1, 2. Sansonmanda yachajunaca ¿imamandata ali can?

 SANSONMANDA parlajta uyashpaca ¿pai imashina cashcapita pensaripangui? Talvez paica shuj shinlli shinlli runa cashcapimi pensaripangui. Ciertomi Sansonga shuj shinlli shinlli runami carca. Shinapash shuj nali decisionda japishcamandami shuj jatun llaquipi urmarca. Shina pandarijpipash Jehová Diosca Sansón shinlli feta charishcataca siempremi ricurca. Chaimandami Jehová Diosca paipa ejemplomanda yachajuchun Bibliapi escribichishpa saquirca.

² Jehová Diosca israelitacunata, contracunamanda salvangapaca Sansondami utilizarca. Sansón huañushcamanda ashtaca huatacuna jipaca Jehová Dios yuyachijpimi apóstol Pabloca shinlli feta charishca Diosta sirvijcunamanda escribijushpaca Sansonba shutitapash escribishpa saquirca (Heb. 11:​32-34). Jatun llaquicunapi cashpapash Sansonga Jehová Diospimi confiarca. Cai temapica Sansonmanda imata yachajui ushashcata paipa ejemplo ñucanchita imashina animajtami ricugripanchi.

3. Sansondaca Jehová Diosca ¿imata rurachunda agllarca?

³ Sansón nacirishca tiempopica israelitacunataca filisteocunami mandashpa causanajurca (Juec. 13:1). Filisteocunaca nalicuna caimandami israelitacunataca ninanda sufrichinajurca. Chaimandami Jehová Diosca ‘israelitacunataca, filisteocunapa maquimanda quishpichichunga’ Sansonda agllarca (Juec. 13:5). Chaita pactachinaca dificilpachami carca. Chaimandami Sansonga Jehová Diospi confiana carca.

4. Jehová Diosca ¿imashinata Sansondaca ayudarca? (Jueces 15:​14-16).

⁴ Sansón ima situacionbi cashpa Jehová Diospi confiashcata ricupashunchi. Shuj viajeca ashtaca soldado filisteocunaca Sansonda  japingapaj munaimandami Lehí shuti pushtuman rirca. Chai pushtuca talvezpashmi Judá llactapi cashcanga. Chai soldadocunata ricushpami Judá llactapi causaj jaricunaca ninanda manllarirca. Chaimandami israelitacunallata Sansonda mushuj cabiacunahuan maquita huatashpa filisteo contra soldadocunaman entregarca (Juec. 15:​9-13). Shinapash ‘Diospaj espíritu santo Sansonman’ poderta cujpimi chai huatashca cabiacunamandaca safarita usharca. Chai jipaca ‘nara ali chaquishca burropaj quijadasta’ japishpami, mil filisteocunata huañuchirca (Jueces 15:​14-16​ta liipangui).

5. Jehová Diospi confiashcataca ¿imashinata Sansonga ricuchirca?

⁵ ¿Imashpata Sansonga filisteocunata huañuchingapaca burropa quijadasta utilizarca? Sansón filisteocunata huañuchingapaj imata utilizajpipash Jehová Dios ayudanataca seguromi carca. Sansonga Jehovapa voluntadta pactachingapaca chai ratopi imata charishcatami utilizarca. Y shina rurashpa Jehovapi confiashcata ricuchishcamandami chai tucui contra soldadocunata mishaita usharca.

6. Sansonba causaimandaca ¿imatata yachajui ushapanchi?

⁶ Jehovapa organizacionbi cushca shuj asignacionda ñucanchi na pactachi ushanashnalla ricurijpipash Jehová Diosca chaita pactachichunmi ñucanchitaca ayudanga. Y Jehová Diosca ñucanchi na pensashcashnami ñucanchitaca ayudaita ushan. Jehová Diospi confiajpica Sansonda ayudashcashnallatami quiquindapash paipa voluntadta pactachichun fuerzata cushpa ayudanga (Prov. 16:3).

7. Jehovapa ayudata mascana importante cashcata ricuchingapaj shuj experienciamanda parlapai.

⁷ Construccionbi apoyaj ashtaca huauquipanicunaca Jehová Diospi confiashcatami ricuchishca. Pundacunapica Jehovapa organizacionga Salón del Reinocunata rurangapaj shuj shuj edificiocunata rurangapaca paicunallatami planocunata rurashpa construin carian. Shinapash Jehovapa organización ashtahuan mirashpa catishcamandami huaquin cambiocunata rurana tucushca. Por ejemplo, construccionda ñaupaman pushaj huauquicunaca Jehovata mañashpami ña huasichishca  propiedadcunata randishpa arreglaita callarirca. Robert huauquiguca, cai último huatacunapica mundo enteropimi ashtaca construcciongunapi ayudashca. Paica: “Callaripica cai cambiocunata chasquinaca na tucuicunapaca fácil carcachu. Cai mushuj cambiocunaca diferentepachami carca. Shinapash cai cambiocunata apoyangapaca huauquicunaca dispuestomi carca. Y cai cambiocunataca Jehová Dios bendiciashcatami ricupanchi” ninmi. Cai experienciami Jehová Dios paipa voluntadta pactachingapaj paipa organizacionda utilizajushcata ricuchin. Shinaca huaquinbillapash cashna pensarinaca alimi canman: “¿Jehovapa ayudata mascashpa, imapash cambiocuna tiajpi chai cambiocunata chasquingapaj esforzaripanichu?” nishpa.

8. Sansón yacunayachishpaca ¿imatata rurarca?

⁸ Sansonga huaquin na crinai cosascunatami rurarca. Por ejemplo, shuj leonhuan macanajushpami chai leondaca huañuchirca. Jipamanga Asquelón llactamanda 30 filisteo jaricunatami huañuchirca (Juec. 14:​5, 6, 19). Sansonga chai tucui cosascunataca Jehovapa ayudata na charishpaca na rurai ushashcataca alimi yacharca. Shuj viajeca Sansonga mil filisteocunata huañuchishca jipami yacunayachi callarirca. Shinapash paillata yacuta mascanapa randica yacuta taringapaca Jehová Diospa ayudatami mañarca. Shinami, Jehová Diospi tucui shungu confiashcata ricuchirca (Juec. 15:18).

9. Sansonba mañashcataca Jehová Diosca ¿imashinata contestarca? (Jueces 15:19).

⁹ Sansonba mañashcataca Jehová Diosca ¿imashinata contestarca? Jehová Diosca shuj milagrota rurashpami yacutaca llujchirca. Chaimandami, Sansonga chai yacuta ufiashpaca “cutin shinlli tucushpa ushaita japirca” (Jueces 15:19​ta liipangui). Jehová Dios yacuta llujchishca pushtutaca profeta Samuel Jueces librota escribijuj tiempocamanmi tiashpa catirca. Israelitacunaca chai pushtuta ricushpaca llaquicunahuan cajpica Jehová Diospi confiajpica Jehová Dios apoyanataca seguromi cashcanga. Israelitacunataca chai pushtuta ricunaca llaquicunahuan cashpapash Jehová Diospi confiajpi Jehová Dios ayudanata seguro cachunmi ayudashcanga.

10. Jehová ayudachunga ¿imatata rurana capanchi? (Fotocunata ricupangui).

¹⁰ Sansón runagushnami tucuicunallata Jehovapa ayudata mascana capanchi. Imata ali rurai ushashpa o Jehovapa organizacionbi ima responsabilidadta charishpapash tucuicunallatami Jehovapa ayudata minishtipanchi. Humildecuna cashpami Jehová Diospi confiashpalla imatapash ali rurai ushashcata cuenta japishun. Sansón runaguca Jehová Dios carashca yacuguta ufiashpami cutin fuerzata japirca. Shina cuendallatami espiritualmente shinlli cangapaca Jehová Dios carashca tucui ayudacunata aprovechana capanchi (Mat. 11:28).

11. Jehovapa tucui ayudacunata chasquingapaca ¿imatata rurana capanchi? Y shuj matrimoniopa ejemplomandaca ¿imatata yachajui ushapanchi?

¹¹ Rusia llactamanda Alexéi shuti huauquigupa ejemplota ricupashunchi. Cai huauquigutaca Rusia llactapica catiriashpami llaquichinajushca. Caicunata aguantangapaca paitaca ¿imata ayudashca? Paita y paipa huarmigutaca Bibliata siempre estudianami ninanda ayudashca. Alexéi huauquiguca ninmi: “Ñucanchicunaca siempremi Jehovapa cosascunata rurangapaj, estudio personalta rurangapaj, cada punlla Bibliata liingapaj esforzaripanchi. Cada punlla texto diariota liishpa, ishcandi Jehovata mañana costumbretapashmi charipanchi”. Shinaca caimandaca ¿imatata yachajui ushapanchi? Na ñucanchipilla confiana cashcata, Jehovapi siempre confiana cashcatami yachajupanchi. Y Jehovapi tucui shunguhuan cringapaj y siempre paipi  confiai ushangapaca, Bibliata liina, paita mañana, reuniongunaman, predicacionman rinami ñucanchitaca ayudanga. Chaita rurajpica Jehová Diosca ñucanchita bendiciashpami Sansonda ayudashcashnallata ñucanchitapash paita sirvishpa catichun ayudanga.

12. Sansonga ¿imapita pandarirca? Dalila huarmihuan canaca ¿imamandata diferente carca?

¹² Sansonga tucuicunashnallatami juchayu carca. Chaimandami huaquinbica nali decisiongunata japishpa pandarirca. Shuj viaje shuj nali decisionda japishcamandami shuj jatun llaquipi urmarca. Asha tiempota juez shina mandajushca tiempopimi ‘Sorec shuti pugru pambapi causajuj shuj huarmita munai callarirca. Paica, Dalila shutimi carca’ (Juec. 16:4). Dalila huarmita nara rijsishpaca, shuj filistea huarmihuanmi cazarangapaj munajurca. Bibliapica israelitacuna, filisteocunahuan macanajushpa mishachunmi Jehová Diosca Sansón chai filistea huarmihuan cazarachun saquijurca nin. Jipamanga Sansón Gaza llactaman rishpa, shuj prostituta huarmipa huasipi quidarca. Chai viajeca Jehová Diosca chai llactapa pungucunata facillla apachunmi Sansonmanga fuerzata curca. Shinami chai llactataca facillla mishaita ushana carca (Juec. 14:1-2; 3, TNM; 14:4; 16:1, TNM; 2, 3). Cutin Dalila huarmica israelitami cashca yarin. Chaimandami paihuan cazaranaca filisteocunata mishachunga na ayudagrijurca.

13. Sansonda umachingapaca Dalilaca ¿imatata rurarca?

¹³ Filisteocunaca Sansonba huarmi Dalila Sansonda traicionachunmi munanajurca. Chaimandami ashtaca culquita cujpica, chai culquita chasquishpa traicionarca. Shinapash, Sansonga ¿imamandata paipa huarmi nalita rurangapaj munajushcata na cuenta japirca? ¿Paita yapata juyaimandachu na cuenta japirca?  Imamanda cajpipash Dalila huarmica Sansón imamanda ashtaca fuerzata charishcata yachangapaca cutin cutinmi ninanda tapuchijunlla carian. Shina tapuchijujpillatami Sansonga villarca. Cashna rurashpaca Sansonga paipa fuerzata chingachishpami Jehovapa ñaupapipash nali quidarca (Juec. 16:​16-20).

14. Dalilapi confiashcamandaca Sansonga ¿ima llaquitata charirca?

¹⁴ Sansón paipa huarmipi ashtahuan confiashcamandami shuj jatun llaquipi urmarca. Filisteocunaca Sansonda japishpami ñavita llujchishpa Gaza llactapi prezu churarca. Sansonga chai llactamanda pungucunata llujchishpami filisteocunataca pingaipi saquishca carca. Chai llactapimi esclavota rurashpa granocunata cutachun churarca. Chai jipaca Dagón nishca yanga dios paicunata Sansonda mishachun ayudashca nishpami, shuj fiestata rurashpa sacrificiocunata ruranajurca. Chaipimi filisteocunaca ‘Sansón runagumanda burlaringapaj prezushca ucumanda llujchishpa, paicunapa ñaupajpi churarca’ (Juec. 16:​21-25).

15. ¿Imata rurashpata Sansonga Jehovapi cutin confiashcata ricuchirca? (Jueces 16:​28-30; callari dibujota ricupangui).

¹⁵ Sansón runaguca pandarishpapash, Jehovapi confianataca na saquircachu. Jehová Diosca Sansondaca filisteocunahuan macanajushpa mishachunmi agllashcarca. Chaimandami chaita pactachishpa catingapaj munarca (Jueces 16:​28-30​ta liipangui). Sansonga Jehová Diostaca: “Ñuca ishcandi ñavita filisteocuna surcushcamanda, paicunatapash tucuillata llaquichingapajmi, cunangulla shinllichihuai” nishpa mañarca. Sansonba mañashcata uyashpami cutin paiman fuerzata curca. Chai fuerzahuanmi Sansonga tucuimanda yali chai viajeca ashtaca ashtaca filisteocunata huañuchirca.

16. Sansonmandaca ¿imatata yachajui ushapanchi?

¹⁶ Sansonga shuj nali decisionda japishcamandami llaquicunata charirca. Shinapash Jehovata sirvinataca na saquircachu. Ñucanchicunapash pandarishcamanda consejai tucushpa, ima responsabilidadcunata perdishpapash, Jehovata sirvinataca na saquinachu capanchi. Jehová Diosca arripintirijpi perdonangapaj listo cashcatami yarina capangui (Sal. 103:​8-10). Sansonda ayudashcashnallatami, Jehová Diosca paipa voluntadta pactachichun ñucanchitapash ayudanga.

17, 18. Michael huauquigupa ejemploca ñucanchita ¿imashinata animan? (Fotocunata ricupangui).

¹⁷ Michael shuti shuj joven huauquiguhuan  ima pasashcata ricupashun. Paica siervo ministerial shina, precursor shina sirvishpami ocupado yalijurca. Shinapash pandarimandami congregacionbi charishca privilegiocunata perdirca. Paica ninmi: “Chai tiempocamanga tucui usharishcagutami Jehovata sirvingapaca rurajurcani. Shinapash pandarishpaca Jehovamanda nimata na ruraita ushanshnami sintirircani. Jehová ñucata ayudashpa catinatallami seguro carcani. ¿Ima horashi Jehovahuanga cutin ali amigo tucushpa congregacionbipash pundashna sirvi ushasha? yarcani”.

¹⁸ Michael huauquiguca pandarishpapash Jehovata sirvishpami catirca. Paica ninmi: “Jehovaman ashtahuan quimiringapami esforzarircani. Chaipaca Jehovata mañana, Bibliata estudiana, estudiashcapi pensarinami ninanda ayudahuarca”. Tiempohuanga cutinmi congregacionbi responsabilidadcunata chari callarirca. Y cunanbica anciano y precursor regular shinami sirvijun. Paica ninmi: “Huauquipanicunapa ayuda, ashtahuanbachaca ancianocunapa ayudaca Jehová ñucata juyashpa catishcatami ricuchihuashca. Chaimandami ñuca concienciapi ali sintirishpa cutin Jehovata sirvi ushapashcani. Shinallata Jehová Diosca pita cashpapash tucui shunguhuan arrepintirijpica perdonajlla cashcatami yachajupashcani”. Shinaca ñucanchicunapashmi cai huauquigushna imapi pandarishpapash, alita rurangapaj esforzarijpi, Jehovapi confiajpi pai bendicianata, paipa voluntadta pactachichun ayudanata seguromi caita ushapanchi (Sal. 86:5; Prov. 28:13).

19. Sansonba ejemploca ¿imashinata ñucanchi fe shinlli tucuchun ayudan?

¹⁹ Cai temapica Sansonba causaimanda huaquin partegucunatallami yachajupashcanchi. Juchayu caimanda na villana cosascunata paipa huarmiman villashpa llaquipi urmashpapash, Jehovapi confiashpa, paita sirvishpami catirca. Y Jehová Diosca paipi confiashpa catishcamandami paipa voluntadta pactachingapaj paita ayudashpa catirca. Shinallata Sansonga Jehovapa ñaupapica shuj shinlli feta charij personami carca. Chaimandami Jehová Diosca Hebreos capítulo 11​pi tucui shunguhuan Diosta crij gentecunapa shutita escribichijushpaca Sansonba shutipash escribishpa quidachun ricurca. Jehová ñucanchita juyashcata, ashtahuanbachaca llaquicunahuan cajpi ayudangapaj munashcata yachanaca, ñucanchitaca ninandami animachin. Shinaca Sansón runagushnallata Jehovata cashna mañapashunchi: “Mandaj Jatun Dioslla, cunanga ñucata yarihuayari. Taita Dioslla, […] cunangulla shinllichihuai” nishpa (Juec. 16:28).