TEMA 38
‘Ñucapaman shamuichi. Ñucami cangunataca samachisha’
‘Shaijushcashna, aparishcashna causajcuna ñucapaman shamuichi. Ñucami cangunataca samachisha’ (MAT. 11:28).
CÁNTICO 17 ‘Ari munanimi’
CAITAMI YACHAJUPASHUN *
1. Mateo 11:28-30pica ¿imatata Jesusca nirca?
TAUCA gentecunapa ñaupajpi cashpami Jesusca cai shimicunata nirca: “Ñucapajman tucuilla shamuichi. Ñucami cangunataca samachisha” nishpa (Mateo 11:28-30, liingui). Cai shimicunaca na yanga nishcacunallachu can. Caita intindingapaca, ashtaca tiempotami quilla nanaihuan huañuj huarmiguta imashina ayudashcata ricupashun.
2. Shuj huarmiguhuanga ¿imata pasarca?
2 Cai huarmiguca uchalla ayudachunmi minishtijurca. Paica ali tucusha yashpami tauca doctorcunapaman rishca carca. Ña 12 huatacunatami cai quilla nanaihuanga sufrijurca. Moisesman cushca Leypi nishca shinaca cai huarmiguca shujcunapa ñaupajpica ‘mapami carca’ (Lev. 15:25). Ungushca gentecunata Jesús jambijujta yachashpami cai huarmigupash Jesusta mascangapaj rirca. Jesusta ricushpaca Jesuspa churajuna pundata tacarishpallami ali tucurca. Shinapash Jesusca cai huarmigu ali tucuchunllaca na ayudarcachu. Jesusca cai huarmigutaca ali, respetohuanmi tratarca. Paita juyashcatapashmi ricuchirca. Chaimandami paihuan parlajushpaca “ñuca huahualla” nirca. Chaita uyashpaca chai huarmiguca cushillami sintiririanga (Luc. 8:43-48).
3. Cai temapica ¿ima tapuicunamandata yachajupashun?
3 Imashinami ricupanchi, cai huarmigumi Jesuspa ayudata mascarca. Chai huarmigushnami ñucanchicunapash Jesuspa ayudata mascangapaj esforzarina capanchi. Cunanbica Jesusca ñana milagrocunata rurashpa jambinllu. Shinapash “ñucapajman tucuilla shamuichi. Ñucami cangunataca samachisha” nijunmi. Cai temapica cai 5 tapuicunamandami yachajupashun: ¿Imashinata Jesuspa ayudata mascai ushapanchi? “Ñuca yachachishcataca, yugota aparinshna yachajuichi” nishpaca ¿imatata Jesusca nijurca? Jesusmandaca ¿imatata yachajupanchi? Jesús mandashcata pactachinaca ¿imamandata ñucanchita cushichin? Jesuspa yugota aparinshna cashpapash ¿imashinata cushilla caita ushapanchi?
“ÑUCAPAJMAN TUCUILLA SHAMUICHI”
4, 5. Jesuspa ayudataca ¿imashinata mascaita ushapanchi?
4 Jesustaca pai imata nishcata, pai imata rurashcata liishpami rijsita ushapanchi (Luc. 1:1-4). Paipa causaimandaca yachajunapachami capanchi. Jesustaca paipa catijcuna tucushpa, bautizarishpapashmi ali rijsishcata ricuchi ushapanchi.
5 Shinallata anciano huauquicunapa ayudata mascashpapashmi Jesuspa ayudata mascashcata ricuchipanchi. Anciano huauquicunatami Jesusca ñucanchicunata cuidachun mingashca (Juan 21:16; Efes. 4:7, 8, 11; 1 Ped. 5:1-3). Shinapash ancianocunapa ayudataca ñucanchillatami mascana capanchi. Shinami paicunaca ayudaita ushanga. Cunanga Julian shuti huauquimanda parlapashun. Julianga ninmi: “Ñuca salud nali cajpimi Betelmanda llujshina tucurcani. Chaimi ama llaquilla sintirichun shuj amigoca, ancianocunata canda visitachun cayangui nihuarca. Ancianocuna visitachunga na minishtinichu yashpapashmi ancianocunata cayarcani. Shinapash ancianocuna ñucata visitashca jipaca cushillapachami sintirircani. Ancianocunaca ashtacatami ayudahuarca” nishpa. Huauqui Julianda visitashca ishcai ancianocuna shinami Jehovata ali sirvij ancianocunaca ‘Cristopaj yuyaita charichun’, Jesuspa chaquita catichun, paishna imagutapash rurachun ayudan (1 Cor. 2:16; 1 Ped. 2:21). Ñucanchita ayudangapaca ancianocunatami Jesusca cushca. Chaimi ninanda cushijupanchi.
“YUGOTA APARINSHNA YACHAJUICHI”
6. ‘Yugota aparinshna yachajuichi’ nishpaca ¿imatata Jesusca ningapaj munarca?
6 Jesuspa yugota aparinshna yachajuichi nishpaca, Jesusta cazuna cashcata, shinallata Jesushuan shuj yugota ñucanchicunapash aparinshna Jehovata sirvingapaj catina cashcatami ningapaj munashcanga. Shinaca Jehovata sirvingapaca shinllita esforzarina cashcatami intindipanchi.
7. a) Mateo 28:18-20pica ¿imatata rurachunda animajun? b) ¿Imatata seguro capanchi?
7 Jehová Diosta candallami tucui causaipi sirvisha nishpami bautizaripashcanchi. Shinami Jesuspa invitacionda chasquishcata ricuchipanchi. Cunanbipash Jesusca tucui gentecunatami Jehová Diosta rijsichun invitajun. Jehovata tucui shunguhuan sirvijcunataca Jehovallatami siempre ayudashpa catinga (Juan 6:37, 38). Jehová Diosca Jesusmanmi gentecunaman ali villaigucunata villachichun mingarca. Chaitallatami ñucanchicunapash rurashpa catina capanchi. Chai villachinapi Jesús ñucanchita ayudanataca seguromi capanchi (Mateo 28:18-20, liingui).
‘ÑUCA YACHACHISHCATA YACHAJUICHI’
Jesús shina shujcunata ñucanchicunapash cushichipashunchi. (Párrafo 8-11 ricupangui). *
8, 9. a) Gentecunaca ¿imamandata Jesushuan yalinataca gushtan carca? b) ¿Imacunatata tapurina capanchi?
8 Humilde gentecunaca Jesushuan yalinataca gushtanmi carca (Mat. 19:13, 14; Luc. 7:37, 38). Jesusca fariseo runacunashnaca na carcachu. Fariseocunaca jariyashcacuna, nalicunami carca (Mat. 12:9-14). Cutin Jesusca humildemi carca. Tucuicunatami juyaihuan tratan carca. Jesusca paipa catijcunapash humildecuna cachun, shujcunata ayudachun, ama jariyashcacuna cachunmi yachachirca. Cutin fariseocunaca charishca jahuapash ashtahuanmi charijyangapaj munan carca (Mat. 23:2, 6-11). Gentecunaca fariseocunataca ninandami manllan carca (Juan 9:13, 22). Paicunahuan ricujpica Jesusca juyaihuan, ali shimigucunata nishpami gentecunataca tratan carca.
9 Jesusmandaca ¿imatata yachajupashcanchi? Tapuripashunchi: “¿Shuj gentecunaca humilde, na ñapash culiraj cashcatachu ricuhuan? Shujcunata ayudangapaca ¿imaguta rurana cajpipash ruranillachu? Shujcunataca ¿respetohuan, aligumanllu tratani?” nishpa.
10. ¿Imashpata Jesuspa catijcunaca Jesushuan yalingapaj munan carca?
10 Jesusca na ñapash culirajlla cajpimi paipa catijcunaca paihuan yalinata gushtan carca. Jesuspash paicunata yachachinataca gushtanmi carca (Luc. 10:1, 19-21). Paicunataca imapash tapuicunata rurachunmi animan carca. Shinallata paicuna imata nijtapash ali alimi uyan carca (Mat. 16:13-16). Imashinami sisa junda shuj uchilla alpaguta cuidajpica juyailla sisagucuna viñan. Shina cuendami Jesuspa catijcunaca, Jesusmanda ashtacata yachajushpa, imata yachajushcatapash ali pactachinajurca.
Shujcunahuan cushilla parlapashunchi.
Cushilla villachipashunchi.
Villachinapi ocupado, humildepash capashunchi. *
11. ¿Imatata tapurina capanchi?
11 Congregacionbi, familia ucupi, o maipipash shujcunata mandana derechota charishpaca, cashnami tapurina capanchi: “Trabajopi cashpa o huasipi cashpapash ¿imashinata shujcunata tratani? ¿Tucuicunahuan tranquilo, ali cangapachu esforzarini? ¿Shujcunaca ñucata na manllashpa fácil tapuhuanllachu? ¿Shujcuna imagutapash nijpica alichu uyani?” nishpa. Fariseocunashnaca na canachu capanchi. Shujcuna paicunata tapuchichunga na gushtanllu carca. Paicunashna na pensajpipashmi shujcunataca llaquichinlla carca (Mar. 3:1-6; Juan 9:29-34).
‘ÑUCAMANDAMI CANGUNACA SAMANATA TARINGUICHI’
12-14. Jesús villachichun mandashcata pactachishpaca ¿imamandata cushilla, ali sintiripanchi?
12 Jesús villachichun mandashcata pactachishpaca cushilla, alimi sintiripanchi. ¿Imamandata shina sintiripanchi? Ricupashun.
13 Jehovapash, Jesuspash, ancianocunapash ayudanajushcamanda. Jehová Diosca tucuita ruraj, tucuita ushaj cashpapash ñucanchi imaguta rurashcata ricushpaca ninandami agradicin. Imaguta rurashcataca yaipimi charin (Heb. 6:10). Pai mingashcata pactachichunbashmi ushaita cushpa ayudan (2 Cor. 4:7; Gál. 6:5). Rey Jesusmi shujcunata imashina tratana cashcataca ali ali ricuchin (Juan 13:15). ‘Jatun michij’ Jesuspa chaquitami ancianocunaca catingapaj esforzarin (Heb. 13:20; 1 Ped. 5:2). Ancianocunaca ali shimicunata nishpa ñucanchita animangapaj, yachachingapaj, imamandapash cuidangapami esforzarin.
14 Villachingapaj ali cumbacunata charishcamanda. Cai mundopica pipash na trabajopica juyaj, ali cumbacunataca charinllu. Jehová Diosta sirvijcunallami ali cumbacunataca charipanchi. Caipi pensaripashun. Ñucanchi cumbacunaca Jehovapa mandashcacunata pactachishpapash, shujcunata yalimi canchi nishpaca na pensanllu. Imatapash ñapash rurangapaj ali cashpapash humildecunami can. Shujcunata ricushpapash paimi ñucata yali can nishpami pensarin. Ñucanchicunaca na yanga cumbacunallachu capanchi, alipacha amigocunami capanchi. Jehovata sirvijcunaca ñucanchimanda huañuna cajpipash huañungallami.
15. Jehovamanda villachina bendicionda charishcamandaca ¿imashinata sintiripanchi?
15 Jehovamanda villachina bendiciondami charipanchi. Gentecunamanga Jehová Diosmanda cabalgutami yachachipanchi. Shinami Diablo llullaj cashcata ricuchipanchi (Juan 8:44). Diabloca llullacunata crichishpami gentecunataca ninanda llaquichin. Por ejemplo, Jehová Diosca na juyanllu ñucanchi juchacunataca nunca na perdonangachu nishpami Diabloca crichin. Caicunata nishpaca gentecunataca shungu faquirishcashna llaquillapachami sintichin. Shinapash Jesuspa ayudata mascajpica, Jehová Diosca ñucanchi juchacunata perdonangami. Jehová Diosca ñucanchita ninandami juyan (Rom. 8:32, 38, 39). Gentecunata Jehová Diosmanda yachachishpa, paipi confiashcamanda Jehová paicunata bendiciajta ricushpaca ninandami cushijupanchi.
JESUSPA YACHACHISHCA YUGOTA APARINSHNA CATIPASHUNCHI
16. Jesuspa yugota aparinshna catinaca ¿imashpata shuj trabajohuanga naigual can?
16 Jesuspa yugota aparinaca na shuj shinlli trabajoshnachu can. Cunanga caipi pensaripashunchi. Punlla entero trabajashpaca shaijushca, huaquinbicarin trabajashcamanda cushillapash na sintiripanchichu. Cutin Jehovata sirvishpa, Jesuspa mandashcacunata cazushpaca cushillami sintiripanchi. Punlla entero trabajashca cashpaca shaijushca caimandami tandanajuiman ringapaca ninanda esforzarina tucupanchi. Masqui shaijushca tandanajuiman rishpapash huasiman muyushpaca cushillami sintiripanchi. Shinallatami villachingapaj llujshishpa, estudio personalta o Bibliamanda ñucanchilla yachajushpaca cushilla sintiripanchi. Shina rurashpaca ¿imatata chasquishun? Chaicunata rurangapaj esforzarishpaca ñucanchillatami cushilla causaita chasquishun.
17. a) Ñucanchicunaca ¿imatata yaipi charina capanchi? b) Ñucanchicunaca chai jovenmandaca ¿imatata yachajupanchi?
17 Ñucanchicunaca shaijunchillami. Chaitaca yaipimi cana capanchi. Chaimi imapita yapa tiempota yalijuni nishpa tapurina capanchi. Cunanga caita yaripashunchi. Shuj punllaca charij charij shuj jovenmi Jesustaca cashna tapurca: “Causaita causagrinata ñuca charingapaca, ¿imatata rurana capani?” nishpa. Chai jovenga Moisesman cushca Leytaca alimi yachashca carca. Shinallata Bibliapi Marcos libropica chai joven ali ali cashcatami parlan. Chaimandami Jesusca chai jovendaca ninanda llaquirca. Chaimi Jesusca chai jovendaca cashna nirca: ‘Cunanga, can imata charishcatapash tucuillata jatushpa ñucata catihuai’ nishpa. Chaicunata saquinaca chai jovenbaca na fácil carcachu. ¿Imamandata na fácil carca? Paica ciertopacha Jesusta catingapaj munaitaca paipa shungupica na charircachu. “Chai runaca ninan charij” caimandami Jesustaca na catita usharca (Mar. 10:17-22). Shina rurashpaca Jesuspa yugota aparinshna catinataca na munashcatami ricuchirca. Shina rurashpaca chai jovenga ‘imata charishcacunatara’ paipa causaipi pundapi churashcatami ricuchirca (Mat. 6:24). Ñucanchica ¿imatata ruranchiman carca?
18. ¿Imatata cada uno tapurina capanchi?
18 Cada punllami ñucanchi causaipi imata pundapi churajushcata tapurina capanchi. ¿Imamandata shina tapurina capanchi? Shinallami imacunatalla ñucanchi causaipi pundapi churajushcata cuenta japipashun. Cunanga Mark jovenmanda yachajupashunchi. Paica ninmi: “Charishca cosascunahuan cushilla causani yanmi carcani. Precursor cashpapash siempremi culquita ashtahuan charinapi, ashtahuan ali causanapimi pensarin carcani. Shinapash tapurinmi carcani ¿imashpata na cushilla caita ushani? nishpa. Chaipimi cuenta japircani, ñuca munaitara pundapi churajushcata. Jehovamanga ñuca puchushca tiempotalla cujushcatami cuenta japircani” nishpa. Jipamanga Mark huauquica cambiarcami, Jehovata ashtahuan sirvingapami tiempoguta llujchirca. Mark huauquica ninmi: “Huaquinbica culquipimi yapata preocuparini. Shinapash Jehová Dios ayudanapimi tucui shunguhuan confiani. Shinallata Jesuspa mingashcata pactachingapami ninanda esforzaripani” nishpa.
19. ¿Imatata yaipi charina capanchi?
19 Jesuspa yugota aparinshna catingapaca cai quimsa yuyaicunatami rurashpa catina capanchi. Primero, Jehovapa mingashcata pactachingapaj yaipi cana capanchi. Villachinata Jehová Dios ñucanchiman mingashcataca pai munashca shinami rurashpa catina capanchi. Ñucanchicunaca Jehovapa mingashcata pactachijcunallami capanchi. Chaimandami Jehová Diosca ñucanchi dueño can (Luc. 17:10). Jesuspa yugota ñucanchi munashcashna aparishpaca ñucanchillatami llaquita apashun. Cunanga caipi pensaripashunchi, shuj huagrata paitalla yugojpica llaqui apaita ushanmi. Shinallata huagrata dueño maiman apangapaj munajujpi huagra paipa munashcata caita chaita rishpaca paillatami yangamanda shaijushca caita ushan. Shina cuendallatami, ñucanchicunapash siempre Jehovata cazushpaca ima llaquita charishpapash aguantashpa catita ushapashun. Jehovapa munai pactarichunga pipash na jarcaita ushangachu (Rom. 8:31; 1 Juan 4:4).
20. Jesuspa yugota aparinshna catingapaca ¿imatata rurana capanchi?
20 Segundo, villachinataca shuj trabajotashnaca na ricunachu capanchi. Villachishpaca Jehová Diosta alabangapami munapanchi. Punda tiempopi Jesusta catijcunapa tiempopica, huaquingunaca charishca jahua ashtahuan charingapaj ansiarijcuna, mitsacunami tiarca. Shina gentecuna caimandami Jesuspa yugota aparinshna catitapash na usharca. Cushillapash na causaita usharcachu (Juan 6:25-27, 51, 60, 66; Filip. 3:18, 19). Cutin chai tiempopi shuj gentecunaca Taita Diosta, gentecunata juyaimandami imagutapash rurarca. Paicunaca cai alpapi cashpallatami Jesuspa yugota aparinshna cushilla causarca. Shinallata paicunaca Jesushuan jahua cielopi causanatapashmi shuyashpa causarca. Ñucanchicunapash, Jesuspa yugota aparinshna causashpaca na ñucanchi munaitalla rurashpa causashunllu. Shina causashpaca ñucanchillatami cushilla causaita ushapashun.
21. Mateo 6:31-33pi nishca shinaca Jehová Diosca ¿imatata ruranga?
21 Tercero, villachijushpa llaquicunata charinataca alimi yachapanchi. Villachimanda sufrinataca alimi yachapanchi. Shinallata Jesusca nircami, paita catijcunataca llaquichingami nishpa. Shinapash ima llaquicunata charishpapash Jehová Dios chai llaquicunata aguantashpa catichun ayudanataca seguromi capanchi. Chai llaquicunata aguantashpaca ashtahuan shinllicunami tucupashun (Sant. 1:2-4). Jehová Diosca paipa Churi Jesús ñucanchita cuidachun, huauquipanicuna cuidashpa cushichichunmi saquishca (Mateo 6:31-33, liingui; Juan 10:14; 1 Tes. 5:11). ¿Imatata ashtahuan minishtipanchi?
22. ¿Imamandata cushilla causaita ushapanchi?
22 Ashtaca tiempota quilla nanaihuan huañujuj huarmiguta Jesús jambijpica chai ratollatami chai huarmiguca alillata sintirirca. Shinapash Jesusta tucui shunguhuan catishpallami chai huarmiguca para siempre cushilla causaita ushana carca. Chai huarmiguca ¿imatashi rurarca? Paica Jesuspa yugota aparinshna causanatami agllarca. Shina agllaimandami paica Jesushuan jahua cielopi can. Chai bendicionga nimahuan na igualanllu. Shinaca, cai alpapi causana cashpa o jahua cielopi causana cashpapash “ñucapajman tucuilla shamuichi” Jesús nishcatami cazushpa catina capanchi.
CÁNTICO 13 Jesuspa chaquitami catisha
^ par. 5 Jesusca paipa ayudata mascachunmi munan. Shinapash paipa invitacionda chasquingapaca ¿imatata rurana capanchi? Cai temapimi cai tapuimanda yachajupashun. Shinallata Jesusta ayudanaca ñucanchitallata ayudaj cashcatami ricupashun.
