1. ¿Taita Diospa angelca gentecunamanga ¿imatata nijun? Chaita uyashpaca ¿imatata rurana capanchi?

 TAITA Diospa shuj ángel quiquinda personalmente parlachijpica ¿paitaca uyapanguimanllu? Cunan punllacunapica shuj angelca ‘tucui llacta gentecunata, tucui jatun familiacunata, tucui idiomacunata parlajcunata y tucui pueblocunatami’ cashna nijun: ‘Taita Diosta manllaichi, paita alabaichi […] jahua cielota, cai alpata, mar yacucunata y pugyucunata ruraj Taita Diostami adorana canguichi’ nijunmi (Apoc. 14:​6, 7). Tucuicunallatami Jehovata adorana capanchi. Paillami Taita Diospacha can. Paipa jatun templo espiritualpi paita adoranaca ñucanchipaca shuj jatun bendicionmi can. Chaimandami ninanda agradicipanchi.

2. Jehovapa templo espiritualca ¿imata can? (“ Templo espiritualca ¿imacunata na can?” nishca recuadrota ricupangui).

² Templo espiritualca ¿imapachata can? Bibliapica ¿maijan partepita cai templomandaca parlan? Templo espiritualca shuj pushtupi construishca shuj huasipachaca na canllu. Ashtahuangarin Taita Dios munashcashna paita adorachunmi can. Y Jesús paipa causaita cushpa huañushcamandami Taita Dios munashca adoraita ushanchi. Apostolcunapa punllacunapica apóstol Pabloca Jehova Diosta imashna adorana cashcataca, Judea llactapi hebreo b cristianocunaman alipacha intindichirca.

3, 4. Hebreo cristianocunamandaca apóstol Pabloca ¿imamandata preocupado carca? Paicunataca ¿imashinata ayudarca?

³ Apóstol Pabloca Judea llactapi causaj hebreo huauquipanicunamanga ishcai razongunamandami escribishcanga. Callaripica paicunata animangapami escribishcanga. Chai huauquipanicunamanda mayoriaca judiocunapa religionda catishpami viñashcarca. Chaimandami chai religionda ñaupaman pushajcunaca paicuna cristiano tucujpica  talvez burlarishcanga. Cristianocunaca judiocunashna Diosta adorangapaj shuj templota sacrificiocunata rurangapaj shuj altarta y sacerdotecunatapash na charircachu. Chaimandapashmi judiocunaca paicunamanda burlarishcanga. Chaimandami paicunata desanimachishpa Jehová Diosmandapash caruyachita ushanman carca (Heb. 2:1; 3:​12, 14). Chai huauquipanicunamanda huaquingunaca talvezpashmi judiocunapa religionman cutin tigrashpa catinataiman pensanajushcanga.

⁴ Catipica hebreo cristianocunataca apóstol Pabloca Diospa shimimanda “shinlli micunashna”, shinlli yachachishcacunata intindingapaj na esforzarinajushcatami ricuchirca (Heb. 5:​11-14). Chai cristianocunamanda huaquingunaca todaviami Moisesman Cushca Leyta catinajurca. Shinapash Pabloca Moisesman Cushca Leypi mandashcashna sacrificiocunata ruranaca gentecunapa pecadota na por completo perdonai ushashcatami ricuchirca. Chaimandami gentecunaca Moisesman Cushca Leytaca ñana pactachina minishtirijurca. Chai jipaca apóstol Pabloca Diospa Shimimanda shinlli micunashna, shinlli yachachishcacunatami cai cristianocunamanga yachachirca. Apóstol Pabloca Jesús huañushcamanda paicuna “shuj ashtahuan ali esperanzata” charishcatami yarichirca. Chai esperanzami Jehová Diosman ashtahuan quimirichun ayudaita ushana carca (Heb. 7:​18, 19).

5. ¿Imata intindinata minishtirishcapacha can? ¿Imamandata chaita intindina capanchi?

⁵ Hebreo cristianocunaca judiocunapa religionda catinajushca tiempopica Moisesman Cushca Leypi mandashcashnami Jehovata adoranajushcarca. Shinapash Apóstol Pabloca cristiano tucushpaca imamanda Jehová Dios munashca shina paita adorana ashtahuan ali cashcatami ricuchirca. Apóstol Pabloca Moisesman Cushca Leyta judiocuna catishpaca Jehovata adoranaca “jipa punllacunapi ima pasanatami ricuchijurca” nircami. Shinallata “chaicunaca Cristopimi pactarin” nircapashmi (Col. 2:17). Shinaca punda tiempocunapi judiocuna Jehovata adorashcami jipa punllacunapi cristianocuna Jehovata ashtahuan ali adoranata ricuchijurca. Shinallata imashina Jehovata adorana cashcata, ñucanchi pecadocunata perdonangapaj Jehová imata rurashcata intindinaca minishtirishcapachami can. Cunanga judiocuna Diosta imashina adorashcata y cristianocuna Diosta imashina adorashcata comparashpami ricugripanchi. Chaitaca Hebreos cartapi ima nishcatami ricugripanchi. Shinami templo espiritual ima cajtaca ashtahuan ali intindita ushapashun. Y chaita intindina ñucanchita imashina ayudajtapashmi ricugripanchi.

6. Israelitacunaca tabernáculo carpa huasitaca ¿imapata utilizarca?

⁶ Judiocunaca ¿imashinata Taita Diosta adoran carca? Jesús cai alpaman nara shamujpillata 1512  huatapimi Moisés runaguca tabernáculo carpa huasita rurarca. Apóstol Pabloca templo espiritualmanda intindichingapaca chai tabernáculo carpa huasimanda parlarca (“Judiocuna. Cristianocuna” nishca recuadrota ricupangui). Tabernáculo carpa huasitaca ‘tuparina jatun carpa’ nishpapashmi rijsin carca. Chai carpa huasigupimi israelitacunaca Jehová Diosta adorangapaj y animalcunata huañuchishpa sacrificiocunata rurashpa carangapaj tandanajun carca (Éx. 29:​43-46). Israelitacunaca desiertopi cashpaca tabernáculo carpa huasigutaca maiman rishpapash apashpami rin carca (Éx. 25:​8, 9; Núm. 9:22). Paicunaca Jerusalén llactapi templo huasita huasichingacamanmi tabernáculo carpa huasitaca casi 500 huatacunata utilizarca. Shinapash tabernáculo carpa huasipashmi cristianocuna Jehová Diosta ashtahuan ali adorana cashcata ricuchirca.

7. Templo espiritualca ¿ima horata tiai callarirca?

⁷ Cristianocunaca ¿imashinata Taita Diosta adoranchi? Tabernáculo carpa huasica Jehová Diospa jatun templo espiritual tiana cashcatami ricuchirca. Apóstol Pabloca hebreo huauquipanicunamanga: Cai ‘carpa huasica [o tabernaculoca] ñucanchi tiempopi ima tiajtami ricuchijun’ nircami (Heb. 8:5; 9:9). Shinaca Apóstol Pablo hebreo huauquipanicunaman chai shimicunata escribijuj horasca templo espiritualca ñami tiarca. Porque templo espiritualca huata 29​pimi tiai callarirca. Chai huatapimi Jesusca bautizarirca, espíritu santohuan agllai tucurca y templo espiritualpi “alipacha Sacerdote principal” shina Jehovata sirvi callarirca (Heb. 4:14; Hech. 10:​37, 38). c

8, 9. Hebreos 7:​23-27​pi nishcashnaca Israel llactamanda sacerdote principalcunahuan y alipacha principal sacerdote Jesushuanga ¿imamandata diferentepacha can?

⁸ Judiocunaca ¿imashinata Taita Diosta adoran carca? Sacerdote principalca israelitacuna Jehová Diosta ali adoraita ushachunmi huaquin cosascunata ruran carca. Israel llactapica Aarón runagumi primer sacerdote principal carca. Tabernáculo carpa huasita inaugurajpimi Jehová Diosca Aarón runagutaca sacerdote principal shina sirvichun nombrarca. Shinapash Apóstol Pabloca: “Huañushpaca sacerdotecunaca paicunapa cargotaca saquinami carca. Chaimandami paicunapa randica, shuj sacerdotecuna paicunapa cargopica catin carca” nishpami intindichirca (Hebreos 7:​23-27​ta liipangui). d Ashtahuanbash chai sacerdote principalcunaca juchayucunami carca. Chaimandami paicunapa pecadocunatallata perdonachunga Jehová Diosmanga sacrificiocunata carana carca. Chaimandami Jesucristohuan, Israel llactamanda sacerdote principalcunahuan ricujpica Jesucristoca alipacha sacerdote principal can.

⁹ Cristianocunaca ¿imashinata Taita Diosta adoranchi? Ñucanchi sacerdote principal Jesucristoca Dios shayachishca ciertopacha tabernáculo carpa huasipimi sirvijun. ‘Chai tabernáculo carpa huasitaca gentecunaca na rurashcachu’ (Heb. 8:​1, 2). Shinallata Apóstol Pabloca “Jesusca para siempremi causan. Chaimandami paipa randi shuj sacerdotecuna tianaca na minishtirin” nishpami intindichirca. Shinallata “ima mapapash illami can. Pecador gentecunashnaca na canllu” nircami. Ashtahuanbash Jesús perfecto caimandaca israelitacunapa sacerdote principalcunashnaca “paica paipa pecadocunamandapash cada punlla sacrificiocunata ruranataca na minishtinllu”. Cunanga altarcunamanda y sacrificiocunamanda imata yachajui ushashcata ricupashunchi.

10. Cobre altarpi rurashca sacrificiocunaca ¿imatata ricuchirca?

¹⁰ Judiocunaca ¿imashinata Taita Diosta adoran carca? Tabernáculo carpa huasiman yaicuna canlla ladopimi, cobrehuan rurashca altar tiarca. Chaipimi israelitacunaca animalcunata huañuchishpa Jehová Diosman sacrificiocunata caran carca (Éx. 27:​1, 2; 40:29). Israelitacuna chai sacrificiocunata rurashpapash paicunapa pecadocunamandaca na por  completo perdonai tucuita usharcachu (Heb. 10:​1-4). Tabernáculo carpa huasipi rurashca sacrificiocunaca shamuj punllacunapi, gentecuna para siempre jucha illa tucuchun shuj sacrificio tiana cashcatami ricuchirca.

11. Jehovapa voluntadta pactachingapaca Jesusca ¿imacunatallata rurarca? (Hebreos 10:​5-7, 10).

¹¹ Cristianocunaca ¿imashinata Taita Diosta adoranchi? Jesusca cai alpaman Jehová Dios gentecunamanda huañuchun cachamushcataca alimi yacharca (Mat. 20:28). Chaimandami Jesusca Jehovapa voluntadta rurangapaj bautizarirca (Juan 6:38; Gál. 1:4). Jesús shina rurashpaca shuj altarpi sacrificiota rurajunshnami carca. Jehovapa ‘voluntadca’ shuj altarshnami can. Y shuj altarpica sacrificiocunata rurashpami cuna can. Y chaita rurai cuendami Jesusca paipa causaita cushpa Jehovapa voluntadta pactachirca. Jesusca paipi tucui shungu crijcunapa pecadocunata para siempre perdonangapaca ‘shuj viajetalla huañushpami paipa cuerpotaca entregarca’ (Hebreos 10:​5-7, 10​ta liipangui). Cunanga tabernáculo carpa ucumanda y chaipi tiashca huaquin cosascuna imata ricuchishcamandami parlagripanchi.

12. ¿Tabernaculopa cada cuartomanga picunata yaicui usharca?

¹² Judiocunaca ¿imashinata Taita Diosta adoran carca?. Tabernáculo carpa huasipi y Jerusalenbi rurashca templocunapa cuartocunapica cazi chai cosascunallatami tiarca. Tabernaculopi y templopipash ishcai cuartocunami tiarca. Shuj cuartoca Santo shutimi carca. Cutin caishuj cuartoca Santísimo shutimi carca. Chai cuartocunaca shuj cortinahuanmi separashca carca (Heb. 9:​2-5; Éx. 26:​31-33). Santo nishca cuartopica orohuan rurashca shuj lámpara, inciensota cushnichingapaj shuj altar, shuj meza y Taita Diosman carashca tandacunami tiajurca. Diosta sirvichun agllashca sacerdotecunallami  paicunapa responsabilidadcunata pactachingapaca, santo nishca cuartoman yaicuita ushan carca (Núm. 3:​3, 7, 10). Cutin Santísimo nishca cuartopica tratota rurashca baúl o arca del pacto nishcami tiajurca. Chai baulca orohuan rurashcami carca. Shinallata Jehová Dios chaipipacha cashcatashna ricuchingapami carca (Éx. 25:​21, 22). Sacerdote principalllami cortinata yalishpa Santísimo nishca cuartoman yaicuita usharca. Pecadocunamanda Limpiarina Punllapimi sacerdote principalca paipa pecadomanda y israelitacunapa pecadocunamandapash perdonachunmi Mandaj Taita Diospa ñaupapi ali tucungapaj animalcunapa yahuarhuan Santísimo nishca cuartoman yaicun carca (Lev. 16:​2, 17). Tiempohuanga Jehová Diosca tabernáculo carpa huasipi tiashca cosascuna imatapacha ricuchingapaj munashcatami paipa espíritu santohuanmi intindichirca (Heb. 9:​6-8). e

13. Santo y Santísimo nishca cuartocunaca ¿imatata ricuchin?

¹³ Cristianocunaca ¿imashinata Taita Diosta adoranchi? Jehová Diosca 144 mil cristianocunatami paipa espíritu santohuan agllashca. Paicunaca Jehovapa propio huahuacunashnami can. Paicunaca jahua cielopimi sacerdotecuna shina Jesushuan sirvinga (Apoc. 1:6; 14:1). Jehova Diosca ungidocunataca cai alpapi cajpillatami paipa propio huahuacunatashna chasquin. Chaitami Santo nishca cuartoca ricuchin (Rom. 8:​15-17). Cutin Santísimo nishca cuartoca Jehová Dios causajuj jahua cielotami ricuchin. Shinallata Santo y Santísimo nishca cuartocunata separashca “cortinaca” Jesuspa aichayu tulluyu cuerpotami ricuchin. Jesús cai alpapi cashpa aichayu tulluyu caimandami jahua cieloman rishpa sacerdote principal shina nara sirvi usharca. Shinapash Jesús gentecunamanda huañushpaca cortinata anchuchi cuendami tucurca. Shinami Jesusca causarishca jipaca templo espiritualpa Santísimo nishca cuartoman yaicushpa ungidocunapash yaicui ushachun ayudarca. Pero Santísimo nishcaman o jahua cieloman yaicungapaca ungidocunapashmi paicunapa aichayu tulluyu cuerpota saquina o huañuna can. Shinami jahua cielopi Jesushuan mandaita ushanga (Heb. 10:​19, 20; 1 Cor. 15:50).

14. Hebreos 9:​12, 24-26​pi nishcashnaca ¿imamandata Jehovapa templo espiritualca ashtahuan ali can?

¹⁴ Jesús ñucanchita salvangapaj huañushcamanda y jahua cielopi sacerdote shina sirvijushcamandami Jehová Diostaca aliguta adoraita ushapanchi. Chaimandami Jehovapa templo espiritual ashtahuan ali cashcataca seguro capanchi. Israelitacunapa punllacunapica Sacerdote principalca gentecuna rurashca Santísimo nishca cuartomanmi yaicun carca. Shinallata paica animalcunapa yahuarta apashpami chai cuartomanga yaicun carca. Shinapash Jesusca Jehovapa ñaupapi jahua cielomanmi yaicurca. Chaipimi ñucanchita salvangapaj paipa perfecto valishca causaita cushcata Jehová Diosmanga ricuchirca. Chaitaca “pecadocunata tucuchingapami” rurarca (Hebreos 9:​12, 24-26​ta liipangui). Jesús huañushpa Jehová Diosman ashtahuan jatun sacrificiota carashcamandami gentecunapa pecadocunataca por completo anchuchita ushan. Cunanga jahua cielopi o cai alpapi causana esperanzata charishpapash, Jehová Diosta paipa templo espiritualpi tucuicunallata sirvita ushashcatami ricugripanchi.

15. Tabernáculo carpa huasipa patiopica ¿picunata Jehová Diosta sirvin carca?

¹⁵ Judiocunaca ¿imashinata Taita Diosta adoran carca? Tabernáculo carpa huasipica shuj patiomi tiarca. Chai patiopa muyundipica cortinacunatami churan carca. Chaipimi sacerdotecunaca paicunapa responsabilidadcunataca pactachin carca. Shinallata chai patiopica broncehuan rurashca jatun altarmi tiarca. Chai altarpimi israelitacunaca animalcunata rupachishpa Jehová Diosman caran carca. Shinallata chai patiopica sacerdotecuna Jehová Diosta adorangapaj paicunapa responsabilidadcunata nara pactachishpallata maquita, chaquita maillachunmi broncehuan rurashca yacuhuan shuj paila tian carca (Éx. 30:​17-20; 40:​6-8). Jipa punllacunapi rurashca templocunapica ucupipash y canllapipashmi patiocuna tiarca. Canlla patiopica na sacerdote  cashpapash israelitacunaca Jehová Diostaca adoraita usharca.

16. Templo espiritualpa cada patiopica ¿picunata Jehová Diostaca sirvin?

¹⁶ Cristianocunaca ¿imashinata Taita Diosta adoranchi? Jahua cielopi Jesushuan sacerdotecuna shina nara sirvishpallatami, cai alpapi causanajuj Jehová Diosta sirvij ungidocunaca templo espiritualpa ucu patiopimi sirvinajun. Israelitacunapa tiempopi tabernaculopa patiopi tiashca yacuhuan jatun pailaca, ungidocunata y tucuilla cristianocunataca pecadopi ama urmangapaj shuj limpio causaita charingapaj esforzarina importantepacha cashcatami yarichin. Shinaca ungidocunata apoyaj pipash na cuentai ushanalla ashtaca ashtaca gentecunaca ¿maipita Jehová Diostaca adoran? Apóstol Juanga shuj muscuipishnami paicuna ‘mandangapaj tiarina pushtu ñaupapi […] shayanajujta’ shinallata ‘tuta y punlla […] Diosta sirvinajujta’ ricurca. Shinaca na cuentai ushanalla ashtaca ashtaca gentecunaca cai alpapi o templo espiritualpa canlla patiopimi Jehová Diostaca sirvin (Apoc. 7:​9, 13-15). Tucuicunallata Jehová Diosta paipa templo espiritualpi sirvita ushashcamandaca ninandami cushijupanchi.

17. Jehová Diosmanga ¿ima sacrificiocunatata caraita ushapanchi?

¹⁷ Tucuilla cristianocunami Jehová Diosman sacrificiocunata carana jatun bendicionda charipanchi. Pero ¿imashinata chaita ruraita ushapanchi? Chaipaca Diospa Gobiernota apoyangapami ñucanchi tiempota, fuerzata y charishca cosascunata utilizana capanchi. Apóstol Pablo hebreo cristianocunaman nishcashnaca ñucanchicunapashmi Jehová Diostaca “siempre alabaita ushanchi”. Shina alabashpami Taita Diosmanga shuj sacrificiota cuenda cunajunchi. Ñucanchicunaca, “ñucanchi shimihuanmi paipa shutitaca shuj gentecunaman villachinchi” (Heb. 13:15). Shinaca tucui ñucanchi usharishcaguta rurashpami, Jehová Diosta adorana jatun bendicionda valichishcata ricuchipashun.

18. Hebreos 10:​22-25​pi nishcashnaca ¿ima cosascunatata na descuidana capanchi? Shinallata ¿ima cosascunatata ima horapash na cungana capanchi?

¹⁸ (Hebreos 10:​22-25​ta liipangui). Apóstol Pablo hebreocunaman escribishca cartapa ultimo partepica, Jehová Diosta adorangapaj ima cosascunata nunca na descuidana cashcatami parlarca. Por ejemplo, Jehovata mañana, ñucanchi esperanzamanda shujcunaman parlana, ñucanchi huauquipanicunahuan tandanajuna y randimanda animarina importantepacha cashcatami nirca. Pabloca “Taita Diospa punlla chayamujujta ricushpacarin, ashtahuanmi chaicunataca rurana capanchi” nircami. Shinallata Apocalipsis libropa último capitulocunapica Jehová Diospa angelca: “Taita Diostami adorana cangui” ninmi. Chaitaca ishcai viajetami nin. Shina rurashpaca Jehová Diosta adorana importantepacha cashcatami ricuchin (Apoc. 19:10; 22:9). Shinaca Jehovapa jatun templo espiritualmanda cai temapi yachajushcacunata y Jehová Diosta adorana jatun bendicionda charishcataca ima horapash na cunganachu capanchi.