Gentecunaca tapunmi
Israelitacuna desiertopi cashpaca ¿maná y codornizcunata micushca jahuapashchu shuj micunacunata micurca?
Israelitacuna desiertopi 40 huatacunata cashpaca maná nishca micunatami ashtahuanbachaca micurca (Éx. 16:35). Ashtahuangarin Jehová Diosca ishcai viajecamanmi paicunamanga codornizcunata micuchun cararca (Éx. 16:12, 13; Núm. 11:31). Shinapash israelitacunaca shuj micunacunatapashmi ashaguta micurca.
Por ejemplo, huaquinbica Jehová Diosca israelitacuna ‘samaita’ ushachunmi huaquin pushtucunaman pushan carca. Chai pushtucunapimi paicunaca yacuguta y huaquin micunacunatami tarin carca (Núm. 10:33). Por ejemplo, ‘Jehová Diosca 12 pugyu yacucuna, 70 palmera quirucuna tiaj Elim shuti pushtumanmi’ paicunataca pusharca. Chai palmeracunaca palmeras datileras nishcacunami cashcanga (Éx. 15:27). Plants of the Bible nishca libroca, “palma datilera nishca yuraca ashtaca pushtucunapimi viñan […] Ashtaca millón gentecunami cai palmeracunamandaca micunata, aceitetapash llujchin. Shinallata chai palmeracunapi llanduitapashmi ushan” ninmi.
Shinallata israelitacunaca desiertopi yacu tiaj shuj jatun pushtupimi samangapaj quedashcanga. Cunanbica chai pushtutaca Farán nishpami rijsin. Y chai pushtuca Farán a nishca pambapimi can. Discovering the World of the Bible, nishca libropica, “cai pambaca 130 kilómetro largomi can. Cai pambaca Sinaí llactapi ashtahuan largo, ashtahuan juyailla, ashtahuan rijsishca pambacunapurapimi can” ninmi. Chai libropica caitapashmi nin: “Cai pambapica ashtaca yacu tiaj Farán nishca pushtumi tian. Chai pushtupica ashtaca palmeracunami tian. Shinallata 4.8 kilómetro largomi can y mar yacumandaca 610 metros jahuamanmi can. Chai pushtucunaca Sinaí llactamandaca ashtahuan juyaillapachami can. Pundamandapachami chai pushtupi ashtaca palmera datilera nishcacuna tiashcamandaca ashtaca gentecuna chaiman rishca”.
Farán pushtupi palmeras datileras nishca yuracuna
Israelitacuna Egiptomanda llujchishpaca jacuhuan rurashca tanda masata, masangapaj trastecunatapashmi aparca. Shinallata huaquin granocunata y aceitetapashmi apashcanga. Shinapash chai apashca cosascunaca asha tiempotallami pararca. Israelitacunaca ‘llamacunatapash, ashtaca ashtaca shuj animalcunatapashmi’ aparca (Éx. 12:34-39). Shinapash desiertopi causai na fácil cashcamandami ashtaca animalcunaca huañushcanga. Shinallata israelitacunaca huaquin animalcunatami micushcanga. Shinallata huaquin animalcunatacarin Jehovaman y yanga dioscunaman carashpa sacrificiocunatapashmi rurashcanga (Hech. 7:39-43). b Ashtahuangarin israelitacunaca llamacunata, huagracunatami viñachirca. ¿Imashinata caitaca yachapanchi? Porque Jehová Diosca paicunataca: ‘Cangunapaj huahuacunaca, 40 huatacamanmi, cai jichushca pambapi michishpa purinajunga’ nircami (Núm. 14:33). Chaimandami israelitacunaca lecheta, y asha aichatapash charishcanga. Shinapash 40 huatacunata más o menos 3 millón gentecunata micuchingapaca na suficienteta charircachu. c
Israelitacuna animalcunaman carangapaca ¿maimandata yacuguta, micunagutaca llujchirca? d Chai tiempopica desiertopica ashtahuan tamia tiashcanga. Chaimandami desiertopica ashtahuan jihua, ashtahuan shuj plantacunapash tiashcanga. Perspicacia para comprender las Escrituras, volumen 1 nishca libropica: “3.500 huatacuna huashamanga Arabia llactacunapica ashtahuanmi tamian carca. Cunanbica chai pushtupica chaquishca pambacunami tian. Shinapash pundacunapica chai pambacunapica riocunami tiarca. Chaita ricushpaca pundacunapica chai llactacunapi ashtahuan tamian cashcatami cuenta japipanchi” ninmi. Shina cashca cashpapash desiertoca chaquishca chaquishca manllanai pushtumi carca (Deut. 8:14-16). Shinaca Jehová milagrocunata rurashpa yacuguta na carashca cajpica israelitacunapash y paipa animalcunapashmi huañunman carca (Éx. 15:22-25; 17:1-6; Núm. 20:2, 11).
Moisesca israelitacunataca: “Runaca na micunahuanlla causana cajta, ashtahuangarin Mandaj Dios rimashca shimicunahuan causana cajta yachachingapajmi” Jehová Diosca maná micunagutaca cararca nircami (Deut. 8:3).
a 1 de mayo de 1992manda La Atalaya revistapi, página 24 y 25ta ricupangui.
b Israelitacuna desiertopi cashpa animalcunata huañuchishpa Jehovaman shuj sacrificiota carashcataca Bibliapica ishcai viajetami parlan. Israel llactapi sacerdotecuna tiai callarijpimi primera vez chai sacrificiocunata rurarca. Shinallata Pascua fiestata rurajushpami segunda vez animalcunata huañuchishpa Jehovaman shuj sacrificiocunata cararca. Jesús cai alpaman nara shamujpillata 1512 huatapimi israelitacunaca chai ishcai viajecunata sacrificiocunata rurarca. Chaica más o menos Egiptomanda llujshishca shuj huata jipami cashcanga (Lev. 8:14–9:24; Núm. 9:1-5).
c Israelitacuna desiertopi causana tiempo ña tucurigrijujpica guerrata mishashpami chai mishashca gentecunapa ashtaca ashtaca animalcunata japirca (Núm. 31:32-34). Shinapash Jehová cusha nishca alpacunaman yaicungacamanmi israelitacunaca maná micunaguta micushpa catirca (Jos. 5:10-12).
d Jehová Diosca israelitacunataca, “maná micunagutaca canguna micui ushanatalla pallaichi” nishpami mandarca. Chaimandami israelitacunapa animalcuna maná micunaguta na micun cashcata nita ushapanchi (Éx. 16:15, 16).
