1. Jehová Diosca paipa munaita pactachingapaca ¿imatata ruranlla?

JEHOVÁ DIOSCA paipa munaita pactachingapaca ima tucuna minishtirijpipash tucunllami. Paica ali yachachij, shuj cushichij taita, shuj villachij, shuj shuj cosascunatapash ruraj Diosmi can (Is. 48:17; 2 Cor. 7:6; Gál. 3:8). Huaquinbica paipa munaita pactachingapaca gentecunatapashmi utilizanlla (Mat. 24:14; 28:19, 20; 2 Cor. 1:3, 4). Paipa munaita pactachichunga Jehová Diosca ñucanchicunaman ali yachaita cushpa, fuerzata cushpapashmi ayudaita ushan. Caicunaca shuj estudiashca gentecuna nishcashnami Jehovapa shuti imata ningapaj munashcata ricuchin.

2. a) ¿Imamandata Jehovapa munaitaca na pactachi ushashachu nishpa pensarinchi? b) Cai temapica ¿imatata yachajupashun?

² Tucuicunallatami Jehovapa munaita pactachingapaj munapanchi. Shinapash mayorlla caimanda, salud ashata nali caimanda, na ushashachu yuyaimandami huaquinbica Jehovapa munaitaca na pactachi ushashachu nishpa na seguro sintiripanchi. Cutin shuj huauquipanicunaca pensanmi, ña testigo de Jehovami cani ashtahuan ruranaca na minishtirinllu nishpa. Cai temapica Jehová Dios paipa munaita pactachichun imashna ñucanchicunata ayudajtami yachajupashun. Shinallata punda tiempopi Jehovata sirvij jaricuna, huarmicuna Jehovapa munaita pactachina munaita charichun, paicunaman fuerzata cushpa imashna pactachichun ayudashcatapashmi yachajupashun. Cunanbipash ñucanchicuna Jehovapa munaita pactachichun imashna ayudajtapashmi yachajupashun.

3. Filipenses 2:13​pi nishca shinaca ¿imashinata Jehová Diosca paipa munaita pactachichun ayudan?

³ (Filipenses 2:13, * liingui) *. Jehová Diosca paipa munaita pactachina munaita charichunmi ayudaita ushan. Chai munaita charichunga ¿imashinata ayudan? Pensaripashunchi, tandanajuipica  caita uyapanchiman. Ñucanchi congregacionbillata imapipash ashtahuan ayudana cashcata, o Betelmanda shuj cartata cachamujpi shuj anciano congregacionman liishpa shuj congregaciongunapi villachishpa ayudachun minishtinajun nishcanman. Chaimi cashna tapurinchi, ¿shuj congregacionbi ayudaita ushaimanlla? nishpa. O shuj mushuj asignacionda ñucanchiman cujpi, chaitaca pactachi ushashacha nishpami pensaripanchi. Shinallata Bibliata liinaca shuj huauquipanicunata imashina ayudanapimi pensarichunmi ayudan. Shinapash chaicunata pactachichunga Jehová Diosca nipita na obliganllu. Cutin Jehovapa munaita pactachina munaita charijpica Jehovallatami chai munaita pactachichun ayudanga.

4. Jehovapa munaita pactachichunga ¿imashinata Jehová Diosca fuerzata cushpa ayudan?

⁴ Jehová Diosca paipa munaita pactachichunga paillatami fuerzata cushpa ayudanga (Is. 40:29). Ñucanchi imata rurachunbash Jehová Diosllatami paipa espíritu santota cushpa ayudanga (Éx. 35:30-35). Shinallata paipa organizacionda utilizashpami ñucanchicuna imagutapash ali rurachun yachachita ushan. Shina yachachijpipash na ushajushpaca huauquipanicunata ayudahuai nipashunchi. Shinallata Jehovata mañapashunchi. Bibliapica ninmi: “Na ñucanchimandalla ushaita charishpapash, Taita Diosmandami ninan ushaita charinchi” nishpa (2 Cor. 4:7; Luc. 11:13). Imashinami Bibliapi ricupashcanchi, punda tiempopi Jehovata sirvij jaricuna, huarmicuna Jehovapa munaita pactachina munaita charichun, chaita pactachingapaj fuerzata cushpa Jehová ayudashcatami yachajupashcanchi. Shinaca punda tiempomanda jaricunamanda, huarmicunamanda yachajupashunchi. Paicunamanda yachajujushpaca Jehová Dios paicunata imashina ayudashca shinallata ñucanchicunatapash ayudajtami ricupashun.

5. Israel llactamanda gentecunata salvachunga ¿ima punllata Jehová Diosca Moisestaca utilizarca?

⁵ Israel llactamanda gentecunata salvachunmi Jehová Diosca Moisesta utilizarca. Shinapash Jehová Diosca ¿ima punllata Moisestaca utilizarca? ‘Egipto llactapi causajcunapa tucuita aligutapacha yachajushcata’ ricushpaca Jehová Diosca Moisestaca na utilizarcachu (Hech. 7:22-25). Ashtahuangarin Moisés manso shungu o humilde cajpimi Jehová Diosca utilizarca (Hech. 7:30, 34-36). Chai jipami, Egipto llactapi mandajhuan ama manllashpa parlagrichun Jehová Diosca ayudarca (Éx. 9:13-19). Moisesta imashina ayudashcamandaca ¿imatata Jehová Diosmandaca yachajupanchi? Jehová Diosca paita tucui shunguhuan sirvingapaj munajcunata, paipi confiajcunatami utilizan (Filip. 4:13).

6. Rey Davidta ayudangapaca ¿pitata Jehová Diosca utilizarca?

⁶ Ashtaca huatacuna jipaca rey Davidta ayudachunmi Jehová Diosca Barzilái runaguta utilizarca. Shuj punllaca Absalonmanda pacajushpami rey Davidpash, paita sirvijcunapash shaijushca, yarjaihuan, yacupash illaj rinajurca. Absalonga rey Davidpa churimi carca. Absalón llaquichingapaj catijujpipash Barzilái rucullagu cashpapashmi, shujcunahuan paicunapa causaita peligropi churashpa Davidman ima minishtirishcaguta saquingapaj rirca. Shinapash Barzilái jariguca, ñucaca ña rucugumi cani, Jehová Diosca na utilizahuangachu nishpaca na pensarcachu. Chaipa randica Barzilái jariguca Jehovata sirvijcunaman cushijushpami pai imata charishcaguta saquingapaj rirca (2 Sam. 17:27-29). Caimandaca ¿imatata yachajupanchi? Mundo enteromanda huauquipanicunata ayudangapaca masqui rucugucuna cajpipashmi Jehová Diosca ñucanchicunataca utilizanga. Paita catijcunata ayudangapaca imatapash rurangallami (Prov. 3:27, 28; 19:17). Mundo enteropi huauquipanicunata ayudangapaca congregacionbi culquiguta churashpami ayudaita ushapanchi. Shinami maipipash llaqui apashca huauquipanicunata ayudaita ushapanchi (2 Cor. 8:14, 15; 9:11).

7. a) Simeón jarigutaca ¿imashinata Jehová Diosca utilizarca? b) Caimanda yachanaca ¿imashpata ñucanchipaca alipacha can?

⁷ Simeón jariguca tucui shunguhuanmi Jerusalén llactapi Jehovata sirvin carca. Jehová Diosca  paimanga nircami, can nara huañushpallatami Mesiasta ricungui nishpa. Chaita uyashpaca Simeón jariguca ninandami cushijurianga. Paica ashtaca huatacunatami chaita shuyajurca. Simeón jariguca Jehovapimi crin carca. Shinallata ima llaquicunatapash aguantashpami causarca. Shuj punllaca “Diospaj espíritu yarichijujpimi, Diospaj huasiman” Simeón jariguca shamurca. Chaipimi Jesustaca ricurca. Chai jarigutaca Jehovami chai huahuagumanda villachichun utilizarca. Chai huahuami Cristo tucugrin nishpa villachirca (Luc. 2:25-35). Jesús villachijtaca Simeón jariguca na ricurcachu. Shinapash Jehová Dios Jesús huahuagu cajta ricuchun saquishcamandaca ninandami cushijurca. Paica paraíso Alpagupi causarishpaca cushilla causaitami chasquinga. Shinallata Jesús cai alpata mandajujpi tucuicuna cushilla causanajujta ricushpaca ninandami cushijunga (Gén. 22:18). Ñucanchicunapash Jehová Dios paita sirvichun saquishcamandaca ninandami cushijupanchi.

8. Jehová Diosca ¿imashinata ñucanchitaca utilizaita ushan?

⁸ Jesuspa punllacunapica José shuti na mitsa jarigumi tiarca. Paica Jehová Dios paita utilizachunmi saquirca (Hech. 4:36, 37). Apostolcunaca paitaca Bernabé nishpami rijsin carca. Shinapash Bernabé shutica “Cushichij” ningapami munan. Bernabé jariguca ciertopachami shujcunata imagutapash nishpa cushichin carca. Por ejemplo, Saulo Jesusta ali catij tucushca jipaca, shujcunaca Sauloman quimiringapaca ninandami manllan carca. Sauloca Jesusta nara catishpaca Jesusta ali catijcunataca llaquichishpami catirian carca. Shina cashca cajpipash Bernabé jariguca Saulota ayudangapami rirca. Chaita ricushpaca Sauloca ninandami cushijurianga (Hech. 9:21, 26-28). Jerusalén llactamanda ancianocunaca Antioquía de Siriamanda huauquipanicuna ayudachun minishtijujtami yachaj chayarca. Chaipi ayudachunga ¿pitata cacharca? Bernabé jarigutami cacharca. Paita cachashpaca ancianocunaca alitami rurarca. Bibliapi nishca shinaca Bernabeca “Jesusta catijushcata na saquishpami, tucui shunguhuan aligutapacha catina canguichi nishpa, tucuicunaman aliguta yachachijurca” (Hech. 11:22-24). Cunanbipash shuj huauquipanicunata ayudashpa cushichichunmi Jehová Diosca ñucanchita utilizaita ushan. Por ejemplo, familia ucumanda pipash huañujpi o irquilla cajpi, llaqui llaqui sintirijcunata visitashpa o cayashpa paicunata cushichita ushapanchi. Shinaca Bernabé jarigutashna ñucanchitapash Jehová Dios utilizachunga ¿imatata ruranajupanchi? (1 Tes. 5:14).

9. Vasily huauquitaca ¿imashinata Jehová Diosca ayudarca?

⁹ Vasily huauqui alipacha anciano cachunmi Jehová Diosca ayudarca. 26 huatata charijpimi anciano cana privilegiota chasquirca. Chaimi huauquicuna problemata charijpica na ayudaita ushashachu nishpa ninanda manllan carca. Shinapash Escuela del Ministerio del Reino nishcaman rina, alipacha experienciata charij ancianocunahuan parlanami Vasily huauquitaca ayudarca. Shinallata pai yachajungapapash ninandami esforzarirca. Por ejemplo, imacunapilla cambiana cashcatami shuj cuadernopi escribirca. Chai escribishcamanda shuguta ña pactachijushpaca asha ashami chai manllaitaca mishaita usharca. Chaimi chai huauquica cashna nin: “Pundaca huauquicuna problemata charijpi imata ruraitapash na atinashpami ninanda manllan carcani. Cunanga huauquipanicunata ayudaimandaca ninandami cushijupani. Shinallata Bibliahuan huauquipanicunata cushichichun Jehová Dios ayudashcamandapash ninandami cushijupani” nishpa. Shinaca cai huauquimandaca ¿imatata yachajupanchi? Huauquicuna, Vasily huauquishnami Jehová Dios utilizachun saquina capanchi. Shinallami Jehová Diosca congregacionbi imacunatapash ali pactachichun ayudanga.

10. a) Abigail huarmiguca ¿imatata rurarca? b) Abigail huarmigumandaca ¿imatata yachajupanchi?

¹⁰ Davidta, paita sirvijcunatapash rey Saúl llaquichingapaj catiriajujpimi Jehová Dios paicunata  ayudachun minishtirca. Shuj viajeca Davidta sirvijcunaca Nabal jaritami asha micunaguta carahuai nishpa rogarca. Nabal jarica charij charijmi carca. Nabal jarica Davidpa sirvijcunamanga micunaguta caranashnallami carca. Paicunami Nabal jaripa llamagucunataca chaquishca pambapi cuidashca carca. Chaimi Davidpa sirvijcunamanga micunaguta carana carca. Shinapash Nabal jarica mitsa mitsami carca. Chaimi nimata na cararca. Chaita uyashpami rey Davidca ninanda culirashpa Nabaltapash paipa huasipi causajcunatapash tucuchingapaj munarca (1 Sam. 25:3-13, 22). Nabal jarica shuj juyailla huarmigutami charirca. Paica Abigail shutimi carca. Abigail huarmiguca David imata ruragrijujta yachaj chayashpami na manllashpa Davidta tuparingapaj rirca. Davidta ricushpaca cashnami rurarca, ‘Davidpa ñaupajpi cungurishpa, alpaman chayajta cumurirca. Ñucata mandajlla, ima juchata rurashcapash, ñucapa jahua cachun. Jehovapa maquipi saquipai’ nirca. Shujpa culpamanda ama shujcunatara huañuchipaichu nishpami mañarca. Shina nijta uyashpami Davidca cuenta japirca, Jehová Dios Abigailta cachamushcata (1 Sam. 25:23-28, 32-34). Jehová Diosta tucui shunguhuan sirvimandami Jehová Diosca paita utilizarca. Cunanbipash Abigail huarmigushna ali pensarij panigucunami tian. Shinami huauquipanicunata, familia ucupipash Jehovata sirvishpa catichun ayudan (Prov. 24:3; Tito 2:3-5).

11. a) Salum mandaj runagupa ushicunaca ¿imatata rurarca? b) ¿Picunata cunanbipash Salum runagupa ushicunashna shinllita trabajan?

¹¹ Ashtaca huatacuna jipaca Jerusalén llactapa pircacunata shayachingapami Salum jarigupa ushicunata Jehová Diosca utilizarca (Neh. 2:20; 3:12). Salum jariguca shuj mandajmi carca. Mandajpa ushicuna cashpapashmi Jerusalén llactapa pircacunata rurana shinlli, peligroso cajpipash ayudangapaj munarca (Neh. 4:15-18). Cutin Tecoítas nishca mandajcunaca jariyashcacunami carca. Shina jariyashca caimandami “Diospajta ruranapica na ayudanajurcachu” (Neh. 3:5). Jerusalén llactapa pircacunata 52 punllacunapilla shayachishcata ricushpaca, Salum jarigupa ushicunaca ninandami cushijunajurianga (Neh. 6:15). Cunanbipash ashtaca panigucunaca ¿imapita shinllita trabajanajun? Tandanajui Huasicunata shayachishpa, Jatun Tandanajui Huasicunata arreglashpapashmi ayudanajun. Cai ruraicuna ali llujshichunga imagutapash ali ruraj, cushilla ayudaj, Jehovata juyaj panigucunatami minishtipanchi.

12. Tabita huarmigutashna ¿imashinata Jehová Diosca ñucanchitapash utilizaita ushan?

¹² Tabita huarmiguca “imagupash illajcunata llaquishpami, aliguta rurashpa causajurca”. Ashtahuanbachaca viuda huarmigucunatami ayudan carca. Shina ayudachunga Jehová Diosmi ayudarca (Hech. 9:36). Chai huarmigu shujcunata juyashpami imagutapash caranlla carca. Chaita yarishpami pai huañujpica tucuicuna ninanda huacanajurca. Shinapash apóstol Pedro chai huarmiguta causachijpica tucuicunami ninanda cushijunajurca (Hech. 9:39-41). Tabita huarmigumandaca ¿imatata yachajupanchi? Jaricuna o huarmicuna jovenguna cashpa, mayorlla cashpapashmi ñucanchi huauquipanicunataca ayudaita ushapanchi (Heb. 13:16).

13. a) Ruth panigutaca ¿imashinata Jehová Diosca utilizarca? b) Ruth paniguca ¿imatata cuenta japirca?

¹³ Ruth paniguca misionera cangapami munan carca. Shinapash chai panigu joven cashpaca gentecunahuan parlanataca ninandami manllan carca. Huasin huasin rishpaca tratadocunata saquishpa ligero ligeromi purin carca. Ruth paniguca ninmi: “Villachinataca ninandami gushtan carcani” nishpa. Shinapash huasin huasin Diospa Reinomanda parlanataca ninandami pinganayan carca. 18 huatacunata charishpami Ruth paniguca precursora regular tucurca. Cutin 1946 huatapica Galaad Escuelamanmi rirca. Chai jipaca Hawái llactapi, Japón llactapimi sirvirca. Shuj shuj llactacunaman ali villaigucunata villachichunga Jehová Diosmi paitaca utilizarca. Casi 80 huatacunata Jehovata sirvijuimandaca Ruth paniguca ninmi: “Jehová Diosmi ama manllashpa villachichun fuerzata cushpa ayudahuashca. Chaimi  na manllashpa villachi ushapashcani. Shinallata maijanbash Jehová Dios ayudanapi confiajpica, Jehovallata utilizanatami cuenta japipashcani” nishpa.

14. Efesios 3:16, 17​pi nishca shinaca ñucanchita Jehová Dios utilizachunga ¿imatata rurajuna capanchi?

¹⁴ Ashtaca huatacunatami Jehová Diosca paita sirvijcunataca shuj shuj ruraicunapi utilizashca. Ñucanchita Jehová Dios utilizachunga ¿imatata ruranajupanchi? Jehová Dios ñucanchita utilizachunga paipa munaita rurangapami esforzarina capanchi (Efesios 3:16, 17, liingui). Quiquin Jehovata ashtahuan sirvingapaj munajpica, Jehová Diosca Bibliamanda ali yachachij tucuchunmi ayudanga. Shinallata cushilla villachichun, imagutapash alita rurachun, llaquilla caj huauquipanicunatapash cushichichunmi ayudanga. Huauquipanicuna imashna sintirijta intindichun, Jehovapa munaita pactachichunbashmi ayudanga.

15. Joven huauquicunaca 1 Timoteo 4:12, 15​pi nishca shinaca ¿imatata Jehová Diostaca mañana capanguichi?

¹⁵ Joven huauquicuna congregacionbi imapash privilegiota chasquingapaca ¿imatata ruranajupanguichi? Tauca congregaciongunapica siervo ministerialcuna shina sirvichunmi huauquicunataca minishtipanchi. Tauca congregaciongunapica anciano huauquicunami siervo ministerialcunatapash yali tian. Jovenguna, congregacionbi ¿ashtahuan ayudangapaj munapanguichichu? Huaquin huauquicunaca pensanmi: “Shuj publicador cashpalla alimi cani” nishpa. Shina pensarijushpaca siervo ministerial cana munaita charichun ayudahuai nishpami Jehovata mañana capanguichi. Shinallata Jehovapa munaita pactachishpa catingapaj fuerzata carahuai nishpapashmi mañanalla capanguichi (Ecl. 12:1). Quiquinguna ayudachunmi minishtipanchi (1 Timoteo 4:12, 15, liingui).

16. ¿Imatata Jehová Diostaca mañana capanchi?

¹⁶ Jehová Diosca paipa munai pactarichunga imatapashmi ruranga. Shina cashpaca Jehovapa munaita rurangapaj munaita charichun ayudahuai nishpa mañapashunchi. Shinallata paipa munaita pactachingapaj fuerzata carahuai nishpapash mañapashunchi. Shinaca joven o mayorlla cashpapash ñucanchi tiempoguta, fuerzata, ñucanchi rurai ushashcata, ñucanchi charishca cosascunahuanbash Jehová Diosta sirvingapaj utilizapashunchi (Ecl. 9:10). Jehová Diosta sirvinapi manllaicunara mishachunga ama saquipashunchichu. Shinallata nimapa na sirvinichu nishca pensamientocuna mishachunbash ama saquipashunchichu. Jehovata sirvinaca shuj jatun bendicionmi can.