1. Testigocunaca ¿imamandata cushilla capanchi? (Callari fotota ricupangui).

TESTIGO DE JEHOVACUNACA cushi cushimi capanchi. Jehová Diosta adorangapaj o ñucanchipura tandanajushpapash cushillami yalipanchi. ¿Imamandashi shina cushilla capanchi? Ñucanchicunaca Jehová Diosta sirvinajuimandami cushilla capanchi. Shinallata Jehová Dios cuenda cushilla cangapami esforzaripanchi (1 Tim. 1:11, NM ; Sal. 16:11). Jehová Diosca shuj cushi Diosmi can. Chaimandami ñucanchicunapash cushilla causachun yachachin (Deut. 12:7; Ecl. 3:12, 13).

2, 3. a) Cushilla canaca ¿imatata nisha nin? b) ¿Imacunamandallata cushilla canaca shinlli ricurin?

² ¿Quiquinga cushillachu capangui? Cushilla cana nishpaca, ñucanchimandallata cushilla cana, ima charishcaguhuan cushilla causanatami nijun. Shinallata Bibliapica ninmi, Jehová Diospa amigo canami ciertopacha cushijuita cun nishpa. Shinapash cai mundopi causanajuimandaca cushilla canaca shinllimi ricurin. ¿Imamandata shinlli can?

³ ¿Imacunamandata cushilla canaca shinlli can? Huaquinbica trabajomanda llujchijpi, cusahuarmi divorciarijpi, ñucanchi  juyashca familia o amigo expulsai tucujpi o pipash huañujpimi cushilla canaca shinlli can. Shinallata familia ucupi problemacuna tiajpi, trabajomanda o escuelamanda cumbacuna burlarijpi, Taita Diosta sirvimanda catiriashpa llaquichijpi o carcelpi churajpimi cushilla canaca shinlli can. Ashtahuanbash llaqui llaqui caimanda, o shuj millai ungüita charimanda, ñucanchi salud nali cajpimi cushilla canaca shinlli ricurin. Shinapash Jesusca ‘ninan cushijuihuan tucuita Mandaj’ caimandami gentecuna cushilla cachun ayudangapaj munan (1 Tim. 6:15; Mat. 11:28-30). Mateo 5-7​pica cai nali mundopi llaquicunahuan causashpapash, cushilla cangapaj imatalla rurana cashcatami Jesusca yachachirca.

4, 5. Cushilla cangapaj munashpaca ¿imatata rurana capanchi?

⁴ Jesusca nircami: “Diosmanda yachajungapaj, paicunapaj shungupi ninanda munajcunaca, ninandami cushijun. Jahua pachamanda shamuj mandanaca, paicunapajmi” can nishpa. Chai shimicunaca minishtirishcapachami can (Mat. 5:3). ¿Imashinata Taita Diosta rijsingapaj munashcata, pai ayudachun munashcatapash ricuchi ushapanchi? Bibliamanda yachajushpa, paipa mandashcacunata cazushpa, paipa munaita pundapi churashpami ricuchi ushapanchi. Shina rurashpaca ñucanchillatami cushilla cashun. Jehová Diospa munai pactarinapipash tucui shunguhuanmi crishun. Shinallata Bibliapi tucui nishcacuna pactarinata yachanami ‘ninanda cushijushpa shuyanajuchun’ ayudan. Shinami ima llaquicunatapash aguantashpa catishun (Tito 2:13).

⁵ Jehová Dioshuan alipacha amigo canami ciertopacha cushilla cachun ayudan. Chaimi apóstol Pabloca nirca: Jehová Dioshuan “shujlla tucushcamandaca, tucui causaipi cushijupaichi. Cutimbash: Cushijupaichi” nishpa (Filip. 4:4, NM ). Bibliapica ninmi: “Cai ali yachaita tarishpa, ali yuyaita charij runaca ninandami cushijun”. “Cai yachajunapi maquihuan charirijcunapaca, causaita cuj yurashnami. Cai ali yachaita chaririajcunaca, ninandami cushijun” nishpa. Biblia nishcashnaca, Jehová Dioshuan ali amigo cangapaca ali yachaitami charina capanchi (Prov. 3:13, 18).

6. Cushilla catingapaca ¿imata ruranata minishtirin?

⁶ Cushilla catingapaca Bibliamanda yachajushcata cazushpa causanaca minishtirishcapachami can. Minishtirishcapacha cajpimi Jesusca cashna nirca: “Cashna ñuca mandajujtaca, ñami yachanguichi. Chaita pactachishpa causajushpaca, ninandami cushijunguichi” nishpa (Juan 13:17; Santiago 1:25, liingui). Cai shimicunaca Jehová Diosta ashtahuan sirvichun, para siempre cushilla catichunmi ayudan. Shinapash cai nali mundopi causanajuimandami cushilla canaca shinlli can. Shinaca cushilla cangapaca ¿imatata rurana capanchi? Chaipaca Mateo 5-7​pi Jesuspa yachachishcacunata ricupashunchi.

7. ¿Imashinata llaquilla cajcunaca cushilla caita ushan?

⁷ “Llaquihuan huacashpa causajcunaca, ninandami cushijun. Paicunami cushijuita japinga” (Mat. 5:4). Huaquingunaca cashnachari tapurin: “¿Imashinata llaquilla cajcunaca cushilla caita ushan?” nishpa. Imagumandapash quejarij gentecunamandaca  Jesusca na parlajurcachu. Ashtahuangarin, Diosmanda yachajungapaj munaj gentecunamandami parlajurca. Shinapash cunanbica ‘tucurimui punllacunapi’ problemacunahuan causanajuimandami nali gentecunapash llaquirishpa causan. Chai nali gentecunaca paicunapilla pensarimandami Jehová Diosman quimiritapash, ciertopacha cushilla causaitapash na ushan (2 Tim. 3:1). Diosmanda yachajungapaj munajcunaca ashtaca gentecuna Taita Diosta na rijsingapaj munashpa, paipa mandashcata na cazujta ricushpami ninanda llaquirin. Shinallata juchayu caimanda paicunallata llaquicunata charishcatapashmi cuenta japin. Shinapash Jehová Diosca chai gentecuna tucui shunguhuan arripintirijta ricushpami, cunanbi cushilla causachun, shamuj punllacunapipash para siempre causachun Bibliahuan ayudan (Ezequiel 5:11; 9:4, liingui).

8. Na ñapash fiñarijcunaca ¿imashinata cushilla caita ushan?

⁸ “Na ñapash fiñarijllacunaca, ninandami cushijun. Paicunami, cai pachata paicunapaj cachun japinga” (Mat. 5:5). Na ñapash fiñarijcunaca ¿imashinata cushilla caita ushan? Huaquin gentecunaca millai, jaicata culirajcuna caimandami imapash problemacunata charishca. Shina gentecunapash Taita Diosmanda yachajushpami “mushujta causangapaj” paicunapa causaipi cambiashca. Chaimi paicunaca juyanata, humilde canata, shujcunata ali tratanata, na ñapash culiranata yachajushca (Col. 3:9-12). Shina yachajuimandami paicunaca shujcunahuan ali llevarita, cushilla causaitapash ushashca. Bibliaca ninmi, chashna gentecunami “llactata [o alpataca] japinga” nishpa (Sal. 37:8-10, 29).

9. a) “Na ñapash fiñarijcunaca” ¿imashinata cai alpataca japinga? b) “Yarjachinshna, yacunayachinshna imatapash cashcatapacha rurajcunaca ¿imashinata cushilla caita ushan?

⁹ “Na ñapash fiñarijcunaca” ¿imashinata cai alpataca japinga? Ungidocunaca, Jesushuan cai alpata mandai callarishpami cai alpataca japinga (Apoc. 20:6). Cutin ashtaca ashtaca gentecunaca cai alpapi para siempre cushilla, jucha illaj, ali causanajushpami cai alpataca japinga. Cai ishcai grupomanda parlashpaca Jesusca cashnami nirca: “Yarjachinshna, yacunayachinshna imatapash cashcatapacha ruranata munajcunaca, ninandami cushijun” nishpa (Mat. 5:6). Jehová Dios tucui nalicunata tucuchijpimi chai shimicunaca pactaringa (2 Ped. 3:13). Chaimi chai gentecunaca ñana llaquirishpa para siempre cushilla causanga (Sal. 37:17).

10. Shujcunata llaquina nishpaca ¿imatata ningapaj munan?

¹⁰ “Shujcunata llaquishpa juyajcunaca, ninandami cushijun. Paicunami, Dios llaquinata japinajunga” (Mat. 5:7). Shujcunata llaquina nishpaca, shujcunata juyaihuan llaquishpa tratanatami ningapaj munan. Shinallata gentecuna llaquipi cajpi paicunamanda llaquirina cashcatapashmi nijun. Shinapash shujcunata llaquinchi nishpallaca na quedanachu capanchi. Ashtahuangarin pipash llaquipi cajpi ayudana cashcatami Bibliapica yachachin.

11. Samaritano runagumandaca ¿imatata yachajupanchi?

¹¹ (Lucas 10:30-37, liingui). Shujcunata llaquishpa tratanamanda intindichingapami Jesusca samaritano runagumanda parlarca. Samaritano runaguca macai tucushca jarita ricushpami ninanda llaquirishpa ayudarca.  Chai chimbapuraimanda Jesús parlashpaca chashnallatami rurana canguichi nishpami mandarca. Shinaca cashna tapuripashunchi: “¿Samaritano runagushnachu ayudajuni? ¿Shujcunata llaquinichu? Pipash llaquipi cajpica ¿ciertopacha llaquishcatachu ricuchijuni? Ashtahuan ayudangapaca ¿imatata rurajuni? ¿Mayorlla huauquipanicunata, viudagucunatapashchu ayudajuni? ¿Na Testigo taitamamacunata charij jovengunatapashchu ayudajuni? ¿Llaqui llaqui cajcunatapash ayudangapachu esforzarijuni?” nishpa (1 Tes. 5:14; Sant. 1:27).

12. Shujcunata llaquishpa ayudanaca ¿imashinata cushilla cachun ayudan?

¹² Shujcunata llaquishpa ayudanaca ¿imashinata cushilla cachun ayudan? Shujcunata ayudashpaca ‘carajpi japijcunatapash yalimi ninanda cushijushun’. Shinami Jehová Diostapash ninanda cushichinchi (Hech. 20:35; Hebreos 13:16, liingui). Rey Davidca shujcunata llaquishpa ayudajcunamandaca cashnami nirca: “Mandaj Diosmi, huacaichishpa causaitapash caranga. Cai pachapipash, ninanda cushijushpami causajunga” nishpa (Sal. 41:1, 2). Shujcunata llaquishpa juyaihuan ayudajpica, Jehová Diospashmi ñucanchicunataca llaquishpa juyaihuan ayudanga. Chaimi ñucanchicunaca para siempre cushilla causashun (Sant. 2:13).

13, 14. ¿Imamandata “shungupi ima mapapash illajcunaca” ninanda cushijun?

¹³ Jesusca nircami: “Shungupi ima mapapash illajcunaca, ninandami cushijun. Paicunami, Taita Diostaca ricunga” nishpa (Mat. 5:8). Shungupi imapash mapa illajcuna cangapaca, ñucanchi pensamientocunapi, ñucanchi munaicunapipashmi mapa illaj cana capanchi. Shina cashpallami Jehová Diosta ali sirvi ushashun (2 Corintios 4:2, liingui; 1 Tim. 1:5).

¹⁴ Shungu ucupi imapash mapa illaj gentecunaca, Jehová Dioshuan ali amigo caimandami cushilla causan. Jehová Diosca cashnami nirca: “Churajunata tajshajcunaca, ninanda cushijunguichi” nishpa (Apoc. 22:14). Churajunata tajshana nishpaca ¿imatata ningapaj munan? Jehová Diosca ungidocunata jucha illajtashna ricuimanda, paicunaman jahua cielopi na huañushpa cushilla  causana bendicionda cunatami ricuchin. Cutin cai alpapi para siempre causana ashtaca ashtaca gentecunapaca, Jehová Diospa ñaupajpi ali ricurimanda paipa ali amigocuna cashcatami ricuchin. Chaimi Bibliapica cashna nin: “Churajunatapash tajshashpami, Llamapaj yahuarpi yurajyachishca” nishpa (Apoc. 7:9, 13, 14).

15, 16. Shungupi ima mapatapash na charijcunaca ¿imashinata Jehová Diostaca ricun?

¹⁵ Bibliapica ninmi: Pipash Taita Diospa “ñavitaca na ricungachu”. Taita Diospa ñavita “ricushpa causaitaca, na ushangachu” nishpa (Éx. 33:20). Shinapash ¿imamandashi Jesusca shungupi ima mapapash illajcunaca “Taita Diostaca ricunga”? nirca. “Ricuna” nishpaca, “imatapash yuyanata, yachanata, intindinatami” ricuchin. Shinaca Taita Diosta ricungapaca, Jehová Dios imashina cajtami intindina, alicachina can (Efes. 1:18). Jesusca, Jehová Dios imashina cajtaca ali alimi ricuchirca. Chaimi cashna nirca: “Maijambash ñucata ricushpaca, ñuca Taitatami ricujun” nishpa (Juan 14:7-9).

¹⁶ Shinallata Jehová Dios ñucanchita imashina ayudashcata ricushpami, Jehová Diostaca ricunchi (Job 42:5). Ashtahuanbash Jehová Diosta tucui shunguhuan ali sirvijcunaman ima bendiciongunatalla cunata ricushpami Jehová Diostaca ricui ushapanchi. Shinapash ungidocunaca jahua cielopi causarishpami, Jehová Diostaca ñavi ñavi ricuita ushan (1 Juan 3:2, NM ).

17. Tucuicunahuan ali cajcunaca ¿imamandata cushilla can?

¹⁷ Jesusca caitapashmi nirca: “Fiñanajushpa causajcunata alichijcunaca, ninandami cushijun” nishpa (Mat. 5:9). Tucuicunahuan ali caj gentecunaca cushillami causan. Chaimi Jesusta catij Santiagoca nirca: “Casilla ali causajcunaca, imatapash cashcatapacha rurashpami, tarpushcata tandachinshna casilla aliguta causanajun” nishpa (Sant. 3:18). Shinaca huauquipanicunahuan o familiapi pihuanbash culirarishca cashpaca, paicunahuan ali tucungapaj ayudahuai nishpami Jehová Diostaca mañana capanchi. Shina rurajpimi ali cualidadcunata ricuchishpa chai problemata arreglachun, cushilla cachunbash Jehová Diosca paipa espíritu santohuan ayudanga. Ñucanchirami tucuicunahuan ali cangapaj esforzarina capanchi. Chaita rurana minishtirishca cajpimi Jesusca cashna nirca: “Taita Diosman imagutapash carangapaj, altarman apashpa ña chayajushpa, cambaj huauqui canda fiñashca purijushcata yaringui. Shina yarishpaca, carangapaj apamushcataca altar ñaupajpi saquishpa, cambaj cumbahuanra ali tucungapaj ringui. Chai jipaca, Diosman carangapaj apamushcataca caragringuilla” nishpa (Mat. 5:23, 24).

18, 19. Catiriashpa llaquichijpipash ¿imamandata Jehovata sirvijcunaca ninanda cushijun?

¹⁸ “Ñucata catinajujpi cangunata na ricunayachishpa catiriashpa llaquichijpi, imatapash llullashpa nalicachijpica, ninanda cushijunguichi”. ¿Imamandata Jesusca cashna nirca? Chaimandallata parlashpami Jesusca cashna nirca: “Ninandapacha cushijunguichilla. Canguna juyailla japinaca, jahua pachapimi. Dios ima nishcata villajcunatapash, chashnallatami catiriashpa llaquichinajurca. Chai villajcunaca, cangunapaj pundami causanajurca” nishpa (Mat. 5:11, 12). Apostolcunataca  macashpami ña na villachishpa catinachu canguichi nirca. Shina nijpipashmi paicunaca ‘mandajpuracunalla tandanajushca, ñaupamanda Ilujshishpaca ninanda cushijunajurca’. Shinapash paicunata macashcamandaca na cushijunajushcangachu. Ashtahuangarin apostolcunaca, ‘Jesuspa Shutimanda llaquita apanajuimandami ninanda cushijunajurca’ (Hech. 5:41).

¹⁹ Cunanbi Jehovata sirvimanda catiriashpa llaquichijpipash o shuj llaquicunata charishpapashmi cushijushpa aguantanchi (Santiago 1:2-4, liingui). Ñucanchicunapash llaquichichunga na munanchichu. Shinapash Jehovata tucui shunguhuan sirvishpa catijpica, paillatami chai llaquita na manllashpa aguantachun ayudanga. Cunanga Henryk Dornik huauquita, paipa huauquitapash ima pasashcata ricupashunchi. Paicunataca, agosto de 1944 huatapimi, shuj campo de concentracionman cacharca. Paicunata llaquichijcunaca nircami: “Paicunata yapata llaquichijpipash, ninandami cushijun” nishpa. Shinapash Henryk huauquica nircami: “Shina ninanda llaquichichunga na munarcanichu. Shina cajpipash Jehovapa ñaupajpi ali ricuringapaj munaimanda, paita tucui shunguhuan sirvijuimanda, chai llaquicunata aguantajushcata yachashpami ninanda cushijurcani. Jehovata tucui shunguhuan mañanami chai llaquicunata aguantachun ayudahuarca” nishpa.

20. Cushi Diosta sirvinaca ¿imamandata ñucanchitapash cushichin?

²⁰ Diosta sirvimanda catiriashpa llaquichijpipash, ungushca cashpa, ña mayorlla cashpa o familiamanda pipash Jehovata ama sirvichun jarcajpipash Jehová Diosta tucui shunguhuan sirvijuimandaca ninandami cushijunchi (1 Tim. 1:11, NM ). Shinallata ‘na llullaj Taita Dios’ paipa tucui nishcata pactachinapi tucui shunguhuan crinami ñucanchitaca cushichin (Tito 1:2). Jehová Diospa tucui nishcacuna pactarijpica, cunanbi charishca llaquicunataca yaritallapash na yarishunllu. Paraíso alpagupi ashtaca ashtacata Jehová Dios bendicianataca yaitallapash na yai ushanchichu. Ashtahuanbash ‘casilla ali causaihuanmi, ninanda cushijunajushun’ (Sal. 37:11).