Nara huañushpallataca ¿imamandata Jesusca Salmo 22:1​pi David nishca shimicunataca nirca?

Jesús ña huañugrijushpaca Mateo 27:46​pi shimicunatami nirca. Paica nircami: “Ñuca Taita Dios, ñuca Taita Dios, ¿imashpata ñucatalla saquinguiyari?” nishpa. Cai shimicunata nishpami Jesusca Salmo 22:1​pi David imata nishcata pactachirca (Mar. 15:34). Cai shimicunata nishpaca Jesús ñana Jehovapi crishcataca na ningapaj munarcachu. Jesusca imamanda pai huañuna cashcata intindimandami huañungapaca dispuesto carca (Mat. 16:21; 20:28). Shinallata pai huañugrijujpipacha Jehová Dios paita ñana ‘cuidagrijujtapash’ alipachami yacharca (Job 1:10). Ña huañugrijujpipash, Jehová Diosta tucuipi cazushcata ricuchichunmi Jehová Diosca Jesustaca huañugrijujpipachaca paitalla saquirca (Mar. 14:35, 36).

Shinaca ¿imamandata Jesusca Salmo 22:1​pi shimicunataca nirca? Jesús imamanda cai shimicunata nishcataca na cabaltapacha yachapanchichu. Shinapash talvez cai cati razongunamandami cashcanga. *

Jesusca cai shimicunata nishpaca paita huañuchichun Jehová Dios napacha jarcanata yachaimandami shina nishcanga. Jesusca tucui gentecunata juchamanda, huañuimanda salvangapami Jehovapa ayuda illaj huañunapacha carca. Jesusca ‘tucuicunamanda huañunapachami’ carca (Heb. 2:9).

Jesusca Salmo enterota gentecuna yarichunmi  Salmo 22​pa huaquin shimicunataca talvez nishcanga. Chai tiempopica judiocunaca tauca Salmocunatami de memoria yachajun carca. Shinaca pipash Salmomanda asha shimicunata nijpica, paicunaca facilmi salmopi imata nishcataca yuyarinlla carca. Jesusca Salmo 22:1​pa shimicunata nishpaca paipa discipulocuna uyashpa Salmo 22 enterota yarichunmi munashca yarin. Salmo 22​pica Jesús huañuna horaspi tauca profeciacuna pactarinatami ricuchijun. Cai profeciacuna Jesuspi pactarijta paipa discipulocuna cuenta japichunmi Jesusca shina nishcanga (Sal. 22:7, 8, 15, 16, 18, 24). Shinallata Salmo 22 tucurinallapi imata nijujta yarichunbashmi shina nishcanga. Chaipica, “Mandanaca, Mandaj Diospajmi” can nijunmi. Cai mandanaca, ‘cai pacha manñacunacamanmi’ canga (Sal. 22:27-31).

David nishca cai shimicunata nishpaca Jesusca talvez pai inocente cashcata ricuchingapami nishcanga. Jesusta nara huañuchishpaca Sanedrinbi mandajcunaca cai runaca Taita Diosmandami llullacunata nishpa purijun nishpami yangata juchachinajurca (Mat. 26:65, 66). Sanedrinbi mandajcunaca Jesustaca tutami juzgarca. Paicunaca ima leycuna tiashcatapash na respetashpami cai juiciotaca rurarca (Mat. 26:59; Mar. 14:56-59). Shinaca Salmo 22:1​pi shimicunata nishpaca, Jesusca pai cai juiciomanda inocente cashcata ricuchingapami nishcanga.

Salmo 22:1​pi shimicunataca Davidmi nirca. Shinapash cai shimicunata nishpaca, pai Jehová Diospa ñaupapi nali cashcata ningapaca na munajurcachu. Talvez caitallata intindichingapami Jesusca cai shimicunataca nishcanga. Davidca Jehová Diospi siempremi tucui shunguhuan crishpa catirca. Cai Salmo 22:1​pi shimicunata nishca jipaca, Davidca Jehová Dios paita sirvijcunata salvanata, cuidanata crishcataca cati versocunapimi ricuchirca (Sal. 22:23, 24, 27). Shinallatami ‘ñaupa taita Davidpaj Churi’ Jesushuanbash pasarca. Jesús racu caspipi llaquinaita sufrijushpaca, pai Jehová Diospa ñaupapi nali caimanda shina sufrijushcataca na ningapaj munajurcachu (Mat. 21:9).

Jehová Dios paita shuj ratota ñana cuidagrijushcata yachaimanda llaquilla sintirishcata ricuchingapapashmi, Jesusca cai shimicunataca nishcanga. Adán y Eva juchata rurashcamandaca Jesús huañunaca minishtirishcapachami carca. Jesús llaquinaita sufrishpa huañuchunga Jehová Diosca na munarcachu. Shinapash Jesús huañushpami Satanás llulla cashcata ricuchi ushana carca. Shinallata gentecunatapash huañuimanda, juchamandapash quishpichi ushana carca (Mar. 8:31; 1 Ped. 2:21-24). Caicunaca Jehová Dios, Jesusta asha ratotalla ñana cuidashpa catijpimi pactarina carca.

Cai shimicunata nishpaca Jesusca paipa catijcuna Jehová Dios imamanda pai racu caspipi huañuchun saquishcata intindichunmi talvez nishcanga. * Jesusca ashtaca gentecunataca pai racu caspipi huarcuria huañunaca shuj nitijachij rumishna cana cashcataca alimi yacharca (1 Cor. 1:23). Jesuspa catijcunaca, Jesús imamanda huañushcata intindishpaca ima pasajushcataca alipachami intindi ushana carca (Gál. 3:13, 14). Caita intindishpami paipa catijcunaca Jesustaca shuj Quishpichijtashna ricui ushana carca, na shuj nali runatashnaca.

Ima razonmanda Jesús cai shimicunata nishca cashpapash, Jesusca racu caspipi huañushpaca Jehová Diospa munaita rurajushcataca seguropachami carca. Chai jipallami paica: “Ñami tucuita pactachircani” nirca (Juan 19:30; Luc. 22:37). Jehová Diosca, Jesús pai cai Alpaman shamushpa imata ruranata pactachi ushachunmi Jesús ña huañugrijujpica paipa ayudataca ñana curca. Shina rurajpimi “Moisés mandashca shimicunapipash, Dios ima nishcata villajcuna villashca shimicunapipash, Salmocunapipash” nishca shimicuna pactarirca (Luc. 24:44).