1. Huatacuna yalijpica ¿imata gentecunahuanga pasashca?

ASHTACA ashtaca huatacunatami ashtaca gentecunaca shuj religionda charirca. Shinapash huatacuna yalijpica gentecunaca cambiashcami. Gentecunaca ashtahuan ashtahuanmi shuj religionda ñana charishcata parlan. * Shuj llactacunapi ashtaca gentecunacarin nishcami, ñucaca ni shuj religionda na catinichu nishpa * (Mat. 24:12).

2. ¿Imamandata ashtaca gentecunaca religiondaca na charinichu nin?

² ¿Imamandata gentecunaca na religionda charinchi nin? Tal vez huaquin gentecunaca paicunapa munaita rurashpa causaimanda o paicunapa problemacunapi pensarijuimandami ocupado causan (Luc. 8:14). Huaquingunacarin ateo nishcamanmi tigrashca. Ateo nishcacunaca Dios tiajtaca na crinllu. Cutin huaquin gentecunaca Taita Diospi crishpapash shuj religionda catinaca na minishtirinllu ninmi. Shinallata ninmi, cientificocunapa nishcahuan, religionba nishcacunahuanga na igual canllu. Religiongunaca ima nali, ima ali cajtapash na yachachinllu nishpa. Cai mundopi causaica evolución nishcamandami tiai callarishca nishcataca gentecunaca tal vez telepi, radiopi, Internetpi, amigocuna nijta, profesor nijtallami uyashca. Shinapash Taita Dios ciertopacha tiashcataca na uyashcachu. Iglesiapi yachachijcuna gentecunata mandangapaj munajta o ashtaca culquita japina munaita charijta ricushpami gentecunaca ninanda culirashca. Cutin shuj llactacunapi gobiernocunacarin, religionbi imatapash ama ashtahuan rurachunmi shuj shuj leycunata llujchishca.

3. Cai temapica ¿imatata yachajupashun?

³ Jesusca mandarcami, “ñucapaj yachajujcuna tucuchun, cai pachapi causanajuj tucuilla gentecunapajman rishpa, villana canguichi”  nishpa (Mat. 28:19). Shinaca religionda na charij gentecunata o Diospi na crij gentecunataca ¿imashinata Jehovata juyachun, Jesuspa ali catij tucuchun ayudaita ushapanchi? Chaipaca chai gentecuna maipi viñashcatami ali yachana capanchi. Por ejemplo, Europa llactapi viñashca gentecunaca Asia llactamanda gentecunashnaca ali villaigucunataca na igual chasquinllu. Europa llactamanda ashtaca gentecunaca Bibliamanda ashagutallapash yachanmi. Shinallata Taita Dios tucuita rurashcatapashmi uyashca. Cutin Asia llactamanda gentecunaca Bibliamandaca casi nimata na yachanllu. Chaimi paicunaca Tucuita Ruraj Dios tiajtaca na crita ushan. Shinaca cai temapimi maijan llactamanda gentecuna cajpipash, imata crijpipash paicunapa shunguman chayangapaj imata ruranata yachajupashun.

4. ¿Imamandata gentecunaca cambiangami nishpa pensarina capanchi?

⁴ Gentecunaca cambiangami. Cada huatami shuj religionda na charij gentecunapash, Diospi na crij gentecunapash testigo de Jehovacuna tucushca. Cai gentecunapuramanda nara Testigo tucushpaca ali causana cashcataca yacharcami. Shinapash religionguna nalicunata rurajta ricushpa, shuj gentecunapash nali causajta ricushpami ninanda culiran carca. Chai gentecunamandaca ashtacacunami nali ruraicunata saquina tucurca. Shinaca Jehová Diospa ayudahuanmi ‘causaita causagringapaj munaj’ gentecunata tari ushapanchi (Hech. 13:48; 1 Tim. 2:3, 4).

5. Gentecuna ali villaigucunata uyachunga ¿imatata rurai ushapanchi?

⁵ Cushilla aliguman parlapashunchi. Ashtaca gentecunaca ñucanchi imata villachijtaca uyashcami. Shinapash ali villaigucunata aliguman villachijpimi ashtahuanbachaca uyangapaj munashca. Gentecunaca paicunata cushilla aliguman parlachunmi munan. Shinallata paicunamanda preocuparichunmi munan. Shinapash ñucanchita uyachunga na obliganchichu. Chaipa randica religionmanda imata pensajta, imamanda shina pensajta ali intindingapami esforzaripanchi. Cutin huaquin gentecunaca na rijsi gentecunahuan religionmanda parlanataca na gushtanllu. Shujcunacarin nishcami, Taita Diospi cripanguichu nishpa tapunaca gentecunata na respetashcatami ricuchinajun nishpa. Shinallata shuj gentecuna Bibliata liijujta, Testigo de Jehovacuna paicunaman Bibliamanda liijujta gentecuna ricuchungarin nimamanda na munanllu. Shina cajpipash gentecunataca respetanami capanchi (2 Tim. 2:24).

6. a) Gentecuna uyachunga ¿imatata apóstol Pabloca ruran carca? b) Apóstol Pabloshna ¿imatata rurana capanchi?

⁶ Bibliamanda, Taita Diosmanda, religiongunamanda parlachun gentecuna na munajta cuenta japishpaca ¿imatata rurana capanchi? Chaipaca apóstol Pabloshnami gentecuna uyangapaj munashca yuyaicunamanda parlana capanchi. Apóstol Pabloca judio gentecunaman villachijushpaca Taita Diospa Shimitami utilizarca. Cutin Areópago plaza pushtupi alipacha yachajushca griego gentecunaman villachijushpaca Taita Diospa Shimitaca na utilizarcachu (Hech. 17:2, 3, 22-31). Shinaca apóstol Pabloshna ¿imatata rurana capanchi? Bibliapi na crij gentecunaman villachijushpaca tal vez Bibliataca na utilizanachu capanchi. Cutin gentecuna ñucanchihuan Bibliata liijujta pipash na ricuchun munajta cuenta japishpaca, tabletpi o celularpimi Bibliamanda textocunata liita ushapanchi.

7. 1 Corintios 9:20-23​pi nishca shinaca apóstol Pabloshna cangapaca ¿imatata rurana capanchi?

⁷ Gentecunata ali uyashpa paicunata intindipashunchi. Gentecuna imamandata shina pensashcata ali intindingapami esforzarina capanchi (Prov. 20:5). Chaipaca apóstol Pablomanda yaripashunchi. Apóstol Pabloca judiomi carca. Chaimi na judio gentecunaman villachingapaca paicuna uyangapaj munashca yuyaicunamandami parlana tucurca. Na judiocunaca Jehová Diosmandapash, Diospa Shimimandapash nimata na yacharcachu. Cunanbipash ñucanchicunaca gentecunata imashina sintirijta, intindingapami  esforzarina capanchi. Chaipaca tal vez publicaciongunapimi informacionda mascaita ushapanchi. Na cashpaca experienciata charij shuj huauquita o panita ayudahuai nishpami mañanalla capanchi (1 Corintios 9:20-23, liingui).

8. Bibliamanda parlai callaringapaca ¿imatata rurana capanchi?

⁸ Ñucanchica Jehová Diosmanda yachajungapaj munaj gentecunatami taringapaj munapanchi (Mat. 10:11). Chaipaca gentecunahuan parlanajushpa paicuna imata yuyashcata parlachunmi animana capanchi. Shinallata paicunahuan parlanajushpaca ali alimi uyana capanchi. Inglaterra llactamanda shuj huauquica gentecunataca cashnami tapun, cusahuarmi cushilla causangapaj, huahuacunata ali viñachingapaj, llaquicunata aguantashpa catingapaca ¿imatata rurana capanchi? nishpa. Gentecuna tigrachishca jipaca chai huauquica cashnami tapun: “Casi 2 mil huatacuna huashaman escribishca cai consejomandaca ¿imatata yuyapangui?” nishpa. Chai consejo Bibliamanda cashcata na villashpami chai huauqui paipa celularpi Bibliamanda ali agllashca textocunata liin.

9. Taita Diosmanda parlangapaj na munaj gentecunapa shunguman chayangapaca ¿imatata rurana capanchi?

⁹ Taita Diosmanda parlangapaj na munaj gentecunapa shunguman chayangapaca ¿imatata rurana capanchi? Chaipaca paicuna rijsishca cosascunamandami parlaita ushapanchi. Por ejemplo, ashtacacunaca animalcunata ricunatami ninanda gushtan. Chaimi cashna nita ushapanchi: “Cientificocunaca animalcunata ricushpami ashtaca aparatocunata rurashca. Shinallata microfonocunata ruraj gentecunaca shuj shuj animalcunapa rinricunatami estudian. Cutin fotocunata llujchina camaracunata rurajcunaca shuj shuj animalcunapa ñavitami estudian. Chaimi paicunataca cashna tapuita ushapanchi rinricunata, ñavicunataca ¿pita rurarca?” nishpa. Paicunata ali uyashca jipaca cashnami nita ushapanchi: “Rinrita, ñavita estudiaj gentecunaca ¿pimandashi yachajunajun? Shinallata punda tiempopi shuj escribij runa ima nishcataca ninandami alicachini. Chai escribij runaca cashnami tapurirca ¿ñavita rurajca nacha ricujunga? ¿Rinrita rurajca nacha uyajunga? nishpa. Caicunata rurajmi tucui gentecunaman ali yachaita cujun. Shinallatami tauca cientificocunaca chai escribij runashnallata pensashca” nishpami nita ushapanchi (Sal. 94:9, 10). Shinaca “Opiniones sobre el origen de la vida” nishca videotami gentecunamanga ricuchita ushapanchi. Na cashpaca ¿Es la vida obra de un Creador? o El origen de la vida. Cinco cuestiones dignas de análisis, nishca folletocunatami gentecunaman saquita ushapanchi.

10. Diosmanda na parlangapaj munaj gentecunahuanga ¿imashinata parlai ushapanchi?

¹⁰ Ashtaca gentecunami shamuj punllacunapi ali  causai tiachun munan. Shinapash ashtaca gentecunaca pensanmi, cai alpaca tucurigrinmi o cai alpapi causaica na tiangachu nishpa. Noruega llactapi superintendente shina sirvij huauquica ninmi: Diosmanda na parlangapaj munaj gentecunaca cai mundo imashna cashcamanda parlagapaj munanmi nishpa. Paicunata saludashca jipaca cashnami tapun: “Shamuj punllacunapica ¿ali causaigu tiangacha? ¿Politicocuna, cientificocuna o pipashchu ali causaiguta cunga?” nishpa. Paicunata ali ali uyashca jipaca, shamuj punllacunapi ali causaigu tiana textocunamandami parlan. Huaquin gentecunaca shamuj punllacunapi ali gentecuna para siempre causanamanda, cai alpa nima hora na tucurinata parlaj textocunataca alicachishpami uyan (Sal. 37:29; Ecl. 1:4).

11. a) Gentecunamanga ¿imamandata shuj shuj yuyaicunamanda parlana capanchi? b) Romanos 1:14-16​pi apóstol Pablo nishcashnaca ¿imatata rurana capanchi?

¹¹ Gentecunahuan parlai callaringapaca shuj shuj tapuicunatami utilizai ushapanchi. Cada gentemi diferente can. Huaquingunaca shuj shuj yuyaicunamandami parlangapaj munan. Cutin shujcunaca shuj yuyaicunamandami parlagapaj munan. Shinallata shuj gentecunaca Taita Diosmanda, Bibliamandami parlangapaj munan. Cutin shujcunaca shuj yuyaicunamandami parlai callarichun munan. Imashina cashpapash tucui gentecunaman ali villaigucunata villachingapami esforzarina capanchi (Romanos 1:14-16, liingui). Bibliamanda yachajuna munaita gentecuna charichunga Jehová Diosllami ayudan (1 Cor. 3:6, 7).

12. Asia llactamanda gentecuna shina yuyaihuan causajpipash ñucanchicunaca ¿imatata rurai ushapanchi?

¹² Mundo enteropimi ashtaca Testigocunaca Asia llactamanda gentecunata tarishca. Shinallata chai gentecunataca chai llactamanda gobiernocuna religionba ruraicunata jarcashca pushtucunamandami shamun. Asia llactamanda ashtaca gentecunaca Tucuita Ruraj Dios tiajta na pensashpami causashca. Huaquingunaca Tucuita Ruraj Dios tiajta uyashpami yangata yachangapaj munaimandalla Bibliamanda yachajui callarin. Cutin huaquingunaca imatapash uyai na uyaica na yachajungapaj munanllu. Chai gentecunamanga ¿imashinata Bibliamanda yachachita ushapanchi? Chaicunata ricushpami huaquin Testigo experienciata charijcunaca chai gentecunamanda preocuparishcata ricuchin. Jipamanga Bibliamanda shuj texto paicunapa causaipi imashina ayudashcatami parlan.

13. Gentecuna Bibliamanda yachajuna munaita charichunga ¿imatata rurai ushapanchi? (Callari paginapi fotota ricupangui).

¹³ Ashtaca gentecunaca Bibliapa consejocuna imashina ayudashcata ricushpami Bibliamanda yachajungapaj munaita charishca (Ecl. 7:12). Shuj paniguca Nueva York llactapi chino mandarín shimita parlaj gentecunata visitajushpaca cashnami nin: “Paicunapi preocuparishcata, paicunata ali ali uyangapami esforzarini. Shinallata chai llactaman chaira chayamushcata ricushpaca, alichu capanguichi, ñachu shuj trabajoguta taripashcanguichi, cai llactapica alichu gentecunaca tratanajun” nishpami tapuni. Shina tapuimandami huaquinbica Bibliamanda parlai callarishcani. Chai jipa usharijpica cashnami tapuni: “Tucuicunallata ali llevaringapaca ¿imashi minishtirin? Proverbios libromanda shuj textoguta liingapaj munapaiman ¿ushapanichu? nishpa. Prov. 17:14​pica cashnami nin: “Fiñanajuita callarichij runaca, jatun yacuta cacharinshnami. Narapash fiñanajushpa rimari callarijpillata anchuringuilla” nishpa. Shinaca cai consejota cazushpaca ¿nachu tucuicunallata ali llevarichun ayudanman?” nishpa. Shina rurajpica paicunaca tal vez cutin parlangapaj munangami.

14. Religionda na charij gentecunahuan parlangapaca ¿imatata Lejano Oriente nishca llactapica shuj huauquiguca rurarca?

¹⁴ Religionda na charij gentecunamanga ¿imatata ni ushapanchi? Lejano Oriente nishca llactapi religionda na charijcunaman shuj huauqui imashina villachijta ricupashun. Paica ninmi: “Cai llactamanda gentecunaca Taita Diospi na crinchichu  nijpica yanga dioscunapi gentecuna na crishcata ningapaj munashcatami intindipani. Chaimandami gentecuna shina nishca jipallami ñucapash yanga dioscunapi na crini nishpa villachipani. Shinallata Jeremías 16:20​ta liini. Chaipica ninmi: “¿Runaca, paipaj dioscuna cachun rurai ushangachu? Ashtahuangarin chaicunaca, na dioscunachu” nijun. Chai jipaca cashnami tapuni, gentecunapa rurashca dioscunahuan ricujpica ¿imashinata Taita Dios ciertopacha Dios cashcata yachai ushapanchi? Shina tapushpaca gentecuna ima nijtami ali ali uyani. Shina uyashca jipallami Isaías 41:23​ta liini. Chaipica ninmi: “Canguna diospacha cashcata ñucanchi yachangapaca, jipa punllacuna ima tucunatapash villaichiyari” nishpa. Shina liishca jipaca, shamuj punllacunapi Jehová Dios imata ruragrijujtami parlapani” nishpa.

15. Asia llactamanda shuj huauquimandaca ¿imata yachajupanchi?

¹⁵ Asia llactamanda shuj huauqui cutin gentecunata visitangapaj imata rurajta ricupashunchi. Chai huauquica ninmi: “Bibliapa consejocunata, Bibliapi profeciacuna imashinata pactarishcata, estrellacuna, planetacuna imashina tiajtami parlani. Chai jipaca Tucuita Ruraj shuj Taita Dios tiajtami gentecunamanga parlapani. Gentecuna Diosmanda uyashpa yachajungapaj munajta ricushpami Jehovamanda Biblia ima nijta ricuchipani” nishpa.

16. Hebreos 11:6​pi nishcashnaca ¿imashinata Taita Diospi crichun, Bibliapi confiachun gentecunataca ayudaita ushapanchi?

¹⁶ Shuj religionda na charij gentecunaman Bibliamanda yachachijushpaca paicuna Taita Dios tiajta crishpa catichunmi ayudana capanchi (Hebreos 11:6, liingui). Shinallata Bibliapa yachachishcacunapi tucui shunguhuan confiashpa catichunbashmi cutin cutin Bibliamanda yachachina capanchi. Cada semana Bibliamanda yachachijushpaca huaquinbica Bibliaca Diospa Shimipacha cashcatami tal vez yachachishpa catina capanchi. Por ejemplo, huaquin profeciacuna pactarishcata, Bibliapa consejocuna imashina ayudashcata, cientificocuna nishcahuan Biblia ciertopacha cashcatami intindichishpa catina capanchi.

17. Gentecunata juyaihuan ayudajpica ¿imatata paicunaca ruranga?

¹⁷ Religionda charijta o na religionda charij gentecunata juyaihuan ayudashpaca Jesuspa ali catij tucuchunmi ayudaita ushapanchi (1 Cor. 13:1). Testigocunaca Bibliamanda shuj gentecunaman yachachishpaca Taita Dios tucui gentecunata juyaj cashcatami yachachina capanchi. Paicunapash Taita Diosta juyachunmi ayudana capanchi. Punda tiempopi religionda na charij gentecunapashmi cunanbica Bibliamanda yachajushpa cada huata ashtaca ashtaca gentecuna bautizarishca. Shinaca gentecuna cambiai ushashcatami crina capanchi. Shinallata tucui gentecunata juyashcata, paicunata ali ali uyashcata, paicunata intindishcatapashmi ricuchina capanchi. Paicunata yachachishpaca Jesuspa chaquita catichunmi ayudapashunchi.