IMA HORA tamianata, shinlli huairanata estudiajcunaca shuj pushtupi ima punlla ushashcata tamianata, ushashca acapana chayamunata yachashpaca uchallami telepi, radiopi tucui gentecunaman villan. Ama pipash llaqui apachunmi uchalla villan.

Ima hora tamianata estudiajcuna shinami Jehová Diosca shuj “jatun llaqui” nara chayamujpillata pipash ama llaqui apachun cutin cutin villajun. Chaipaca ¿imashinata villan? Ama pipash llaqui apachun munashpa imapash nara pasajpillata villajujtaca ¿imashinata yachapanchi? Chaita yachangapaca punda tiempopi Jehová Dios nara llaquichishpallata imata rurashcatami yachajupashun.

Punda tiempocunapica Jehová Diosca paipa mandashcacunata na cazujcunataca llaquichisha nishpami cutin cutin villarca (Jer. 30:23). Nara llaquichishpallatami Jehová Diosca paipa ñaupajpi ali cangapaj ima cambiocunatalla rurana cashcata pundamandallata villarca (2 Rey. 17:12-15; Neh. 9:29, 30). Gentecuna ima cambiocunatalla rurana cashcata yachachunga, Jehová Diosca cai alpapi paipa ali sirvijcunatapashmi utilizarca. Paicunami Jehovapa mandashcacunata na cazujpica ima llaquicunalla tiana cashcata villan carca (Amós 3:7).

Jehovapa shuj ali sirvijca Noé runagumi carca. Noé runaguca na manllashpami huainayashpa causaj gentecunaman, millai millai nalita ruraj gentecunamanbash cai alpapi shuj jatun manllanai tamia tianata villarca (Gén. 6:9-13, 17). Chai jatun manllanai tamiamanda quishpiringapapash imata rurana cashcatapashmi Noeca gentecunaman villachingapaj ninanda esforzarirca. Chaimandami Bibliapica Noetaca Jehová Diosta cazushpa ‘[alita] rurashpa causanata villajmi’ can nin (2 Ped. 2:5).

Noé runagu villachingapaj esforzarijpipash chai tiempomanda gentecunaca na cazurcachu. Jehová Diospi crishcatapash na ricuchircachu. Chaimandami ‘yacuhuan tucuilla tucuchina punlla chayamujpica’ tucui gentecuna huañurca (Mat. 24:39; Heb. 11:7). Chai gentecunaca, Taita Diosca na villashpallatami castigan nitaca na usharcachu.

Cutin shuj viajecunapashmi Jehová Diosca nara llaquichishpallata imata rurana cashcata villashca. Gentecuna cambiai ushachunbash tiempota cushcami. Egipto llactapica 10 plagacunata nara cachamushpallatami ña villarca. Por ejemplo, nara runduta tamiachishpallatami Jehová Diosca faraonda, paipa sirvijcunatapash cutin cutin villachunga Moisesta, Aarón runagutapash cacharca. Runduhuan tamiamanda pacajungapaca ¿mashna tiempotata gentecunaca charirca? Bibliapica ninmi: “Mandaj Dios imata nijujta Faraonbaj servijpuracunamanda uyashpa, maijan manllajcunaca, paicunapaj servijcunatapash, paicunapaj animalcunatapashmi, huasipi pacajugrichun cacharca. Ashtahuangarin Mandaj Dios imata nijujta shungupi na chasquijcunaca, paicunapaj servijcunatapash, animalcunatapash, pambapi saquircallami” nishpa (Éx. 9:18-21). Caita ricushpami, nipanchi Taita Diosca pundata villashparami castigan nishpa. Chaimi Egiptopi Jehovapa nishcata cazujcunaca llaquichi tucunamandaca salvari usharca.

Taita Diosca último plagata nara cachashpallatami faraonman paipa sirvijcunamanbash imata rurana cashcata villarca. Shinapash paicunaca na cazurcachu (Ex. 4:22, 23). Chaimi paicunapa rucu churicuna imashina huañujta paicunaca ricurca. Chaica llaquipachami cashcanga (Éx. 11:4-10; 12:29). Shinapash ¿chai llaquimandaca salvari ushanmanllu carca? Ari, salvari ushanmanmi carca. Moisés runaguca israelitacunamanga, Jehová Dios cachamushca plagamanda salvari ushangapaj imashina paicunapa familiacunata cuidana cashcatami villarca (Éx. 12:21-28). Chai nishcata cazuimandami 3 millón yali israelitacuna, Egiptomanda  ‘shican shican ashtaca gentecunapash’ Egiptomanda llujshishpa salvari usharca (Éx. 12:38).

Imashinami cai ejemplocunapi ricupashcanchi, Jehová Diosca nara castigashpallatami gentecunamanga tiempohuan imata rurana cashcata villan (Deut. 32:4). Shinapash ¿imamandata Jehová Diosca shina ruran? Apóstol Pedroca ninmi, Jehová Diosca “cangunapuramanda shujllapash tucuchi tucuchunga na munanllu. Ashtahuangarin tucuicuna arripintirichunmi munan” nishpa (2 Ped. 3:9, NM). Jehová Diosca tucui gentecunamandami ninanda preocuparin. Paica gentecuna paicunapa nali ruraicunamanda arrepintirishpa paipa mandashcacunata cazushpa llaquichina punllacunamanda salvarichunmi munan (Is. 48:17, 18; Rom. 2:4).

Jesús cai alpapi cashpaca Jehovata na cazuj gentecunaca “Ninan Manllanai Llaqui Punllacuna” chayamujpica tucuchi tucunga nishpami villarca. Cunanbipash mundo enteropi villachinajujtaca gentecunaca cazunami can (Mat. 24:21). Shinallata Biblia nishca shuj profecía pactarijta paita ali catijcunaca, “Ninan Manllanai Llaqui Punllacuna” chayamujpi ricunata, paicunapa propio causaipi ima tucunatapashmi Jesusca parlarca. Shinallata mundo enteropi jatun llaquicuna cunanbi tianatapashmi parlarca (Mat. 24:3-12; Luc. 21:10-13).

Jesuspa nishcacuna pactarijujtami ricupanchi. Jehová Diosca tucuilla gentecuna paita cazuchun, paitalla sirvichun nishpami mandajun. Jehová Diosca tucui gentecuna paita cazushpa cushilla causaita charichunmi munan. Shinallata paraíso Alpagupi causachunbashmi munan (2 Ped. 3:13). Jehová Diospa nishcacunapi gentecuna tucui shunguhuan confiachun munaimandami Jehová Diosca paipa Reinomanda ‘ali villaicunata’ uyachun saquishca. Chai villaita uyashpami gentecunaca salvarita ushanga. Shinallata Jesusca cashnami nirca: “Cai pachapi tiaj tucui llactacunapi causajcuna yachachunmi villanajunga” nishpa (Mat. 24:14). Chai ali villaigucunata villachichunga Jehová Diosca paipa sirvijcunataca ali alimi yachachishca. Chaimi testigo de Jehovacunaca 240 llactacunapi villachinajunchi. Jehová Diosca tucuilla gentecuna quishpirichun munaimandami paipa nishcacunata cazuchun nishpa cutin cutin villan. Cazushpaca ‘Dios fiñarishpa llaquichijui punllamanda’ quishpirita tal vez ushangami (Sof. 1:14, 15; 2:2, 3).

Jehová Diosca paipa nishcacunata cazuchunga cutin cutinmi villajushca. Shina villashcataca Bibliapimi yachajupashcanchi. Gentecunaca ¿Jehovapa nishcacunata cazungapaj munangacha? nishpami tapurina capanchi. Cai mundo nara tucurijpillatami tucuilla gentecunaman ali villaigucunata villachishpa catina capanchi.