1. Apóstol Pabloca ¿imamandata Jesusta ali catijcunataca cunanmi ashtahuan animarina canguichi nirca?

CUNAN punllacunapimi caishujhuan, chaishujhuan ashtahuan animarina capanchi. ¿Imamandata shina nipanchi? Hebreos libropica apóstol Pabloca cashnami nirca: “Tandanajunataca, na saquinachu canchi. Shujcunaca, tandanajunata saquijllacunami tian. Ashtahuangarin caishujmanda chaishujmanda aliguta yarichirishpami causana canchi. [Jehová Diospa, NM] punlla ña chayamujujta yachashpacarin”, ashtahuanmi animarina capanchi nishpa (Heb. 10:24, 25). Jesusta ali catijcunaca picha huatacuna jipami, Jehová Dios nishcashna Jerusalén llacta llaquichi tucugrijujta ricugrinajurca. Chaipimi Jesuspa nishcacuna pactarijta ricushpa, Jerusalén llactamanda llujshishpa rina carca (Hech. 2:19, 20; Luc. 21:20-22). Jehová Dios nishcashnami huata 70​pi Jerusalén llactataca romanocuna llaquichirca.

2. ¿Imamandata caishujhuan, chaishujhuan ashtahuan animarina capanchi?

² Cunan punllacunapi ima pasajujta ricushpami, Jehová Diospa punlla ñalla chayamunata cripanchi. Jehová Diospa punlla chayamujpica “manllanayai jatun llaquimi tianga” (Joel 2:11). Sofonías  1:14​pi shimicunapashmi cunanbica pactarijun. Chai textopica ninmi: “Mandaj Dios shamuna jatun punllami ña chayamujun, ñallapachami chayamunga” nishpa. Chaimi ‘caishujhuan, chaishujhuan ashtahuan juyarishpa, imata cashpapash alita ruranacunata yarichirina’ capanchi (Heb. 10:24). Shinaca huauquipanicunamanda ashtahuan preocuparishpami paicunata animana capanchi.

3. Apóstol Pabloca ¿imatata yachachirca? (Callari dibujota ricupangui).

³ Bibliapica ninmi: “Runapaj shungupi llaquilla canami, ñavita urai cumuchin. Ashtahuangarin alita rimashca shimicunaca, cushichinllami” nishpa (Prov. 12:25). Tucuicunallatami ali shimicunata nishpa animachun minishtinchi. Apóstol Pablo nishcashnaca tucuicunatami animana capanchi. Chaimi Roma llactapi huauquipanicunamanga cashna escribirca: “Canguna ashtahuan shinllitapacha catichun, Diospaj espíritu ñucaman imaguta caramushcatapash yarichingapajmi, cangunataca ricungapaj munani. Cangunapash, ñucapash paitallata crij cashpami, ashtahuan aliguta catingapaj, shujmanda shujmanda” animaringapaj munani nishpa (Rom. 1:11, 12). Imashinami ricupanchi apóstol Pablopashmi huaquinbica animachun minishtirca (Romanos 15:30-32, liingui).

4, 5. ¿Picunatata animana capanchi? ¿Imamandata animana capanchi?

⁴ Ashtaca huauquipanicunami paicunapa munaita huashaman saquishpa tiempo completopi Jehovata sirvinajun. Chaimi precursorcunata, misionerocunata, betelitacunata, superintendente de circuito huauquicunata paicunapa huarmigucunata, Oficina de Traducciongunapi sirvij huauquipanicunatapash ali shimigucunata nishpa animana capanchi. Shinallata huaquin huauquipanicunaca ñaupa punllacunapi tiempo completopi sirvishca cashpapash, paicunapa causaipi imapash cambiocuna tiajpimi shina sirvitaca ñana ushashca. Paicunatapashmi animana capanchi. Shina animajpica paicunaca agradicingami.

⁵ Soltera o soltero huauquipanicunapashmi animachun minishtin. Paicunaca ‘Jesusta crij’ jarihuan, huarmihuan cazarana mandashcata pactachingapaj munashpami nara cazarashca (1 Cor. 7:39). Cazarashca huarmigucunapashmi paicunapa cusa juyashcata ricuchichun, paicunapa ruraicunata alicachichun munan (Prov. 31:28, 31). Catiriashpa llaquichijpipash, imapash ungüihuan cashpapashmi huaquin huauquipanicunaca Jehovata tucui shunguhuan sirvishpa catinajun. Paicunatapashmi animana capanchi (2 Tes. 1:3-5). Chai tucui huauquipanicunataca Jehová Diospash, Jesuspashmi animashpa catijun (2 Tesalonicenses 2:16, 17, liingui).

6. Isaías 32:1, 2​pi nishcashnaca ¿imatata ancianocunaca rurana can?

⁶ (Isaías 32:1, 2, liingui). Llaqui punllacunapi causanajuimandami huaquinbica llaquilla, desanimarishca sintirinchi. Jesusca ‘mandajcunata’ o anciano huauquicunata utilizashpami tucuilla huauquipanicunata animajun. Huaquin ancianocunaca ungidocuna o shuj llamagucunamanda huauquicunami can. Shinapash huauquipanicunataca ancianocunaca ‘cashna, chashna crishpami catina canguichi nishpaca na mandajunllu’. Chaipa randica huauquipanicuna ‘cushilla causachunmi ayudan’. Shinaca ancianocunaca huauquipanicuna cushilla, tucui shunguhuan Jehovata sirvichunmi ayudanajun (2 Cor. 1:24).

7, 8. Ancianocunaca ¿imashinata huauquipanicunataca animana can?

 ⁷ Ancianocunaca apóstol Pablopa ejemplotami catina can. Paica Tesalónica llactapi catiriashpa llaquichi tucushca huauquipanicunamanmi cashna escribirca: “Ñucanchica, cangunataca ninanda juyashpami, Taita Diosmanda ali villaita villarcanchi. Cangunamandaca, huañuitapash huañushunlla yashpami, na saquishpa villarcanchi. Cangunaca, ninanda juyai tucushcami canguichi” nishpa (1 Tes. 2:8).

⁸ Imagutapash nishpa animana ali cajpipash, apóstol Pablo nishcashnaca ruraicunahuanmi animana ashtahuan ali can. Éfeso llactamanda anciano huauquicunamanga apóstol Pabloca cashnami nirca: ‘Imagupash illajcunaman carana canguichi nishpami yachachijurcani. Carajpi japijcunatapash yalimi carajcunaca ninanda cushijun nishpami Jesusca yachachishca. Chaitaca, yarinami canguichi’ nishpa (Hech. 20:35). Apóstol Pabloca huauquipanicunataca ruraicunahuanmi ashtahuanbachaca animarca. Chaimi cashna nirca: “Cangunapaj ali cachunmi, ñuca imaguta charishcatapash, ninanda cushijushpa tucuchisha” nishpa (2 Cor. 12:15). Imashinami ricupanchi ancianocunaca shimihuanllaca na animanachu can. Ashtahuanbachaca ruraicunahuanmi huauquipanicunataca animana can. Shinami tucui shunguhuan huauquipanicunamanda preocuparishcata ricuchinga (1 Cor. 14:3).

9. Huauquipanicunata ali shimicunahuan consejachunga ancianocunataca ¿imata ayudanga?

⁹ Huaquinbica huauquipanicunata animangapaca ancianocunaca consejanami tucushca. Huauquipanicunata ali shimicunahuan consejachunga ancianocunataca Bibliami ayudanga. Jesusca shujcunata consejanamandaca shuj alipacha ejemplotami saquirca. Jesusca huañushpa causarishca jipami Asia Menor, Éfeso, Pérgamo, Tiatira llactapi congregaciongunataca felicitashca jipa consejarca (Apoc. 2:1-5, 12, 13, 18, 19). Shinallata Laodicea llactapi congregacionmanga cashnami nirca: “Ñuca juyashcacunataca, tucuicunatami [disciplinashpa, NM] yachachini. Cunanga, ñucatalla juyashpa, nalita rurashcamanda ninanda llaquirishpa, ñucapajman tigraringui” nishpa (Apoc. 3:19). Huauquipanicunata consejana tucujpica ancianocunaca Jesuspa ejemplotami catina can.

10. Tucuicunallata animaringapaca ¿imatata rurana capanchi?

¹⁰ Ancianocunallaca na shujcunata animanachu can. Chaimi apóstol Pabloca tucuicunata cashna nirca: “Shujcuna shinlli tucushpa catichunmi, ali canatalla parlana canguichi”. Shujcunapapash “aligupacha uyarichunmi, chashna parlana canguichi” nishpa (Efes. 4:29). Shinaca tucuicunallatami ñucanchi huauquipanicunamanda preocuparishpa, paicuna imata minishtishcata ricushpa ayudana capanchi. Apóstol Pabloca hebreo huauquipanicunamanga nircami: “Shaijushca maquitapash, na cuyurij cunguritapash shinlliyachina canguichi. Canguna purina chaqui ñangunataca, alichinami canguichi. Jangacuna ñanmanda ama Ilujshishpa ali tucuchunmi, chashna rurana canguichi” nishpa (Heb. 12:12, 13). Jovengunapashmi shuj huauquipanicunataca imagutapash nishpa animanalla can.

11. Marthe panigutaca ¿imata ayudarca?

¹¹ Marthe * shuti panigumanda ricupashunchi. Paica llaqui llaquimi carca. Paica ninmi: “Shuj punllaca ayudahuai nishpami Jehovata mañarcani. Chai jipallami shuj mayorlla ñañaguhuan tuparircani. Chai ñañaguca ñucata juyaihuan tratashpami llaquishcata  ricuchihuarca. Ñucapashmi shina llaqui llaqui sintiricani nishpami parlahuarca. Chaita uyashpaca na ñucalla cashcatami cuenda japircani” nishpa. Chai mayorlla paniguca paipa nishcacunahuan Marthe paniguta ayudanataca yaitallapash na yashcangachu.

12, 13. Filipenses 2:1-4​pi shimicunataca ¿imashinata pactachi ushapanchi?

¹² Filipos congregacionmanda huauquipanicunamanga apóstol Pabloca cashnami nirca: ‘Cristopi cangunapa cushijui tiajpi, juyaimanda cushijui tiajpi, Diospa espiritupash cangunahuan cajpi, tucui shunguhuan juyarina, shujcunata llaquina yuyai tiajpica ñucatami cushichihuanguichi. Chai juyaitallata charishpa, shujlla yuyai tucushpami chashna cushichihuanguichi. Randimanda fiñanajungapalla, na cashpaca yanga jariyangapallapash, na imatapash ruranachu canguichi. Ashtahuangarin paimi ñucatapash yali ashtahuan ali yashpami na jariyashpa tucuicunatallata alicachina canguichi. Maijan cashpapash quiquinballa ali cachunga, na yarinachu canguichi. Ashtahuangarin shujcunapapash ali cachunmi, tucuicunallata yarina canguichi’ nishpa (Filip. 2:1-4).

¹³ Chai textopi nishcashnaca, tucuicunallatami huauquipanicunata animangapaj esforzarina capanchi. Chaimi huauquipanicunamanda preocuparishcata, paicunata juyashcata, llaquishcatapash ricuchi ushapanchi.

14. Shujcunata animangapaca ¿imatata rurai ushapanchi?

¹⁴ Ñucanchi ayudashca huauquipanicuna cunangaman Jehovata sirvishpa catinajujta ricushpaca ninandami cushijunchi. Apóstol Juanga nircami: “Na llullashpa villajuj Shimita ñuca huahuacunashna causanajushpa, aliguta catinajun” nijta uyashpaca ninandapachami cushijuni nishpa (3 Juan 4). Ashtaca precursorcunaca  ninmi: Ñucanchihuan Bibliata yachajushca gentecuna Jehová Diosta tucui shunguhuan sirvinajujta ricushpa o precursorcuna tucushcata ricushpaca ninandami cushijunchi nishpa. Shinaca shuj precursor huauqui o pani desanimarishca cajta ricushpaca, shuj gentecunata imashina ayudashcata yarichishpami animaita ushapanchi.

15. Jehovata tucui shunguhuan sirvijcunata animangapaca ¿imatata rurana capanchi?

¹⁵ Ashtaca superintendente de circuito huauquicunapash, paipa huarmigucunapash cashnami nin, huauquipanicuna congregacionda visitashcamanda agradicishpa shuj cartaguta cujpica cushillami sintirinchi nishpa. Shinallata ancianocuna, misionerocuna, precursorcuna, Betelpi sirvij huauquipanicunapash tucui shunguhuanmi Jehovata sirvinajun. Chaimi paicunata agradicishpa animana capanchi.

16. Huauquipanicunataca ¿imashinata animana capanchi?

¹⁶ Huaquinbica imata ninata na atinaimandami shujcunata animanaca shinlli ricurin. Shinapash shujcunata animangapami esforzarina capanchi. Chaipaca huauquipanicunataca cushillami saludana capanchi. Por ejemplo, ñucanchicuna cushilla saludajpipash na ñucanchi munashcashna ricujpica ¿imapita pensarina capanchi? Tal vez chai huauqui o pani imapash problemacunata charimanda na ñucanchi munashcashna ricushcatami pensarina capanchi. Paicuna imashina sintirishcata parlajpica alimi uyana capanchi. Paicunata uyajpica alimi sintiringa (Sant. 1:19).

17. Shuj joven huauquitaca ¿pita ayudarca?

¹⁷ Cunanga Henri shuti huauquimanda ricupashunchi. Paipa familia ucupuramanda taucacuna Jehová Diosmanda caruyashca cajpimi  paica desanimarishca carca. Paipa taitaca anciano shina sirvijushpapashmi Jehovamanda caruyashcarca. Chaimi superintendente de circuito huauquica cafeguta ufiashpandi Henri huauqui ima nijta ali ali uyarca. Chai jipallami Henri huauquica paipa familia cutin Jehovaman tigrachunga paira Jehová Diosta tucuipi cazuna cashcata cuenta japirca. Shinallata Salmo 46, Sofonías 3:17, Marcos 10:29, 30 textocunami Henri huauquitaca animarca.

18. a) Rey Salomonga ¿imatata nirca? b) Apóstol Pabloca ¿imatata nirca?

¹⁸ Henri shuti huauquimanda, Marthe shuti panimandaca ¿imatata yachajupanchi? Llaquilla caj huauquipanicunata tucuicunallata animai ushashcatami yachajupanchi. Rey Salomonga nircami: “Ali shimicunata parlachun munashca horaspi parlashpacarin alipachamari”. “Cushilla ñavihuan ricujpica, shungupash cushijunmi. Ali villaicunata villashcacunaca, tullucunatapash shinllichinmi” nishpa (Prov. 15:23, 30). Shinaca pitapash llaquilla cajta ricushpaca ¿imatata rurana capanchi? Villajuj revistata o Internetpi jw.org paginamanda informaciondami liina capanchi. Apóstol Pabloca nircami: ‘Cangunapurami caishujhuan, chaishujhuan yarichirishpa [o animarishpa], tucuicuna yachajuna canguichi. Salmocunata, Diospa espíritu yachachishca juyailla candanacunatapash’ Jehová Diosta pagui nishpami tucui shunguhuan candana canguichi nishpa (Col. 3:16; Hech. 16:25). Imashinami ricupanchi, canticocunata candanaca tucuicuna ali sintirichunmi ayudan.

19. ¿Imamandata caishujhuan, chaishujhuan animarinaca ashtahuan minishtirishca can? ¿Imatata rurana capanchi?

¹⁹ Jehová Diospa punllaca ñallami chayamunga. Chaimi caishujhuan, chaishujhuan ashtahuan animarina capanchi (Heb. 10:25). Shinallata apóstol Pablopa shimicunatapashmi pactachina capanchi. Paica nircami: “Ashtahuan aliguta catingapajmi cangunaca shujmanda shujmanda yarichirina [o animarina] canguichi. Chaitaca ñami cangunallata ruranajunguichi” nishpa (1 Tes. 5:11).