamandaca ¿imata pasarca?

³ Adanbash, Evapash Diablota crishpami chai yuramanda micurca. Chaita crishpa huañuna cashcataca Diabloca alimi yacharca. Shina yachashca jahuapashmi Diabloca millai caimanda Adandapash, Evatapash umachirca. Paicunaca Diablopa nishcata crishpami Jehovata na cazushpa tiempohuanga huañurca (Gén. 3:6; 5:5). Ashtahuangarin, “Taita Dios mandashcata na cazushpami” Adanga juchata rurarca. Chai juchamandami ‘huañuipash tucuicunaman yalirca’ (Rom. 5:12, 14). Shinapash Jehová Diosca gentecuna jucha illaj para siempre causachunmi munarca. Shina cajpipash cunan punllapica “ñucanchi causana punllacunaca, canchis chunga huatacamanllami. Ashtahuangarin ninan shinllicunallami, pusaj chunga huatata” causan. Shina “ninan shinlli cashpapash, llaquita apashpa, llaquinayaita causangapajllami” causan (Sal. 90:10). Chaica shuj llaquimi can. Diablo llullaimandami shina causanajupanchi.

4. a) ¿Ima tapuicunatata yachajupashun? b) Salmo 15:1, 2​pi nishcashnaca ¿picunallata Diospa amigocuna caita ushan?

⁴ Jesusca Diablomandaca cashnami nirca: “Llullashpalla causajmi. Paipica, llullanallami tian” nishpa. Diabloca cunangamanmi ‘tucui cai pachapi causajcunata umachijun’ (Apoc. 12:9). Shinapash Diablopa trampacunapi ama urmangapaca ¿imatata rurana capanchi? Chaipaca cai quimsa tapuicunatami yachajupashun: Diabloca ¿imashinata gentecunataca umachin? Gentecunaca ¿imamandata llullacunata nin? Ñucanchicunaca Adanshna, Evashnaca na cangapaj munapanchichu. Paicunaca Jehová Dioshuan amigo canatami saquirca. Shinaca Jehová Dioshuan amigo cashpa catingapaca ¿imamandata na llullana capanchi? (Salmo 15:1, 2, liingui).

5. Diabloca ¿imashinata gentecunataca umachijun?

⁵ ‘Ñucanchicuna nalita rurachunbash’ Diablo ‘ninanda yarichijujtaca’ alimi yachapanchi. Shinaca Diablopa trampacunapi ama urmangapaca tucuicunallatami esforzarina capanchi (2 Cor. 2:11). Diabloca cai alpata, panda religiongunata, llulla gobiernocunata, jatushpa randishpa causaj gentecunatapashmi mandajun. Chaitaca alimi yachapanchi (1 Juan 5:19). Shinallata autoridadta charij gentecunapash llullacunata nichunmi Diabloca pandachijun (1 Tim. 4:1, 2). Huaquingunaca imatapash jatungapallami llullacunata nishpa propagandacunata rurashca. Culquimandallami yangata umachishpa imatapash jatushca.

6, 7. a) Panda religiongunaca ¿imatata gentecunamanga yachachishca? b) Quiquinga, paicunamandaca ¿ima llullacunatata uyapashcangui?

⁶ Panda religiongunata ñaupaman pushajcunaca llullacunata nishpami gentecunataca yachachishca. Chaica nalipachami can. ¿Imamandata shina nipanchi? Chai llullacunata crishpa, Taita Dios na ricunayachishca cosascunata rurashpaca chai gentecunaca tal vez para siempre causaitapash na ushangachu (Os. 4:9). Jesús cai alpapi cashpaca, chai punllacunapi religionda ñaupaman pushajcuna llullacunahuan gentecunata umachishpa causajtami ricurca. Paicunataca Jesusca cashnami nirca: “Mandashca shimita yachachijcuna, fariseocuna, ¡aij imachari tucunguichi! Cangunaca mishqui shimi, jayaj  shungucunami canguichi. Canguna yachachishcata shujllapash catichunmi, mama cuchatapash, alpatapash rinajunguichi. Canguna yachachishcata ña catijpica” cangunatapash ashtahuan yali Gehenapi [para siempre tucuchi tucuchunmi] tigrachinguichi nishpa (Mat. 23:15). Paicunataca Jesusca caitapashmi nirca: “Cangunaca, cangunapaj taita Diablopajmi canguichi. Paica, callarimandapacha huañuchijmi” can nishpa (Juan 8:44).

⁷ Cunanbica panda religiongunata ñaupaman pushajcunataca pastorcuna, curacuna, rabino nishpapashmi paicunataca rijsin. Paicunaca, fariseocuna cuendami Diospa Shimimanda cabalta yachachinapa randica “llullatara” yachachin (Rom. 1:18, 25). Panda religiongunaca yachachinmi jaricuna huarmihuanshna puñuna, jaripura o huarmipurallata cazaranapash Diospa ñaupajpica alimi can nishpa. Shinallata na huañuj almatami charinchi, infiernopash tian nishpami yachachin.

8. a) Gobiernocunaca ¿imatata ñalla llullashpa ninga? b) Ñucanchicunaca ¿imatata rurana capanchi?

⁸ Gobiernocunapashmi llullacunata nishpa gentecunata umachishca. Paicunaca llullashpami ñalla cashna ninga “casilla aliguta, imatapash na manllashpami causanajunchi” nishpa. Paicunaca cai nali mundopi causai ali cashcatashna crichingapami gentecunamanga munan. Shina ninajushpapash paicunaca ‘ñapashmi’ tucuchi tucunga. Gobiernocunapa llullacunataca ñucanchica nimamanda na crinachu capanchi. Shinallata ‘tuta shuhua shamunshna, [“Jehovapa punlla”, NM ] chayamunataca alimi yachapanchi (1 Tes. 5:1-4).

9, 10. a) Gentecunaca ¿imamandata llullacunata nin? b) Llullacunata nishcamandaca ¿imata tucushca? c) Bibliapica ¿imatata Jehovamandaca nin?

⁹ Cunanbica autoridadta charijcunallaca na llullanllu. Casi tucui gentecunami llullanata gushtan. Chaimi National Geographic revistapa “Por qué mentimos” nishca temapica cashna nin: ‘Tucuilla gentecunami llullacunata nin’ nishpa. Chaipillatami cashna nin: “Gentecunaca imapipash pandarishpa o imapash nalicunata rurashpami shujcuna ama yachachun llullacunata nin. Shinallata gentecunaca paicunapilla pensarimandami ashtahuan culquita ganangapaj munaimanda o shuj ali trabajota tarinamanda llullacunata nin. Ashtahuanbash gentecunaca na rijsishcacunaman, trabajopi cumbacunaman, amigocunaman o familiacunamanbash llullacunata ninllami” nishpa.

¹⁰ Llullacunatalla parlajpica pipash ñana cringachu. Ali amigo caitapash ñana ushashunllu. Caipi pensaripashunchi, shuj cazada huarmi shuj jarihuan pacalla puri callarishcanman. Chaita paipa cusa ama yachaj chayachunga llullacunata nishpa umachishcanman. Umachijujta yachaj chayashpaca ¿imashinashi cusaca sintirinman? Llaqui llaquimi sintirinman. Cunanga caipi pensaripashunchi, cusa paipa huarmiguta, huahuacunatapash shujcunapa ñaupajpica ali ali tratashcanman. Cutin huasipi cashpaca paipa huarmigutapash, huahuacunatapash nali tratashcanman. Chashna ruranaca nalipachami canman. Chaicunata shuj gentecuna na yachajpipash, Jehová Diosca tucuitami ricujun. Chaimi Bibliapica cashna nin: Diospa “ñaupajmandaca napacha pacajui ushanllu. Ashtahuangarin paica, ima tiajtapash tucuitami, aligutapacha ricujun” nishpa (Heb. 4:13).

11. Cai cusahuarmimandaca ¿imatata yachajupanchi? (Callari dibujota ricupangui).

¹¹ Ananías y Safira cusahuarmimandami Bibliapica parlan. Paicunaca punda siglopi  Jesusta catijcunami carca. Shinapash paicunataca llullacunata nichunmi Diabloca pandachirca. Paicunaca shuj alpata jatushpami culquitaca apostolcunaman cugrirca. Paicunaca shuj huauquipanicunapa ñaupajpi ali ricuringapallami shina rurarca. Shinapash gulpi culquitami cunajupanchi nishpami paicunaca llullarca. Chaitaca Jehová Diosca alimi yacharca. Shina llullaimandami paicunaca huañurca (Hech. 5:1-10).

12. Llullashpa causajcuna na arripintirijpica ¿imatata Jehová Diosca ruragrin? ¿Imamandata shina ninchi?

¹² Llullashpa causajcunamandaca ¿imatata Jehová Diosca yuyan? Diablotapash, llullashpa causaj gentecunatapash Jehová Diosca nimamanda na ricunayachinllu. Paicunaca shujcunata llaquichingapami llullacunata nin. Llullashpa causaj gentecunaca, Diabloshna na arripintirishpaca Biblia nishca shina ‘azufrehuan rupajuj nina cuchamanmi shitai’ tucunga. Chaica para siempre huañuna cashcatami nisha nin (Apoc. 20:10; 21:8; Sal. 5:6). ¿Imamandata shina nipanchi? Llullashpa causajcunataca “alcushna” causajcunatashnami Jehová Diosca ricun. “Alcushna” causajcuna nishpaca, Taita Diospa ñaupajpi millanayai cosascunata rurashpa causajcunamandami shina nin (Apoc. 22:15).

13. a) Jehová Diosca ¿imashinata can? b) ¿Imatata rurana capanchi?

¹³ Jehová ‘Dios, na llullaj’ Dios cajtaca alimi yachapanchi. Shinallata, Jehová Diosca “llullaitaca na ushanllu” (Núm. 23:19; Heb. 6:18). Bibliapica ninmi: Jehová Diosca ‘llullashpa parlajtaca’ ninandami millanayachin nishpa (Prov. 6:16, 17). Jehovapa amigo cangapaca paipa mandashcacunata cazushpa, na llullashpami parlana capanchi. Bibliapica ninmi: “Caishujmanda chaishujmanda na llullarishpa causana canguichi” nishpa. Cai mandashcatapashmi cazuna capanchi (Col. 3:9).

14. a) Testigocunaca ¿imamandata panda religionmanda gentecunahuanga diferente capanchi? b) Lucas 6:45​ta intindichipai.

¹⁴ Testigocunaca ¿imamandata panda religionmanda gentecunahuanga diferente capanchi? ‘Na llullashpa parlaimanda’ (Zacarías 8:16, 17, liingui). Apóstol Pabloca nircami: ‘Na llullashpa villajuj shimita villashpami’ ‘Taita Diospajta ruranajupanchi’ nishpa (2 Cor. 6:4, 7). Shinallata Jesuspash nircami: “Imata rimachumbash, shungu ninanda yarichijpimi, shimica riman” nishpa (Luc. 6:45). Shinaca Taita Diospa mandashcacunata ñucanchi shungupi charishpaca cabaltami parlapashun. Chaimi trabajopi cumbacunahuan, na rijsishca gentecunahuan, amigocunahuan, ñucanchi familiacunahuanbash cabalta parlangapaj esforzaripanchi. Shinaca ¿imacunapillata na llullashpa parlangapaj esforzarina capanchi?

15. a) Nalicunata pacalla rurashpa causanaca ¿imamandata nalipacha can? b) Quiquinba cumbacunashna ama cangapaca ¿imatata yarina capangui? (Notata ricupangui).

¹⁵ Joven cashpaca quiquinba cumbacuna alicachichun, o ali amigo cachunmi munangui. Shinapash huaquingunaca cumbacunahuan ali amigo cangapaj munaimandallami paicunashna nalicunata pacalla rurai callarin. Chaimi tandanajuipi cashpa, paipa familiahuan cashpapash shuj ali Testigo shina portarin. Cutin na Testigo cumbacunahuan cashpa, Internetpi cumbacunahuan escribirishpaca diferentepachami can. Chaipica mapa, nali shimicunata nin, pinganayai ropacunata churajun, nali musicacunata uyan, yapata tragotapash ufian, pacalla shuj jarihuan o shuj huarmihuan puri callarin, drogacunatapash chupan, ashtaca nali cosascunatapash ruran. Chaita rurashpa causaj jovengunaca paicunapa taitamamaman, huauquipanicunaman, Taita Diosmanbashmi llullashpa causan (Sal. 26:4, 5). Nalicunata pacalla rurashpa causajcunaca shimihuanllami ninanda alicachinajun. Ashtahuangarin paicunapa shunguca Jehová Diosmandaca carupimi can. Chaitaca Jehová Diosca alimi yachan (Mar. 7:6). Ashtahuanbash Bibliapica ninmi: “Juchasapacunata ricushpaca, ama ñucapash chashna cashcaiman yanguichu. Ashtahuangarin tucui cambaj causaipi, Mandaj Diostalla manllashpa causangui” nishpa (Prov. 23:17). Shinaca chai mandashcatami pactachina capangui. *

16. Tiempo completopi sirvingapaj solicitudta jundachijushpaca ¿imatallata escribina capangui?

¹⁶ Quiquinga precursor regular shina o tiempo completo especialpi sirvingapami tal vez munapangui. Por ejemplo Betelpa solicitudta jundachijushpaca quiquinba salud imashna cajta, ima musicata uyajta, quiquinba causaimandapashmi tucui tucuita na llullashpa escribina capangui (Heb. 13:18). Shinapash imapash nalita rurashcata ancianocunaman na villashca cashpaca ¿imatata rurana capangui? Quiquinba concienciapi tranquilo ali sintirishpa Jehová Diosta cushilla sirvingapaca, ancianocunapa ayudatami mañana capangui (Rom. 9:1; Gál. 6:1).

17. Ñucanchi huauquipanicunapa causaimanda cutin cutin tapuchijujpica ¿imatata rurana capanchi?

¹⁷ Taita Diospa Reinomanda ama villachichun nishpa gobierno jarcashcanman. Shinallata huauquipanicunamanda imatapash villachun cutin cutin tapushcanman. Shina tapuchijpica ¿imatata rurana capanchi?  Chaipaca Jesús imata rurashcata ricupashunchi. Jesustaca, Roma llactata mandajmi cutin cutin tapuchijurca. Shina tapuchijujpipashmi Jesusca “upalla cangapajpash, rimangapajpash, chai punllacunami chayamun” nishcata pactachirca. Chaimi Jesusca na imatapash nishpa quedarca (Ecl. 3:1, 7; Mat. 27:11-14). Shinaca ñucanchi huauquipanicunapa causaita ama llaquichingapaca na imatapash yangata villanachu capanchi (Prov. 10:19; 11:12).

18. Ancianocuna tapujpica ¿imatata rurana capanchi?

¹⁸ Cunanga caipi pensaripashunchi. Pipash juchata rurashcata yachashcanchiman. Shinaca ancianocuna ñucanchita tapujpica ¿imatata ninchiman? Yaripashunchi, ancianocunaca congregación ucupi imapash nali ruraicuna ama tiachunmi ricurianajun. Shinapash ñucanchi amigo, o familia juchata rurashcata yachaj chayashpaca ancianocunaman villanaca shinllimi ricurin. Shinlli cajpipash ¿imatata rurana capanchi? Bibliapi nishcatami catina capanchi. Chaipica ninmi: “Na llullaj runaca, chashna cashcatapachami villan” nishpa. Shina cashpaca na pacashpami tucuita villana capanchi (Prov. 12:17; 21:28). Shinaca ancianocuna tapujpica na pacashpa, na mirachishpami tucuita villana capanchi. Shina rurajpimi, paicunaca juchapi urmashca huauquita o panita Jehovapa amigo cashpa catichun ayudanga (Sant. 5:14, 15, NM ).

19. Cati temapica ¿imatata yachajupashun?

¹⁹ Davidca Jehová Diostaca cashnami mañarca: “Canga na llullajtami ninanda juyangui” nishpa (Sal. 51:6). Davidca alimi yacharca Jehová Diospa mandashcacunata shungupi charina minishtirishcapacha cashcata. Shinaca ñucanchicunapash “caishujmanda, chaishujmanda na llullashpami” parlana capanchi. Shinallata shuj gentecunamanbash Bibliamanda na llullashpa yachachina capanchi. Chaitaca cati temapimi yachajupashun.