1. Jesús shuj milagrota rurajpi Pedro ashtaca pescadocunata japishpaca ¿imashinata sintirirca?

 PEDROCA pescadota japishpami trabajan carca. Chaimandami pescadota japingapaca tucui tuta shuyashca carca. Shinapash nimata na japishcachu carca. Shinapimi Jesusca: “Ashtahuan jundulla ladoman rishpa, pescadocunata japingapaj redcunata chaipi shitaichi” nirca (Luc. 5:4). Shina nijpica Pedroca ashta na crishpapashmi, Jesús nishcata rurarca. Chai jipaca redpica ashtaca pescadocuna jundajpimi redca liquiri callarirca. Pedro y paihuan cajcunapash Jesús shuj milagrota rurajujta cuenta japishpami “ninanda manllarishca carca”. Chaimandami Pedroca: “Ñuca Señorlla, ñucapamanga ama quimirimupaichu, pecadormi capani” nirca (Luc. 5:​6-9). Pedroca Jesuspa ñaupapi canataca na miricinichu yajurcami.

2. Pedropa ejemplomanda yachajunaca ¿imashinata ayudan?

² Pedroca pecadormi capani nishpaca ciertotami nijurca. Bibliapica apóstol Pedro imatapash nishca o rurashca jipa arripintirishcatami ricuchin. ¿Pedroshnachu sintiripashcangui? ¿Imapipash mejorangapaj o imapash nali munaita o pensamientota saquingapachu ashtaca tiempota esforzarijupashcangui? Shina cashpaca ama desanimaripaichu. Pedropa ejemplomi quiquindaca ayudanga. Apóstol Pedro imacunapilla pandarishcata yaripai. Jehová Diosca paipa pandarishcacunataca Bibliapi na escribichishpa saquita ushanmanmi carca. Shinapash ñucanchicuna yachajuchunmi Jehová Diosca Bibliapi chai pandarishcacunatapash escribichishpa saquirca (2 Tim. 3:​16, 17). Pedroca ñucanchishnallatami pandari nali munaicunata y nali pensamientocunata charirca. Shinaca Bibliapi paimanda liishpaca, Jehová Dios ñucanchicuna perfecto cachun na shuyashcatami cuenta japipanchi. Chaipa randica nali munaicunata, nali pensamientocunata charishpapash alita rurangapaj esforzarishpa catichunmi munan.

3. ¿Imamandata esforzarishpa catinaca minishtirishca can?

³ ¿Imamandata esforzarishpa catinaca minishtirishca can? Porque cutin cutin imagutapash rurashpaca mejoraita ushashunmi. Pipash  shuj violinda ali tocangapaj munashpaca ashtaca tiempotami yachajuna can. Yachajujushpaca ashtaca viajecunata pandarishpami tocanga. Shinapash asha ashami mejorashpa catinga. Y ali yachajushca jipapashmi huaquinbi huaquinbica pandarita ushan. Shinapash chaimandalla tocanataca na saquingachu. Ñucanchicunahuanbash shinallatami can. Imapash nali munaicunata, nali pensamientocunata mishashcanchi yashpapash cutinmi chaicunapi urmaita ushapanchi. Shinapash mejorashpa catingapami esforzaripanchi. Tucuicunallatami imatapash nishca jipa o rurashca jipara arripintirinchi. Shinapash esforzarishpami catipanchi. Jehová Diosmi mejorashpa catichun ñucanchitaca ayudanga (1 Ped. 5:10). Cunanga apóstol Pedro imashina esforzarishpa catishcata ricupashun. Apóstol Pedro pandarijpipash Jesús juyaihuan tratashcata ricunami ñucanchicunapash Jehová Diosta sirvishpa catichun ayudan.

4. Pedroca ¿imashinata sintirijurca? Y Jesusca ¿imashinata animarca? (Lucas 5:​5-10).

⁴ Bibliapica apóstol Pedro imamanda “pecadormi capani” nishcataca na ricuchinllu. Shinallata ima pecadocunamanda parlajushcatapash na ninllu (Lucas 5:​5-10​ta liipangui). Apóstol Pedroca talvezpashmi imapipash pandarishpa shuj shuj pecadocunatapash rurashcanga. Jesusca apóstol Pedro paipa pecadocunamanda paipa ñaupapi nali sintirijushcatami cuenta japirca. Shinallata Pedro Jehová Diosta na saquishpa sirvi ushashcatapashmi cuenta japirca. Chaimandami Jesusca apóstol Pedrotaca juyaihuan: “Ñana manllanachu cangui” nirca. Apóstol Pedro pandarishca jahuapash Jesús paipi confiashpa catishcata ricunami paitaca ñaupaman catichun ninanda ayudarca. Jipamanga paipash paipa huauqui Andrespashmi pescadota japishpa trabajana negociota saquishpa, Jesuspa chaquita catinata decidirca. Chaita rurashcamandami paicunaca ashtaca bendiciongunata chasquirca (Mar. 1:​16-18).

5. Pedro manllaicunata mishashpa Jesusta catij tucushcamandaca ¿ima bendiciongunatata chasquirca?

⁵ Pedro Jesuspa discípulo tucushpaca ashtaca experienciacunatami chari callarirca. Paica Jesús imapash unguicunahuan gentecunata jambijta, demoniocunata gentecunamanda llujchita, huañushcacunata causachijtami ricui callarirca (Mat. 8:​14-17; Mar. 5:​37, 41, 42). b Shinallata shuj muscuipishnami Jesús Diospa Gobiernopi ima puestota charina cashcata ricurca. Paipa causaipica cai cosascunataca nunca na cungarcachu (Mar. 9:​1-8; 2 Ped. 1:​16-18). Shinaca Pedroca nuncapash na pensashca cosascunatami ricui usharca. Chaimandami chai manllaita mishangapaj esforzarishcamanda Jesusta catij callarishcamandaca ninanda cushijushcanga. Shinapash chai nali pensamientocunata na vincingapaj esforzarishpaca cashna privilegiocunataca na charinmanllu carca.

6. ¿Apóstol Pedroca paipa nali pensamientocunataca ñapashchu vinci usharca?

 ⁶ Pedroca, Jesuspa milagrocunata ricushca jipa paipa yachachishcacunata uyashca jipapash paipa nali munaicunata, nali pensamientocunata vincingapami esforzarishpa catircara. Por ejemplo, Jesús Bibliapi nishca profeciacunata pactachingapaj sufrishpami huañuna cani nijpica, apóstol Pedroca ama chaitaca ruraichu nishpami Jesustaca jarcangapaj munarca (Mar. 8:​31-33). Shinallata huaquin viajecunatami apóstol Pedro y chaishuj apostolcunapash maijan ashtahuan importante canamanda cutin cutin fiñanajunajurca (Mar. 9:​33, 34). Shinallata Jesús huañungapaj shuj punllalla faltajpipash Pedroca Jesusta apagrinajujpi manllarishpami shuj runapa rinrita muchurca (Juan 18:10). Y chai tutallatami manllaimandaca Jesustaca na rijsinichu nishpa quimsa viajecaman negarca (Mar. 14:​66-72). Caicunapi pandarishcamandaca Pedroca ninanda llaquiyashpami ninanda huacarca (Mat. 26:75).

7. Jesús causarishpaca apóstol Pedromanga ¿ima oportunidadtata curca?

⁷ Jesusca apóstol Pedro pandarishcamanda desanimado cajpica na paitalla saquircachu. Jesús huañushpa causarishca jipaca apóstol Pedro, paita juyashcata ricuchina oportunidadtami curca. Chaipaca congregacionmanda huauquipanicunata cuidachunmi mingarca (Juan 21:​15-17). Chai mingashcataca Pedroca cushijushpami pactachirca. Chaimandami Pentecostés punllapica Pedroca Jerusalenbi carca. Paimi espíritu santota primero chasquijcunapurapi carca.

8. Apóstol Pedroca Antioquía llactapi cashpaca ¿imapita pandarirca?

⁸ Pedroca ungido cangapaj agllai tucushca cashpapashmi nali munaicunata, nali pensamientocunata vincingapaj esforzarishpa catinara tucurca. Huata 36​pica Pedroca na judío, na circuncisionda rurashca Cornelio shuti shuj jarigu espíritu santota Taita Diosmanda chasquijtami ricurca. Chaipimi paica ‘Taita Dios tucuicunatallata igual’ tratan cashcata ricurca (Hech. 10:​34, 44, 45). Apóstol Pedroca chai punllacamanga na judío gentecunahuan micungapaca na tiarishcarcachu. Shinapash chai horasmandami na judío gentecunahuanmi micungapaj tiarinata yachajurca (Gál. 2:12). Chai punllacunapica huaquin Jesusta catij judiocunaca, na judío gentecunahuanga na micungapaj tiarinachu canchi nishpami pensan carca. Chashna pensamientota charij huauquicunami Antioquía llactaman chayamurca. Shinapash, “cai huauquicunata nali sintichishachu” yashpami Pedroca na judío huauquipanicunahuanga ñana micungapaj tiarirca. Pedro chashna portarijujpimi, apóstol Pabloca tucuicunapa ñaupapi shinllita rimarca (Gál. 2:​13, 14). Cashna pandarishpapash Pedroca Jehovata sirvishpami ñaupaman catirca. Chaita rurachunga paitaca ¿imata ayudarca?

9. Juan 6:68, 69​pi nishcashnaca, Apóstol Pedroca Jesusta tucui shunguhuan catijushcataca ¿imashinata ricuchirca?

⁹ Pedroca Jesustaca tucui shungumi catijurca. Chaimandami imapash pandarishcacuna Jesusta catinata jarcachunga na saquirca. Shuj viajeca Jesuspa nishcata chaishuj discipulocuna na intindijpipashmi Pedroca Jesusta tucui shunguhuan catijushcataca ricuchirca (Juan 6:68, 69​ta liipangui). Jesuspa huaquin discipulocunaca Jesuspa nishcacunata na intindishpaca, intindichichunbash na mañarcachu. Shinallata paicunata intindichichunbash na saquishpatami Jesusta saquishpa rirca. Shinapash Pedroca tucuicunapa ñaupapimi Jesustaca “quiquinba parlashca shimicunamari para siempre causaita caran” nircami.

10. Jesusca Pedropi confiashcataca ¿imashinata ricuchirca? (Dibujota ricupangui).

¹⁰ Jesusca Pedrotaca siempremi ayudarca. Paitaca nunca na saquircachu. Jesús huañungapaj shuj punlla faltajpillatami Jesusca apóstol Pedro y chaishuj apostolcunapash paita jichushpa saquinataca ali yacharca. Shinapash Jesusca Pedro pandarishpapash, cutin tigrashpa paita ali sirvinataca alimi yacharca (Luc. 22:​31, 32). Jesusca “gentecunaca alita rurangapami munan. Pero paicunapa  cuerpoca alita ruraitaca na ushanllu” (Mar. 14:38). Chaimandami Pedro Jesusta negashca cajpipash, Jesusca paitaca na saquirca. Jesús causarishca jipaca apóstol Pedromanmi ricurirca. Chaipica Pedrohuan Jesushuanga ishcandillami parlashcanga (Mar. 16:7; Luc. 24:34; 1 Cor. 15:5). Chaipi Jesushuan parlanami Pedrotaca ama desanimarishca catichun ayudashcanga.

11. Jesusca, Jehová Dios Pedrota cuidanataca ¿imashinata ricuchirca?

¹¹ Jesusca Pedrotaca Jehová Diosmi candaca tucuipi cuidanga nishpami animarca. Jesús huañushpa causarishca jipaca Pedro y chaishuj apostolcunapash pescadota japichunmi cutin shuj milagrota rurarca (Juan 21:​4-6). Cutin chashna milagrota ricushpami apóstol Pedroca, Jehová Dios paipa tucui minishtirishcagucunata chari ushachun ayudanata seguro cachun ayudarca. Jesusca apóstol Pedrotaca Jehová Diosca candami cuidanga nishpami prometishcarca. Chai ratopica apóstol Pedroca “Taita Diospa Gobiernotara, [ . . . ] pundapi churana canguichi” nishca Jesuspa shimicunatami yarishcanga. Taita Diospa Gobiernota pundapi churajcunataca Jehovami cuidanga nishca promesatapashmi yarishcanga (Mat. 6:33). Chaita yachashcamandami pescadocunata japishpa trabajana negociota paipa causaipi primero churanapa randica, Jehová Diosta sirvinatami primero churarca. Shinami Pentecostés huata 33​pica Diospa Gobiernomanda apóstol Pedroca na manllashpa villachishcamanda ashtaca gentecuna Jesusta catijcuna tucuchun ayudarca (Hech. 2:​14, 37-41). Jipamangarin ashtaca samaritanocunata y na judío gentecunatapashmi Jesusta catijcuna tucuchun ayudarca (Hech. 8:​14-17; 10:​44-48). Shinaca Jehová Diosca paipa organizacionman tucui laya gentecunata apamungapami Pedrotaca ali utilizarca.

12. Chai nali munaicunatallata, pensamientocunatallata saquingapaj ashtaca tiempota esforzarishpaca ¿imashinata Pedropa ejemploca ayudaita ushan?

¹² Esforzarishpa catichunga Jehová Diosca ñucanchitapashmi ayudaita ushan. Huaquinbica chai nali munaicunatallata, nali pensamientocunatallata saquingapaj ashtaca tiempota esforzarijushpapash dificilmi caita ushan. Shinallata Pedro nali munaicunata, nali pensamientocunata charijpipash, ñuca munaicuna, pensamientocunaca ashtahuan nalimi can nishpami pensarita ushapanchiman. Shina pensajpipash esforzarishpa catichunga Jehová Diosmi ñucanchiman fuerzata cuita ushan (Sal. 94:​17-19). Shuj huauquiguca, Jehová Diosta nara sirvishpallatami tauca huatacunata homosexual carca. Paipa experienciata ricupashunchi. Paica mapa causaita saquishca cashpapash huaquinbica nali munaicunatami charishpa catirca. Chai huauquigu esforzarishpa catichunga ¿imata ayudarca? Huauquiguca “Jehová Diosmi  ñucanchita shinlliyachin. Shinallata Jehovapa espíritu santopa ayudahuanmi paita ali sirvishpa catita ushashcani” ninmi. Shinallata “Jehová Diosca paita sirvi ushachunmi saquihuashca. Juchayu cajpipash ñucata shinlliyachishpami catihuashca” ninmi.

13. Pedropa ejemplotaca ¿imashinata catita ushapanchi? (Hechos 4:​13, 29, 31; fotota ricupangui).

¹³ Imashnami ricupashcanchi Pedroca gentecunata manllaimandami huaquin viajecunata pandarirca. Shinapash Jehová Dios paita ayudachun mañashcamandami gentecunata ñana manllashpa catirca (Hechos 4:13, 29, 31​ta liipangui). Ñucanchipashmi ñucanchi manllaicunataca mishaita ushanchi. Horst shuti huauquigupa experienciata ricupashunchi. Paica nazi nishca gentecuna tiashca punllacunapimi Alemania llactapi causarca. Chai tiempopica gentecunaca Hitler runami ñucanchitaca salvanga nishpami saludan carca. Horst huauquiguca chashna saludana nali cashcatami yacharca. Shinapash paipa profesorcunata y compañerocunata manllashcamandami huaquinbica chaita nishpa saludarca. Huauquigupa taitamamaca paita tacurinapa randica, Jehová Diosta paihuan mañashpami ama manllachun paita ayudapai nishpa mañarca. Paipa taitamama ayudashcamanda y Jehová Diospi confiashcamandami. Tiempohuanga Horst huauquiguca gentecunata ñana manllashpa catirca. Jipamanga huauquiguca “Jehová Diosca ñucataca nunca na saquihuarcachu” nircami. c

14. Ancianocunaca ¿imashinata desanimarishca huauquipanicunataca juyaihuan animachita ushan?

¹⁴ Jehová y Jesusca ñucanchitallaca nunca na saquingachu. Pedroca Jesusta na rijsinichu nishpa quimsa viajecaman negashca jipaca, Jesusta catishpa catinata o na catinatami decidina carca. Jesusca apóstol Pedro shinlli feta charishpa catichunmi Jehová Diosta mañashcarca. Chai jipaca Pedrotaca Jehová Diosta paimanda mañashcatami nirca. Shinallata jipa punllacunapi apóstol Pedro huauquipanicunata shinlliyachi ushanata seguro cashcatami nirca (Luc. 22:​31, 32). Apóstol  Pedro Jesús chaita nishcata yarishpaca ninandami cushijushcanga. Apóstol Pedroshnami ñucanchicunapash importante decisiongunata japina tucushun. Chashna decisiongunata japina tucujpimi Jehová Diosca paita sirvishpa catichunga talvez ancianocunahuan ñucanchitaca ayudanga (Efes. 4:​8, 11). Paul shuti huauquica ashtaca huatacunatami anciano shina sirvijushca. Paica huauquipanicunata consolachingapami esforzarin. Huauquiguca shuj huauqui o pani ñana esforzaringapaj munajushcata ricushpaca Jehová Dios paicunata paipa organizacionman imashina apamushcatami yarichin. Shinallata Jehová Dios llaquij, juyaj cashcamanda paicunata nunca na saquinatapashmi yarichin. Cai anciano huauquiguca ashtaca huauquipanicuna desanimarishca cashpapash Jehová Diospa ayudahuan ñaupaman catishcatami ricushca.

15. Apóstol Pedro y Horst huauquigupa experienciacunaca Mateo 6:33​pi shimicuna siempre pactarishcataca ¿imashinata ricuchin?

¹⁵ Jehová Dios minishtirishca cosascunata charita ushachun apóstol Pedrota y caishuj apostolcunatapash imashina ayudashcatami ricupashcanchi. Y ñucanchicuna predicanata Jehová Diosta sirvinata ñucanchi causaipi primero churajpica Jehová Diosca ñucanchitapashmi shinallata cuidanga (Mat. 6:33). Ñajagu parlashca Horst shuti huauquiguca Segunda Guerra Mundial tucurishca jipaca precursor cana munaitami charirca. Shinapash paica pobrellami carca. Shinallata Jehová Diosta tiempo completopi sirvishpandi, paillata mantiniringapaj suficiente culquita chari ushanataca na segurochu carca. Shinaca huauquiguca ¿imatata rurarca? Jehová Dios paita ciertopacha cuidajushcata seguro cangapami superintendente de circuito huauqui visitajujpica semana enterota predicangapaj llujshirca. Chai semana tucurijpica superintendente de circuito huauquica, Horst huauquigumanga shuj sobregupi culquita curca. Shinapash chai culquiguta pipacha carajushcataca Horst huauquiguca na yacharcachu. Chai culquihuanga ashtaca quillacunatami precursor shina sirvita ushagrijurca. Chai culquiguta chasquishpaca Horst huauquiguca Jehová Dios paita cuidanataca seguromi carca. Chai punllamandapachami paica predicanata, Jehová Diosta sirvinataca paipa causaipi primeropi churarca (Mal. 3:10).

16. Apóstol Pedropa ejemplota y pai escribishca cartacunata yachajunaca ¿imamandata minishtirishca can?

¹⁶ Pedroca Jesús paita na saquishcamandaca ninandami cushijushcanga. Jesusca apóstol Pedrota tucuipi cazuj cachun y shuj cristianocunapapash shuj ali ejemplo cachunmi paitaca ayudashpa, yachachishpa catirca. Jesús apóstol Pedrota shina yachachishcamandami ñucanchicunapash ashtaca cosascunata yachajuita ushapanchi. Pedroca apostolcunapa punllacunapica congregaciongunaman ishcai cartacunatami escribirca. Chai cartacunapimi Jesús paita ayudashcamanda, yachachishcamanda imata yachajui ushashcata y shuj minishtirishca cosascunatapash escribirca. Cati temapica chai cartacunapa ashtahuan importante yachachishcacunata cunan punllacunapi imashina pactachinatami ricugripanchi.