Chai huatapillatami Jehovapa organizacionga Bibliamanda Estudiantecuna Jehovata ashtahuan unido sirvichunga huaquin cambiocunata rurarca. Chai tiempopica Reunión de Oración, Alabanza y Testimonio nishca tandanajuipica cada semana Bibliamanda shuj textotami estudian carca. Shinapash jipamanga The Watch Tower revistapica cada semanapa estudiana textomanda shuj explicacionmi llujshi callarirca. Shinallata Bibliamanda Estudiantecunaca cada semana ima textota yachajuna cashcata y cada punlla ima himno de alabanza nishcata candanata yachachunmi shuj calendariota imprimishpa llujchin carian. Chai canciongunataca estudio personalta rurashpa o familiahuan Bibliamanda yachajushpami candai usharca.

Reuniongunapica Bibliamanda Estudiantecunaca “testimoniocuna” nishca partepica predicacionbi ima experienciacunata charishcata parlashpami, Jehovata agradicishpa, shuj canticota candashpa, mañaitapash ruran carian. 15 huatacunata charishpa huata 1923​pi bautizarishca Eva Barney shuti paniguca: “Reuniongunapi pipash parlangapaj munashpaca shayarishpami: ‘Ñucaca Señortami agradicingapaj munani, ñucaman ashtaca juyaita ricuchishcamanda’ nishpami parlai callarin carian” ninmi. Huaquin huauquicunaca testimonio nishca partepi parlanataca ninandami gushtan carca. Shinallata panigu Barneyca: “Godwin shuti mayorlla turiguca Señortaca siempremi ashtaca cosascunamanda agradicingapaj munan carian. Shinapash turigu yapata parlajushcamanda reunionda ñaupaman pushaj turigu preocuparijujta ricushpa, Godwin turipa huarmiguca paipa chaquetamandami aisachin carian. Chaimi chai turiguca tiarin carian” nircami.

Reunión de Oración, Alabanza y Testimonio nishca tandanajuitaca quillapica shuj viajetami diferenteta ruran carian. 1 de abril de 1923 huatapa The Watch Tower nishca revistapica chai tandanajuipi imata ruran cashcatami intindichirca. Chaipica: “Chaupi tandanajuicamanmi predicacionbi ima experienciacunata charishcata parlana y predicacionbi ayudashca huauquipanicunata animana canguichi [...]. Cai reuniongunaca tucuicunallata tandanajushpa unido cachun ayudanapimi confiapanchi” nijurcami.

Cai reuniongunaca Vancouver (Canadá) llactamanda 19 huatata charij Charles Martin huauquigutaca ashtacatami ayudarca. Paica: “Chai tandanajuicunapimi huasin huasin predicashpa imata ninata yachajurcani. Cazi siempremi huasin huasin predicashpa ima experienciata charishcata parlan carian. Chaicunata uyanami villachishpa imata ninata, pipash na uyangapaj munajpi imata ninata yachajuchun ayudahuarca” nircami.

Predicanapash tucui huauquipanicunallata ashtahuan unido cachunmi ayudarca. 1 de abril de 1923  The Watch Tower revistapica: “Tucuicunallata chaitallata rurashpa unidos cangapami [...], martes 1 de mayo de 1923 punllataca predicangapaj llujshita ushapashun. Chai jipaca cada quillamanda primer martes punllatami chaitallata rurapashun [...]. Congregacionmanda tucui huauquipanicunallatami predicangapaj llujshina canga” nircami.

Jovengunapashmi predican carca. 1923 huatapi 16 huatacunata charij Hazel Burford shuti paniguca: “Chai tiempopica Bulletin nishca publicaciondami charircanchi. Gentecunahuan parlangapaca chaipi tiashca presentaciongunataca de memoriami yachajun carcanchi. a Ñuca abuelitohuanga cushijushpami predican carcanchi” nircami. Shinapash panigu Hazelca na pensashca shuj jarcaitami charirca. Paniguca: “Shuj mayorlla turiguca ñuca crishcacunamanda shuj gentecunaman parlachunga nimamanda na munarcachu. Chai tiempopica huaquin Bibliamanda Estudiantecunaca jari cashpa o huarmi cashpapash ‘chairalla viñaj’ jovengunapash predicashpa Jehová Diosta alabana cashcataca nara ali intindircachu” nircami (Sal. 148:​12, 13). Chashna jarcaicuna tiajpipash paniguca predicashpami catirca. Escuela de Galaadpa clase 2man rishca jipami Panamá llactapi misionera shina sirvirca. Tiempohuanga huauquipanicunaca jovengunamanda, predicacionmanda imata yuyashcataca asha ashami cambiarca.

Asambleas locales y regionalescunapashmi huauquipanicuna ashtahuan unido cachun ayudarca. Chaipica predicana punllacunapashmi tiarca. Por ejemplo, Canadá llactapi Winnipeg pushtupica shuj asambleami tiarca. 31 de marzotaca chai asambleaman rishca tucui huauquipanicuna predicaita ushachunmi arreglocunata rurarca. Shinami ashtaca gentecunaca Jehová Diosmanda yachajui usharca. 1923 huatapillatami 5 de agosto punllataca chai pushtupillata shuj asamblea tiarca. Chai asambleamanga 7 mil gentecunami rirca. Canadá llactapica chashna ashtaca gentecunaca shuj asambleamanga nuncapash na rishcarcachu.

1923 huatapa 18 al 26 de agosto punllacunapica Los Ángeles (California) llactapimi shuj alipacha asamblea tiarca. Chai asamblea callaringapaj huaquin  semanacuna faltajpillatami chai asamblea tianataca periodicocunapi villachirca. Shinallata Bibliamanda Estudiantecunaca 500 mil invitaciongunatami entregarca. Chai asamblea tianataca paicunapa carrocunapi, buscunapipash letrerocunata churashpami villarca.

Sábado 25 de agosto punllataca huauqui Rutherfordca “Llamagucuna y chivocuna” nishca discursotami curca. Chai discursopica: “‘Llamagucunaca’ ali shunguta charij gentecunami can. Paicunaca paraisopi causana bendiciondami chasquinga” nishpami intindichirca. Shinallata shuj discursopica “Amonestación” nishca resoluciondami presentarca. Chaipica Jesustami catinchi nij tucushca religionguna nalicunata rurashcatami ricuchirca. Shinallata ali shunguta charij gentecunataca ‘Importante Babilonia Llactamanda’ llujshichunmi animarca (Apoc. 18:​2, 4). Jipaca chai resoluciondaca shuj tratadopi imprimishpami llujchirca. Mundo enteropimi Bibliamanda Estudiantecunaca chai tratadopa ashtaca ashtaca copiacunata gentecunaman cushijushpa curca.

Chai asambleapa último punllapica huauqui Rutherfordca “Todas las naciones están marchando hacia el Armagedón, pero millones que ahora viven no morirán jamás” nishca discursotami curca. Chai discursotaca 30 mil yali gentecunami uyarca. Chai asambleaman ashtaca gentecuna shamunata yachashpami Bibliamanda Estudiantecunaca Coliseo de Los Ángeles nishca estadiota alquilarca. Discursocunata tucuicuna uyaita ushachunga huauquicunaca estadiopillata tiashca parlantecunatami utilizarca. Chai parlantecunaca avanzado aparatocunami carca. Chai asambleataca shuj gentecunapashmi radiopi uyarca.

1923 huatapica África, Europa, India y Sudamérica llactacunapimi huauquipanicunaca ashtahuan predicashpa catirca. India llactapi causaj Adavimannathu Joseph huauquica cazado y seis huahuacunatami charirca. Paimi hindi, tamil, telugu y urdu shimicunapi publicaciongunata rurangapaj ayudarca.

Sierra Leona llactapi sirvij Alfred Joseph y Leonard Blackman huauquicunaca Nueva York llactapi Jatun Betelmanga: “Predicadorcunatami minishtinajupanchi” nishpami escribirca. Paicunapa mañashcataca 14 de abril de 1923​tami contestarca. Alfred huauquiguca: “Sábado tutaca cungashcapimi pichari cayamurca” nircami. Telefonota contestajpica shinllita parlashpami: “¿Quiquinllu Jatun Betelmanga, ‘villachidorcunata minishtinajunchi’ nishpa escribimurcangui?” nirca. Shina nijpica huauquiguca, “ari” nishpami tigrachirca. Shina nijpica: “Bueno, ñucatami cachamuhuashca” nircami. Chai huauquiguca William Brown shutimi carca. Paica chai punllallatami Caribe llactamanda paipa huarmi Antoniahuan y Louise y Lucy paipa ishcai ushicunahuan chayashcarca. Huauquipanicuna paicunata en persona rijsingapaca na ashtaca tiempota shuyarcachu.

Huauquigu Alfredca: “Huauqui Leonardhuanga cada semanami Bibliata estudian carcanchi. Chaitallatami caya tutamandaca ruranajurcanchi. Shinapimi shuj jatun jari chayamujta ricurcanchi. Chai jarica Brown huauquigumi cashcarca. Cai huauquiguca tucui shungumi Bibliamanda gentecunaman yachachingapaca munarca. Chaimandami cayapallata shuj discursota cungapaj munarca” nircami. Cai huauquiguca quillapash nara pactajpillatami pai charishca tucui  publicaciongunataca gentecunaman entregarca. Asha tiempo jipaca 5 mil librocunata chasquishpami chaitapash entregashpa ashtahuan minishti callarirca. Ashtaca publicaciongunata entregajpipash gentecunaca paitaca “Librocunata jatuj” nishpaca na rijsinllu carca. Paica siempremi discursocunata cungapaca Bibliata utilizarca. Chaimandami paitaca “Brown el de la Biblia” nishpa rijsin carca.

Chai tiempopica Alemania llactamanda Barmen shuti pushtupimi shuj sucursal tiarca. Chai sucursalpica huauquipanicuna trabajangapaca espaciomi faltai callarijurca. Shinallata “Barmen shuti pushtutaca Francia llactamanda soldadocuna atacagrinajun” nijtami huauquicunaca uyashcarca. Bibliamanda Estudiantecunaca cambiaringapaj shuj pushtuta mascanajuimandami Magdeburgo pushtupi publicaciongunata imprimingapaj alipacha edificiocunata tarirca. 19 de juniotami chaishuj Betelmanda tucui cosascunata empacashpa cai mushuj edificiocunaman cambiarirca. Huauquicuna “Jatun Betelman ñami cambiarishcanchi” nishpa villashca shuj punlla jipallami “Barmen llactataca Francia llactamanda soldadocunaca ñami atacai callarishca” nishpa periodicocunapica villanajurca. Chaita uyashpaca huauquicunaca Jehová Dios paicunata ninanda cuidajushcatami sintirca.

Cutin Brasil llactapica George Young huauquigumi llacta entero predicashpa purijurca. Chai huauquiguca chai llactapi shuj sucursal tiachun y The Watch Tower revista portugués shimipi llujshichunmi ayudarca. Asha quillacunapillami huauquiguca 7 mil yali publicaciongunata entregashcarca. Huauquigu Sarah Ferguson huarmigupa familiata visitajpica paica ninandami cushijurca. Chai huarmiguca 1899 huatamandapachami The Watch Tower nishca revistata liijushcarca. Shinallata Jehová Diosta candallami sirvisha nishpa ña mañashca cashpapash nara bautizarita ushashcarcachu. Shinapash George Young huauquigu chayashcamanda huaquin quillacuna jipaca paipash y paipa chuscu huahuacunapashmi bautizarita usharca.

Chai huata ña tucurijujpimi 15 de diciembre de 1923 huatapa The Watch Tower nishca revistaca reuniongunapi, predicacionbi y asambleacunapi cambiocuna tiashcamanda ima pasajushcata villarca. Chai revistapica: “Congregacionguna espiritualmente ali cajtaca [...] fácil ricunallami can [...]. Shinaca Taita Dios cushca armadurata churajupashunchi. Shinallata shamuj huataca Jehová Diostaca tucui shunguhuan cushijushpa sirvipashunchi” nircami.

1924 huataca Bibliamanda Estudiantecunapaca shuj alipacha huatami cagrijurca. Betelpi sirvij huauquicunaca huaquin quillacunatami Staten Island nishca pushtupica shuj construccionda ruranajushcarca. Chai pushtuca Brooklyn llactapi Jatun Betelmanda ladollapimi carca. Chai construcciondaca 1924 huata callaripimi tucuchirca. Chai edificiocunaca tucui huauquipanicuna ashtahuan unido, tandanajushca cachun y chai tiempocaman na pensashca formacunapi predicachunbashmi ayudarca.