1-3. a) Jovengunaca ¿imatata rurana can? Shuj chimbapuraita parlapai (Callari fotota ricupangui). b) Jovengunaca Jehová Diosta ashtahuan sirvingapaca ¿imatata rurana can?

PENSARIPAI, shuj importante tandanajuiman caru caruman buspi rigrijushcanguiman. Bus paradapi ña cashpaca ashtaca gentecunata, ashtaca buscunata ricushpami imata ruraitapash na atinanguiman. Shina cashpapash maimanbacha rinata ali yachaimandami chai pushtuman rijuj busta japinguiman.

² Ñucanchi causaica caru caruman rijuj cuendami can. Jovengunaca bus paradapi gentecunashnami can. Paicunaca ashtaca decisiongunata agllana caimandami preocuparishca sintirin. Shinapash maimanbacha rinata ali yachaimandami chai pushtuman rina yuyaihuan imatapash ali decidin.

³ Cai temaca jovenguna Jehová Diosta ashtahuan sirvichunmi ayudanga. Chaipaca imapi trabajanata, imata estudianata, cazaranata o na cazaranata decidingapaca Jehová Diospa mandashcacunatami pactachina can. Shinallata espiritual metacunata pactachingapami esforzarina can. Jehovata ashtahuan  sirvingapaj esforzarinajuj jovengunataca Jehová Diosca bendiciangami. Cushilla causaita charichunbashmi ayudanga (Proverbios 16:3, liingui).

4. Cai temapica ¿imatata yachajupashun?

⁴ Espiritual metacunata charinaca ¿imamandata ali can? Cai temapimi quimsa yuyaicunata ricupashun. Callari yuyaicunaca, espiritual metacunata pactachingapaj esforzarina Jehová Dioshuan ali amigo cachun ayudajtami ricuchinga. Último yuyaica ricuchingami, joven cashpallata espiritual metacunata charinaca cushilla causachun ayudashcata.

5. ¿Imamandata espiritual metacunata charina capangui?

⁵ Punda yuyaita ricupashunchi. Jehová Dios ñucanchita juyashcamanda, ñucanchimanda imata rurashcata agradicingapami espiritual metacunata charina capangui. Taita Diosta sirvij runaguca nircami: “Mandaj Dioslla, canda alicachinaca [o agradicinaca] juyaillagumari” can nishpa. Caitapashmi nirca: “Mandaj Dioslla, can tucuita rurashpa ñucata cushichishcamandami, cambaj maquihuan rurashcata ricushpa ninanda cushijuni” nishpa (Sal. 92:1, 4). Jehová Diosca quiquinmanga causaita, huauquipanicunata, jipa punllacunapi para siempre causana esperanzatapashmi cushca. Shinallata paita rijsichun, paipa mandashcacunata Bibliapi yachajuchunmi Jehová Diosca saquishca. Chaicunapimi pensarina capangui. Shinaca espiritual cosascunata pundapi churashpaca Jehová Diosta agradicishcatami ricuchingui. Shinami Jehová Dioshuan ali amigo tucungui.

6. a) Espiritual metacunata charinaca ¿imapita ayudan? b) Uchilla huahuacunaca ¿ima metacunatata chari ushan?

⁶ Cati yuyaita ricupashunchi. Espiritual metacunata pactachingapaj esforzarijpica Jehová Diosca alicachishpami ricun. Shinallata paita rijsichunmi ayudanga. Apóstol Pabloca nircami: ‘Taita Diosca imatapash cashcatapacha ruraj cashpami, canguna imatalla ruranajushcataca na cungan. Paipa shutita juyaimanda, chashna rurashpa catinajushcamandami na cungan’ nishpa (Heb. 6:10). Tucuicunallatami espiritual metacunata chari ushapanchi. Huaquin ejemplocunata ricupashunchi. Christine shuti panica 10 huatacunata charishpami Jehovata sirvijcunapa experienciacunata lii callarirca. Toby huauquica 12 huatacunata charishpami nara bautizarishpallata tucuilla Bibliata liina metata churarirca. Maxim huauquica 11 huatacunata charishpami bautizarirca. Cutin paipa pani Noemica 10 huatacunata charishpami bautizarirca. Paicunaca ishcandimi igual bautizarirca. Betelpi sirvina metata pactachingapami ishcandillata esforzarirca. Shinallata chai metata ama cungangapami Betelman rina solicitudta paicunapa huasi ucupi pegarca. Quiquinga ¿ima metacunatata pactachingapaj munangui? Quiquinba metacunata pactachingapaj esforzaripangui (Filipenses 1:10, 11, liingui).

7, 8. a) Jovengunataca ¿imata ayudanga ali decisiongunata agllachun? b) ¿Imamandata shuj paniguca na universidadman rirca?

⁷ Cunanga último yuyaita ricupashunchi. Joven cashpallatami imata estudianata, imapi trabajanata, shuj cosascunatapash decidina capangui. Caipi yuyapashun, maimanbash rijujpi ishcai ñan ricurijpica maijan ñanda rinatami agllana tucun. Shina cuendami  ñucanchi causaipaca imapash decisiongunata agllana tucun. Maiman chayanata ali yachashpaca chaiman chayangapami ali decisiongunata agllai ushangui. Shinallatami quiquinba causaipi imata ruranata ali yachashpaca ali decisiongunata agllangui. Proverbios 21:5​pica ninmi: Imatapash aliguta yarishpa uchalla rurajcunaca ali causaitami charinga nishpa. Quiquinba metacunata ali yuyashpa uchalla pactachingapaj esforzarishpaca quiquinllatami ashtaca bendiciongunata chasquingui. Shuj ejemplota ricupashunchi, Damaris shuti paniguca shuj importante decisiondami agllana tucurca.

⁸ Damaris paniguca ali estudiantemi carca. Chaimi colegiota tucuchishpa, universidadpi abogadapa estudiachun paimanga shuj becata cusha nirca. Shinapash paica chaita na chasquishpami medio tiempo trabajota mascarca. ¿Imamandata shina rurarca? Paica ninmi: “Siempremi precursora cangapaj munarcani. Chaita pactachingapaca huaquin punllacunatallami trabajana carcani. Universidadta estudiashpaca ashtaca culquitami ganaiman carcani. Shinapash huaquin punllacunatalla trabajaitaca na ushaimanllu carcani” nishpa. Damaris paniguca ña 20 huatacunatami precursora shina sirvijun. Universidadpi na estudiashcataca na arripintirinllu. Paica ninmi: “Ñuca trabajaj pushtupica ashtaca abogadocunami tian. Paicunaca na cushilla causanllu. Ñucapash shinallatami causaiman carcani. Shinapash precursora tucushcamandami cunangaman cushilla Jehovata sirvijuni” nishpa.

9. ¿Imamandata jovengunataca felicitana capanchi?

⁹ Tucui congregaciongunapimi ashtaca ashtaca jovenguna espiritual metacunata pactachishpa Jehovata tucui shunguahuan sirvinajun. Chaimandami paicunataca felicitana capanchi. Paicunaca cushillami causan. Shinallata estudianapi, trabajopi, familiapi shuj shuj cosascunapipash, Jehovata cazushpami imata ruranata ali decidingapaj esforzarinajun. Rey Salomonga nircami: Jehová Diostaca “cambaj tucui shunguhuan yariangui”. “Imata rurangapajpash, Diostara yaringui. Paimi, can purina ñangunapipash aliguta pushanga” nishpa (Prov. 3:5, 6). Jehová Diosca jovengunataca ninandami alicachin. Jovengunata juyaimandami Jehová Diosca paicunata bendician, cuidan, paicunapa causaipipash ayudan.

10. a) Quiquinba causaipica ¿imata ashtahuan importante cana can? b) Ali villachichunga ¿imata ayudanga?

¹⁰ Jehová Diospa ñaupajpi ali ricuringapaca jovengunaca ashtahuan villachingapami esforzarina can. Jesusca villachina minishtirishcapacha cashcatami ricuchirca. Chaimi nirca: ‘Ali villaitami tucui llactacunapi causajcunaman villachinapacha’ can nishpa (Mar. 13:10). Imashinami ricupanchi quiquinba causaipica villachinami ashtahuan importante cana can. Shinaca ¿ashtahuan  villachingapaj o precursor shina sirvingapaj esforzarijunguichu? Villachinapi na cushilla sintirishpaca ¿imatata rurai ushangui? Quiquinba crishcacunata shujcunaman ali intindichingapaca ¿imatata rurana cangui? Cai ishcai yuyaicunata rurangui. Ali prepararingui. Quiquinba crishcacunata shujcunaman parlangui. Shina rurashpaca quiquinllatami cushilla sintiringui.

11, 12. a) Jovenguna paicunapa crishcacunata shujcunaman parlangapaca ¿imatata rurana can? b) Lucasca ¿imatata rurarca?

¹¹ Escuelapi o colegiopi quiquinba cumbacuna imamandata Diospi cringui nishpa tapujpi imata ninata ali prepararingui. Chaipaca Internetpi jw.org paginapi cai tapuimanda ashtahuan informacionda mascangui. Shinallata Jovengunapa 10 tapuicuna nishca folletopi “Evolucionbi ¿crinachu cani?” nishca tapuipashmi quiquinba cumbacunaman ali intindichichun ayudanga (1 Pedro 3:15, liingui).

¹² Shinallata jw.org paginaman quiquinba cumbacuna yaicuchunbash animangui. Lucas * shuti jovenga chaitami rurarca. Shuj punllaca paipa profesorami shuj shuj religiongunamanda parlaj librohuan yachachijurca. Chai libropi testigo de Jehovacunamanda panda yuyaicunata yachachijujtami uyarca. Chaimi manllai manllailla paipa profesorataca, testigo de Jehovacunamanda chai yachachishcacuna imamanda llulla cajta parlachun saquihuai nishpa mañarca. Lucasca paipa cumbacunapa ñaupajpimi paipa crishcacunata parlarca. Shinallata Internetpi jw.org paginatapash ricuchirca. Chaimi pizarronbi dibujashca videocuna nishca partepi Imashinata na macashpa difindirita ushangui nishca videota tucuicuna ricuchunmi profesoraca deberta  mandarca. Lucasca Jehovamanda parlashcamandami cushilla sintirirca.

13. Jarcaicuna ricurijpipash ¿imamandata na desanimarina cangui?

¹³ Espiritual metacunata pactachingapaj esforzarijujpi jarcaicuna ricurijpipash, na desanimarishpami ñaupaman catina cangui (2 Tim. 4:2). Katharina paniguca chaitami rurarca. Paica 17 huatacunata charishpami trabajopi tucuilla cumbacunaman villachi callarirca. Paicunamanda shuj cumbaca tauca viajetami shinllita rimarca. Shinapash Katharina paniguca na manllashpami villachishpa catirca. Paipa ali ejemplota ricushpami Hans shuti jarica ñucanchi publicaciongunata lii callarirca. Chai jipaca Bibliamanda yachajushpami bautizarirca. Katharina paniguca shuj ladopi causangapaj rimandami nimata na yachashca carca. 13 huatacuna jipaca, Hans shuti huauqui tandanajuipi discursota cugrijujta ricushpami Katharina paniguca manllarirca. Trabajopi cumbacunaman villachingapaj esforzarishcamandami Katharina paniguca ninanda cushijurca.

14, 15. a) Shujcuna nijtalla ama rurangapaca ¿imatata yarina cangui? b) Shujcuna nijpilla ama imatapash rurachunga ¿imata ayudanga?

¹⁴ Jehová Diospa ñaupajpi ali ricurichun, espiritual metacunata charichunmi caicamanga jovengunataca ña animashca. Huaquin jovengunaca imatapash rurashpa ali yalinatallami munan. Quiquinbash chashnallata rurachunmi munanga. Espiritual metacunata pactachingapaj munashcata o na munashcatapash quiquinmi paicunaman ricuchina cangui. Shujcuna nijtallaca na ruranachu cangui. Chaipa randica espiritual metacunata pactachingapami esforzarina cangui. Callari parrafopi parlashca chimbapuraita yaripai. Shuj busta japigrijushpaca buspi cajcuna cushilla cajta ricushpallaca na vitsanguimanllu.

¹⁵ Shujcuna nijpilla ama imatapash rurachunga ¿imata ayudanga? Imapash ruraicuna juchapi urmachijta yachashpaca chaicunamanda uchallami caruyana cangui (Prov. 22:3). Shinallata nalicunata rurashpa quiquinllata llaqui apanatami yarina cangui (Gál. 6:7). Shuj huauquipanicuna ayudachun minishtishcataca na cunganachu cangui. Shinami experienciata charij huauquipanicuna, quiquinba taitamamacuna consejajpica na jariyashpa aliman chasquingui (1 Pedro 5:5, 6, liingui).

16. Humilde canaca ¿imamandata minishtirishca can? Shuj experienciata parlapai.

¹⁶ Cunanga Christoph shuti jovenmanda ricupashunchi. Paica humilde caimandami huauquicuna consejajpica aliman uyarca. Bautizarishca jipalla gimnasioman ri callarijpimi shuj jovengunaca paicunahuan pugllachun paita invitarca. Chaitami Christoph jovenga shuj ancianoman parlarca. Chai ancianoca nircami, jipaman ima pasanata ricushpami quiquinllata ali decidina cangui nishpa. Shina parlashca jahuapashmi Christoph jovenga chai jovengunahuan pugllana invitacionda chasquirca. Jipamanga chai pugllai peligroso nali cajtami paillata cuenta japirca. Huaquin ancianocunahuan parlajpimi, Christoph jovendaca Bibliahuan consejarca. Paica ninmi: “Jehová Diosllatami ñucata consejachun huauquicunata cachamushca. Paicunapa consejota chasquina shinlli cajpipash cazurcanimi” nishpa. Huauquicuna consejajpica ¿quiquinga humilde cashcatachu ricuchingui?

17, 18. a) Jovenguna ¿imashina causachunda Jehová Diosca munan? b) Joven cashpallata ¿imatata rurana cangui? Shuj ejemplomanda parlapai.

 ¹⁷ Jehová Diosca cashnami nin: “Chairalla viñai cashpallata cushijuilla. Chairalla viñai cashpallata, cambaj shungu cushijuchun saquilla” nishpa (Ecl. 11:9). Quiquin cushilla causachunmi Jehová Diosca munan. Cai temapica Jehová Dios munashcashna ali decidina, espiritual metacunata pactachina cushilla causachun ayudashcatami ricupashcanchi. Joven cashpallata quiquinba causaipi imata ruranata ali decidishpaca Jehová Dios imashina cuidajta, ayudajta, bendiciajtapashmi quiquinllata ricungui. Bibliapa consejocunapi yuyashpami cai consejota pactachina cangui. Bibliapica ninmi: “Canda Ruraj Diostaca, chairalla viñai cashpallata yaringui” nishpa (Ecl. 12:1).

¹⁸ Siempre jovenllaca na causashunllu. Ashtaca gentecunami joven cashpa nali decisiongunata agllashcamanda, espiritual metacunata na charishcamandaca ninanda llaquirin. Cutin joven cashpallata espiritual metacunata pactachishpaca ña mayoriashpapash cushillami causanga. Shuj ejemplota ricupashun. Mirjana paniguca cushillami sintirin. Paitaca joven cajpillatami Juegos Olímpicos de Invierno nishcapi participachun invitarca. Shinapash tiempo completopi Jehová Diosta sirvinatami paica agllarca. Mirjana paniguca 30 huatacunatami paipa cusagundi tiempo completopi sirvinajun. Paica ninmi: “Famosa tucushpa, autoridadta charishpa, ashtaca culquita ganashpapash cushilla causaitaca na usharinllu. Cutin Jehová Diosta sirvishpa, shuj gentecunapash Jehovata rijsichun ayudashpaca cushillami causarin” nishpa.

19. Espiritual metacunata pactachinaca ¿imashinata ayudan?

¹⁹ Jarcaicuna ricurijpipash Jehová Diosta tucui shunguhuan sirvij jovengunataca felicitanami capanchi. Paicunaca espiritual metacunata pactachingapaj, ashtahuan villachingapaj, cai mundopi ama chapuringapami esforzarishpa causanajun. Quiquinba rurashcacunaca na yangapi quedangachu. Ashtaca huauquipanicunami juyaihuan quiquindaca apoyanga. Quiquinba causaipi Jehová Diospa mandashcacunata pactachishpaca quiquinllatami cushilla causangui.