Cushichij Diospa ejemplota catipashunchi
‘Taita Diosca ninanda alicachi tucushca cachun. Paillami ñucanchitaca jatun llaquicuna japijpipash cushichin’ o animan (2 COR. 1:3, 4).
1. Adanba miraicunataca ¿imashinata Jehová Diosca animarca?
GENTECUNA juchayu tucushca punllamandapachami Jehová Diosca cushichij Dios cashcata ricuchishca. Jardín de Edenbimi Adanbash, Evapash Taita Diosta na cazushcata ricuchirca. Paicuna na cazushca jipallami Jehová Diosca shuj profeciata curca. Chai profeciata ali intindinami Adanba miraicunataca shuj esperanzata charichun, animarichunbash ayudagrijurca. Chai profeciaca Génesis 3:15pimi can. Jehová Diosca nircami, Diablotapash, paipa nali ruraicunatapashmi tucuchisha nishpa (1 Juan 3:8; Apoc. 12:9).
PAITA SIRVIJCUNATAMI JEHOVÁ DIOSCA ANIMARCA
2. Jehová Diosca ¿imashinata Noetaca animarca?
2 Noé runaguca Jehovata na adoraj gentecunapurapimi causarca. Chai punllacunapica Noé, paipa familiallami Jehová Diostaca adorashpa causan carca. Gentecunaca nalita rurashpa, huainayashpami causan carca. Chaita ricushpami, chai gentecunaca nunca na cambiangachu nishpa Noeca llaquirinman carca Gén. 6:4, 5, 11; Jud. 6). Shinapash Jehová Dios ayudajpillami Noeca Jehovata tucuipi cazushpa causarca (Gén. 6:9). Jehová Diosca chai nali gentecunata tucuchinatami Noemanga villarca. Shinallata Noepash, paipa familiapash salvaringapaj imata rurana cashcatami villarca (Gén. 6:13-18). Chaita uyashpaca Noeca ninandami animarishcanga.
(3. Jehová Diosca ¿imashinata Josuetaca animarca? (Callari dibujota ricupangui).
3 Huatacuna jipaca, Josué runagumi israelitacunataca Jehová Dios cusha nishca alpaman pushana responsabilidadta chasquirca. Chaipaca chai llacta ladolla soldadocunatami mishana carca. Jehová Diosca Josué imamanda preocuparishca cashcata ali yachashpami paita animachun Moisesta cacharca. Jehová Diosca nircami: “Cunanga Josuetaca, cushichishpa shinllichishpa mandangui. Paimi, israelcunata ñaupashpa rishpa, can ricugrijuj llactataca, paicunapaj cachun cunga” nishpa (Deut. 3:28). Jehová Diospashmi Josuetaca cashna nishpa animarca: “Ricui, ñucami candaca ama manllashpa, shinllipacha tucungui nishpa mandani. Na manllashpa, na shaijunachu cangui. Canda Mandaj Taita Dios ñucaca, can maita rijpipash, canhuanmi casha” nishpa (Jos. 1:1, 9).
4, 5. a) Jehová Diosca ¿imashinata paipa sirvijcunataca animarca? b) Jehová Diosca ¿imashinata Jesustaca animarca?
4 Tucui paita sirvijcunatami Jehová Diosca animan. Por ejemplo, Jehová Diosca alimi yacharca israelitacuna Babilonia llactaman prezo apai tucushpaca animachun minishtishcata. Chaimi cashna nirca: “Na manllanachu canguichi, ñucami cangunahuan cani. Na shaijunachu canguichi, ñucami cangunaman ushaita cuj Taita Dios cani. Imatapash cashcatapacha ruraj, ñuca ali lado maquihuanmi, cangunapaj tucui causaipi ayudajushalla, imatapash carajushalla” nishpa (Is. 41:10). Punda siglopi Jesusta catijcunaca Jehová Dios ayudanataca tucui shunguhuanmi crirca. Ñucanchipash chaitallatami crinchi (2 Corintios 1:3, 4, liingui).
5 Jehová Diosca paipa churi Jesustapashmi animarca. Jesús bautizarishca jipaca jahua cielomandami cashna nij uyarirca: “Caimi, ñuca juyashca Churigu. Paimandami ninanda cushijuni” nishpa (Mat. 3:17). Chai shimicunaca Jesustaca ninandami animashcanga.
JESUSPA EJEMPLO
6. Talentocunamanda chimbapuraica ¿imapata ayudan?
6 Jehová Diospa ejemplota catishpami Jesusca shujcunata animarca. Talentocunamanda chimbapuraita utilizashpami Jesusca paipa catijcuna Jehovata tucuipi cazushpa catichun animarca. Chai chimbapuraipica shuj runami paita tucuipi cazuj esclavocunataca cashna nishpa alicachirca: “Canga, aliguta pactachij, aliguta ruraj runagumi cashcangui. Ashagutalla mingajpipash, aliguta cuidashpami cashna mirachishcangui. Cunanga, ashtahuan ashtacatami canman mingapasha”. Cushijungapaj ripashun nishpa (Mat. 25:21, 23).
Jesusca apóstol Pedrota animashpami, shuj huauquipanicunatapash animachun mandarca
7. a) Jesusca ¿imashinata apostolcunataca animarca? b) ¿Imashinata Jesusca apóstol Pedrotaca animarca?
7 Apostolcuna pandarijpipashmi Jesusca paicunata animarca. Por ejemplo apostolcunaca pi ashtahuan yali cashcata yachangapaj munaimandami paicunapura casi siempre fiñarin carca. Shinapash Jesusca pacienciahuanmi cashna nishpa animarca, na jariyashpami shujcunata sirvina canguichi nishpa (Luc. 22:24-26). Apóstol Pedroca tauca viajetami pandarirca (Mat. 16:21-23; 26:31-35, 75). Shinapash Jesusca apóstol Pedrotaca animashpami, shuj huauquipanicunatapash animachun mandarca (Juan 21:16).
PUNDA TIEMPOPI DIOSTA SIRVIJCUNAPA EJEMPLO
8. Soldadocunata mandajcunata, israelitacunatapash ¿imashinata Ezequiasca animarca?
8 Jesús cai alpaman nara shamujpillatami Jehovata sirvijcunaca shujcunata animana minishtishcata ali yacharca. Rey Ezequiaspa ejemplota ricupashunchi. Asiriocunaca Jerusalén llactatami llaquichigrinajurca. Chaimi Ezequiasca israelitacunatapash, soldadocunata mandaj runacunatapash tandachishpa animarca (2 Crónicas 32:6-8, liingui).
9. ¿Imatata Job runagumandaca yachajupanchi?
9 Cunanga Job runagumanda ricupashunchi. Pai llaqui llaqui cajpimi shuj runacunaca animangapaj rirca. Jobta animanapa randica imacunatapash nishpami nali sintichirca. Shina nali sintichijpipash Jobca shujcunata imashina animanatami paicunataca yachachirca. Jobca nircami, ali shimicunata nishpami shujcunataca ñucaca animaiman carcani nishpa (Job 16:1-5). Jehová Diospash, Elihú runagupashmi Jobtaca animarca (Job 33:24, 25; 36:1, 11; 42:7, 10).
10, 11. a) Jeftepa ushiguca ¿imamandata animachun minishtirca? b) ¿Cunan punllacunapica ¿picunatata animana capanchi?
10 Jefté runagupa ushipashmi animachun minishtirca. Jefteca ammonita nishcacunahuanmi macanajungapaj rigrijurca. Chaimi Jehová Diostaca cashna nirca: “Macanajuita mishashpa tigrajujpi, ñucata tuparingapaj ñuca huasi pungumanda maijambash punda Ilujshimushpaca, Mandaj Diospajmi canga” nishpa. Jefté runagu ‘macanajuita mishashpa paipa huasiman tigrajujpica, paipa ushimi tuparingapaj ñapash Ilujshimurca’. Chaita ricushpaca Jefteca ninandami llaquirirca. Paica ashtahuan huahuacunataca na charircachu. Shinapash paipa nishcata pactachishpami Siló llactapi tabernáculo huasipi tucui vida sirvichun paipa ushitaca cacharca (Juec. 11:30-35).
11 Chaita pactachinaca Jefté runagupaca shinllimi cashcanga. Shinapash paipa ushigupami ashtahuan shinlli carianga. Shina cajpipash paica paipa taita nishcatami pactachingapaj munarca (Juec. 11:36, 37). Chaita pactachingapaca na cazaranachu carca. Huahuacunatapash na charinachu carca. Jefté runagupa miraica tucurigrijurcami. Chaimi Jeftepa ushiguca animachun minishtirca. Bibliapica ninmi: Galaad llactapi causaj Jefté runapaj ushi shina rurashcamandami, Israel llactapi jarihuan nara tacarishca cuitsacunaca, chaita yarishpa cada huata chuscu punllacaman alicachingapaj rin carca nishpa (Juec. 11:39, 40). Cunan punllacunapi huauquipanicunaca Jehovata ashtahuan sirvingapaj munaimandami soltera o soltero catishca. Chaimi chai huauquipanicunataca animana, felicitana capanchi (1 Cor. 7:32-35).
APOSTOLCUNAPA EJEMPLO
12, 13. Apóstol Pedroca ¿imashinata huauquipanicunataca animarca?
12 Jesusca pai huañuna punlla chayamujujpimi apóstol Pedromanga cashna nirca: Luc. 22:31, 32).
“Simón, Simón ricui, Satanasmi cangunataca, trigotashna shushungapaj ña mañagrishca. Ashtahuangarin ñucata crishpa aliguta catichunmi, canmandaca Diosta ninanda mañarcani. Ñucata aliguta crishpa cutin tigrarishpaca, cambaj huauquicuna ñucata tucui shunguhuan catichun yachachipangui” nishpa (Apostolcuna escribishca cartacunaca punda siglopipash, cunanbipashmi animashpa catin. (Párrafo 12-17 ricupangui).
13 Apóstol Pedroca punda siglopi congregaciongunataca alipachami ayudarca (Gál. 2:9). Paica Pentecostés punllapipash, shuj viajecunapipashmi na manllashcata ricuchirca. Chaimandami shuj huauquipanicunapaca shuj ali ejemplo carca. Apóstol Pedroca ashtaca huatacunata Jehovata sirvishca jipami cashna nirca: Cai asha escribishcapica animangapami cachamuni. ‘Ninanda juyashpa Taita Dios caramujujta canguna chasquinajujca, napacha llulla cajtapash villashpami cachamuni’ nishpa (1 Ped. 5:12). Apóstol Pedropa escribishca cartacunaca, ashtaca huatacunatami Jehovata sirvijcuna animarishpa ñaupaman catichun ayudashca. Cunan punllacunapipash Jehová Diospa nishcacuna pactarichunmi shuyanajupanchi. Chaimi ñucanchicunaca animachun minishtinchi (2 Ped. 3:13).
14, 15. Apóstol Juan escribishca librocunaca ¿imamandata Jehovata sirvijcunataca animashca?
14 Apóstol Juanbashmi punda siglopi congregaciongunataca alipacha ayudarca. Paipashmi Jesús imashina villachishcataca escribirca. Apóstol Juan escribishca librocunaca cunangamanmi Jehovata sirvijcunataca animashca. Jesusca nircami: “Juyarishpa causanajujta ricushpami, ñucapaj yachajujcuna Juan 13:34, 35, liingui).
cashcataca tucuicuna rijsinajunga” nishpa. Cai shimicunaca Juan libropillami escribishca tiajun (15 Juan escribishca quimsa cartacunapica ashtahuan valishca yachachishcacunatami tari ushapanchi. Por ejemplo, Jesús paipa causaita cushpa ‘ñucanchipa juchacunata tucuillata maillanshna’ anchuchishcata liishpaca ¿nachu ñucanchi pandarishcacunamanda llaquilla sintirijushpapash ali sintiripanchi? (1 Juan 1:7). ‘Taita Diosca ñucanchi shunguta yalitami yachan’ nishca shimicunata liishpaca, punda juchacunamanda shungupi nali sintirijushpapash ¿nachu animaripashcanchi? (1 Juan 3:20). Apóstol Juanllami ‘Taita Diosca juyajmi’ can nishpa escribirca (1 Juan 4:8, 16). Jesusta ali catijcuna ‘na llullashpa villajuj Shimita catishpa causanajujpimi’ Juanga felicitarca. Chaitaca Segunda y Tercera de Juanbimi ricupanchi (2 Juan 4; 3 Juan 3, 4).
16, 17. Apóstol Pabloca ¿imashinata huauquipanicunataca animarca?
16 Apóstol Pablomi huauquipanicunataca ashtahuan animashpa ayudarca. Jesusta ali catij congregacionguna tiai callarijuj tiempopica, casi tucui apostolcunami Jerusalén llactapi carca. Cuerpo Gobernantepi huauquicunaca chai llactapimi carca (Hech. 8:14; 15:2). Judá llactamanda Jesusta ali catijcunaca chai llactapi gentecunamanmi Jesusmanda villachirca. Shinapash chai gentecunaca judiocunapa costumbrecunatapash, crishcacunatapash catishpami shujlla Dios tian nishpa crin carca. Shinallata Diospa espíritu santo yarichijpimi apóstol Pabloca griegocunaman, romanocunaman villachingapaj rirca. Paicunaca ashtaca yanga dioscunata adorashpami causan carca (Gál. 2:7-9; 1 Tim. 2:7).
17 Apóstol Pabloca ashtaca llactacunapimi villachirca. Cunanbica chai llactacunaca Turquía, Italia, Grecia llactacunami can. Apóstol Pabloca na judío gentecunapurapimi congregaciongunata callarichirca. Na judío huauquipanicunaca ‘paicunapa llactapuracunallata ninanda llaquichijpimi’ animachun minishtirca (1 Tes. 2:14). Tesalónica llactapi chairalla callarishca congregacionmanmi apóstol Pabloca huata 50pi shuj cartata escribirca. Chai cartapica nircami: “Cangunataca na cungashpami, Taita Diosta pashi nishpa, tucuicunata yariashpa mañanajunchi. Cangunaca, alipacha crishpami, ninan juyaita charishpa, imatapash aliguta rurashpa causanajunguichi” nishpa (1 Tes. 1:2, 3). Shinallata chai huauquipanicunataca mandarcami: “Ashtahuan aliguta catingapajmi, cangunaca caishuj chaishuj aliguta yarichirina [o animarina, NM] canguichi” nishpa (1 Tes. 5:11).
CUERPO GOBERNANTEPA EJEMPLO
18. Cuerpo Gobernante huauquicunaca ¿imashinata Felipetaca animarca?
18 Jehová Diosca Cuerpo Gobernantepi huauquicunata utilizashpami punda siglopi ñaupaman pushaj huauquicunata, shuj huauquipanicunatapash animarca. Por ejemplo, Felipeca samaritano gentecunamanmi Jesusmanda yachachirca. Cuerpo Gobernante huauquicunaca, Felipeta apoyachunmi Pedrotapash, Juandapash cacharca. Pedropash, Juanbashmi Cuerpo Gobernantepura carca. Chaimi mushuj huauquipanicunapash Diospa espíritu santota chasquichun paicunaca Jehová Diosta mañarca (Hech. 8:5, 14-17). Shina rurashcamandaca Felipepash, chai mushuj huauquipanicunapashmi ninanda animarishcanga.
19. Cuerpo Gobernantepa cartata liishpaca huauquipanicunaca ¿imashinata sintirirca?
19 Moisesman cushca Leypica judiocuna circuncisionda rurachunmi mandashca carca. Chaimi na judío huauquicuna circuncisionda rurana cashcata o na rurana cashcata yachangapaj Cuerpo Gobernantepi huauquicunata tapurca (Hech. 15:1, 2). Cuerpo Gobernantepi huauquicunaca Jehová Diospa espíritu santota mañashpa, Bibliapi ricushca jipami, circuncisionda rurana ñana minishtirishcata intindirca. Chai jipaca imamanda circuncisionda rurana ñana minishtirishcata villashpami shuj cartata escribirca. Chaimi shuj huauquicunata tucuilla congregaciongunapi saquigrichun mandarca. Huauquipanicuna chai cartata liishpaca “ninandami cushijunajurca” (Hech. 15:27-32).
20. a) Cuerpo Gobernantepi huauquicunaca ¿imashinata mundo enteropi huauquipanicunataca animan? b) ¿Imatata cati temapica yachajupashun?
20 Cunan punllacunapi Testigo de Jehovacunapa Cuerpo Gobernanteca Betelpi sirvijcunata, tiempo completo especialpi sirvijcunata, tucuilla huauquipanicunatapashmi animan. Chai huauquicuna ñucanchita animashcamandaca punda siglopi huauquipanicunashnami cushilla sintirinchi. Ashtahuanbash Jehovamanda caruyashcacuna cutin Jehovaman tigrachunmi, Cuerpo Gobernanteca huata 2015pi Jehová desea que vuelva nishca folletota llujchirca. Shinaca ¿ñaupaman pushaj huauquicunallachu Jehovapa ejemplota catishpa shujcunata animana can? Chai tapuitaca cati temapimi yachajupashun.