TEMA 37
Jehová Diosta cazushpa catipashunchi
Taita Diostacarin, “¿nachu ashtahuan aliguta cazuna canchi?” (HEB. 12:9).
CÁNTICO 9 Jehová Diosmi ñucanchita mandajun
CAITAMI YACHAJUPASHUN *
1. ¿Imamandata Jehová Diosta cazuna capanchi?
JEHOVÁ DIOSTACA cazunapachami capanchi. Pai ñucanchita rurashcamandami ñucanchita mandana derechota charin (Apoc. 4:11). Jehová Diostaca pailla ali mandai ushashcamandapashmi cazunapacha capanchi. Cai tucui huatacunapica tauca gentecunami shujcunata mandana autoridadta charishca. Shinapash Jehová Diosllami ali yachaj, llaquij, juyaj, na ñapash fiñarij, ninanda llaquij can (Éx. 34:6; Rom. 16:27; 1 Juan 4:8).
2. Hebreos 12:9-11pi nishca shinaca ¿imamandata Jehovataca cazuna capanchi?
2 Jehová Diostaca na manllaimandachu cazupanchi. Paita juyaimandami cazunchi. Jehová Diostaca ñucanchi taitatashnami ricupanchi. Hebreo huauquipanicunaman escribijushpaca apóstol Pabloca, Jehová Diosta cazuchunmi mandarca. ‘Ñucanchipaj ali cachunmi’ Jehovataca cazuna capanchi (Hebreos 12:9-11, liingui).
3. a) Jehovata cazushcataca ¿imashinata ricuchipanchi? b) Cai temapica ¿ima tapuicunatata yachajupashun?
3 Jehová Diostaca paipa mandashcacunata cazungapaj esforzarishpa, ñucanchipilla ama confiaringapaj esforzarishpami paita cazushcataca ricuchipanchi (Prov. 3:5). Jehová Dios imashina cashcata yachashpaca ashtahuanmi cazungapaj munapashun. Pai imata mandashpapash, imata rurashpapash pai imashina cashcatami ricuchin (Sal. 145:9). Jehová Diosta ashtahuan rijsishpaca ashtahuanmi paita juyashun. Jehovata juyaimandami pai caitaca ama ruranguichu, caitaca rurangui nijuchunga na minishtinchi. Paita juyaimandami Jehová alicachishcata alicachingapaj, millanayachishcataca millanayachingapaj esforzarinchi (Sal. 97:10). Shinapash Jehovata cazunaca ¿siemprechu fácil can? Anciano huauquicuna, taitacuna, mamacunaca ¿imatata gobernador Nehemiasmanda, rey Davidmanda, Jesuspa mama Mariamandaca yachajuita ushan? Cai temapica cai tapuicunamandami yachajupashun.
JEHOVATA CAZUNACA ¿SIEMPRECHU FÁCIL CAN?
4, 5. Romanos 7:21-23pi nishca shinaca ¿imamandata Jehová Diosta siempre cazunaca na fácil can?
4 Juchayucuna nacirishcamandami Jehovata siempre cazuitaca na ushapanchi. Chaimandami na siempre cazui ushanchilla. Adán y Eva na micuna frutata micushpaca, Taita Diospa mandashcacunata ladoman saquishpami paicunapa munaita rurarca (Gén. 3:22). Adán y Eva shinami cunanbipash tauca gentecunaca paicunapa munaicunatalla rurashpa causan.
5 Jehová Diosta sirvijcunapashmi Jehovata tucuipi cazuitaca na ushapanchi. Apóstol Pablopashmi Jehovata cazungapaca ninanda esforzarina carca (Romanos 7:21-23, liingui). Apóstol Pablo shinami ñucanchicunapash Jehovapa munaita rurangapaj munanchi. Chaimandami ñucanchi nali munaicunata mishangapaj esforzarina capanchi.
6, 7. ¿Imamandapashta Jehovata siempre cazunaca na fácil can? Shuj experienciamanda parlapai.
6 Jehovapa munaita na pactachij gentecunapurapi viñashcamanda, taitamamacuna imashina viñachishcamandapashmi Jehová Diosta cazunaca na fácil can. Ashtaca gentecunaca paicunapa propio yuyaicunata catimandami Diospa mandashcacunataca na pactachin. Chashna gentecunapurapi viñashcamandami Diospa mandashcacunataca na cazuita ushanchi. Caimanda ashtahuan intindingapaca cai ejemplopi yuyapashun.
7 Huaquin llactacunapica jovengunataca ali ganashpa trabajachunmi ninanda animan. Cunanga Mary * shuti panigumanda parlapashun. Mary paniguca Jehová Diosmanda nara yachajushpaca shuj rijsishca universidadpimi estudiarca. Paipa familiaca shuj ali trabajota tarishpa, rijsishca rijsishca cachunmi animan carca. Marypash chaitallatami munan carca. Shinapash shuj punlla Jehovamanda yachajushpa, paita juyaimandaca ñana pundashna pensashcata rurangapaj munarcachu. Ña shina decidishca cashpapashmi Mary paniguca: “Ashtaca culquita ganana munaihuan viñashcamandami huaquinbica imapash ali negociocuna uyarijpica chaicunata rurangapaj munani. Shinapash chaicunata rurashpaca Jehová Diosta ali sirvitaca na ushashachu yanimi. Chaimi Jehovataca ama chaicunata rurangapaj ayudahuai nishpa mañani” nin (Mat. 6:24).
8. ¿Imatata yachajugripanchi?
8 Jehová Diosta cazunaca ñucanchipallatami ali can. Shinapash ancianocuna, taitacuna, mamacunapash Jehová Diosta cazushpaca shujcunatapashmi ayudaita ushan. Ancianocuna, taitacuna, mamacunaca shujcunata cuidana responsabilidadtami charin. Cunanga Bibliapi parlashca huaquin Jehovapa sirvijcunamandami yachajugripanchi. Jehovapa ñaupajpi ali cangapaj, paicunamanda imata yachajui ushashcatapashmi yachajupashun.
NEHEMIASMANDACA ¿IMATATA ANCIANOCUNACA YACHAJUITA USHAN?
Imashina Nehemías runagu Jerusalén llactapi Jehovapa templota arreglarca. Shinallatami ancianocunapash tandanajui huasita arreglashpa ayudan. (Párrafo 9-11 ricupangui). *
9. Nehemías Jerusalenman chayashpaca ¿imacunatata ricurca?
9 Jehová Diosca ancianocunatami paipa sirvijcunata cuidachun mingashca (1 Ped. 5:2). Jehovapa sirvijcunata imashina Nehemías cuidashcamandaca ashtacatami anciano huauquicunaca yachajuita ushan. Judá llactamanda gobernador cashcamandaca Nehemiasca ashtaca autoridadtami charirca (Neh. 1:11; 2:7, 8; 5:14). Nehemías Jerusalén llactaman chayashpaca ¿imacunatata ricurca? Jerusalenman chayashcandimi judiocuna Jehovapa templopi nalicunata ruranajushcata ricurca. Shinallata levitacunaman Jehová mandashca shina culquiguhuan na ayudanajujtami Nehemiasca ricurca. Chai jahuapash sabadocunata na trabajanachu nishcatapash na cazunajushcatami ricurca. Huaquin judiocunacarin na israelita huarmicunahuanmi cazarashca carca. Chaimandami Nehemiasca imatapash rurana carca (Neh. 13:4-30).
10. Judiocuna nalita ruranajujpipash ¿imatata Nehemiasca rurarca?
10 Nehemiasca autoridadta charishpapash, judiocuna paipa munaita rurachunga na obligarcachu. Chaipa randica Jehová Diostami paicunata ali ñaupaman pushangapaj ayudahuai nishpa mañarca. Shinallata Diospa mandashcacunatami judiocunamanga yachachirca (Neh. 1:4-10; 13:1-3). Nehemiasca humildemi carca. Chaimandami paipash shuj judiocunandi Jerusalenbi templota cutin shayachingapaj shinllita trabajarca (Neh. 4:15).
11. Ancianocunaca ¿imashinata 1 Tesalonicenses 2:7, 8pi nishca shinaca huauquipanicunata tratana can?
11 Anciano huauquicunaca Nehemías charishca problemacunatashnaca na charingachu. Shinapash Nehemiasmandaca ashtacatami yachajuita ushan. Por ejemplo, huauquipanicunata ayudashpa. Ancianocunaca congregacionbi autoridadta charishpapash shujcunata yalimi canchi nishpaca na pensanllu. Chaipa randica tucui huauquipanicunatami juyaihuan, ali tratan (1 Tesalonicenses 2:7, 8, liingui). Ancianocunaca huauquipanicunata ali tratashpami humildecuna cashcata ricuchin. Ashtaca huatacunata anciano shina sirvishca Andrew shuti huauquica ninmi: “Ancianocuna juyaihuan, respetohuan ali tratajpimi huauquipanicunaca ancianocuna imata nishcataca aliguman cazujta cuenta japishcani” nishpa. Cutin Tony anciano huauquica ninmi: “Filipenses 2:3pi nishca consejota catingapami esforzarini, chaimi shujcuna ñucata yali cashcata yaipi charishpa ama mandaitalla mandajungapaj esforzarini” nin.
12. Anciano huauquicunaca ¿imamandata humildecuna cana can?
12 Jehová Dios shinami anciano huauquicunaca humildecuna cana can. Jehová Diosca pailla tucuita rurashca cashpapashmi “imagutapash na charijtaca, ñutu alpamanda jatarichin” (Sal. 18:35; 113:6, 7). Bibliapica Jehová Diosca ‘jariyashca shunguta charijcunataca’ na ricunayachinllu ninmi (Prov. 16:5).
13. ¿Imamandata ancianocunaca imatapash na yangata ninalla can?
13 Jehová Diosta cazuj ancianocunaca huauquipanicuna paicunata nali tratajpipash na culirashpami aliguman, juyaihuan imagutapash nin (Gál. 5:14, 15; Sant. 1:26). Huauqui Andrewca ninmi: “Huaquinbica shuj huauqui o shuj pani culirashpa ñucata yangata imatapash nijpica ñucapash shinallata nishalla yanimi. Shinapash Bibliapi parlashca Diospa sirvijcunamanda yachajunami humilde cachun, ama shinallata tigrachichun ayudahuashca” nishpa. Ancianocunaca shuj huauquipanicunata, ancianopurapash ali tratarishpa, aliguman parlashpami Jehová Diosta cazujushcataca ricuchin (Col. 4:6).
REY DAVIDMANDACA ¿IMATATA TAITACUNACA YACHAJUITA USHAN?
14. Taitacunamanga Jehová Diosca ¿imatata mingashca?
14 Jehová Diosca familia ucupi huahuacunata cuidana derechotaca taitacunamanmi cushca. Huahuacuna na cazujpica tacurishpa, ali yachachichunga taitacunamanmi mingashca (1 Cor. 11:3; Efes. 6:4, NM). Shinapash taitamamacunaca tucui causaipi mandaitaca na ushangachu. Taitacunaca Jehová Diospa ñaupajpi familiacuna ali catichunmi ayudana can (Efes. 3:14, 15). Taitacunaca ¿imashinata Jehovata cazushcata ricuchita ushan? Familiata aliguman yachachishpa. Rey Davidca alipacha ejemplomi carca. Cunanga paimanda yachajupashunchi.
Testigo taitaca Jehovata mañashpaca humilde cashcatami ricuchin. (Párrafo 15, 16ta ricupangui). *
15. Rey Davidca ¿imamandata alipacha ejemplo can?
15 Jehová Diosca rey Davidtaca familiata mandachunllaca na agllarcachu. Ashtahuangarin israelitacunata mandachunmi agllarca. Davidca tucui tucuitami mandai usharca. Shina mandana derechota charimandami nalicunatapash rurarca (2 Sam. 11:14, 15). Canga pandarircanguimi nijpica Davidca alimanmi Jehová Diostaca cazurca. Jehová Dios nishcata cazuimandami, Jehovaman tucui tucuita villashpa, nalita rurashcamanda arrepintirishpa Jehovata mañarca. Shinallata paipa mandashcata tucui shunguhuan cazungapapashmi esforzarirca (Sal. 51:1-4). Rey Davidca humilde caimandami jaricunapa, huarmicunapa consejotapash cazurca (1 Sam. 19:11, 12; 25:32, 33). Rey David pandarishca cashpapash Jehovata ashtahuan sirvinapimi ocuparirca.
16. Taitacuna ¿imatata rey Davidmandaca yachajupanguichi?
16 Cunanga taitacuna rey Davidmanda yachajupaichi. Familiataca taitami huasi ucupica mandana derechota charin. Shinapash paicunapash pandarijlla cashcatami cuenda japina can. Shinallata pipash Bibliahuan consejota cujpica aligumanmi chasquina can. Shina aliguman chasquijta huarmigupash, huahuacunapash ricushpaca alimanmi cazungapaj munanga. Taitacuna Jehovata tucui Deut. 6:6-9). Shina rurashpaca familiapa alipacha ejemplomi capangui.
shunguhuan mañajpica, familiaca Jehovata mañanaca minishtirishcapacha cashcatami cuenda japinga. Ashtahuanbachaca Jehovata sirvinata pundapi churajtami familiaca ricunga (MAMACUNACA ¿IMATATA MARÍA HUARMIGUMANDACA YACHAJUPANGUICHI?
17. Mamacunataca ¿imata rurachunda Jehová Diosca mingashca?
17 Jehová Diosca mamacunatapashmi familia ucupi ayudachun mingashca. Mamacunapash paicunapa huahuacunata aliguta cuidashpami ayudana can (Prov. 6:20). Mamacunapa ima rurashcapash huahuacunapa causaipica para siempremi ayudaita ushan (Prov. 22:6). Mariaca Jesuspa mamami carca. Shinaca paimanda mamacuna imata yachajui ushashcata yachajupashunchi.
18, 19. Jesuspa mama Mariamandaca ¿imatata mamacunaca yachajuita ushapanguichi?
18 Jesuspa mama Mariaca alipachami Diospa Shimimanda yacharca. Shinallata Jehová Diostaca tucuipimi cazun carca. Chaimi Jehová Diosca paipaca alipacha amigo carca. Mariaca Jehová Diospa mandashcacunata cazuna na fácil cajpipash paipa causaipi pactachingapami ninanda esforzarirca (Luc. 1:35-38, 46-55).
Mamaca masqui shaijushca cashpapash o culira cashpapash familiata juyashcata ricuchingapami ninanda esforzarin. (Párrafo 19ta ricupangui). *
19 Cunanga mamacuna Mariamanda imata yachajui ushashcata ricupashunchi. Primero, Bibliamanda yachajuna, Jehovata mañana. Shina rurashpallami Jehová Dioshuan ali amigo cashpa catita ushapanguichi. Segundo, quiquingunapa causaipi cambiana cajpica uchalla cambiangapami esforzarina capanguichi. Shinallami Jehovata cushichi ushapanguichi. Cunanga caita yaripashunchi, ñucanchi taitamamacunaca jaicata culiranllami carca. Shina viñachishcamandami huaquinbica pensanchi, shinallata ñucanchi huahuacunata viñachinaca normalmi can nishpa. Huaquinbicarin ña Jehová Dios yachachishcacunata yachashca jahuapashmi huahuacunahuan jaicata culirashpa imacunatapash yangata nita ushapanchi. Trabajomanda shaijushca shamushca cashpa o huaquinbica huahuacuna na cazungapaj munajpimi shina nali trataita ushapanchi (Efes. 4:31). Shina cashpaca uchashpami Jehovata mañana capanguichi. Cunanga Lydia panigumanda ricupashunchi. Paica ninmi: “Ñuca huahua na cazungapaj munajpica ama ani ani tacuringapami Jehovata tucui shunguhuan mañapani. Huaquinbicarin, paihuan parlajushpami shungu ucupica ama culirangapaj ayudahuai nishpa Jehovata mañajunata yachani. Shina Jehovata mañanami ama jaicata culirachun ayudahuashca” nishpa (Sal. 37:5).
20. Huaquin mamacunaca ¿imashpata paicunapa huahuacunata juyaita ricuchitaca na ushan?
20 Huaquin mamacunaca paicunapa huahuacunata juyanimi nitaca na ushashcachu (Tito 2:3, 4). ¿Imamandata juyashcata na ricuchita ushashca? Paicuna huahua cajpi paicunapa taitamamacuna juyaihuan na viñachishcamandami shina viñashca. Shinaca ñucanchita shina viñachishcamandallaca na shinallata huahuacunataca tratanachu capanchi. Jehovata rijsij mamacunaca Jehová Dios yachachishcashnami huahuacunataca juyaihuan viñachina can. Huahuacunata juyaihuan viñachita na ushashpaca Jehová Dios yachachishcashnami cambiangapaj esforzarina capanguichi. Shinallami quiquinguna imashna pensashcapi, imashna sintirishcapi, imashna tratanapipash cambiangapaj esforzarina capanguichi. Shina rurajpica quiquinbash, huahuacunapashmi cushilla causaita ushapanguichi.
JEHOVATA SIEMPRE CAZUPASHUNCHI
21, 22. Isaías 65:13, 14pi nishca shinaca Jehovata cazushpaca ¿imashina causaitata chari ushapashun?
21 Rey Davidca Jehovata cazunaca cushi causaita charichun ayudaj cashcatami yacharca. Chaimi Davidca cashna nirca: “Mandaj Dios mandashcacunaca, imapajpash alipacha cashpami, shungutaca cushichin. Mandaj Dios imatalla rurai nishcacunaca, ima mapapash illaj cashpami, ñavitaca punchayachin”. Shinallata nircami: “Canda servij ñucaca, chai shimicunahuanga alipacha yachachi tucushcami cani. Chaicunata cazushpaca, alitapacha japinami tian” nishpa (Sal. 19:8, 11). Cunanbica picuna Jehovata cazujta o na cazujtaca ricunallami can. Maijanbash Jehovata cazushpaca cushillami causaita ushan. Chaimi Bibliapica cashna nin: “Ñucata servijcunaca, tucui shunguhuan ninanda cushijushpami candanajunga” nishpa (Isaías 65:13, 14, liingui).
22 Shinaca ancianocuna, taitacuna, mamacunapash Jehovata cazushpaca paicunapa causaipimi cushilla causai ushanga. Shina cajpica huauquipanicunapashmi tucuicuna ali cashun. Ashtahuanbacha Jehová Diosta cushichi ushapashun (Prov. 27:11). ¿Imatata ashtahuan rurai ushapanchi?
CÁNTICO 123 Jehová Diostami tucui shunguhuan cazuna canchi
^ par. 5 Cai temapica Jehová Diosta imamanda cazuna cashcatami yachajupashun. Shinallata gobernador Nehemiasmanda, rey Davidmanda, Jesuspa mama Mariapa causaimandapashmi yachajupashun. Shinallata paicunamanda ancianocuna, taitacuna, mamacuna imata yachajui ushashcatapashmi yachajupashun.
^ par. 7 Cai temapica huaquin shuticunata cambiashcanchimi.
^ par. 61 CAI DIBUJOPICA: Shuj huauquica paipa churihuanmi tandanajui huasita arreglanajun. Punda tiempopica Nehemías runagupashmi Jerusalén llactapi Jehovapa templota arreglajujta ricuchin.
^ par. 63 CAI DIBUJOPICA: Shuj huauqui tucui shunguhuan Jehovata paipa familiahuan mañanajujtami ricuchin.
^ par. 65 CAI DIBUJOPICA: Shuj huahuaca tauca horascunata videojuegocunata pugllaimanda escuelapi mandashca deberta na rurashca, huasipipash nimata na ayudashcatami ricuchin. Chaimi paipa mamaca na jaicata culirashpa aliguman huahuata nijujta ricuchin.