1, 2. a) ¿Imatata gobiernocunaca ñalla ni callaringa? b) ¿Ima tapuicunapita pensarina capanchi?

GOBIERNOCUNA ‘casilla aliguta, imatapash na manllashpami causanajunchi’ ninajushcanman. Paicunaca, cunanbishnaca ima punllapash na shinaca causashcanchichu ninajushcanman. Tucuimi cunanmanda vichaica ali canga nishpami jariyanajunga. Shinapash Bibliapica ‘ñapash tucuchij llaquimi’ shamunga ninmi. Shinallata “chai jatun llaquimandaca, pipash na pacajui ushangachu” nijunbashmi (1 Tes. 5:3). Gobiernocunaca chai pasagrijushcataca na jarcaita ushangachu.

² Chaimandami cai cati tapuicunapi pensarina capanchi: ‘Ninan Manllanai Llaqui Punllacunapica’ ¿imata pasagrin? Chaicamanga ¿imata rurachunda Jehová Diosca munan? ‘Ninan Manllanayai Llaqui Punllacunapi’ aguantashpa Jehovata sirvishpa cati ushangapaca ¿imatata cunanmandallata rurana capanchi? (Mat. 24:21).

3. Apocalipsis 17:5, 15-18​pi nishca shinaca ¿imashinata Jehová Diosca ‘Babilonia shuti jatun pueblota’ tucuchinga?

³ (Apocalipsis 17:5, 15-18, liingui). ‘Babilonia shuti jatun puebloca’ tucuchi tucugrinmi. Gobiernocunaca chaita jarcaitaca nimamanda na ushangachu. ¿Imashpata shina nipanchi? Taita Diosmi gobiernocunapa shungupi ‘pai munashcata rurachun paicunaman yuyaita cunga’. Jehová Diosca tucui panda religiongunata,  Jesusta catinchi nij tucushca religiongunatapashmi * tucuchingapaj munan. Chaipaca “yana puca manllanayai animalpaj” ‘chunga cachucunapa’ shungupimi, Jehová Diosca pai imata yuyashcata churanga. ‘Yana puca manllanayai animalpa chunga cachucunaca’, Organización de las Naciones Unidas nishcata apoyaj tucui gobiernocunatami ricuchin (Apoc. 17:3, 11-13; 18:8). Ninan Manllanayai Llaqui Punllacunaca gobiernocuna panda religiongunata llaquichijpimi callaringa. Caica mundo enteropimi cungashcapi pasanga.

4. a) ¿Imacunata nishpashi gobiernocunaca panda religiongunata llaquichi callaringa? b) Panda religiongunata catijcunaca ¿imatashi tal vez ruranga?

⁴ Gobiernocuna imashina ‘Babilonia shuti jatun pueblota’ o panda religiongunata tucuchi callarinataca na ali yachapanchichu. Tal vez casilla, ali causaiguca religiongunapa culpamandami na tian ningami. Na cashpaca yapatami politicapi satirin, ashtaca ashtaca cosascunatami charin nishpami tal vez llaquichi callaringa (Apoc. 18:3, 7). Shinapash panda religionda catijcunataca tal vez na tucuchingachu. Chaipa randica panda religiongunatami tucuchitapacha tucuchigrin. Chai tucui religionguna tucurijpimi gentecunaca religiongunata ñaupaman pushajcunapica ñana confianga. Chaimi caruyangapaj munanga.

5. ‘Ninan Manllanayai Llaqui Punllacunapica’ ¿imashinata Jehová Diosca ayudanga?

⁵ Bibliapica ‘Babilonia shuti jatun pueblota’ o panda religiongunata mashna tiempopi tucuchinataca na villajunllu. Shinapash na unaita paranataca yachapanchimi (Apoc. 18:10, 21). Jehová Diosca paipa ‘agllashcacuna’ o paita sirvijcunalla quishpiri ushachunmi ‘chai llaqui punllacunataca’ uchalla tucuchinga (Mar. 13:19, 20). Shinapash ‘Ninan Manllanayai Llaqui Punllacuna’ callarishcamanda Armagedón chayamungacamanga ¿imata rurachunda Jehová Diosca munan?

6. Jehová Diosca ñucanchicuna ¿imata rurachunda munan?

⁶ Chaishuj temapica Jehová Diosca ‘Babilonia shuti jatun pueblomanda’ o panda religiongunamanda  caruyachun munashcatami yachajuparcanchi. Shinapash chaita yachashpallaca na quedanachu capanchi, Jehová Diosta pai munashcashna ali sirvishpa catingapapashmi decidirishca cana capanchi. Chaita pactachichunga cai ishcai yuyaicunami ayudanga.

7. a) Jehovapa mandashcacunatalla cazunajushcataca ¿imashinata ricuchipanchi? b) Hebreos 10:24, 25​pi nishca shinaca ¿imamandata cunanbica ashtahuan tandanajushca catina capanchi?

⁷ Punda yuyai, Jehovapa mandashcacunatalla cazuna. Jehovapa mandashcacunatalla cazuimandami mundopa costumbrecunata, yachachishcacunataca na catinchi. Chaimandami jaripura, huarmipura puñushpa faltapi urmanacunataca napacha apoyanchi. Shinallata jaripura, huarmipura cazaranacunatapash na apoyanchichu (Mat. 19:4, 5; Rom. 1:26, 27). Cati yuyai, ñucanchi huauquipanicunahuan Jehovata alabashpa catina. Ñucanchi huauquipanicunahuanga usharijpica tandanajui huasicunapi, shuj huauquipa o panipa huasipi o pacalla shuj ladocunapi tandanajushpami Jehová Diostaca alabanchi. Ima pasajpipash nunca na tandanajunataca saquinachu capanchi. “Taita Diospa punlla chayamujta yachashpacarin” ashtahuanmi tandanajushca catina capanchi (Hebreos 10:24, 25, * liingui).

8. ¿Imashinata tal vez villachi callarishun?

⁸ Cunan punllacunapica Diospa Reinomanda ali villaigucunata villachishpa, Jesuspa ali catijcuna tucuchunmi yachachishpa purinchi. Shinapash ‘Ninan Manllanai Llaqui Punllacunapica’ tal vez ñana chai ali villaigucunataca villachinajushunllu. Bibliapica chai punllacunapica ‘rundushna’ villaicunatami villachishun ninmi (Apoc. 16:21). Tal vez cashnami villachishun, Diablopa nali mundoca ñallapachami tucurigrin nishpa. Shinapash imatapacha villachina cashcata, imashina villachinatapash chai punllapimi ashtahuan yachapashun. ¿Cai cien huatacunata villachin cashcashnallatachu villachigripanchi? Na yachapanchichu. Imashina villachina cashpapash Jehovapa punllapi llaquichi tucuna cashcatami villachishun (Ezeq. 2:3-5).

9. Shina villachinajujpica ¿imatata tal vez gobiernocuna rurangapaj munanga? Shinapash ¿imatata seguro cana capanchi?

⁹ Ñucanchicuna shina villachinajujpimi gobiernocunaca tal vez jarcangapaj munanga. Shina pasajpipash Jehová Diospimi cunanbishnallata confiashpa catina capanchi. Shinallata Jehová Diosllata paipa munaita pactachichun ayudanapipashmi seguro cana capanchi (Miq. 3:8).

10. Lucas 21:25-28​pi nishca shinaca ‘Ninan Manllanai Llaqui Punllacuna’ callarijpica ¿imatashi ashtaca gentecunaca rurai callaringa?

¹⁰ (Lucas 21:25-28, liingui). ‘Ninan Manllanai Llaqui Punllacunapica’ cai mundopi ima charishca cosascunapi, gentecunapi confiashcacunapash imapapash na ayudajta ricushpami gentecunaca ninanda manllarinajunga. ‘Chai manllanayai llaqui punllapica’ gentecunaca na huañungapaj munashpami ninanda manllarishpa caparinajunga (Sof. 1:14, 15). Chai punllacunaca Jehovata sirvijcunapapashmi shinllipacha canga. Cai mundopa cosascunapi na chapurimandami tal vez minishtirishcapacha cosascunatapash na chari ushapashun.

11. a) Mundo enteromanda gentecunaca ¿imatata yachaj chayanga? b) ¿Imamandata Ninan Manllanai Llaqui Punllacunataca na manllana capanchi?

¹¹ Gentecunaca paicunapa religionguna tucuchi tucushcata ricushpa, cutin testigo de Jehovacunaca na tucuchi tucushcata ricushpami paicunaca ninanda culirashpa Testigocunataca ricunajunga. Chaitaca tucui ladocunapi, Internetpipashmi villanajunga. Testigocunata na tucuchishcata yachaj chayashpami gobiernocuna, ashtaca gentecuna, Diablopash Testigocunata  na ricunayachinajunga. Chaipica testigo de Jehovacunalla tiashpa catijtami mundo enteromanda gentecunaca yachaj chayanga. Chaimi llaquichingapaj munanga. Chai llaquichina punlla chayamujpica tucuilla gobiernocuna tandanajushpami Gog de Magog nishca tucunga. * Shinami tucuilla gobiernocuna tandajushpa Jehová Diospa tucuilla sirvijcunata ninanda llaquichi callaringa (Ezeq. 38:2, 14-16). Imashinapacha llaquichinataca na yachapanchichu. Shinapash ‘Ninan Manllanai Llaqui Punlla’ chayamujpica salvarichun imata ruranatami Jehová Diosca ñucanchiman yachachinga (Sal. 34:19). Shinaca salvarina punlla chayamujujta yachashpami “ashtahuan shinlli tucushpa vichai ricuna” capanchi. *

12. “Aliguta cazushpa, aliguta yarishpa servij” esclavoca ¿imashinata shamuj punllacunapaca ña yachachijushca?

¹² “Aliguta cazushpa, aliguta yarishpa servij” esclavoca, ‘Ninan Manllanai Llaqui Punllacuna’ nara callarijpillatami chai punllacunapi Jehovatalla sirvishpa cati ushachun ña yachachijushca (Mat. 24:45). Ashtaca cosascunata rurashpami yachachijushca. Por ejemplo, huata 2016manda 2018​camanga Quimsa Punlla Jatun Tandanajuicunatami cushpa ayudajushca. Cai jatun tandanajuicunapica Jehovapa ñaupajpi ali cangapaj, paita ashtahuan sirvishpa catingapaj imata rurana cashcatami yachajupashcanchi. Cai jatun tandanajuicunapi imatalla yachajushcata yaripashunchi.

13. a) Jehovata na saquishpa catingapaca ¿imata rurashpa catina capanchi? b) ¿Imatata cunanmandallata rurana capanchi?

¹³ Jehovata na saquina. Huata 2016​pi “Jehová Diostaca na saquinachu canchi” nishca Quimsa Punlla Jatun Tandanajuipimi cai temamanda yachajuparcanchi. Chai jatun tandanajuipica Jehovata na saquishpa paipa alipacha amigo cashpa catichunmi ayudarca. Shinallata Jehovata tucui shunguhuan mañachun, Bibliamanda yachajuna minishtirishcapacha cashcatapashmi yarichirca. Shina yachajushpallami ima llaquicuna shamujpipash aguantashpa catichun ayudanga. Shinapash Diablopa nali ruraicuna ña tucurina punlla quimirimujpica Jehovata ama sirvichun, Diospa Reinomanda ama villachichunmi ashtaca jarcaicuna tianga. Chai punllapica gentecunaca testigo de Jehovacunamandaca burlaringami (2 Ped. 3:3, 4). Testigo de Jehovacunaca cai mundopa ruraicunapica na chapuripanchichu. Shinaca cunanmandallata Ninan Manllanai Llaqui Punllacuna nara chayamujpillata Jehovata na saquishpa paitalla sirvishpa catingapami esforzarina capanchi.

14. a) ¿Imata ungido huauquicunahuanga pasanga? b) ¿Imamandata cunanmandallata na manllashpa catina capanchi?

¹⁴ Ninan Manllanai Llaqui Punllacunapica, Cuerpo Gobernantepi sirvij huauquicunapa causaica cambiangami. Shuj punllaca na yashcapimi tucuilla ungidocuna jahua cieloman rishpa Armagedón guerra macanajuipi Jesusta ayudangapaj ringa (Mat. 24:31; Apoc. 2:26, 27). Shinaca chai punllamandapachami Cuerpo Gobernantepi sirvij huauquicunaca ñana ñucanchihuan canga. Shinapash pipash na cuentai ushanalla ashtaca gentecunaca shujlla shina tandanajushcami cai Alpapi quedanga. ¿Imashinata tandanajushca caita ushanga? Experienciata charij huauquicunami ashtaca ashtaca huauquipanicunata yachachishpa catinga. Chai huauquicunaca Taita  Dios munashcashnami yachachinajunga. Shinaca chai huauquicunata cazushpa, paicunata apoyashpa catinami capanchi. Shinallami salvaritapash ushashun.

15. a) Aguantashpa catichunga ¿imata ayudanga? b) ¿Imamandata cunanmandallata aguantashpa catinaca minishtirishcapacha can?

¹⁵ Aguantashpa catina. Huata 2017​pi “Aguantashpa catipashunchi” nishca Quimsa Punlla Jatun Tandanajuipimi cai temamanda yachachirca. Llaquicunata aguantashpa catichunmi ayudarca. Shinallata llaquicunata charishpa o na charishpapash aguantashpa catinatami yachajuparcanchi. Jehovapi ashtahuan confiashpa catichunbashmi ayudarca (Rom. 12:12). Shinaca Jesús nishcataca ama cungapashunchichu. Paica nircami: “Tucurimuicaman, llaquicunata apajcunallami quishpichi tucunga” nishpa (Mat. 24:13). Jesuspa shimicuna nishcaca ima llaqui o problemacuna shamujpipash aguantashpa catichunmi ayudan. Cunanmanda aguantashpaca Ninan Manllanai Llaqui Punllacunata aguantachunbashmi ayudanga.

16. a) Na manllashpa catichunga ¿imata ayudanga? b) ¿Imashinata cunanmandallata na manllashcata ricuchita ushapanchi?

¹⁶ Na manllashpa catina. Huata 2018​pi “Na manllashpa catipashunchi” nishca Quimsa Punlla Jatun Tandanajuipimi cai temamanda yachachirca. Chaipica yarichircami na manllana cashcata, ñucanchi ruraicunapillata na confiarina cashcatapash yarichirca. Ashtahuangarin Jehová Diospi confiashpa, aguantashpa catinatami yachachirca. Jehovapi confiashpa catichunga ¿imata ayudanga? Bibliata cada punlla liishpa, shinallata punda tiempopi Jehovata sirvijcunata imashina ayudashcatapashmi yarina capanchi (Sal. 68:20; 2 Ped. 2:9). Ninan Manllanai Llaqui Punllacuna chayamujpica gobiernocunaca llaquichingapami ñucanchitaca munanga. Shinaca na manllashpa, Jehovapi confiashpa catingapami ninanda esforzarina capanchi (Sal. 112:7, 8; Heb. 13:6). Cunanmandallata Jehovapi confiashpaca Gog llaquichijujpica na manllashpami ñaupaman catishun. *

17. Armagedón macanajui punlla chayamuchunga ¿manllanachu capanchi? (Callari paginapi fotota ricupangui).

¹⁷ Imashinami caishuj temapi ña yachajuparcanchi, tucurimui punllacunapimi tucui ñucanchicunaca  causanajupanchi. Shinapash Ninan Manllanai Llaqui Punllacunapi salvaringapami munapanchi. Cutin Armagedón macanajui jipaca nali ruraicuna, nali gentecunaca ñana tiangachu. Chaimi Armagedón macanajui punllataca na manllashpa shuyajuna capanchi. Chai macanajuica Taita Diospa macanajuimi can (Prov. 1:33; Ezeq. 38:18-20; Zac. 14:3). Armagedón macanajui callarinataca Jehová Diosmi Jesusman villanga. Shinaca ungidocuna, ashtaca ashtaca angelcuna Jesusta chai macanajuipi ayudashpami Diablota, paipa ayacunata, soldadocunatapash tucuchinga (Dan. 12:1; Apoc. 6:2; 17:14).

18. a) Jehová Diosca ¿imatata ñucanchicunamanga nishca? b) Apocalipsis 7:9, 13-17​pi nishca shinaca shamuj punllacunapi ¿imashina causanatata shuyanajupanchi?

¹⁸ Jehová Diosca ñucanchitaca cashnami nin: “Maijan shinlli macanajunacunahuan shayarishpapash, candaca pipash na mishangachu” nishpa (Is. 54:17). Shinaca ‘Ninan Manllanai Llaqui Punllacunamandami’ tucui shunguhuan Jehovata sirvij ‘ashtaca ashtaca gentecunaca’ Jehovata jatunyachishpa catinajunga (Apocalipsis 7:9, 13-17, liingui). Bibliapi cai nishcacunata yachajushpaca shamuj punllacunapi ali causaiguta shuyashpa catichunmi ayudan. Jehovata cazujcunataca paillami salvanga. Chaitaca alimi yachapanchi (Sal. 31:23). Shuj punlla Jehovapa shuti jatunyachishca quedajpica, tucui Jehovata juyajcunami ninanda cushijupashun (Ezeq. 38:23).

19. ¿Imata ñallapacha pactaringa?

¹⁹ Cunanga caipi pensaripashunchi. Cai mundota Diablo ñana mandajujpica 2 Timoteo 3:2-5​pi nishca shina gentecunaca ñana tiangachu (“ Shamuj punllacunapi gentecunaca ¿imashinashi canga?” nishca recuadrota ricupangui). George Gangas * Cuerpo Gobernantepi sirvishca huauqui imata nishcata ricupashunchi. Paica nircami: “Paraíso alpagupica tucuicunami shuj familiashna cushilla, nunca na huañushpa causanajunga. Tucuicuna Jehovatalla sirvinajujta ricunaca alipachami canga” nishpa. Caita yachanaca ¿nachu shuj jatun cushijui can?