Tratado de Versalles nishcata firmajcunaca, Liga de Naciones nishcapash tianami can nishpami mandashcarca. Liga de Nacionesca tucui llactacunapi casilla, ali causaigu tiachunmi ayudana carca. Ashtaca Jesusta catinchi nij tucushca religiongunapashmi chai tratadotaca apoyanajurca. Consejo Federal de las Iglesias de Cristo en América nishcacunapash cashnami nirca: “Liga de Naciones nishca organizacionga Diospa Reinotami cai alpapi ricuchinajun” nishpa. Consejo Federal de las Iglesias de Cristo en América nishcacunaca Liga de Naciones nishcata apoyajuimandami huaquin representantecunatapash París llactapi tiashca Conferencia de la Paz nishcaman cacharca. Cai conferenciaman rishca shuj jarica nircami: “Caica mundo enteropi casilla ali causaigu tiachunmi ayudagrin” nishpa.

Cai huatapica ciertomi ashtaca cambiocuna mundo enteropi tiagrijurca. Shinapash Conferencia de la Paz nishcapi cajcunaca cai Alpapi cushilla ali causaigu tiachunga, na ayudagrinajurcachu. Huata 1919​pica Jehová Diosmi ima punllapash na villachishcata villachichun Bibliamanda yachajujcunata ayudagrijurca. Shinapash Bibliamanda yachajujcunaca huaquin cambiocuna tiajtami ricugrinajurca.

Sociedad Watch Tower Bible and Tract nishcapi picuna ñaupaman pushana cashcataca cada huatami agllan carca. Chai viajeca sábado 4 de enero de 1919​pami quedarca. Huata 1919​pica Joseph Rutherford huauquimi Jehovapa organizaciondaca ñaupaman pushajurca. Shinapash yangamandami huauqui Rutherford, paita ayudaj 7 huauquicunapash Atlanta-Georgia, Estados Unidos llactapi prezocuna carca. Cai huauquicunallata ñaupaman pushashpa catina cashcata o shujcunata agllana cashcatami chai viajeca decidina carca.

Rutherford huauquica Jehovapa organización ñaupaman catichunmi munarca. Shuj huauquicuna shuj huauquita presidente shina agllangapaj munajtaca yacharcami. Chaimandami prezo cashpallata shuj cartata escribishpa cacharca. Cai cartapica Evander Coward huauquita agllapaichi nishpami escribishcarca. Chai huauquica “tranquilo, imatapash na yangata nijlla, Jesusta ali sirvijmi can” nircami. Shinapash tauca huauquicunaca Jehovapa organizacionda ñaupaman pushajcunata agllangapaca 6 quillacunata shuyashunra ninajurcami. Carcelpi caj huauquicunata difindij abogadocunapashmi chaitallata ninajurca. Shinapash tiempo yalijujpica tucuicunallatami ashtahuan ashtahuan preocuparinajurca.

 Shinapimi Richard Barber huauqui nishca shinaca cai problemaca asha asha arreglarijurca. Sociedad Watch Tower Bible and Tract nishcapa tandanajuipica shuj huauquica nircami: “Ñucaca na abogado canichu shinapash Taita Diosca paita tucuipi cazujtami juyan. Chaimandami Jehová Diospi confiashcata, paita cazushcataca cutin Rutherford huauquitallata presidente shina agllashpami ricuchipanchiman” nishpa (Sal. 18:25, NM).

Alexander Macmillan huauquica chai tandanajui tiashcamanda pacari punllapi ima pasashcata yarishpaca cashnami nin: “Rutherford huauquica shuj cartatami cuhuarca. Cai cartataca huauquicunami huauqui Rutherfordman cachashca carca. Chai cartapica imata decidishcatami villajurca. Chaipica nijurcami: “RUTHERFORD WISE VAN BARBER ANDERSON BULLY Y SPILL HUAUQUICUNACA DIRECTORCUNAMI CAN. PAICUNAMI MUSHUJ 3 DIRECTORCUNA CAN. JUYASHCA HUAUQUICUNA” nishpa. Cai cartapica paicunatallata Sociedad Watch Tower Bible and Tract nishcata ñaupaman pushachun cutin agllashcatami nijurca. Paicunaca Joseph Rutherford huauqui, William Van Amburgh huauquicunami carca. Huauqui Joseph Rutherfordca presidente shinami catigrijurcara.

Bibliamanda yachajujcunaca chai 8pura prezo huauquicunata carcelmanda llujchingapami firmacunata mañashpa purinajurca. Cai na manllaj huauquipanicunaca 700 mil yali firmacunatami tandachirca. Cai firmacunata nara ricuchijpillatami miércoles 26 de marzo de 1919​pica, huauqui Rutherford paipa 7 ayudaj huauquicunapash libre llujshirca.

Paita chasquingapaj llujshishca huauquicunataca huauqui Rutherfordca nircami: “Cai experienciaca ashtahuan shinlli punllacunapi imata rurana cashcata yachachunmi ayudashca. [...] Quiquingunaca na carcelmanda llujchingapallachu esforzaripashcanguichi. Chaica na yapa importantechu can [...] Quiquingunaca Jehová Diosta alabangapami tucuita rurapashcanguichi. Chaimandami Jehová Diosca bendiciajun” nishpa.

Juiciocunapi imalla pasashcacunata ricunami Jehová Dios paipa organizacionda ayudajushcata cuenta japichun ayudarca. 14 de mayo de 1919 huatapica tribunal de apelacionga nircami: “Paicunapa derecho cajpipash, chai jaricunaca na shuj ali juiciota charishcachu [...] chaimandami paicunaca libre quedana can” nishpa. Chai huauquicunataca nalicunatapachami rurashca nishpami juchachinajurca. Paicunapa sentenciacunata rebajashpalla saquijpi o yangata libre saquijpica chai huauquicunaca autoridadcunapa ñaupajpica leycunata na cazujcunashnami ricurinman carca. Shinapash huauquicuna imapash nalita na rurashcata cuenta japishpami imatapash na nishpa libre saquirca. Imamanda juchachinatapash ñana charircachu. Chaimandami Rutherford huauquica juez shina, abogado shinapash cati usharca. Shinami Jehovata sirvijcunataca Tribunal Supremo de Estados Unidos llactapica difindishpa cati usharca.

Macmillan huauquica nircami: “Jesús cieloman apangacamanga na maqui cruzashcaca shuyanajurcanchichu. Chaipa randica Jesuspa munai ima cashcata yachangapami esforzarina carcanchi” nishpa.

 Chai tiempopi ashtahuan jatun Betelmanda huauquicunaca na pundashna villachishpa catita ushanajurcachu. Huauquicuna carcelpi caj tiempopica publicaciongunata imprimingapaj tucui aparatocunatami gobiernomanda gentecunaca huaglichishpa saquishca carca. Chaimandami huaquin huauquicunaca ñana villachishpa cati usharingachu nishpa pensanajurca.

Bibliamanda yachajujcunaca, Diospa Reinomanda villachishpa catina o na catina cashcata yachangapami munanajurca. Chaimandami huauqui Rutherfordca shuj discursota cungapaj decidirca. Cai discursoman richunmi ashtaca gentecunata invitanajurca. Huauqui Macmillanga nircami: “Pipash cai discursoman na rijpica, ñana villachishpa catinachu carcanchi” nishpa.

Huañujuj cashpapashmi huauqui Rutherfordca, domingo 4 de mayo de 1919​pica “La esperanza para la humanidad angustiada” nishca discursota curca. Cai discursotaca Los Ángeles (California) llactapimi curca. Cai discursomanga 3.500 gentecunami rirca. Tauca tauca gentecunaca na yaicui ushashpami canllapi quedarca. Chai pacaritaca 1.500 gentecunapashmi rirca. Caita ricushpami huauquipanicunaca gentecuna Diospa Reinomanda yachajushpa catingapaj munashcata cuenta japirca.

Chai punlla jipa, huauquicuna imata rurashcami cunan punllacunacaman villachishpa catichun ayudashca.

Inglés shimipi La Atalaya del 1 de agosto de 1919 revistapica, septiembre quilla callaripica shuj jatun tandanajui Cedar Point (Ohio) llactapi tianatami villajurca. Misuri llactamanda Bibliamanda yachajuj Clarence Beaty shuti huauquiguca nircami: “Tucuicunami chaipi cana cashcataca yacharcanchi” nishpa. Cai jatun tandanajuimanga 6 mil yali huauquipanicunami rirca. Chai tucui gentecuna rinataca na yashcarcachu. Lago Erie nishcapica 200 yali gentecunami bautizarirca. Chai punllataca pipash na cungaita ushanmanllu carca.

Chai jatun tandanajuipillata 5 de septiembre de 1919​pica, huauqui Rutherfordca “Discurso a los colaboradores”  nishca discursotami curca. Chai jatun tandanajuipica shuj mushuj revista llujshishcatami villarca. Cai revistaca The Golden Age  * nishca shutitami charirca. Cai revistaca “mundo enteropi imacunalla pasajushcata, imashpa shina pasajushcata, chaicunamanda Biblia imata nijta intindichingapami ayudanga” nircami.”

Tucui Bibliamanda yachajujcunataca cai revistahuan na manllashpa villachichunmi animarca. Imashina villachina cashcataca shuj cartapimi villachirca. Chai cartapica nijurcami: “Tucui bautizarishcacunami shujcunaman villachinataca alicachishpa ricuna canguichi, shujcunaman yachachinaca shuj bendicionmi can” nishpa. Caita uyashpaca ashtaca huauquipanicunami animarirca. Chaimi diciembre quillapaca, cai revistata chasquingapaj munaj 50 mil yali gentecuna anotarirca.

Huata 1919 tucurijujpica, Diospa llacta ashtahuan villachishpa catingapaj imacunatalla rurashpa catina cashcatami Bibliamanda yachajujcunaca intindirca. Shinallata tucurimui punllacunamanda parlaj huaquin profeciacunapash chai huatapi pactarishcatami cuenta japirca. Malaquías 3:1-4​pica Jehovapa sirvijcunataca panda yachachishcacunamanda ‘mapata anchuchinshna’ limpiana cashcatami ricuchijun. Shinallata Jehovapa ñaupajpi ali cangapaj imata rurana, imata na rurana cashcatapashmi intindichijun. Cai profeciami 1919​pica pactarirca. Chai huatapimi Diospa llactaca, ‘Babilonia jatun pueblopa’ panda yachachishcacunamandapash libre quedarca. Chai huatapillatami ‘aliguta cazushpa, aliguta yarishpa sirvij’ esclavota * agllarca (Mal. 3:1-4; Apoc. 18:2, 4; Mat. 24:45). Caicuna pasashca jipami Bibliamanda yachajujcunaca Jehovamanda gentecunaman villachingapaca listo carca.